YOHANET 6

Yesùt en apùnì logolek sùpùrùk wogisasike wene

(Mat.14:13-21; Mrk.6:30-44; Luk.9:10-17)

1Hobuk he, at Yesùt i moge Kalilea, etage aike Tiberiat egaregat atì, aik ìlì bakwe wùlìpike. 2I aik ìlì bakwe wùlùpenem he, alebat apùnì inoba ou mene elalinat hagarinapenem ineileken hasukwasi'mo nogo nen he, apùnì inebe apigat esa logolhìlùk, at opolik lagaukwa. 3Opolik laga kolek, at Yesùt agoromì ane wanhì lagaukwa mene amanogo inomat wùlùpukwasik he, ùkùl oba lagalìk hù'lagaukwa. 4Nen, atem higit he, it apùnì Yahuri mene nen he,

“Ala nen telninapike,” ìlùk ina'la eberogo pesta etage Paskah nekarek a'nogo nasak oba arat hakok i wagaike. 5Atì'nogo hù'lagaukwasik, at Yesùt eileken lagisasike hak he, apùnì apik esa logolek atogosi waganem eileken lagisìlìk, Pilipùt mel yogosike:

“Pilipùt. Apùnì logolek aroma sùpùrùk noak en, o koma mene oko palisùok he,” ìlùk yogosike. 6Atì'nogo yogosike atì re, at Yesùt en hagasigin mene elu logolìgat he, at Pilipùt oabùt paligìlùk yogosike atì. 7Atì'nogo yogosikomo, at Pilipùt en he, mel yogosike:

“Apùnì nen yabu ineki omake hesik hagatenem ineki oko uang wogisagarek atì mene nit en 200 oba sùpùrùk horoti mene oko pali lamo re, apùnì yoma, hamùlùk hamùlùk eken wokhìgìk elok nasak? Meaat o,” ìlùk isikomo re, 8at Yesùt agoromì ane wanhì lagaukwa mene aike etage Atereat, Simon etage aike Peterùt egarek a'nogo agot en he, mel yogosike:

9“Noe. Yoma elegekerek mene aike sùpùrùk horoti jelai werago mene 5 nen, nen ikan pìre mene inom hesogo werek meneat he, apùnì esa yìgìnì'mo elok nasak nogo? Mea o,” ìlùk yogosikomo, 10at Yesùt en agoromì amanogo mel yogoisasike:

“Nagoromì. Apùnì aroma hù'lasuak en, yogoisani o,” ìlùk isikomo, pupuk eka apik were'ma, obakwe hù'larik lagaukwa re, apùnì inebe apigat mene re, ap enek inebe 5.000 nenineki wenasukwa. 11Atì'nogo hù'larik lagaukwama re, at Yesùt en sùpùrùk horoti mene aremnogo ekimo wanhìkesik he,

“Ala nopase,” ìlùk hai warogo re, apùnì apik hù'lagaukwa mene amanogo sùpùrisìlìk he, ikan aremnogo atì'nogoat sùpùrisasike. Sùpùrisasikomo, it ina'la nen, nelo akasukwa hagat inalabut ning hogo nasukwa. 12Inalabut ning hogo nasukwama re, at agoromì ane wanhì lagaukwa mene amanogo mel yogoisasike:

“Sùpùrùk nekasik ato titelogo hebaga mene aroma alema'lasi nogo nen he, atogorogo omakìma heni o,” ìlùk yogoisasikomo re, 13sùpùrùk horoti jelai mene werago 5 nen amanogo nasukwasik, titelogo hesukwa mene mùl ugu 12 nen apem hesogothìgìk kalogo hesukwa. 14Atì'nogo kalogo hesukwama, at Yesùt en ebe hùthoagalùk elalinat hagasike mene atì, it apùnì ineileken hasukwasi'mo nogo nen be, mel isukwa:

“Ap aike nen Ala ane kweangma yogonisa wesigin isukwa a'nogo eberogoat he, ebe yìat o,” ìlùk isukwa. 15Atì'nogo isukwama, at Yesùt a'la nen he,

“It atì wìrìk, an it inoe kain logouagalùk inane keirogo menhanugun hìgì,” ìlùk inoabùt enagat palhikesik he, o atoma hebisalùk punu ba aligat lagasike.

Yesùt esok i agùm obakwe hìlìk wagaike wene

(Mat.14:22-33; Mrk.6:45-52)

16-17At Yesùt ebe atì'nogo lagasikesik, agoromì ane wanhì lagaukwa mene amanogo inoba wagì'lek oan werek kolek, o arat hi isikomo, it enek i yekelek a'nogo aik oba pi wagaukwasik he, so a'la kisukwasik, warogo o Kaperenagùm wùlìbi wesuogolùk wagaukwa. 18Wùlìbi waganem he, sogoi aninirogo hunha wagaikomo re, i ha'labu apik agaike. 19I ha'labu apik hagato kolek, it a'nogo so warìk tùlem heise'ma 5 kilometer he a, 6 kilometer he a, walegat asi wagaukwa hak he, at Yesùt a'nogo esok i agùm obakwe hìlìk inoba higit horogat waganem, ineileken lakhìlìk inayùk apik agaike. 20Inayùk apik agaikomo re, at Yesùt en he, mel yogoisasike:

“Nagoromi. An nebeat waga lagì. Halok, hinayùk agùp o,” ìlùk yogoisasikomo, 21it ina'la hai hakìlìk Yesùt ebe so a'la kelakhiko kolek aremnogoat, so a'nogo it ina'la nen,

“I aik oba a'lem higit wùlùbugun o,” ìlùk akasukwa higit hogo arat asi wagaukwa.

Apùnì apik Yesùt herarìk wagaukwa wene

22Wagaukwasik oba nen, ohealekokwe re, it apùnì apik i aik ìlì bakwe hisalùk wagaukwa mene amanogo ina'la nen he,

“Eige. O himagane so omakeat enek welaga meneat he, at Yesùt ebe inom lek. We, at agoromì ane wìlì'lùgì mene nek so warogo wùlùpenem nineileken isogo,” ìlùk akasukwa. Atì'nogo so ebe lek halogat isukwa meneat he, 23hobuk so hunigat mene aike apùnì o etage Tiberiat mene nen warìk, ninoe Etagepogot Yesùt en sapan Ala hai warogo nen sùpùrùk horoti mene sùpùrisasikomo nasukwa ba a'nogo wùlùpukwasik were'ma, ineileken hasukwa. 24Ineileken hasukwasik ina'la nen akìkì logolìk he,

“Yesùt ebe mel, agoromì ane wìlì'lùgì meme mel, inebe yoma lek yoma,” ìlùk, so a'la kìlìk, Yesùt ebe herarìk, o Kaperenagùm wùlìbi wagaukwa.

Yesùt en, “Sùpùrùk inelugurinaperek mene nebe anat o,” ìlùk yogoisasike wene

25It apùnì amanogo wùlìbi wagaukwasik, at Yesùt o Kaperenagùm were'ma oba wagaukwasik he, mel yogosukwa:

“Noe, hat o yoma mera wagen,” ìlùk oba hinok wokhasukwama, 26at en he, mel yogoisasike:

“An wene aike yogohisak. An nebe hùthanuageip ìlùk elalinat hagatenem hineileken neegep a'nogo nen hera'nabìk wagep hùk. Lek o. We, sùpùrùk horoti mene sùpùrogo wokhisìgìma hinalabut ning hogo nekep a'nogo nenat hera'nabìk wagep hisìgì o, ìlùk oberogoat yogohisìgì. 27Sùpùrùk hili arìk lek asusak mane hesik yabu hagatùp o. At he, sùpùrùk motok logogin mene nìkì logolìk, ineluk motok logousak mane atì, an nenat wokhisìkì logouagalùk, nopase nen nayoko hìlìk lakhani wagaikomo, abat ta'lasi wagagi atì hesik yabu hagatì logoni o,” ìlùk yogoisasike. 28Atì'nogo yogoisìkì lagaikomo, it en at mel yogosukwa:

“Noe. Ala a'la akikerek mene hagatì logogùkwe re, nit ninoabùt nìkì'nogo hagatì logou,” ìlùk, oba hinok wanhukwama, 29at en he, mel yogoisasike:

“Ala a'la akikerek mene hit en hagasusak atì ebe re yì. Hinetaùken an Ala nen lakhani wagaikomo wagagi mene yì, noba hìpìrethousak atìat o,” ìlùk yogoisasikomo, 30it en he, mel yogosukwa:

“Hebe hùthagùagalùk, elalin mene aike hagatenem nineileken hììlìk, ninetaùken hoba hìpìrethùgùkwe re, ebe kì mene hagasigin. Aike nìkì'nogo hagasigin. 31#Kel.16:4,15; Neh.9:15; Mzm.78:24 Ninopalak o leimo apùnì le'ma logolik, sùpùrùk na hak, etage manna mene nìkì lagaukwa ìlùk, Ala ane helal mel ìlùk waganek werek:

It inapùrùk nìkì logouagalùk, at en pogat oba nen pelaksa waga lagaike,

ìlùk helal waganek werek hagat nìkì lagaukwa,” ìlùk yogosukwa. 32-33Atì'nogo yogosukwama, at en he, mel yogoisasike:

“An nen wene aike yogohisak. Sùpùrùk pogot oba nen pelakhisa waga lagaike atì re, at Musa nen hùk. Lek o. At he, sùpùrùk ebe mene atì re, nopase nen an nebe apùnì kweangma mene inelugurinapìrek mene pogot oba nen pi wagagi atìat wokhisikerek o,” ìlùk yogoisasike.

34Atì'nogo yogoisasikomo, it en he, mel yogosukwa:

“Noe. Sùpùrùk atì mene wo'nisiko motok logoino,” ìlùk yogosukwama, 35at en he, mel yogoisasike:

“Sùpùrùk inelugurinapìrek mene atì re, an nebeat o. Sa nen an noba wagìk, etaùken noba hìpìrethìgìk, igin halok he, sùpùrùk nele agìk, i nele agìk, ìkì logogin lek o. 36Mene re, an nen wene alep yogohisìgì hagat, hineileken nììkì lagep meneat he, hinetaùken noba hìpìrethousak hinabit o. 37-38Mene re, an pogot oba nen pi wagagi atì re, an nokawarek na'la nen kagalogo hagasigìlùk pi wagagi hùk. We, at lakhani wagaike mene a'la akikerek mene atìat higit hogo hagasigìlùk pi wagagi atì nen he, apùnì an nopase nen wo'neterek mene inebe lopok noba waganem he, an nen,

Hit an noba wesusak lek, ìlùk, wenagisegein lek o. 39Nen, at a'la akikerek mene an nen hagasuagalùk lakhani wagaike atì re, ebe yì:

At en apùnì an wo'neterek mene obogat aike pelaksìgì'legat, o elùgùn oba, an nenat inelugurinabuagalùk, 40nopase a'la akikerek o. Atì'nogo akìkì logolìk, apùnì nen Ala aput nebe yì ineileken nììgìk, inetaùken noba hìpìrethìgìk, iko halok, inebe lopok ineluk motok logouagalùk, o elùgùn oba, an nen inelugurinabuagalùk a'la akikerek o,” ìlùk yogoisasike.

41Nen, at Yesùt en atì'nogo yogoisìkì logolìk,

“Sùpùrùk horoti pogot oba mene atì re, an nebeat pi wagagi o,” ìlùk yogoisasike atì nen, it ap Yahuri mene nen, at abok ngùlùk-habuk palhì logolìk,

42“At yì etage Yesùt, ap Yùsùp aput. Nen, at opase agosa ninelu meneat he, at en ìkì logolìk,

An nebe re, pogot oba nen pi wagagi, ìlùk ike atì nìkì'nogo nen ike akegep,” ìlùk isukwama re, 43at Yesùt en he,

“Hit-hit nabok ngùlùk-habuk palhì lagep atì, palhe hùk o. 44An nopase lakhani wagaike mene a'nogo nen, apùnì lit-lit an noba wogisek wagì'lek halok, noba wesusak mea o. We, at en it aike lit-lit wogisek waganem noba wesugun halok, o elùgùn oba, an nen inelugurinabiginat o. 45#Yes.54:13 Wene atì hesik it ap Ala ane yogoisìkì lagaukwa mene amanogo nen helal waganogo hìkì logolìk mel isukwa:

It apùnì obogat Ala nenat wene yakùlisegein o,

ìlùk, helal waganogo hasukwa atì hagat, apùnì an nopase ane inasuk holìlùk, at en yakùlisikenem yakùlha halok, inebe lopok an noba wagaikaregat o. 46Wene yogohisìgì yì re, it apùnì aike nen, an nopase atì ineileken hasukwa ìlùk yogohisìgì hùk. We, an naligat Ala were'ma nen wagagi mane yì nek he, nopase neileken hasigi o. 47Sa nen etaùken an noba hìpìrethiko halok he, ineluk motok welagaikarek mene ese agasik werek o, ìlùk, eberogoat yogohisìgì,” ìlùk yogoisasikesik, 48wene aike mel yogoisasike;

“Sùpùrùk inelugurinapìrek mene atì re, an nebeat o. 49Hit hinopalak o leimo apùnì le'ma logolìk sùpùrùk na hak, manna atì mene nìkì lagaukwa meneat he, inebe wa'larìk wagaukwa atì. 50Atì'nogo wa'lagaukwa meneat he, sùpùrùk ebe mane pogot oba nen pi wagaike atì. Atì'nogo pi wagaikesi'mo re, sa nen sùpùrùk atì mene niko halok, at ebe wa'lagì'lek eluk motok logogin o. 51Sùpùrùk inelugurinaperek mene pogot oba nen pi wagarek atì re, an nebeat o. Sùpùrùk an nen wogisegein mene atì, sa nen niko halok, at ebe eluk motok logogin o. Apùnì kweangma mene ineluk logouagalùk an nebe it hesik wa'lasigin atì, an nebeat wogisegein,” ìlùk yogoisasike.

52Atì'nogo yogoisasikomo re, it ap Yahuri mene amanogo, it-it inane palhì logolìk he, wene mel isukwa:

“Ap sanì. Ap yì ebe mane nit noagalùk nìkì'nogo wo'nisagalùk en yogonisike akegep,” ìlùk isukwama, 53at Yesùt en he,

“An nen wene aike yogohisak. An abat ta'lasi wagagi a'nogo nebe nìkìk, namep nìkìk, ìkì lagep lek halok, ineluk motok welagaikarek mene, hit esewerek agì'lek welagep o, ìlùk eberogoat yogohisìgì. 54Meneat he, sa nen an nebe nìkìk, namep nìkìk, ìlì'logo halok he, ineluk motok logogun mene ese arìk were'ma, o elùgùn oba an nen elugurasigin o. 55An nebe mel, namep mel, atì re, hinapùrùk hinagei ebe meneat o. 56Sa nen an nebe nìkìk, namep nìkìk, ìlì'logo halok he, at en an neperak hutigat, nen, an nen, at neperak hutigat, logogun o. 57An nopase eluk motok welagarek mene nen lakhani wagaikomo wagagi a'nogo, at eluk welagarek atì nen an neluk welagìrek atì hak, sa nen, an nebe niko halok, an neluk welagìrek atì nen, at elugat logogin o. 58Nen, sùpùrùk pogot oba nen pi wagaike mene yì re, hit hinopalak nìkì lagaukwa mene inebe wa'laga lagaukwa atì hake re, lek meneat he, ap sa nen sùpùrùk ebe mene yì niko halok, eluk motok logogin o,” ìlùk yogoisasike. 59Wene Yesùt en atì'nogo yogoisasike atì re, at ebe o Kaperenagùm o sapan egarek oba wene yakùlisìkì logolìkyogoisasike.

Wene inelugurinaperek wene

60At Yesùt en wene atì'nogo yogoisasikomo, it at agoromì ane wanhì lagaukwa mene amanogo aike inebe apigat wene atì inasuk holhukwasik he, mel isukwa:

“Wene ike atì re, ekin api'mo, sa hak en wanigin akegep. Mea o,” ìlùk isukwa. 61Atì'nogo at ebe yogotì'lek isukwa meneat he, at an he,

“Wene ìgì a'nogo hesik nagoromì nen ua palogo wene palì'lùgì hìgì,” ìlùk inoabùt enagat palhikesik mel yogoisasike:

“Wene yogohisìgì a'nogo nen,

At ninabìt, ìlùk kobologo herakhanuogolùk ìkì lagep a? 62An abat ta'lasi wagagi a'nogo alep welagagi ba hobuk napotkwe lagaikenem hineileken nììlìk, hina'la nìkì'nogo akogoin. 63Ala Areagùn nen apùnì inelugurinaperek o. Apùnì kweangma mene inomame ba aike hagasusak mea o. Mene re, wene an nen yogohisìkì lagì atì, Ala Areagùn nenat ikerek mene nogo nen he, inelugurinaperek wene yogohisìkì lagì o. 64Wene atì ba inelugurinaperek meneat he, hit he'nakìt yoma eberogoat ìlùk hinetaùken an noba hìpìrethìgì'lek welagep hìgì,” ìlùk yogoisasike. Atì'nogo yogoisasike atì re, it aike inetaùken at oba hìpìrethìgì'lek mene mel, at aike nen Yesùt ebe wasuagalùk yoko legein mene mel, it atì, atì'nogo hagasugun, ìlùk at emakum enat elu welagaikesi'mo nogo nen he, wene atì'nogo yogoisasike atì. 65Atì'nogo yogoisasikesik he, wene aike mel yogoisasike:

“Atì'nogo ìlùk, an nen he,

Apùnì Ala nen ina'la kagalhì'lek halok, an noba wesusak he, mea ìlùk, yogohisìgì atì,” ìlùk yogoisasike. 66Wene atì'nogo yogoisìkì lagaikomo, at agoromì ane wanhì lagaukwa mene amanogo, inebe logolegat aike Yesùt heraksalùk pùgùlhukwasik he, hobuk opolik nìkì logouogolùk, oba wagì'lek kamo isukwa.

67Atì'nogo pùgùlhukwama, at Yesùt en agoromì 12 nen amanogo mel yogoisasike:

“Hit hogo re, atì'nogoat herakhanìlùk pùgùluogolùk akìkì lagep a?” ìlùk, yogoisasike. 68Atì'nogo yogoisìkì lagaikomo, at Simon Peterùt a'nogo nen he, mel yogosike:

“Eigo. Noe. Ninebe nineluk motok logousak hesik mene re, wene hat en yogonisìkì lagen hake yama re, hat herakhagalùk ap sa ba lasak akegen. 69Nit en he, ninoe hat Ala okawerek hesik menhagalìk, eberogoat at en lakhagei wagaikomo ìlùk, hùthagagosik ninetaùken hat hoba hìpìrethogo o,” ìlùk atì'nogo yogosikomo, 70at en he, it mel yogoisasike:

“An nen hit hinebe 12 nen yì wenakhinapigi lek nogo? An nenat wenakhinapigi o. Meneat he, hat omakeat aike Ibilit meneat welagen o,” ìlùk yogoisasike. 71Wene atì'nogo isike atì re, ap Simon Isikariot aput etage Yùrat hesik isike. At ap atì ebe Yesùt agoromì inebe 12 nen amanogo meneat he, hobuk Yesùt ebe wasuagalùk yoko lagaike atì mane hesik isike atì.

Atualmente Selecionado:

YOHANET 6: LAIDNI

Destaque

Copiar