MATÌÙT 17

Yesùt tom oba lagalìk were'ma elokoken hùnogoat haga'lagaike wene

(Mrk.9:2-13; Luk.9:28-36)

1At Yesùt en atì'nogo yogoisasikesik he, nogo ineki 6 ìlùk en, Peterùt mel, Yakobùt mel, agot Yohanet eperagat mel, inaligat wogisek tom uan aike ba lagasike. 2Lagasikesik were'ma, at ebe it ineilhanem, hùnogoat haga'laga logolìk he, elokoken mo eil hake haga'lagìk, asu laberek mene kut motok amùlìt apik haga'lagìk, isike. 3Atì'nogo haga'laganem, at agoromì aremnogo nen ineileken lakhasukwa re, Musa mel, Elia mel, weinam agaukwasik Yesùt inom weneane ikenem isasukwa. 4Atì'nogo isasukwasik he, at Peterùt en Yesùt mel yogosike:

“Noe. Nit o yoma hano welago hìgì. Hat en elok akegen halok he, yoma o sabu hìnagan, hat hesik aike, Musa hesik aike, Elia hesik aike, wùthikegein o,” ìlùk yogosike. 5Atì'nogo yogotenem aremnogoat, ohena kut mene sebelinabi wagaikesik, Ala ane ohena a'nogo a'la nen mel yogoisasike:

“An naput netaùken hutìk mene. At hesik na'la hai hakìgìrek o. Halok, at ane holek logoino o,” ìlùk yogoisasikomo, 6Yesùt agoromì inom lagasukwa mene amanogo inasuk holhukwasik, inayùk en he, ineitep awì yagasogo inelokwe kweangma sogoum ìlìk were'ma 7at Yesùt inoba wagaikesik he, inebe eki hakìkì logolìk he,

“Hinayù'lek hogo mela'ni o,” ìlùk yogoisasikomo, 8inot le'larìk ineileken hìthasukwa re, it aike inom lek. We, at Yesùt aligat enek were'ma hasukwa.

9Atì'nogo haga'lùk he, tom oba a'nogo nen pi waga logolìk, at Yesùt en mel yogoisasike:

“An abat ta'lasi wagagi a'nogo re, nebe noatenem wa'larìk were'ma, Ala nen nelugu'napì'lek werek kolek, an haga'laganem hineileken neegep a'nogo apùnì aike motok yogoisagùp o. We, hobuk Ala nen nelugu'nape halok en, yogoisasak o,” ìlùk inasuk warìk warìk pi wagaike. 10Inasuk wasikomo, it agoromì amanogo nen he, mel yogosukwa:

“Halok he, it ap Ala ane helal waganek esewerek mene amanogo nen he,

Elia tak wesigin, ìlìk ìlì'lùgì atì nìkì'nogo nen,” ìlùk hinok wanhukwama, 11at en he, mel yogoisasike:

“Elia tak wìrìk he, at en yì hagatìk, tì hagatìk, tegeli wesigin, ìlì'lùgì atì, eberogoat meneat he, 12an wene eberogoat yogohisak. At Elia ebe arat wagaike meneat he, it apùnì nen motok hùthìgì'lek wongothìkì logolìk he, atì'nogo hagasu walok en, at ebe weagathesukwa hagat, an abat ta'lasi wagagi a'nogo re, nebe atì'nogo weaga'nabugunat o,” ìlùk yogoisasikomo re, 13it agoromì amanogo nen he, mel isukwa:

“Atì, at Yohanet ima pegalinapì lagaike mene a'nogo hesik yogonisike o,” ìlùk hùthasukwa.

Yesùt en mokareke oabùt weak mene yekerek aike a'la kìlìk were'ma henogo wulapike wene

(Mrk.9:14-29; Luk.9:37-43)

14Atì'nogo haga'lùk he, apùnì apik amanogo inoba pi wagaukwama re, ap aike Yesùt oba wagaikesik he, awe a'ma eitep awì yagasogo hai watì logolìk he, mel yogosike:

15“Noe. An naput yì hetawìrasin o. Eil hùrùk hìkì logolìk, ebe wa'lagìk, eluk agìk, hagatì logolìk, ninhùp-nanhùbat etumo kìgìk, i lagìk, ìkì logolìk weak motok welagarek atì nen he, 16hat hagoromì hane wanì'lùgì mene inoba wolok wagì meneat he, it en hagasusak he, mea aga,” ìlùk yogosike. 17Atì'nogo yogosikomo, at Yesùt en he, mel yogosike:

“Hit apùnì o yogotak welagep mene yì re, hinetaùken noba hìpìrethìgì'lek logolìk nong akìkì lagep yoma rì! An hit ninom neki mìren oba logogun nogo. Hit yì'nogo hagato kolek nepe morogo neki mìren logogin,” ìlùk yogoisasikesik he,

“Yekerek arì an noba wolok we'ni o,” ìlùk yogoisasikomo 18yekerek a'nogo wolok wagaukwama mokareke oabùt weak mene a'la kìlìk were'ma Yesùt en wenagasikomo re, henogo wùlìpikomo aremnogoat hano agaike. 19Hano agaikomo re, it Yesùt agoromì ane wanhì lagaukwa mene amanogo oba wagaukwasik inom inaligat logolìk he, mel yogosukwa:

“Nit en he, at mokareke oabùt weak mene atì henogo wulabusak mea atì nìkì'nogo nen,” ìlùk oba hinok wokhasukwama, 20-21at Yesùt en he,

“Hit hinetaùken tùkùm hogo noba hìpìrethìkì lagep lek atì nen o. Kìbì-kìbì eken magakelak mene heik lakhagarek atì hak, hinetaùken an noba hamùlùgat enek hìpìrethìlìk he, tom arì yogotì logolìk,

Aroma nen hìgìlogo wele'ma atoma asi lan o, ìlùk gosugun halok he, atoma nen wele'ma atoma asi lasagat o. Hit en yì mene tì mene hagasumo re, aike mea agì'lek hano nek asigin, ìlùk eberogoat yogohisìgì. [Mene re, mokareke oabùt weak mene yì hake ina'la kìlìk were'ma re, sùpùrùk nìkì'lek sapan umo nek he, elok henogo wùlùbusak o,]” ìlùk yogoisasike.

Yesùt en, “An noasugunat o,” ìlùk alep yogoisasikesik en, hobuk yogoisasike wene

(Mrk.9:30-32; Luk.9:43-45)

22Hobuk he, at Yesùt agoromì inom o Kalilea atoma atogosukwasik logolìk he, mel yogoisasike:

“An abat ta'lasi wagagi a'nogo re, ap en yoko lìlìk it aike ineki ba hanumo, 23noasugun o. Noasumo, nebe warek neki pìre were'ma, aike nen he, Ala nen nelugu'nabigin o,” ìlùk yogoisasikomo re, ina'la motok weak arìk lagaike.

Yesùt en Ala awì wùrìk hesik oko uang hesike wene

24Atì'nogo haga'lùk, o Kaperenagùm wagaukwama re, it Ala awì wùrìk hesik oko uang kìno ìlìk wanhì lagaukwa mene nen, at Peterùt oba wagaukwasik he, mel yogosukwa:

“Hinoe Ala ane yakùlhisikerek mene atì nen Ala aìi wùrìk hesik oko uang hagarek a'nogo mene aike hikerek a? Lek a,” ìlùk yogosukwama re, 25at Peterùt en he,

“Hikeregat o,” ìlùk yogoisasike. Yogoisalùk ouma kisikesik he, at en ìgì'lek werek kolek, Yesùt en tak mel yogosike:

“Simon. Hat he, kì'nogo akegen. It ap kweangma mene inetagepogot atì hesik, apùnì sanì nen uang hìlì'lùgì. Inokawerek inagoromì nen hìlì'lùgì akegen a? Ì a, at he, it hùnogoat mene nen hìlì'lùgì akegen a,” ìlùk yogosikomo re, 26at Peterùt en he,

“It ap hùnogoat mene nen hìlì'lùgì o,” ìlùk yogosikomo, at Yesùt en he,

“Halok he, it inokawerek inagoromì atì nen he, housak lek hìgì. 27Mene re, it en ina'mapsìrì wa'nisa nogo nen he, i yekele'ma lìlìk ikan watarek mene hele a'nogo ima pelapenem emakumagìk wanigin mene a'naga hekimo wìlìk ape langathikenem he, uang apelema were'ma hegein o. Halok he, atìat waganogo re, hat hesik, an hesik, it ap atì wogisano o,” ìlùk yogosike.

Atualmente Selecionado:

MATÌÙT 17: LAIDNI

Destaque

Copiar