Génesis 8
8
Dios jwai balawa öibajinö weina jawa
1Ja̧danö, Diosma omukwatijetö Noénöbi, okobe deinö Noékwö isowi okwa ju̧kwadönöbi. Jobadönö omukwatö webijetö Diosma jwa̧lȩ'epjo böjȩnö jwa̧lȩ'ewobö. Jejenö jwa̧lȩ'ewö jwai balawama tjo̧'omanö öibajijetö. 2Ja̧danö, niji okwatjö ojwiyo döaja̧bi 'dö̧ibajijetö, döökönö. Mölejȩbetjö o̧baja̧bi o̧bijökötö. 3-4Ja̧danö, jwai balawama tjo̧'omanö öibajijetö, ciento cinquentanö möle ichibenanö baibanö. Ja̧ mölema Noéma seiscientos a̧yo jelemutjö dujutaja ja̧wo̧dö bajalekwö diecisietenö möle juna̧lijetö. Ja̧ mölema isowima öbibajö mö'ösa'onö wamatijetö Ararat mikwi̧ o'ijutjö bakwa'onö.
5Ja̧danö, jwai balawama tjo̧'omanö öibajijetö isowima Ararat mikwa'onö wonö. Ja̧wo̧dö du̧ju̧tajanö ichibenanö baibaja̧ bajalekwö ja'yubeda ida̧ökö okobe jwiinö mö'ösa'iju bajalema öwawachijetö.
Noé pjiyuwanö köbebö weina jawa, jwai balawa öibajobö edobö
6Ikenama cuarentanö möle baibena Noéma po̧bebijetö otidinowi ja'ösa'doma. 7Po̧bebajo̧ ja'donö pjiyuwanö, cuervo mikwo̧nö köbebö webijetö Noéma jwai balawa okobe jwiinö öbibajö niji öwawachojobö edobö. Ja̧danö, köbebö weajökwe pjiyuwama okobe jwiinö köba̧löda köba̧lijetö böjȩnö jwai balawa öibajonö te'ada̧lö.
8Ikenama Noéma jelo̧nö, yunukunö köbebö webijetö, jwai balawa okobe jwiinö öbibajö niji öwawachojobö edobö. 9Jo̧kwaijayonö jo̧bama ina jwai balawa okwiökwe ja̧danö, böjȩ okobe jwiinö öwamatemi jwiiökwe, tjebachajijetö isowikwö, Noé a̧jowikwö. Ikenama Noéma ömamu i̧sebökwe wamatijetö yunukuma, Noé ömamunö. Ja̧danö, Noéma wamatajo̧nö tebatijetö isowi okwa.
10Ikenama jelemutjö dötölataja möle te'ada̧lajo̧ Noéma yemidanö köbebö webijetö yunukunöma isowitjö. 11Weajökwema yi̧benakwö ȩwa̧jijetö oliva söja, i̧ya̧nö pokwöja 'döbebajo̧ do̧ba̧lö e'ewö aponö. Jo̧kwaiökwe Noéma waisijetö, Jwai balawama ida̧ökö öibajabe, jö̧ba̧lö böjȩnöma. 12Ikenama yemidanö te'ada̧lijetö jelemutjö dötölataja möle. Ja̧ möle baledibajena yemidanö köbebö webijetö yunukunö. Yemidanö weajökwema tjebachajijökötö.
13Ja̧danö, ja̧wo̧ bakwo̧ öbaledaja̧ bajalekwö bakwöta möle baibena, ja̧ mölema jwai balawama öibajijetö böjȩnöma. Ja̧ baledena Noéma seiscientos un a̧yo bo̧ ji̧jetö. Ikenama Noéma mö muchekwado̧ kabebö lobijetö. Kabebö lobö edemi ida̧kö̧ niji öwawachajabe edijetö. 14Ja̧danö, kaebajemi tupakwöma ja̧wo̧ bakwo̧ luwo̧nö veintisietenö möle baledibajena jwai balawama tjo̧wi̧ okobe jwiinö öibajijetö böjȩnöma.
Dios Noénö weina jawa, isowitjö labebaduwi, jö̧ba̧lö
15Ikenama Diosma webijetö Noénö:
16—Noé, ökwö, kwilekwo, kwi̧tji̧mu, kwo̧jo̧li̧mu isowitjö labebaduwi. 17Ja̧danö, labebö a'dewaduwi okobe deinö ökwökwö ju̧kwibajadönöma, mö köba̧lö ju̧kwadönöbi, a̧ji̧kwakwawedönöbi, ju'wedö nijinö kwebachadönöbi, nijinö töbawadönöbi, böjȩnö ja̧nö idöda yebawö tjöba̧jekwachakobetjö̧— webijetö Diosma.
18Jejenö weiökwe Noéma labebijetö isowitjö, i̧tji̧mukwö ilekwokwö o̧jo̧li̧mukwö. 19Ja̧danö okobe deinö böjȩnö ju̧kwadö Noékwö ju̧kwibajadöma a̧ji̧kwakwawedöbi, ju'wedö nijinö kwebachadöbi, nijinö töbawadöbi, mö köba̧ladöbi bakwo̧nökwena, tjilekwokwena isowitjö labekwijadötö.
Noé Diosnö ösödö iyina jawa
20Latjebaja̧ ikena Noéma Isabenö Jo̧nö juwö iyawemi otidijetö. Otidajo̧ a̧jwi̧mutjö̧, Isabenö Jo̧nö iyawedötjö ju'wedönö bakwo̧nökwena do̧batö tjö̧kwölanö 'wi'wibijetö tjökwösobu ebawinö. 'Wi'wiawö̧nö juwö iyawena wa̧nö juwö iyijetö Noéma Isabenö Jo̧nö ösödö. Ja̧danö, mö köba̧lö ju̧kwadötjö Isabenö Jo̧nö juwö iyawedötjö ju'wedönö do̧batö bakwo̧nökwena juwö iyawena wa̧nö juwö iyijetö Noéma Isabenö Jo̧nöma ösödö.
21Ja̧danö, Isabenö Jo̧ Diosma Noé ujuwi̧ söinö 'dö̧ekwobe 'dö̧batö jö̧ba̧lijetö itedada:
—Yemidanöma lȩbebö wetökakwo̧sa niji suli̧ waekwobö, jojodö sulabenö omukwatö tjö̧ji̧ balekwa mikwama. Chöwaisawö̧ jojodönöma. La'akatjöda, tjemu tjö̧jemitjö̧ damö batjibanö sulabenö omukwatö ja̧badö. Jejenö tjö̧jijayonö yemidanöma lȩbebö wetökakwo̧sa niji suli̧ waekwinö. Ja̧danö, yemidanöma söbeböbi lotökakwo̧sa babe söbebö lotinanöma, okobe deinö böjȩnö 'yaba̧ladönö söbebö lobö— jö̧ba̧lijetö Isabenö Jo̧ Diosma itedada, söinö 'dö̧ekwobe 'dö̧atena.
22Ina jö̧ba̧lijetö:
—Böje ötjö chotidinöjema 'dö̧ibajenanö baibanö baikwö jobö webo̧sa: Jojodöma batjo junawa tjujunakwedö ja̧danö, batjo 'wiawa 'witjakwedö. Ja̧danö, tiyuwi̧bi, tubi̧bi, o̧babi, imiyamebi baledakobe. Ja̧danö, mölebi, yö̧tebi baledakobe. Böjȩma jejenö baledobö wetakwo̧sa böje 'dö̧ibajenanö baibanö— jö̧ba̧lijetö Isabenö Jo̧ma.
Atualmente Selecionado:
Génesis 8: WPC
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
©2021, All Rights Reserved
