Matayo 10

Anyautumwa Ikumi na Vavëë

(Mrk 3:13-19; Luk 6:12-16)

1Na mweeso agavaëtaana kunë mweeso atumami vakwe ikumi navëë na agavafa veeso udaho gunto a vinyonyinyonyi në vivë, na uvijuncha, na uforya mu gërue nanë mu ulegheku. 2Na, mina a anyautumwa vasaa ikumi na vavëë uu chaaya; wa mwandyo unë Simoni nëugutaanwaa Petero, na Anderea muunaakwe, Yakobo mwana amwa Sebedayo, na Yohana muunaakwe, 3Filipo na Baritolomayo, Toma na Matayo nënaa munya ukhomboisya, Yakobo mwana amwa Alifayo, na Tadayo, 4Simoni Mukanaani na Yuda Isikariotë nënaa agamutoneera Yesu.

Yesu uguvatuma atumami ikumi na vavëë

(Mrk 6:7-13; Luk 9:1-6)

5Yesu agavatuma vasaa ikumi na vavëë na uvafa maraghëëyo ayaa: “Mutaje mwende gwa antu va antu va Ndughu ingëja, na mutaje mwingie mu miji a Asamaria. 6Ëgweeso endi gwa antu va Isiraeli nëvayaghee mwino nkhoo nëyayaghee. 7Nëmwinjë tanantyi vii: ‘Utemi wa girunde wahumbeeraa.’ 8Fori arue, fëtyi akuyi, eryi anya matana, funyi vinyonyinyonyi. Mwafewa ndende, duyi ndeende. 9Mutahore mu mpinda yanyu sahabu, mba hela mumakundo amasaa anyu. 10Mutahoreeye ubene wa muhënjo mbesa nkhaanju ivëë, mbesa maatu, mbesa mwaanga. Gusoko munyautenda mwëmo imunoneye afewe ilëwa rakwe. 11Nëmwingëa mu muji gëkaku mba gëjiji, fenji faafo muntu nëugudaha umughenyifa, na ëkhai na mweeso faka fana mujeutungwëëya ufuma faafo. 12Nëmwaagingëa mukhaya varamuchi aghonjo vayo. 13Nëaghonjo akhaya ësëë varumëëya mwino mwaaramuchaa, uvii, majëghana anyu ëgikhaa itambëëmwe na veeso. Ëgweeso nëvadea urumëëya, uvii majëghana anyu ëgumusëkëa nyenye aghonjo. 14Nësa muntu gëkaku uguhita umughenyifa mbesa umutegheeya, uvii, nëmwadua mukhaya ësëë mba umuji wasuu, kununti ukungu nëugutendeka urifo u mighuu anyu. 15Tutë namwëëra itiku ra uramui muji wasuu uje ukhuvëchwa nanguu ukëra mwino naaëgatendwa miji a Sodoma na Gomora.

Ula mantu antu

(Mrk 13:9-13; Luk 21:12-17)

16“Itungwee, nëë ngumutuma nyee mwino nkhoo mukhatë a mbughi. Tendeki mwina mahaa mwino njoka, na mutimanyie mwino nkurwë. 17Ighoji na antu gusoko vëumutoa nyee umabarasa na umukhuva makhotya mumasinagogi awe. 18Muutowa usonge a atemi na atemi në aküü gusoko ane mudahe utanantya Sayu Njija kunë veeso na antu nëti Ayahudi. 19Uvii, nëvamutoa nyee umabarasa tajee muhange wisaghasaghëi muurëghëtya ntuni mbesa wurë, itungo nërafika muufewa roorëghëtya. 20Gusoko ti nyee nëmujeurëgheetya uu Mwahu wamwa Tata wanyu nëugurëghëtya mukhatë anyu. 21Muntu ugumutoneera muunaakwe auraghwe, na tata ugumutoneera mwanakwe, ang'ënya noo vëuvakenkëa mafënë afafi vawe na uvauragha. 22Antu voong'e vëumuhura nyee gusoko a rina ranë. Ëgweeso wasuu nëugughëmëëya faka mpeo ugutueka. 23Antu nëvamula nyee mantu mu muji rumwe iruki endi umuji ungëja. Tutë nene ngumukhanëa, mutiumarëya umëendeenda miji oong'e a Isiraeli nëkëë MwanaMuntu inasuka.

24“Musëywi ti müküü nanguu ukëra musëyi wakwe, na mbesa mutumami ti müküü nanguu ukëra müküü wakwe. 25Ikhondekie gwa musëyi utendeka mwino musëywi wakwe, na mutumwa utendeka mwino müküü wakwe. Nësa vëumutaana müküü wa nyumba Beelisebuli#10:25 Beelisebuli: Rina rëngëja në Setani. wurë vëuvataana antu vangëja va munyumba ësëë mina mavë nanguu.

Nëunoneye googhofwa

(Luk 12:4-7)

26“Uvii, mutavaoghofee antu vasaa. Mu rësëë nërëkunëkëwe rëukunukuwa, na mu rësëë nërëfihiwe rëudwëëywa mu weru. 27Nëngumukhanëa nyee mukiti, rërighetie mu weru, na intu nërëgifwefweheerwa rëtanantyi gunji. 28Mutavooghofee vasaa nëvëguuragha mwëërë ëgweeso vëtiudaha umëuragha nkhoo. Bahu nanguu umwooghofa wasuu nëudahite uwuragha mwëërë itambëëmwe na nkhoo mu moto wa uJehanamu. 29Soro vavëë vëurinjwaa gwa ughuri unyughu. Ëgweeso mbesa umwe wawe atiugwaa fang'ë në Tata wanyu inahanya. 30Gweeso, gwa uvaru wanyu, mbesa ntuka ya umatwe anyu ivariywe yoong'e. 31Uvii, mutaoghofee, nyenye mwë vaja nanguu ukëra vaa soro vingë.

Umusudangëa na Umukhana Kiristo

(Luk 12:8-9)

32“Mu muntu nëwansudangëa gwa antu mwino mweeso uu nëwanë, nënënoo ngumusudangëa mweeso usonge amwa Tata wanë në wë girunde. 33Ëgweeso gëkaku muntu nëwankhana gwa antu, nëënoo ngumukhana mweeso usonge amwa Tata wanë nëwëëgirunde.

Wifaghati

(Luk 12:51-53; 14:26-27)

34“Mutasëghee mwino najie gweeta majëghana muurëmi. Ntinajaa gweeta, majëghana ëgweeso fëta. 35Gusoko najie gweeta wifaghati mukhatë a muntu na tata wakwe, mukhatë a muncha na yiu wakwe, mukhatë a mukhwe na mukhweakwe. 36Na arughu a muntu unë antu va mukhaakwe.

37“Nëumwanjëte tata mbesa yiu wakwe nanguu ukëra mwino unyanjëta nee, atinoneye kunë nee. Nëumwanjëte mwana mbesa muncha nanguu ukëra nene atinoneye kunë nee. 38Muntu nëwadëa ukhasëka gusoko ane na ung'onga nene, atinoneye kunë nee. 39Mweeso unë uguwuhanga ufanga wakwe uguwuyaghaya, na mweeso unë uguwuyaghaya ufanga wakwe gusoko ane uguwughanga.

Gëfewa

(Mrk 9:41)

40“Nëugumugenyifa nyee, ugung'enyifa nene na nëugung'enyifa nene, ugumugenyifa wasuu nëwantumie. 41Nëugumughenyifa munyagëdaghu gusoko unë munyagëdaghu, uguhanga gënyamwëëmo gamwa munyagëdaghu. Nëugumughenyifa muntu në muja gusoko unë muntu në muja, uguhanga gëfewa ga muntu në muja. 42Tutë nene ngumwëëra nyenye, muntu gëkaku nëugumufa umwe wa anyuughuu avaa gakuu ga majë nëmariuku gusoko unë ung'ongie nee, atiuwurya mbanduvë uhanga gëfewa gakwe.”

Atualmente Selecionado:

Matayo 10: RNT

Destaque

Copiar