Isaías 9
9
King walanibis tunan batahndawi king kana kidika kulnin aslah lani kat
1Tatuna kau laih Papang yaklauwi Zabulón dawak Neftalí sauni Galilea kidika sau yakat lakpamna dai, Papang kukulwas saunina yaihnit kau dai kidika,#Mt 4:15. kidika sauni laih Jordán wasni nakas kaupak kuma kung kat; kaunah usnit kat ayangni nuhni dulauna dai.
2Puksani yak muih bangdai kidika
yaringni nuhni tatalna dai;
yaringni as kalahna dai
puksani kau bang kidika dinina.#Mt 4:16; Lc 1:79.
3Dawan, alasna nuhni as duaina man;
alasnina kidika laih nuhni palni ki.#9.3 Alasna nuhni as...palni ki: Hibru kau laih yulwi nisan kidika kalatang barakna, kauna alasnina kidika laih minitkau kalatasman.
Muih bitik man muhmat yakat alasna ki,
sihm di minik yayakwa mani kapat,
di minit nuhni as sahyakwi duduwa kapat.
4Kat man lawa warau lani kidik yakpamna man bahang
muih balna yak taihwi duwa dai kidika,
bahang kidika yulni kulninna bukwadai kidika,
king dutni yaklauwi ditaihwa dai kidika.
Sihm Madián kau daukalnaman dai kapat ki.#Jue 7:15-25.
5Kalbauyang muihni balna kalnina parasni lapapakwa dai kidika,
dawak praknina bik ā manah kahna dai kidika busna karang,
kuhpau yaklauwi buswi disyamna karang.
6Kat muihbin as batahndana bahang mayang akat,
Papang yaklauwi muihbin al as mayana,
bahang witing yakat parasni kalana king kana atnin.
Dawak adika ayangni balna kalalawarang:
warkni balna kidika yamni manah, Papang sip minitbayayakwas karang,
Papang ban kaput atnin, kulnin aslah lani kingni.
7Devid yalahwa pāni yakat yalahna karang;
witing king parasni kidika sau bitik yakat kiuna karang
dawak kulnin aslah lani kidika laih dahnkalwas karang;
witing king kāwa lani kidika laih yamni palni āna karang,
dawak rahni balna kidika laih la kat yamnin dawak muih rahmni kidika kalanin karang,
warmani kaupak ban kaput karang.#Lc 1:32-33.
Adika laih Dawan dalani lani daihni duwa kidika yaklauwi yamna karang.
Dawan kulnin daukalna Israel kingni niningkauh
8Dawan yaklauwi yul sihna Israel Jacob tawanni yakat;
9Efraín muihni balna bitik Samaria kau yalalahwa balna kidika
amanglalana karang.
Witingna manah kapat kaldakawi yuyulwi:
10“Ladrillos balna kidika bubukna,
kaunah kipala kau yamdarang.
Ani damni panan kapapat kidika uman rababutna ūnina yamna atnin,
kaunah suhun kau diadarang.”
11Dawan yaklauwi yamwak waihla yamadadangni#9.11 Waihla yamadangni: Hibru kau laih yulwi Rezín waihnila balna. kidika aina;
witing yaklauwi pakna niningna yakat kalbauna atnin.
12Makilwa niningkauh sirio balna kidika,
makawa kauh laih filisteo balna.
Takpas kasna as kapat Israel yakat dalpapamna.
Kaput kaunah Papang kulnin daukalna kidika bandai;
witing kidika ban niningna kauh yaklaunin yamwi.
13Kaunah muih kidika Papang yakat kiwas dai, wah kalawa bik;
Dawan parasni nuhni duwa yakat walwas dai.
14Kaput laih Dawan yaklauwi Israel yakat kalyamna
tinglau as kat laihwi mamahni dawak tunani dadakwa kapat,
pan pipihwa kapat.
¡Adika dini bitik ma aslah yamna dai!
15(Tunan kidika tanka laih, tatuna muihni balna dawak muihbararak balna,
mamahni kidika laih prapit balna alas manah sumamalwa dai kidika.)
16Tunan muihni balna yaklauwi yayamwakat adika tawanni ta didisna,
dawak tanina tuna as wawalna kidika didisna.
17Kidika bahang Dawan miniknakun ditalwas dai#9.17 Dawan miniknakun ditalwas dai: sara mani kau tingkau ulna kidika yakat kaput ulna ki. Hibru kau laih yulwi Papang witing laihwi duwas dai. wawahma yak,
kaput bik warau dawak tingmak yayal yakat bik.
Kat tawan muihni balna bitik dutni yayamwa dai bahang
dawakat yul babauwa kidika di dauh manah yuyulwa dai.
Kaput bahang Dawan kulnin daukalna kidika yamni kalwas dai;
witing kidika ban niningna kauh yaklauna.
18Kulnin dutni yaklauwi kaldaukalwi
sihm kuh yaklauwi wakal damasni kat buswa kapat
kaput bik asangpas kau pan nunuhni kidika bik buswi,
dawak wayauni balna kidika kalawakat mayakat purwi kil'kiwi.
19-20Dawan parasni nuhni duwa kidika kulnin daukalna
bahang adika sauni bitik laih dahlna sakki,
kuhpau yaklauwi tawan balna buswi;
witingna alas walaninabis muihni kakaswi;
dawak wirahnina balna yak miniknakun tatalwas ki.
Akat muih as witing laih dalwi kaunah yuh kidika ban ki,
kut yakat ūk sakkidika laih kaswi kaunah isning lakwas ki.
21Manasés yaklauwi Efraín yak kaldaukalwi,
dawak biriwi kalyamwi,
albupak kalpakwi Judá niningyak uiwi.
Kaput kaunah Papang kulnin daukalna kidika ban ki;
witing ban niningyakat yaklauwi.
Atualmente Selecionado:
Isaías 9: SUMU
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Biblia Sumo
Texto © Sociedad Bíblica de Nicaragua 1998
