Genesi 15
15
Gitumbiso ni pwanano wa Nungungulu ni Abrama
1Hwane nya satshavbo sesi, Pfhumu Nungungulu a di wonega ga Abrama a mu embela, khuye: “U nga thavi Abrama. Eni kheni Muvhikeli wago; u na hakha tshatshazelo nya yikhongolo ngudzu.”
2Khavbo avbo, Abrama a di hakha, khuye: “Pfhumu Nungungulu wangu, ginani U na nyi ningago, olu nyi nafago nyambana sanana, Eliyezeri, givelegwa gya Dhamasiko khuye a na khalago mune ndranga yangu.” 3Abrama a di engedza gambe, khuye: “U ngu dziti gwadi gukhuwe khwa nyi ninga sanana, ni gu khuwe githumi gi velegidwego ndrangani gwangu khigyo gi na khalago muhodzi nya thomba yangu.”
4 Pfhumu Nungungulu a di phindrula, khuye: “Khandruye oyu a na gu khalago muhodzi nya thomba yago. Aholu, gyanana gyago nya gu gi velege khigyo gi na gu khalago muhodzi nya thomba yago.” 5#Wona gambe: Rom 4:18; Hebh 11:12. Nungungulu a di ruma Abrama gu duga vbavbandze nya nyumba, a mu embela, khuye: “Khusa maho yago u khedzisa vbatshani damboni, wona mwendro u ngu dzi khodza gu saya tengo nya dzinyeledzi. Khidzo wu na bani wuri idzo sayo nya situgulwana nya livelego lago.”
6 # Wona gambe: Rom 4:3; Gal 3:6; Jak 2:23. Abrama a di khodwa ga Pfhumu Nungungulu, khu kota nya gukodwe gwaye, Nungungulu a di mu wona nari muthu a lulamidego.
7 Pfhumu Nungungulu a di mu embela, khuye: “Eni kheni Pfhumu Nungungulu. Kheni nyi nga gu dusa khu dhoropani ga Uri, tigoni gwa Vakalidhiya, nyi fela guta gu ninga litigo leli li khala thomba yago.”
8Abrama a di wudzisa, khuye: “Pfhumu Nungungulu nyi na dziti kharini gukheni litigo leli li na khala thomba yangu khu lisine?”
9 Pfhumu Nungungulu a di mu hakha, khuye: “Nyi resele gimombyana nya nyamayi, phongo nya nyamayi ni nvutana; satshavbo nya myaga miraru nya guvelegwe. U resa gambe lituva ni gipomba.”
10Abrama a di ya dzega sirengo soso satshavbo, a si hapfha, a si kabanisa khu vbakari, a gu vega gipandre ni gipandre mbeli ga gikwawe; aholu, sinyoni basi khiso a ngamba si kabanisa khu vbakari. 11Makoti ma di tshigela dzinyama dzile nya sirengo nya gufe, aholu Abrama a di gu ma gusela.
12Gupfolani nya lidambo, Abrama a di wongomedwa khu ligovbe nya likhongolo, a tala khu hwanga, a dzipwa na fenengedzidwe khu gidema nya guthise. 13Khavbo avbo, Pfhumu Nungungulu a di mu embela, khuye: “Khala nu gu dziti gukhuwe situgulwana nya livelego lago si na vbanya kha nga vawuyi tigoni nya valombo, li si gu lawe. Va na khoziswa va gu girwa dzikhumbi, va tshonigiswa gipimo nya mazana mana myaga. 14#Wona gambe: Eks 1:1-14; 12:40-41; Mith 7:6-7. Aholu, Eni mune furi nyi na tsayisa litigo li na gu va girago dzikhumbi. Khu guhegisa, va na duga ni wufumu nya gutale ngudzu. 15Gasi uwe, hwane nya gu nu vbanyide myaga nya gulaphe, u nafa nu tangade, u naya hefemula gurulani gumogo ni vababe vago. 16Ga melana nya wu na, situgulwana sago si na wuya gambe tigoni momu. Kholu Vaamori va si gu tadzisi pimo nya sihoso sawe va kodza gu hakha tsayiso wu va fanelago.”
17Na li pfode lidambo, gu manega gidema nya gikhongolo, wu di wonega wutshi ni nilo na wu gu vbindra khu vbakari ni vbakari nya sirengo sile si nga piledwago. 18#Wona gambe: Mith 7:5. Litshigu lolo la limwedo, Pfhumu Nungungulu a di gira pwanano ni Abrama, khuye: “Nyi ngu ninga litigo leli sanana sago, gukhugela Egipito kala tsongoni nya wukhongolo wa Ewufrate. 19Nyi na va ninga litigo la Vakeni, la Vakenezi, la Vakademoni, 20la Vahiti, la Vaferezi, la Varefayime 21la Vaamori, la Vakhanani, la Vagiregesi ni la Vajebhusi.”
Atualmente Selecionado:
Genesi 15: BGE2014
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
A Bíblia em Gitonga © Bible Society in Mozambique, 2014.
