MATÌÙT 18
18
Yesùt agoromì nen, “Kain he, hat nogo? An o,” ìgìk inane sagalhukwa wene
(Mrk.9:33-37; Luk.9:46-48)
1Atì sat he, at Yesùt agoromì ane wanhì lagaukwa mene amanogo oba wagaukwasik he, mel yogosukwa:
“Ala awe a'ma hisikere'ma atoma, kain etagewerek he, sa logogin,” ìlùk yogosukwa. 2Atì'nogo yogosukwama re, at en yekerek magakelak mene aike waesikomo oba wagaikomo re, it amanogo inekele'ma menhìkì logolìk he, 3mel yogoisasike:
“Hit apùnì yì re, hinepe hebelarìk hinoabùt yekerùgì yì inoabùt hake haga'lasugun lek halok he, Ala nen awe a'ma hisikere'ma atoma kugun motok lek o, ìlùk eberogoat yogohisìgì. 4Sa nen,
An mea mene, ìlùk oabùt yekerek yì oabùt hake etaùken okawerek en sebethakìlìk seberogo logogin halok he, at atì Ala awe a'ma hisikere'ma atoma kain etagewerek logogin o. 5Nen, sa nen yekerek yì hake an hesik wanhe halok he, an nebeat wo'nabigin o,” ìlùk yogoisasike.
Apùnì nen it aike weak hagasuagalùk ina'la kagalharek wene
(Mrk.9:42-48; Luk.17:1-2)
6Atì'nogo yogoisasikesik he, aike mel yogoisasike:
“Sa nen yekerùgì magatek yì hake aike etaùken an noba hipirìk were'ma kopologo herakhanuagalùk a'la kagaligin oba an kopologo herakhanhe halok, at a'la kagalhewerek atì helep hùko mene alokopma hele kelogo re, i laut yekele'ma tùlem atoma temuk hogo pelaksamo i lelepma re, hano o. 7It apùnì kweang'ma mene yoma, it aike nen an kopologo herakhanuagalùk ina'la kagalumo motok weak asugun atì nen, netawì lak e. An kopologo herakhanuagalùk ina'la kagalhì logogun meneat he, it ina'la kagalugunwerek atì Ala nen motok weagarinabigin werek o. 8Hineki nen a? Hinesok en a, weagathinabusak haga'laga halok he, o'moko palogo laksìlìk, o'moko nek logolìk, ineluk motok logogunmo atoma kumo hano o. Mene re, hineki hinesok atì wùrat were'ma etu nogoilasusak le'ma atoma lakhikamo weak o. Halok he, o'moko palogo laksano. 9Nen, hineileken nen weagathinabusak haga'laga halok he, o'moko hemelogo laksìlìk, hineileken o'moko nek logolìk ineluk motok logogunmo atoma kumo hano. Hineileken warat were'ma etumo lakhikamo weak o. Halok, o'moko hemelogo laksano,” ìlùk yogoisasike.
Topa wam nalarì'mo herasusak ìlùk oba lìrogo yogoisasike wene
(Luk.15:3-7)
10Atì'nogo yogoisasikesik he, aike mel yogoisasike:
“Malaikat Ala nen pogot oba nen yoko pelaksa wagarek mene nen yekerùgì yì hake serisek logolìk nopase eilhanem motok welagaikarek atì nen he, yekerùgì atì hina'la meatsagùp o. [11An abat ta'lasi wagagi a'nogo re, apùnì nong arì'lùgì mene atì heragasogo telinabigìlùk wagagi o.] 12Hina'la nìkì'nogo akegep. Ap aike ako topa wam ebe 100 nen were'ma, 99 enek ùkùl oba lagalìk hano werek kolek, omakeat aike kwe nong arìk he, nalasi laga halok hobuk herasi lasak lek nogo? Herasi lasagat o. 13Ap atì ako arat herakìlìk en he, 99 welagaika mene atì hesik he, a'la hai mea negen hakasak meneat he, omakeat nalasi laga mene atì ebe herakìlìk enek he, a'la motok hai apik hakasak o, ìlùk eberogoat yogohisìgì. 14Atì hak he, hinopase pogot oba mene a'nogo nen he.
Yekerùgì magatek atì hake omakeat aike nalasi lasak he, motok abìt o, ìlùk akikerek,” ìlùk yogoisasike.
Inerùgì inagaiya'lak weak hagarinapenem inasuk wasusak wene
15At Yesùt en atì'nogo yogoisasikesik he, aike mel yogoisasike:
“Hat aike herei hagaiyak aike nen weak hagathape halok he, hat at oba lìlìk heperak hinaligat logolìk he,
Atì'nogo hagasusak lek o, ìlùk pak hogoat asuk wa'no. Atì'nogo watenem, asuk holhe halok he, sagalogo heperak hano asusak. 16#Ul.19:15 Meneat he, asuk holhì'lek halok he, mel hagasusak. Ala ane helal waganogo hìkì logolìk he,
Apùnì nen it aike ùkùm inoba houogolùk halok, apùnì aike inebe pìre he a? Hìnagan he a, weak hagatenem ineileken haga mene nen, Eberogoat nineileken hogo, ìlùk iko halok eberogoat akasak,
ìlùk isikomo helal waganogo hesukwa atì nen he, apùnì inebe pìre he a? Hìnagan he a, inayoko hìlìk hinom oba lane. 17Lamo re, it atì inane asuk holhì'legat halok he, Ala againapùrì inebe atogorek were'ma yogoisano. Yogoisamo re, it Ala againapùrì inebe obogat amanogo inane asuk holhì'legat halok he, at atì hinerei hinagaiyak meneat he, it uang pemerintah hesik kìno ìlìk wanharek mene inabìt mene hake eta'ma mene haga'laga o, ìlùk akano,” ìlùk yogoisasike.
Ala ikerek hagat, wene palhìk, hano ìgìk, egarek wene
18At Yesùt en atì'nogo yogoisasikesik he, aike mel yogoisasike:
“Wene aike yì yogohisak. Hit en he, kweangma yoma mene hesik,
Atì'nogo hagasusak lek, ìlùk wene palhep halok he, Ala pogot oba mene nen wene palhe hagat ugun o. Nen, hit en he, kweangma yoma mene hesik,
Atì'nogo hagasusak he, hano, ìlùk egep halok he, atì Ala pogot oba mene nen hano ike hagat ugun o.”
19-20“Nen, wene aike yì yogohisak. Hit hinebe pìre a? Hìnagan a, an netage ba atogosugun halok he, an nebe hinekele'ma atoma logogin atì nen he, hit hinebe pìreinagùn nen kweangma yoma logolìk, hinetaùken omakeat arìk, hit en,
Aike wo'nisan, ìlùk, we, nena mene Ala kìno yogosugun halok he, kìno ugun mene atì, an nopase pogot oba mene nen hinane asuk holìk he, wokhisegeinat o,” ìlùk yogoisasike.
“Weak hagathinapenem sagalogo heraksìkì logousak,” ìlùk yogoisasike wene
21At Yesùt en atì'nogo yogoisasikomo re, at Peterùt oba wagaikesik he, mel yogosike:
“Noe. An nagaiyak aike nen weaga'nape halok he, wene atì eken hìgì'lek he, neki mìren oba sagalogo legetsasak nogo. Hùlì neki 7 ba nen sagalogo legetsasagat a? Mea a,” ìlùk yogosikomo, 22at Yesùt en he,
“Heki 7 ba nek sagalogo legetsamo motok mea o. We, apùnì inebe 70 ineki 7 ba lopok asi waga halok he, sagalogo legetsìkì logousagat o. 23Atì hake re, Ala nen awe a'ma hisikere'ma atoma eperak higit he, ap kain etagepogot aike agarok agoromì nen hesogo welagaukwa mene waisasike. An enek sabùrogo hanhama a? It aike inoba palek werek a, ìlùk eki wenasigìlùk waisasikomo wagaukwama re, 24agarok amanogo eki wenatenem he, agoromì amanogo aike uang juta motok apik oba palek welagaike mene oba wolok Wagaukwa. 25Wolok waganem, hìthasike mene, at en oko wogosusak he, mea agaikomo re, at ap kain a'nogo nen agoromì he'nakìt mel yogoisasike:
Ap yì ebe mel, agwe mel, againapùrì mel, agarok yì men tì mene mel, motok heleleng hogo oko abarìk he, oko e wanugun mene atì an wo'nesi we'no, ìlùk yogoisasike. 26Atì'nogo yogoisikenem, at agot a'nogo nen eitep awì yagasogo hai watì logolìk he, mel yogosike:
Noe. Hetawì nììlìk he, eil omakeat logoino. Motok wokhesiginat o, ìlùk yogosikomo re, 27at kain a'nogo nen, at agot a'nogo etawì agaikesik he,
Halok he, an nagarok hat hoba palek mene atì welegat a'no. Heraksìgì, ìlùk wene sagalogo legetsìlìk lakhesike. 28Atì'nogo lakhesikomo re, at agot a'nogo olilu wùlìpike hak he, at agaiyak ap kain a'nogo agot aike, at wùlìpike a'nogo auang 1.000 mene hamùlùgat wogosike mene oba palek were'ma eperak api agaukwa. Apì agaukwasik ebe hakhìlìk he, alokop perelogo hesogo logolìk,
Nagarok hoba palek werek a'nogo oko wo'nom, ìlùk yogosikomo re, 29at agaiyak a'nogo awe a'ma soma ìlìk hai watì logolìk he,
Nagaiyak e. Netawì nììlìk eil omakeat logoino. Wokhesiginat o, ìlùk yogosike meneat he, 30agaiyak a'nogo nen,
Nabìt o, ìlùk ap atì oba palek mene oko oan wogotì'lek werek kolek, ap ineki hele warogo hisagarek mene nen o ineki hele warek hisagarek oba kelakhìlìk logouagalùk wogisasike. 31Atì'nogo hagatenem, ap kelakhesike mene atì agaiya'lak he'nakìt en ineileken hasukwasik ina'la motok weak agaikesik, it en hobuk yoko ap kain a'nogo wene obogat yogosi wagaukwa. 32Yogosi wagaukwama re, ap kain a'nogo nen ap atì wesuagalùk isikomo, wagaikomo re, mel yogosike:
Hat hoabùt motok weak yì rì! An nagarok hat hoba palek welaga mene re, hat hane helageik ane yogonetì lagenma,
Welegat a'no, ìlùk yogohetì akìgì. 33Meneat he, an hat netawìthapì atì hak, hat atì'nogoat hagaiyak atì hetawìrara'len he, ìlùk yogosikesik, 34a'mage nen he, ap a'nogo oba palek mene obogat heleleng hogo wogotìlek werek kolek he, it ap ineki hele warek hagisek welagaikarek mene amanogo nen tùgì watì logolìk hesogo logouagalùk wogisasike. 35Atì hagat, hit hinerùgì hinagaiya'lak en weagathinabì'lùgì mene atì hinetaùken nenat sagalogo legetsìgì'lek halok he, an nopase pogot oba mene nen atì'nogo hagathinabiginat o,” ìlùk yogoisasike.
Atualmente Selecionado:
MATÌÙT 18: LAIDNI
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
