LUKAT 18

He soge mene ho, ap kain mene ho, inoba lìrogo yogoisasike wene

1Atì'nogo yogoisasikesik he, at Yesùt en agoromì ane wanhì lagaukwa mene amanogo sapan ìkì logopik ina'la pùk arìk herakhìgì'lek, hutik-hutigat ìkì logouagalùk, wene aike oba lìrogo mel yogoisasike:

2“O sili aike, ap kain mene wene inoba hìgìk, kotìk, ikerek mene aike Ala ayù'lek logolìk, apùnì agauk hogo etawìrinaperek lek mene welagaike. 3Atì'nogo were'ma, he soge mene aike o sili atì welagaikeat. Logolìk, ninhùp-nanhùp ap a'nogo oba wago motok logolìk he, mel yogotì lagaike:

Ap aike an neperak weak mene hat en elele wo'nabinogolùk wagì o, ìlùk yogosi waga lagaike. 4Atì'nogo yogosi waganem he, ap kain a'nogo nen ebalep ane holhì'lek abìt hìkì lagaike meneat he, hobuk a'la ebetì logolìk he,

An noabùt he, Ala nayù'legat logolìk, apùnì agauk hogo netawìrinapìrek lek meneat he, 5at he soge mene yì, ane noba sabelogo yogonesi wìrì'logo yì, awene haletì'lek halolotsamo re, noba wago motok logolìk na'la mep sageiksagak hogo hagatì logoinogo nen he, awene atì halesigin, ìlùk a'la akasike,” ìlùk Yesùt en yogoisasike.

6Atì'nogo yogoisìlìk he, at ninoe Etagepogot Yesùt en he, aike mel yogoisasike:

“Ap oabùt kolo logolìk wene apùnì inoba hìgìk, kotìk, ikerek mene ike atì hùthani o. 7Atì hake, at Ala nen againapùrì weteberogo hisasike mene hùgì nen likene hùako inane keirogo ayoko hiko halok he, elele woginabigin lek nogo? Inane konhì logopik en, hobuk halok elele woginabigin nogo? 8Lek o. Hepok-hepok elele woginabigin o, ìlùk eberogoat yogohisìgì. Atì'nogo hagarinabigin meneat he, an abat ta'lasi wagagi a'nogo hobuk wesipik he, apùnì kweangma mene yoma aike inetaùken noba hìpìrìk were'ma isa wesigin a? Lek he a,” ìlùk yogoisasike.

Ap Parisi mene ho, ap uahg pemerintah hesik kìno ìlìk atogoterek mene ho, inoba lìrogo yogoisasike wene

9Atì'nogo yogoisasikomo, it apùnì he'nakit amanogo ina'la nen he, mel akìkì lagaukwa:

“It apùnì obogat yoma mea negen meneat he, nit yì ek he, hinebe esin logolìk higit hogo hagatì lago,” ìlùk akìkì lagaukwama re, at Yesùt en wene oba lìrogo mel yogoisasike:

10“Ap inebe pìre mene sapan uogolùk, Ala awì wùrì'mo ki lagaukwa. Ap aike re, Parisi mene. Nen, aike re, uang pemerintah hesik kìno ìlìk atogoterek mene. 11Eperak ki lagaukwasik sapan ìkì logolìk, ap Parisi mene a'nogo melagaikesik sapan a'la nen ìkì logolìk he, mel isike:

Ala, nopase e. An noabùt he, apùnì obogat inoabùt hake lek o. It apùnì yùgùnat yogot wanharek mene mel, kolo hagatarek mene mel, hìmì pailak haksìlì'lùgì mene mel, ap uang pemerintah hesik kìno ìlìk atogoterek mene yì mel, inoabùt atì hak he, an atì'nogo motok lek nogo nen he, hai wathapì lagì o. 12An he, minggu omakeat oba neki pìre ba sùpùrùk nìkì'lek heang negen hìlìk welagìk, nagarok yì mene tì mene hakìgìrek mene, obogat neki wenagasogo re, nomolo ba asi waganem, aike hat hesik hagagìk, ìgìrek o. Nopase, ìlùk isike meneat he, 13at ap uang pemerintah hesik kìno ìlìk atogoterek mene a'nogo nek he, ebe walegat metek logolìk ot hiok hogo eileken pogot oba higit lìakhìgì'lek ayùk hogo logolìk, eki nen etaùken hothìkì logolìk he, mel isike:

Ala nopase e! An weak hagatìrek mene yì, hetawì nean o, ìlùk yogosike. 14It sapan atì'nogo isukwa atì hesik, an wene aike yogohisak. Ap sa nen etaùken hesagathakìlìk hogorakiko halok he, Ala nen sebelhikerek o. Nen, ap sa nen etaùken sebelhakìlìk,

An mea, akike halok he, Ala nen hesagathikerek atì nen he, at ap sapan alep ike mene atì, Ala nen wene oba mene sagalogo legetsìgì'lek kamo isike. Meneat he, at ap sapan hobuk isike mene atì nek he, Ala nen wene oba mene sagalogo legetsasikomo aua lagaike, ìlùk yogohisìgì,” ìlùk yogoisasike.

“Yekerùgì magatek atì noba we'nìk,” ìlùk yogoisasike wene

(Mat.19:13-15; Mrk.10:13-16)

15At Yesùt en atì'nogo yogoisasikesik were'ma, hobuk apùnì nen inagainapùrì magatek mene Yesùt en eki hagisoagalùk he, oba wogisek wagaukwa. Atì'nogo wogisek waganem, at Yesùt agoromì ane wanhì lagaukwa mene amanogo nen ineileken isìlìk he, wenagisasukwa. 16Atì'nogo wenagisasukwa meneat he, at Yesùt en yekerùgì magatek amanogo wesuagalùk waisasikomo waga kolek he, at ane wanhì lagaukwa mene amanogo mel yogoisasike:

“Apùnì inoabùt it yekerùgì arì inoabùt atì hake haga'lasugun halok he, Ala nen awe a'ma hisikere'ma atoma esewerek asugun atì nen he, yekerùgì magatek aroma an noba we'nìk. Wene palhe hùk o. 17Sa nen, yekerùgì magatek mene Ala nen awe a'ma hisikerek wene wìlìk kagarek atì hak kìgì'lek halok he, kigin motok lek o, ìlùk eberogoat yogohisìgì,” ìlùk yogoisasike.

Ap kain agarok apik mene Yesùt oba wagaike wene

(Mat.19:16-30; Mrk.10:17-31)

18Atì'nogo yogoisìkì lagaikomo re, it ap Yahuri mene inoe kain aike nen Yesùt mel yogosike:

“Noe. Wene yakùlnisìkì lagen atì, hat hano o. An nabùlal-habùlal ese asik en, an noabùt nìkì'nogo hagatì logousak,” ìlùk yogosikomo, 19at Yesùt en he, mel yogosike:

“Hat hano, ìlùk yogoneten atì nìkì'nogo nen yogoneten. At aike hano lek o. We, at Ala aligat hano o. 20#Kel.20:12-16; Ul.5:16-20 Wene Ala nen,

Yì'nogo haga'no, tì'nogo haga'no, ìlùk ninasuk watì logolìk, mel isikomo werek:

Pailak haksasak lek o. Apùnì inebe inoasusak lek o. Yogot wanusak lek o. Hinapeliagat inabok palusak lek o. Hinopase hinagosa inane hologo agaugerinapì logousak o,

ìlùk ninasuk wasike a'nogo hat heluat o,” ìlùk yogosikomo, 21at ap a'nogo nen he, mel yogosike,

“Wene yogoneten atì obogat he, an nebe yekerek oba nenat nasuk hologo higit hogo hagatìrek meneat o,” ìlùk yogosikomo, 22at Yesùt asuk holhikesik he, mel yogosike:

“Wene omakeat enek aike hagatì'lek welagen o. Hat hagarok atoma heleleng hogo it alke inoba abasi lano. Abarìk he, oko wokhesugun mene atì it apùnì aike inagarok lek inelageik mene atì motok sùpùrogo wogisano o. Atì'nogo arat wogisegen halok he, hat pogot oba mene hùkoat esewerek asigin o. Halok, atì'nogo arat sùpùrogo wogisalùk he, an nopolik nìkì logoinok en we'no,” ìlùk yogosikomo, 23at ap a'nogo asuk holhikesik he, agarok motok api'mo nogo nen he, a'la motok weak agaike. 24A'la atì'nogo weak agaikomo, at Yesùt eileken enagat lakhìlìk he, agoromì mel yogoisasike:

“Eige. Nayùk e. Apùnì inagarok apik mene Ala nen awe a'ma hisikere'ma atoma nìkì'nogo kuheat o. 25Wam unta huko mene atì lisu eketma kelabumo elok kusak meneat he, it apùnì inagarok apik mene Ala nen awe a'ma hisikere'ma atoma kusak motok mea o,” ìlùk yogoisasike. 26Atì'nogo yogoisasikomo, it amanogo inasuk holhukwasik he, at Yesùt mel yogosukwa:

“Halok he, Ala nen apùnì sanì hak elok telinabusak he,” ìlùk yogosukwama, 27at Yesùt en he, mel yogoisasike:

“Apùnì nen hagasusak motok mea meneat he, at Ala nen hagasusak elok o,” ìlùk yogoisasike.

28Atì'nogo yogoisasikomo, at Peterùt en he, mel yogosike:

“Mene re, nit hat hopolik nìkì logouogolùk ninagarok yì mene tì mene heraksalùk wagosik nìkì lago mene yì nek he, nìkìnik,” ìlùk yogosikomo, 29-30at Yesùt en he, mel isike:

“Sa nen Ala awe a'ma logoigìlùk awì wùrìk mel, agwe mel, oe agot mel, opase agosa mel, againapùrì mel, heraksalùk waga halok he, o yogotak ya logolìk obùlù'mo motok apik oba louk hogo wogosigin o. Nen, o hobuk haga'lasigin a'nogo logolìk, nabùlal-habùlal wogosiginat o, ìlùk eberogoat yogohisìgì,” ìlùk yogoisasike.

“An noasugun o,” ìlùk eki pìre ba yogoisasikesik en, hobuk aike yogoisasike wene

(Mat.20:17-19; Mrk.10:32-34)

31At Yesùt en wene atì'nogo yogoisalùk he, agoromì inebe 12 nen amanogo wogisek he, inalepma kek hogo lìlìk mel yogoisasike:

“Nagoromì. Nit yogotak o Yerusalem pìkì lago. Arat pìlì'mo nen he, it ap alep Ala ane yogoisìkì lagaukwa mene amanogo nen, an abat ta'lasi wagagi a'nogo hobuk haga'nabugun mene helal waganogo hesukwa mene higit hogoat haga'nabugun o. 32Nebe noasuagalùk, yoko lìlìk it ap eta'ma mene ineki ba hanugun o. Hanumo, inane kerethìgìk yogonetìk, wesi hanhìk, 33tùgì labìsake noatìk, ìlìk he, nebe motok noasugun o. Noatenem he, neki pìre warek logopik en, aike nen he, neluk asigin o,” ìlùk, 34atì'nogo pak hogo yogoisasike meneat he, hinago mene ike salek, at agoromì amanogo nìkì'nogo mene hesik ike heat wongothasukwa.

Ap eileken mùm mene aike hagasike wene

(Mat.20:29-34; Mrk.10:46-52)

35At Yesùt o Yeriko ki lagalùk horok hogo asi lagaike hak he, ap aike eileken mùm logolìk ape kìno weak ìkì lagaike mene ebekalem aremnogo hùrek were'ma re, 36apùnì inane apik ìlìk laganem asuk holhikesik he, mel yogoisasike;

“Inane aroma, nìkì'nogo halok ìlìk wìrì'lùgì,” ìlùk hinok wanhike. 37Hinok wanhikomo, it en he, mel yogosukwa:

“Yesùt awì Nasaret mene a'nogo kwe yìkwe wìrì'logo nen ìlì'lùgì o,” ìlùk yogosukwama, 38ap a'nogo nen ane hùkorogo ìkì logolìk he, Yesùt mel yogosike:

“Yesùt Taùt en tagokwe mene noe a! Hetawì nean o,” ìlùk yogosikomo, 39it apùnì ebalep lagaukwa mene amanogo nen,

“Hane o,” ìlùk wenagasukwa meneat he, hobuk ebenageik ane hùkorogo mel yogosike:

“Taùt en tagokwe mene noe a! Hetawì nean o,” ìlùk yogosikomo re, 40at Yesùt ebe melagaikesik he, apùnì amanogo mel yogoisasike:

“Ap atì wolok we'ni o,” ìlùk yogoisasikomo, ebe Yesùt era'lu hei wagaukwama, at en hinok wokhìkì logolìk,

41“An nen nìkì'nogo hagathabuagalùk yogoneten,” ìlùk yogosikomo, at ap a'nogo nen he, mel yogosike:

“Noe e. Neileken hano haga'nabinogolùk yogohetì o,” ìlùk yogosikomo, 42at Yesùt en he, mel yogosike:

“Heileken mùm arì hano ame o. Hat hetaùken noba hipìrethegen atì baat hano agen o,” 43ìlùk yogoto kolek aremnogoat, eileken mùm mene a'nogo hano agaikesik, Yesùt opolik laga logolìk he, Ala hogorarìk lagaike. Nen, it apùnì he'nakìt amanogo Yesùt en hagasike mene atì ineileken hasukwasik he, Ala hogorasukwaat.

Atualmente Selecionado:

LUKAT 18: LAIDNI

Destaque

Copiar