LWIKHI 20

Jezwi sɛ́npɛ́ si achan

(Ɔ́n wú Mat 21.23-27; Ɔ́n wú Mák 11.27-33)

1Cíbɛn, lóka Jezwi ya Yankan-khúthé élie ápasá yí, khɛ́n ántɔ Ábhwe Bhwábhwá bhwe sé nkɔn, lótɛ nphahamán-óthemánhɔn, bidíyɛ́nmán le mrɔ́khómán ɔ́nmɔn bha, 2ló wo ébhi nkɛ sa:

– Lómɔ́nsi bɛn nɔn ɛgɛ khɛ́n ɛtɛ́ áyí yábhɛ lókɔn ɛ? Saji abɛn se hɛ lómɔ́nsi ɛ? Tɔ obhá!

3Ló Jezwi kranman nkɔn sa:

– Mɛn lɔ, mɛn mán mi hɔ́n bhwe bɛn, ló ɔ́n tɔ sé mɛn: 4yán abɛn chɛ Jan bha ehá néphan nduhɛ́n ɛ, Yankan lée ka néphanmiɔn?

5Khɛ́n wo ya wo thethé talí bhwe, ló wo étɔ sa:

– Kasé lo étɔlé: “Yankan chɛ nkɛ bha”, ánman mi lo lée: “Ló bítɛ khɛ́n ɔ́n ne bhú nkɛ mímí ɛ?” 6Ńthé kasé lo étɔlé: “Néphan chɛ nkɛ bha”, lólɔ, aféchwe bha kúmú dia lo wɛ́n, lósi akhɔ tɛ ɔn, wo khúnbrɛn wo yɛn salé Jan li bhwetɔ́tréwo.

7Lótɛ wo nkɛé:

– Lo le yɛn lephan achɛ ńma anhá néphan nduhɛ́n.

8Ló Jezwi kranman nkɔn sa:

– Mɛn lɔ, ńmɔ́nsi yábhɛ mɛn gɛ khɛ́n mɛn tɛ́ yí khúnbrɛn lókɔn ɔn, mɛn nɛn yɛn.

Divɛn-nyá gɔn júmánmán thɛnyanmán phɔ yandran obhu

(Ɔ́n wú Mat 21.33-46; Ɔ́n wú Mák 12.1-12)

9Lómánji, Jezwi bhu yandran lókɔn se aféchwe pasá ló ńtɔ sa:

– Sɛ bɛn ha divɛn-nyá, ló ńhɔn ha divɛn-nyá gɔn júmánmán dɔnbɛn mɔ́n mɛn, ló ńno hu, khɛ́n ánman mɔ́n lóne kpɛ́bɛn. 10Lóka ádi divɛn mí bhú ka, ńchɛ nɛnkhwɛ́nwo bɛn lo égɛ divɛn-nyá gɔn júmánmán odo mɛ́n nyámí ékɛ bha se. Khɛ́n divɛn-nyá gɔn júmánmán chrwa nɛnkhwɛ́nwo lókɔn, ló wo thu nkɛ hɛ́n ka, ńmo mɔ́nbhíwrɛ́ ɔ́nmɔn no. 11Ábithe nthe chɛ nɛnkhwɛ́nwo nankhɛ cu lo, khɛ́n divɛn-nyá gɔn júmánmán chrwa nkɛ lɔ, wo ta nkɛ, wo thu nkɛ thá, ló wo le se nkɛ yíɛkɛ. 12Ńdɔn bhwaliá hrómɛn, ńcu chɛ nɛnkhwɛ́nwo lójɔ lo. Mɛ́n lókɔn ɔn, wo tɛ nkɛ yí phromɛn phromɛn, ló wo tranman nkɛ. 13Ló ábithe nthe tɔ sa: “Ńthé bí nɔn mán tɛ́ npɔ ɛ? Man chɛ́ mɛn mi khɛ́n mɛn pɔ ló lóne; mɛ́n-ɛ, khɔ wo jí nkɛ o.” 14Khɛ́n divɛn-nyá gɔn júmánmán ka awu nkɛ ɔn, lótɛ wo ya wo hromɛn wo étɔ sa: “Nɛn jalíwo khɛ́n ebhá bhó si cí bɛn o. Ɔ́n ma owɛn, ló divɛn-nyá gɔn osa lí lo ékɛ.” 15Lótɛ wo hɔn nkɛ chan divɛn-nyá gɔn hromɛn thandi lo njɛ-áan, ló wo wɛn nkɛ.

Ló Jezwi bhi sa, ébí nɔn divɛn-nyá gɔn nthe bha tɛ́ júmánmán lókɔn ɛ? 16Ánman má, ánman wɛ́n divɛn-nyá gɔn júmánmán lókɔn, ló ánman hɔ́n divɛn-nyá gɔn há néphan nankhɛ mɔ́n mɛn.

Khɛ́n lóka néphan ye ábhwe lókɔn, ló wo étɔ sa:

– Ole kpá khɔ́ nɛn tɛ́!

17Khɛ́n Jezwi sa mɛ tre nɛn nkɔn ɔɔ, ló ńtɔ sa:

– Yankan hrɔ́ bhwe lókɔn khɛ́n étɔlé:

“Ábhú khɛ́n nkhúthánmán hɔn fɔnká bu,

khɛ́n ajrɛn ńkhú ngrɛmɛ́n bhú khóo,

ábhwe lókɔn ɔn, lóthé li bí.”?

18Lephan khúnbrɛn tɛɛ ábha hálé ábhú lókɔn tho ɔn, ánman wɔyɔ. Lókhɛ́n lephan, kasé ábhú lókɔn halé hɛ tho ɔn, ɛ́bha jrɛn núlu.

La-npho osɔ́n sé ákhúbhɛ́-óthe bhrɔ́khó

(Ɔ́n wú Mat 22.15-22; Ɔ́n wú Mák 12.13-17)

19 Bidíyɛ́nmán le nphahamán-óthemánhɔn ɔ́nmɔn yɛn salé wo phɔ yandran nɔn Jezwi ebhú, lóka lókɔn nɔn wo énɛn wo hɔ́n nkɛ, khɛ́n wo esó aféchwe npasá lɔ. 20Achan lóka lókɔn élo ɔn, wo mɛbhí bha Jezwi phɔ. Lóhɛ́nthé wo chɛ bhwebhómán bha nkɛ phɔ. Wo lókɔn ɔn, wo ebhó wo nbrɛn tɛ́sa néphan mímí apriman, khɛ́n ali néphan ógɛ ji, ochɛ́sé lóka wo bhá bhi Jezwi bhwe ɔn, nkɛ tɔ bhwe tú nkɛ bɛn nbrɛn, ló wo khɔ́ lóphɔ hɔ́n nkɛ sé ákhúbhɛ́-óthemánhɔn, ló ákhúbhɛ́-óthe bhrɔ́khó obhó mɔ́n tré nkɛ tho. 21Lóhɛ́nthé, wo ébhi Jezwi bhwe lókɔn sa:

– Yíliéwo, lo yɛn salé hɛ ɔn, áyí apriman bhwe nɔn ɛ́tɔ, saji lóyí nɔn ɛ́lie. Hɛ, lephan mɛ́n lephan yábhɛ ńni, lóbhwe le tɛ́ hɛ yíɛkɛ. Khɛ́n ábhwe mímí hrómɛn, lósi khɛ́n Yankan énɛn salé lo khɔ́ bhá mɛpɔ́, lóyí cɛ́ɛ́ nɔn ɛ́lie. 22Ńthé tɔ obhá a. Wú lo bidí se mɔ́nsi salé osɔ́n la-npho sé Rɔ́mɛn khúbhɛ́-óthe bhrɔ́khó, lée nka ole sɔ́n se?

23Khɛ́n Jezwi yɛn nkɔn mɛ́ nkɔn ekhú, lótɛ ńkránman nkɔn sa:

24– Ɔ́n mo ngbólú bɛn bha sé mɛn wí a. Ńthé abɛn lephan hɛ́nmɛn le hɛ́nphe ɔ́nmɔn nɔn atre lótho ɛ?

– Ló wo nkɛé, ákhúbhɛ́-óthe bhrɔ́khó ékɛ.

25Lótɛ Jezwi kranman nkɔn sa:

– Kasé áli nɛn o, áyí ali athe bhrɔ́khó yí, ɔ́n mó sé athe bhrɔ́khó, ló áyí ali Yankan yí, ɔ́n mó sé Yankan.

26Jezwi bhwe étɔ aféchwe pasá hɛ́nmɛn, wo le gɛ ápɔnlí bhwe brɛ lóhrómɛn. Khɛ́n ló atɛ nɔn ali salé, mɛ́n bhwetɔ́ etán wo hɛ́nmɛn kpɛ́ɛ́n, áchɛ́se wo temélé thíí.

Ákhúnɔn mɛn chánfe, lóphɔ bhwe bɛn néphan ébhi

(Ɔ́n wú Mat 22.23-33; Ɔ́n wú Mák 12.18-27)

27 Sadusenɛ́n kpɛ́bɛn bha Jezwi yé. (Wo lókɔn, wo nɔn wo étɔlé mɔngumán bha lé gɛ chán khúnɔn mɛn fe.) Ló wo bhwe wo étɔ sé Jezwi 28nɔn ali sa:

– Yíliéwo, Moyízi bidí bɛn aha hrɔ́ mɛn se lo nɔn ali salé: “Kasé hɛ hɔnsɛ́n phɛn bhie, ńnɛn ho miɔ́ khɛ́n ńkhu, áyɔn salé ɛbhó mɛ́n bhia grwanya lókɔn phɛ́n, ló hɛ le mɛ́n ɔ́nmɔn ɔ́n hó miɔ́ tré hɛ hɔnsɛ́n akhu phɛ́nmɛ́n.” 29Ácí abha hɛn, hɔnsɛ́nhɔn khwache dɔnbɛn bháne. Sithwáwo phɛn bhie, mɛ́n le nkɛ ɔ́nmɔn wo le ho miɔ́ lɔ khɛ́n ńkhu. 30Hɔnsɛ́n adɔngba phɛn mɛ́n bhia grwanya, khɛ́n mɛ́n le nkɛ ɔ́nmɔn wo le ho miɔ́, 31hɔnsɛ́n asi bhwaliá hrómɛn, mɛ́n lɔ lóyábhɛ brɛ, kábrɛ kábrɛ ápi wo hɛ́n khwache, khɛ́n wo khúnbrɛn wo khu. 32Lómánji, bhie lɔ khu. 33Ńthé lóka mɔngumán bha chán khúnɔn mɛn fe, hɔnsɛ́nhɔn hɛ́n khwache lókɔn hromɛn ɔn, abɛn nɔn bhie lókɔn bha lí mɛ́n bhia ɛ? Khɔ́ wo khúnbrɛn wo phɛn bhie lókɔn dilé!

34Ló Jezwi kranman nkɔn sa:

– Thénthé khúbhɛ́nɛ́n, ńsɛ le ńmie ɔ́nmɔn gɛ phɛ́n, 35lókhɛ́n ńsɛ le ńmie ɔ́nmɔn a, ógɛ tɔlé ali néphan apriman khɛ́n ágɛ chán khúnɔn mɛn fe ácí abha hɛ́nmɛn ebhá ɔn, wo lé gɛ phɛ́n npɔhɔ́n. 36Átɛsalé wo bha lé cu khú, wo tɛsa Yankan-mranchɛ́mán. Wo li Yankan miɔn, átɛsalé wo saji bha mɛpɔ́. 37Moyízi étɔ gbée salé mɔngumán bha chán khúnɔn mɛn fe. Yankan hrɔ́ phɛ́nta si étɔ áyápɔ́ bhri ethɔ́ntɛn bhwe ɔn, lóne ánche Hwánthe “Ábrahámɛn, Izakhi le Jakɔ́phu ɔ́nmɔn Yankan.” 38Yankan li néphan abha mɛpɔ́ Yankan, lókhɛ́n ńnɛn ni néphan akhu wo Yankan; átɛsalé mɛ́n hɛ́nthé nɔn wo khúnbrɛn wo bha mɛpɔ́.

39Lótɛ, bidíyɛ́nmán mɔ́nbɛn bho bhwetɔ́, ló wo étɔ sa:

– Yíliéwo, lóbhwe brɛn nɔn ɛtɔ o.

40Ló álepɛ lephan khɛ́n ácu gɛ bhi nkɛ bhwe npɔhɔ́n.

Mesi le Davi ɔ́nmɔn

(Ɔ́n wú Mat 22.41-46; Ɔ́n wú Mák 12.35-37)

41Ló Jezwi bhi nkɔn sa:

– Kalósi ógɛ khɔ́ tɔ salé Mesi li Davi njibhi e? 42Khɔ́ Davi nbrɛn-ɛ nɔn étɔ Sómu hrɔ́ hrómɛn gbée salé:

“Hwánthe Yankan tɔ se mɛn Hwánthe sa:

Bha chré mɛn liémɔn si,

43kábrɛ kábrɛ, odi lóka mɛn khwɛ́n hɛ mɛsamán

tɛ́sa hɛ yákhru ɛkhwɛ́n hɛ nta tré lótho.”

44Khɔ́ Davi nbrɛn-ɛ nɔn éche nkɛ Hwánthe, ló kalósi Mesi bha gɛ khɔ́ lí mɛ́n jibhi e?

Jezwi étɔlé ohá mwanhɛ́n bidíyɛ́nmán yítɛ́ phɔ

(Ɔ́n wú Mat 23.1-36; Ɔ́n wú Mák 12.38-40)

45Lóka ápasá ya eyé Jezwi bhwe étɔ, lótɛ ńkránman mɛ́n yíchwɛmán sa:

46– Ɔ́n há hɔ́n nbrɛn mwanhɛ́n bidíyɛ́nmán yítɛ́ phɔ, wo pɔ ntráliɛ́ thóntho osɔ́ ya khali, ló ábhácathé, wo énɛn salé néphan obhɔ́ wo yí ájí mɛn. Hɛ́nbhúrɛ si, ńyákhru akhwa hɛ́nmɛn ɔn, lótho khɛ́n wo chré, ló ńnɛn mɛ́n lɔ, ási mímí khɛ́n wo énɛn wo chré. 47Wó phiɔ grwanyá mɔ́n mɛn khwɛ́n nkɔn yí khúnbrɛn nkɔn pɛ, lótɛ khɛ́n lóka yábhɛ nɔn wó la Yankan thotho khóo, ló olie salé wo li néphan mímí. Khɛ́n óbha bhɔ́ wo kwa ńmɛ́n khrákhrá mɛn!

Atualmente Selecionado:

LWIKHI 20: ENT96

Destaque

Copiar