LWIKHI 21

Grwanya gbreya bɛn yí ase

(Ɔ́n wú Mák 12.41-44)

1Jezwi éha mɛ nɛ́n mɛ́n jɛ́ njɛ, lótɛ ńwu ńmringbilímán jɛtɛn ebhó ká áyánɔn hromɛn si óbɔn Yankan-khúthé kɔphrɛ ha. 2Ńwu bhie grwanya gbreya bɛn lɔ akhwɛn kɔphrɛchí chɛ́-nchɛ́ mɔn ha lóhrómɛn. 3Ló ántɔ sa:

– Mímí mɛɛ́n kranmán hɔ́n: grwanya gbreya lókɔn yí abho kane ɔn, ábanbrɛn néphan nankhɛ khúnbrɛn yí abho. 4Átɛsalé wo krɛnnɛ́n khúnbrɛn lókɔn, wo jɛtɛn aka tho, jɛtɛn khɛ́n wo le nɛn ɔn, lónɔn wo bho kane; khɛ́n gbreya lókɔn-ɛ jɛtɛn abho, mɛ́n gbre jɛtɛn brɛn ńpɛ, khɛ́n achɛ ńma mɛpɔ́, lónɔn ńmo kane.

Jezwi étɔ Yankan-nkhú cá ebhá ca khwá phɔ bhwe

(Ɔ́n wú Mat 24.1-2; Ɔ́n wú Mák 13.1-2)

5Néphan kpɛ́bɛn étɔ Yankan-nkhú phɔ bhwe, ló wo étɔ salé Yankan-nkhú lókɔn yɔn kábrɛ, lóle lónmú mwámwá le áyí okhwɛn ha npha se Yankan ɔ́nmɔn. Lókhɛ́n Jezwi étɔ gbée salé:

6– Ácí ebhá, ló ńmú lókɔn khɛ́n hɔ́n ewú ɔn, brɛ bha le tré lójɔ tho bhrɔ́ɔ́, lókhúnbrɛn bha ca khwálé.

Muswe le ágbrelí

(Ɔ́n wú Mat 24.3-14; Ɔ́n wú Mák 13.3-13)

7Lótɛ wo ébhi nkɛ sa:

– Yíliéwo lóka yábhɛ bɛn nɔn lóyí bha tɛ́ ɛ? Ló saji ébí phɔ nɔn óbha khɔ́ yɛ́n salé áyí ebhá tɛ́ lócí si phu ɛ?

8Ló Jezwi tɔ sa:

– Tɛmɛ ɔ́n hámwanhɛ́n, ló ɔ́n ne yɔ́ hɔ́n bɛn nbrɛn kálé sé néphan okhrɛ hɔ́n. Átɛsalé néphan búdúbúdú bha bhó mɛn hɛ́n hrómɛn bhá, ló wo bhá tɔ sa: “Mɛn nɔn mɛn ni Mesi!” saji, “Ácí lɔ si!” Khɛ́n ɔ́n ne ká wo mɛ́n. 9Lóka ɔ́n ma yé átha le ápasá di ɔ́nmɔn tɔ́, ɔ́n ne sókhú, áyɔn salé lóyí lókɔnhɔn ophrɛ thwási tɛ́; lókhɛ́n áleli salé áthéji bhɔ́ ebhá bhɔ́, thénthé tɛɛ lócí si phu.

10Ló ńcu tɔ sa:

– Aféchwe dɔnbɛn bha gɛ aféchwe lójɔ ɔ́nmɔn kútha, bhringbi bɛn bha ywɛnlí bhringbi lójɔ, 11áyíta bha jika kranmɛn, ló ágotho dɔndɔn, áko bha di, álɔ́ ákúpɛn bha do lóne; saji ábha pɛ áphɔgóyí le áyí khónkhó átrɛ tré bha chántho bhá. 12Khɛ́n chán ɔɔ lóyí lókɔn tɛ́, mɛn hɛ́nthé, wo bhá phrɛ khwɛ́n hɔ́n, wo bhá lri hɔ́n gbre, wo bhá khwɛ́n hɔ́n ló hɛ́nbhúrɛ si lo bhɔ́ hɔ́n kwa, wo bhá há hɔ́n khúthé, ló wo bhá khwɛ́n hɔ́n ló mringbilímán le ákhúbhɛ́-óthemánhɔn ɔ́nmɔn hɛ́nmɛn. 13Lóka lókɔn nɔn ɔ́n ma lí mɛn phɔ ndalefɛ. 14Lóhɛ́nthé, tɛmɛ ɔ́n gɛlé ya, ló hɔ́n si ɔ́n ma khɔ́ tɔ bhwe do hɔ́n nbrɛn ká, lóbhwe ole jan hɔ́n thɛ́n. 15Átɛsalé, mɛɛ́n nbrɛn nɔn mán sé hɔ́n ábhwetɔ́ le ábhweyɛ́n ɔ́nmɔn khɛ́n ábha chɛ́ hɔ́n mɛsamán bha lé gɛ tɔ bhwe há hɔ́n tho. 16Hɔ́n themánhɔn bhwá nbrɛn lɔ, hɔ́n hɔnsɛ́nhɔn, hɔ́n bháthónɛ́n le hɔ́n jɔn ɔ́nmɔn bha khwɛ́n hɔ́n sé néphan, ló wo bhá wɛ́n néphan búdúbúdú hɔ́n hrómɛn. 17Ló mɛn hɛ́nthé, néphan khúnbrɛn bha sa hɔ́n mɛ. 18Khɛ́n hɔ́n hɛ́nyro abha hɔ́n hɛ́nthé, brɛ bha le liá. 19Tɛmɛ ɔ́n gɛlé ya: lósi ɔ́n ma khɔ́ do hɔ́n nbrɛn mɛpɔ́bhá ká nɔn ali lókɔn.

Jezwi étɔ Jeruzalɛ́mɛn bhɔ́ ebhá bhɔ́ bhwe

(Ɔ́n wú Mat 24.15-21; Ɔ́n wú Mák 13.14-19)

20– Lóka ɔ́n ma wú thamán jekhalí Jeruzalɛ́mɛn, lónɔn ɔ́n ma yɛ́n salé lóka nɔn Jeruzalɛ́mɛn ebhá bhɔ́. 21Lóka hromɛn nɔn énɛn salé néphan abha Jude gotho owá ló ńmóbhó tho; wo khɛ́n wo bha Jeruzalɛ́mɛn lɔ, áyɔn salé wo chán lóne féne, wo khɛ́n wo bha lójɛ́ njɛ lɔ, wo lé cu sáji bhá Jeruzalɛ́mɛn khúbhɛ́ hrómɛn. 22Lócí lókɔn nɔn Yankan bha tɛ́ yí khú néphan phɔ, ochɛ́sé Yankan hrɔ́ bhwe khúnbrɛn étɔ, lóyí otɛ́ símɛ́n. 23Ábha lí muswe cí sé lwɛlwɛyá le ńtánbroyá ɔ́nmɔn! Ábha pɛ ábhwephé khrákhrá ákhúbhɛ́ lókɔn hromɛn, ló Yankan bha do thɛ́nyan sé aféchwe lókɔn. 24Óbhá wɛ́n wo khókhríyan mɛn, óbha khwɛ́n wo ɔ́nmɔn ló aféchwe nankhɛ khúbhɛ́ sa ńgangánmán, ló néphan ale yɛn Yankan bha cha Jeruzalɛ́mɛn khúbhɛ́ há yítathé kábrɛ kábrɛ wo lɔ, wo cí bha sí.

Lóka Lephan Mi bha bhá

(Ɔ́n wú Mat 24.29-31; Ɔ́n wú Mák 13.24-27)

25– Ábha pɛ áyí ábha trɛ tré ácɛ́nmɛ, pɛ le pɛmwe ɔ́nmɔn hrómɛn. Ábhwephé khóo bha gɛ aféchwe khúnbrɛn abha áthéji, ló gwe le ńdu phran ɔ́nmɔn bha tɛ́ thɛ́n lí wo. 26Ákhúsó bha wɛ́n néphan, áyí dɔndɔn ebhá tɛ́ áthéji hɛ́nthé, lósi akhɔ tɛ ɔn, átho sɛ́npɛ́ khúnbrɛn bha fa. 27Ló óbha wú Lephan Mi bha bhó sɛ́npɛ́ le nguhá khóo ɔ́nmɔn khɔ́ mɔngú mɔngú hrómɛn bhá. 28Lóka lóyí lókɔnhɔn ebhá tɛ́, ɔ́n fe tho ya, ló ɔ́n je bhwa tho, átɛsalé ácí wo ebhá swa hɔ́n, ágbali phɔ.

Áyílie wo bho thweli fígeyá

(Ɔ́n wú Mat 24.32-35; Ɔ́n wú Mák 13.28-31)

29Lómánji Jezwi bhu yandran lókɔn se wo, ló ńtɔ sa:

– Ɔ́n wú fígeyá le ńyá nánkhɛ ɔ́nmɔn: 30lóka ɔ́n wu wo nbi élu, ɔ́n yɛ́n salé áwá gbali phɔ. 31Lóyábhɛ brɛ, lóka lóyí khúnbrɛn lókɔnhɔn etɛ́ sé ɔ́n wú, ɔ́n yɛ́n salé Yankan Bhringbi khúbhɛ́ gbali phɔ. 32Mímí mɛɛ́n kranmán hɔ́n: néphan aya ncɛ́n, wo khúnbrɛn wo bha le khú lɔ khɛ́n lóyí khúnbrɛn lókɔn bha tɛ́. 33Átho le áthé ɔ́nmɔn bha hɛ́n, khɛ́n mɛn bhwetɔ́-ɛ bha lé hɛ́n bhrɔ́ɔ́.

Lóyí hɛ́nthé khɛ́n énɛn salé oká mɛlé chré

34– Ɔ́n hámwanhɛ́n! Ɔ́n ne dɛn fɛ́thi khólí, ńnɛn khólí, ńdɛ khónán le áthéji mɛpɔ́bhá mwanhɛ́nbhu ɔ́nmɔn olɔ hɔ́n nánnánmi, ochɛ́sé Ákwabhɔ́ cí lókɔn ole ká hɔ́n nta mɛn búbrumɛn, 35sa ńmɛ́ okhu ka a, átɛsalé ábha ká áthéjinɛ́n npasá khúnbrɛn nta mɛn. 36Ɔ́n ne láná, ɔ́n na Yankan ákakhúnbrɛn, ló ɔ́n gɛ sɛ́npɛ́, ochɛ́sé lóyí khúnbrɛn lókɔn khɛ́n ebhá tɛ́, brɛ ole ká hɔ́n tho, ló ɔ́n wúsi khɔ́ thándi ya Lephan Mi hɛ́nmɛn.

37Ńcrɔ́n, Jezwi lie yí Yankan-khúthé; khɛ́n ńjuka anná ábhóbhó óche Olive-nyá bhóbhó tho. 38Ló ńjuju fítaan, néphan khúnbrɛn bhá Yankan-khúthé bha yé mɛ́n bhwe ántɔ.

Atualmente Selecionado:

LWIKHI 21: ENT96

Destaque

Copiar