LUKAT 19

Ap Sakeùt en hagasike wene

1Atì'nogo haga'lùk he, at Yesùt o Yeriko ki lagaikesik, o sili atoma hebùlùk pìkìrat laganem he, 2ap aike etage Sakeùt, uang pemerintah hesik kìno ìlìk atogotì lagaukwa mene inoe kain logolìk agarok apigat welagaike. 3Were'ma.

“Yesùt atì ebe nìkìnik he,” ìlùk eileken lakhagalùk isike mene re, apùnì inebe motok apigatma, nen, at ebe horokolagatma, nogo nen he, kì'nogo lakha heat haga'lagaike. 4Atì'nogo haga'lagaikomo, at a'la nen he,

“Yesùt ebekwe yì ba waganem neileken lakhegein,” ìlùk, it apùnì amanogo hobugutsalùk he, at ebe alebagìk humusek lagaikesik, e ba lagasike. 5Lagalìk were'ma, at Yesùt aremnogo lìlìk eileken lìakhìlìk he, etage pak hogo mel yogosike:

“Sakeùt, yogotak hat haua neperak nogo i lùok en he, hepok pi me o,” ìlùk yogosikomo, 6at Sakeùt a'nogo hepok pi wagaikesik he, Yesùt ebe hai warogo wanhikesik he, a'la hai hakìlìk, at aua eperak lagaukwa. 7Eperak laganem, it apùnì aike obogat en ineileken lagisìlìk, ua palogo inane ngùlùk-habuk inabok palhì logolìk he, mel isukwa:

“Yesùt he, ap weak hagarì'logo mene a'nogo aua eperak nogo i lùogolùk lìlì'lùgì atì nayùk e!” ìlùk isukwa meneat he, 8at Sakeùt a'nogo melagaikesik he, at ninoe Etagepogot Yesùt mel yogosike:

“Noe! An nagarok yì mene tì mene obogat tùlem heirogo mìkìlogo re, it apùnì inagarok lek inelageik mene atì sùpùrisegein. Nen, an nen apùnì napeliak en lalinapi mene halok he, oko neki 4 oba nen hobuk oba louk hogo wogisegein o,” ìlùk yogosike. 9Atì'nogo yogosikomo at Yesùt en he:

“Hat hebe Aberaham en tagokwe mene nogo nen he, yogotak yìat hat hagainapùrì hinomat Ala nen telhinape o! 10Telhinape mene atì, an abat ta'lasi wagagi a'nogo, it apùnì nong arì'lùgì mene heragasogo telinabigìlùk wagagiat o,” ìlùk yogoisasike.

Uang emas hùko mene oba lìrogo yogoisasike wene

(Mat.25:14-30)

11At Yesùt en atì'nogo yogoisasikesik, inasuk holek werek kolegat, o Yerusalem arat horok hogo asi lagaukwasik en he, it apùnì amanogo ina'la nen mel akasukwa:

“Ala nen awe a'ma hinegein atì yogotak yaat hinikenem nineileken hogoin o,” ìlùk ina'la akasukwa atì nen he, at Yesùt en wene aike oba lìrogo mel yogoisasike:

12“Ap kain nen tagokwe mene aike a'la nen he,

O ap kaintek inetagepogot menhisagare'ma atoma laganem an kain netagepogot menhanumo napotkwe wesigin, ìlùk akasike. 13Atì'nogo akasikesik logolìk he, atitigeke mene inebe 10 nen waisasikomo wagaukwama re, uang emas hùkotek mene ebe 10 nen inebe lopok omakìtek sùpùrogo wogisìkì logolìk he, mel yogoisasike:

An oan wagì'lek werek kolek, nauang yì ba abarogo seikpeik hogo hagatì logoino, ìlùk yogoisalùk he, at a'nogo lagaike. 14Laga kolek he, it oe agot amanogo ap atì inapsìrì nen he, wene palhukwasik,

At ap atì ninoe kain etagepogot logousak he, ninabìt, ìlùk yogoisa lano, ìlùk, yoko opolik laksasukwa. 15Atì'nogo wene warogo laksasukwa meneat he, ap a'nogo kain etagepogot logouagalùk menhesukwama aua apotkwe wagaike. Wagaikesik he,

Uang an mene amanogo it en kì'nogo abarogo seik-peik hogo hagata, ìlùk, elu asigìlùk he, atitigeke mene amanogo waisasike. 16Waisasikomo, at aike alebagìk wagaikesik he, mel yogosike:

Noe. An uang emas hùko mene omakeat wo'nesigin a'nogo ba, an nen abarogo re, hobuk 10 nen oba labelogo sabùrogo hagagìma yì o, ìlùk yogosikomo, 17at oe a'nogo nen he,

Nagot wa! Hat hoabùt hano hagatì lagenma hìgì o. Hamùlùgat mene hoabùt hùpùn hogo hagatì lagenma atì nen he, yogotak he, o kota 10 nen yoma hobuk hat ese logolìk hagisek logoinogolùk menhagagì o, ìlùk yogosike. 18Atì'nogo yogosikesi'mo nen, hobuk at aike opolik wagaikesik he, mel yogosike:

Noe. An uang emas hùko mene omakeat wo'nesigin a'nogo ba, an nen abarogo hobuk 5 nen oba labelogo sabùrogo hagagìma yì o, ìlùk yogosikomo, 19at oe a'nogo nen he,

Nagot wa! Halok he, o kota 5 nen yoma hobuk hat ese logolìk hagisek logoinogolùk menhagagì o, ìlùk yogosike. 20-21It atì'nogo yogoisasikesi'mo nen, hobuk at aike wagaikesik he, mel yogosike:

Noe. Hat hoabùt motok ningsek logolìk, hat mene le'maat he, it aike mene helìgìk, nen, hat en awì heik lakhìgì'lek, we, it aike nen awì heik lakhaga meneat he, eken heki abusak palìgìk, egetek a'nogo nen, hoabùt palhìrìk, nayùk en he, uang emas hùko mene omakeat wo'nesigin a'nogo an su likak horatukwe mene a'la yeilogo hesogo welagarìk he, wokhesi wagì yì o, ìlùk yogosike. 22Atì'nogo yogosikomo, at kain a'nogo nen he,

Nagot. Hat hoabùt weak motogat hagatì lagenma o. Hat hane egen atì baat ùkùm hoba hìlìk weagathabigin o. An noabùt ningsek logolìk he, an nen hìgì'lek mene helìgìk, awì an nen yatì'lek meneat he, eken palìgìk, ìgìre'ma, noabùt hat helu halok he, 23an napotkwe wìrìk nauang ebe mene mel, oba labelogo mangorasugun mene mel, an hela wesuagalùk he, it apùnì aike uang hesogo logolìk, abarogo aike inom oba louk hogo hìlì'lùgì mene amanogo wogisaemat he, nenahalok wogisìgì'lek welagen, ìlùk yogosike. 24Atì'nogo yogosikesik he, it apùnì era'lu metek welagaukwa mene mel yogoisasike:

Uang emas hùko omakeat mene ap arì hesogo werek arì waganogo re, ap aike 10 nen sabùrogo hike mene arì wogo'ni o, ìlùk yogoisasikomo, 25it apùnì amanogo nen he, mel yogosukwa:

Noe! At yì auang emas hùko mene 10 nen werek yoma, ìlùk yogosukwama, 26at kain a'nogo nen he, mel yogoisasike:

It apùnì aike inagarok werek mene atì, inebe lopok hobuk aike inom oba louk hogo wogisogoin o. Nen, it aike inagarok lek mene atì, hamùlùgat hesogo werek mene atì, inekimo nen telogo helogoin atì nen he, at ap arìat wogosuageip ìlùk yogohisìgì o. 27Atì'nogo yogoisasikesik he,

It ap an ninom inaselei mene hake haga'napasik ìkì logolik,

At atì nit ninoe kain etagepogot logousak he, ninabìt, ìlùk ega mene atì inebe wogisek wìrìk he, an neilhanem yaat inoasuageip o, ìlùk yogoisasike,” ìlùk he, at Yesùt en apùnì amanogo yogoisasike.

Yesùt hogorato kolek o Yerusalem kisike wene

(Mat.21:1-11; Mrk.11:1-11; Yoh.12:12-19)

28Wene atì'nogo arat yogoisalùk he, apùnì amanogo oan werek kolek, at Yesùt ebe ebalebagìk, o Yerusalem lagasike. 29Lagaki lagaikesik, tom Saitun a'ma o sili aike etage Petpage, aike etage Petania, atoma higit asi lagasikesik he, at agoromì ane wanhì lagaukwa mene aike inebe pìre wene warogo alebagik laksìkì logolìk he, 30mel yogoisasike:

“O sili hinelokoma a'li lani o. Nen, atoma ki logoin hak he, wam keledai eak mene oan apùnì apot oba hù'laganem wogisek lagì'lek mene kopì kelik were'ma hineileken hogoin a'naga. Nen, arat hineileken hegep halok he, kopì kelik atì hikalogo wolok we'no. 31Atì'nogo kopì hikalhenem, it apùnì atoma mene aike nen,

Wam kopì hikalhì lagep atì nenahalok, ìlùk hinok wanhe halok he, mel yogoisano:

Nit ninoe Etagepogot a'nogo nen wam yì mene lek en he, wolok lùogolùk kopì hikalhì lago, ìlùk yogoisano,” ìlùk he, wene warogo laksasike. 32Atì'nogo laksasikomo, it a'nogo lagaukwa hak he, at en isike hagat were'ma hasukwa. 33Hasukwasik he, wam keledai a'nogo kopì hikalhenem he, it ap inako esewerek mene nen he,

“Wam keledai atì nenahalok kopì hikalhì lagep,” ìlùk yogoisasukwama, 34it en he,

“Nit ninoe Etagepogot a'nogo wam keledai yì mene lek en he, wolok luogolùk kopì hikalhì lago,” ìlùk yogoisalùk he, 35wam keledai a'nogo wolok Yesùt oba wagaukwa. Wagaukwasik he, inasu etakwe laberek mene nokologo wam a'nogo apot oba talhìlìk he, Yesùt ebe wam a'nogo apot oba hùthesukwa. 36Atì'nogo hùthesukwama, wam apot oba hù'lagaikesik laganem he, it amanogo inasu laberek mene nokologo re, ebekwe talìk lagaukwa. 37Talìk lagaukwasik he, o Yerusalem horok hogo asi lagaukwasik, kwe tom Saitun oba nen pagare'ma atoma puogolùk he, at agoromì opolik nìkì lagaukwa mene inebe logolek amanogo, at Yesùt hagasusak lek mene elalinat hagatì lagaike amanogo ineileken hìkì lagaukwasi'mo nogo nen he, ina'la hai hakìkì logolìk inane hùkorogo a'mìt sup hogo Ala hogorarìk pisukwa. 38#Mzm.118:26 A'mìt sup hogo pìkì logolìk mel isukwa:

“Ala nen ninoe kain Etagepogot lakhagei wagama wagen yì, at enat hanothabuak o! lt pogot oba welagaikarek mene atoma inetaùken hapuk hogo logouak o. Nen, Ala esin pogot oba welagarek mene hogoratì logouok o,” ìlùk atì'nogo ìlìk-ìlìk pisukwa. 39Atì'nogo ìlìk pikenem he, it ap Parisi mene he'nakìt apùnì logolek amanogo ina'la pìkì logolìk he, Yesùt mel yogosukwa:

“Noe! Hagoromì inane lek asuagalùk inasuk wasumo re,” ìlùk isukwama, 40at Yesùt en he, mel yogoisasike:

“Nane eberogoat yogohisak. It apùnì yì inane ìgì'lek kamo ilepma re, helep yoma inane a'mìt sup ilebat o,” ìlùk yogoisasike.

Yesùt en o Yerusalem hesik ouak le agaike wene

41At Yesùt en atì'nogo yogoisalùk horok hogo asi pisukwasik, at Yesùt eileken o kota Yerusalem a'nogo lakhìlìk he, ouak le agaike. 42Ouak le aga logolìk he, mel isike:

“Hit apùnì o Yerusalem mene atì, hina'la nen,

Nit hano lìok hogo logouok en tì'nogo hagasuok, ìlùk yogotak yaat hina'la ebesuem ebetì'lek welagep atì, eige! Netawìlak e! Mene re, yogotak wene atì hit hineilmo hinago werek en hùthìgì'lek welagep. 43-44Ala nen hanothinabigìlùk hinoba waga meneat he, hit hùthìgì'lek welagep atì nen, hit hobuk hinaua nen hese wùlìbi lanogo ìlùk he, hinaselei mene nen leget walìngìrogo wùrogo hikìlìk he, o'moko o'moko nen hobothikìlìk, hop-hop ki wesugun o. Ki wìrìk he, hinawì helep mene sapapal wùrìk aroma aike obùlù'mo wùrìk hebìgì'lek mesalhì logolìk hinebe motok heleleng hogo hinagainapùrì hinom wùlì tagalogoat hinoasugun o,” ìlùk inouak le agaike.

Yesùt en Ala awì wùrì'mo kìlìk tegelhike wene

(Mat.21:12-17; Mrk.11:15-19; Yoh.2:13-22)

45Atì'nogo yogoisasikesik he, Ala awì wùrì'mo kisikesik, it apùnì oko palhì lagaukwa mene mùk hogo mak hogo wulaksìkì logolìk he, mel yogoisasike:

46 # Yes.56:7; Yer.7:11 “Ala nen he,

An nawì wùrìk yì re, o sapan ìkì logogun obaat o,

ìlùk, helal waganek werek meneat he, hit en he, it ap apùnì aike inagarok ineki abusak telogo helagarek mem inawì negen wùrogo hisìkì lagep yì rì!” ìlùk wenagisasike. 47Atì'nogo yogoisìlìk he, at Yesùt en ninhùp-nanhùp Ala awì wùrì'mo wene yakùlisiko motok welagaike. Atì'nogo yakùlisikenem, it ap Ala esewerek inogogi kaintek inom, Ala ane helal waganek esewerek mene inom, Yahuri mene kaintek inetagewerek mene inom en,

“At Yesùt ebe nìkì'nogo wasuok,” ìlùk abok palhì lagaukwa. 48Atì'nogo abok palhì lagaukwa meneat he, it apùnì hùkokwe re, at Yesùt ane ikenem inasuk hologo motok welagaukwa atì nen he, at ebe nìkì'nogo wasu heat haga'lagaike.

Atualmente Selecionado:

LUKAT 19: LAIDNI

Destaque

Copiar