Génesis 7
7
Jwai balawa okwatina jawa
1Jemi ikenama Isabenö Jo̧ma webijetö Noénö:
—Noé, chedemi böjȩnö ju̧kwadötjö ökwöda ötjö weti̧ a̧ja̧kwö ja̧jibo̧ma. Jo̧kwaitjö̧ wetakwö: Isowi okwa tebachi, kwilekwokwö, kwi̧tji̧mukwö, kwo̧jo̧li̧mukwö. 2Ja̧danö, a̧ji̧kwakwawedönö tebati, ötjönö kwabö juwö iyawedönötjö#7:2 · a̧ji̧kwakwawedötjö ju'wedöma Isabenö Jo̧ weinawö̧, jo̧banö juwö tjiyobö. Ja̧danö ju'wedönöma tjiyoböma weinokobe. jelemutjö du̧ju̧tajanö tjilekwokwenada. Ja̧danö, ju'wedö tekatawö̧, iyawedöböködötjöma tjilekwokwenada tebati. 3Ja̧danö, mö köba̧lö ju̧kwadönöbi tebati isowi okwa, jelemutjö̧ du̧ju̧tajanö tjilekwokwenada. Jejenö tebati Noé, okobe deinö tjuju̧kwibakwedönöma, tji̧tji̧munö yemidanö 'yatjebakobetjö̧— webijetö.
4Ina yöba̧lijetö:
—Noé, jelemutjö dötölataja möle baibena ojwiyo o̧binö wetakwo̧sa cuarentanö möle, cuarentanö yö̧te o̧bobö, jwai balawa okwatinö. Jejenö ötjö chotidinawö̧ jojodönöbi, ju'wedö böjȩnö ju̧kwadönöbi okobe deinö söbebö lotakwo̧sa— yöba̧lijetö Isabenö Jo̧ma Noénöma. 5Ikenama, Noéma okobe jwiinö Isabenö Jo̧ weaja̧danö a̧ja̧kwijetö.
6Jo̧bama seiscientos a̧yo bo̧ jijetö jwai balawa okwatinö baledena. 7Ja̧danö, Noé, i̧tji̧mu, ilekwo, o̧jo̧li̧mu isowi okwa tebachijadötö, ojwiyo okwati̧tjö ju̧kwibadöma. 8Isabenö Jo̧ Diosnö juwö iyawedöbi, ju'wedö iyawedöböködöbi tjilekwokwena Noé isowi okwa a̧jobekwö tebachijadötö, isowi okwa. Ja̧danö, mö köba̧lö ju̧kwadöbi, nijinö töbawadöbi tebachijadötö. 9Bakwo̧nökwenada tjilekwokwena tebachijadötö, Isabenö Jo̧ Dios weaja̧danö.
10Ja̧danö, isowi okwa tetjachaja̧ ikena jelemutjö dötölataja möle baibena jwai balawa ma jamatö okwatijetö böjȩnöma. 11Ja̧ o̧ba, Noé seiscientos a̧yo̧ ujuna̧lina o̧bama, ja̧wo̧dö du̧ju̧taja tjöbaledaja̧ bajalekwö diecisietenö möle baibena jwai balawa okwatijetö böjȩnöma. Niji 'wabachibö, ojwiyo niji okwatjö döi̧danö okwatibijetö. Ja̧danö, mölejȩbetjöbi nöobu o̧bijetö, jwai balawa okwatinö. 12Ja̧danö, ojwiyo o̧bijetö cuarentanö möle, cuarentanö yö̧te.
13Ja̧ möle, ojwiyo jamatö o̧bi̧ möle baibena Noé, i̧tji̧mu Sem, Cam, Jafet, ilekwo, o̧jo̧li̧mu isowi okwa tebachajadö a̧jijadötö. 14Ja̧danö, jobadökwö a̧ji̧kwakwawedö ju'wedö ju'wedöbi, ja̧danö, nijinö töbawadö ju'wedö ju'wedöbi, ja̧danö, mö köba̧lö ju̧kwadö ju'wedö ju'wedöbi tebachajadö a̧jijadötö. 15Du̧ju̧tajakwena 'yaba̧ladöma tebachijadötö isowi okwa Noé a̧jobekwö. 16Iso̧kwö isujukwö tebachijadötö Dios wei̧danö. Ja̧danö, okobe deinö tetjachaja̧ ikena Isabenö Jo̧da tumatijetö apjudema.
17Ja̧danö, tetjachaja̧ ikena cuarentanö möle cuarenta yö̧te baibanö ojwiyo o̧bijetö böjȩnö. Ja̧danö, isowima jwai balawa okwatonö la̧nöda li̧jetö jwai balawa wame. 18Jwiinö okwatibijetö jwai balawama böjȩnöma. Ajayinö okwajiemi o̧penönö okwatibijetö. Isowima jwai balawa wame li̧jetö jwai balawa okwatonö. 19Böjȩnöma jwiinö okwatobetjö̧ okobe jwiinö mö'ösa'ijuma jwai balawa okwa baibijetö, öwawökönö böjȩ ba̧kwemeachibanö. 20Yelösöda, mö'ösa'iju ju̧kwemitjö̧ bajalekwö jelemutjö dötölataja metros jenanö okwatijetö jwai balawama.
21Jo̧kwajabetjö̧ okobe deinö böjȩnö ju̧kwadöma debö 'yi̧jadötö. Jojodöbi, mö köba̧lö ju̧kwadöbi, a̧ji̧kwakwawedöbi, ju'wedö nijinö kwebachadöbi, nijinö töbawadöbi okobe deinö böjȩnö ju̧kwadöma o̧bibö wobijadötö. 22Okobe deinö tjo̧'wo̧nö emadöma debö 'yi̧jadötö. 23Isabenö Jo̧ma jejenö okobe deinö böjȩnö ju̧kwadönöma söbebö lobijetö. Ja̧danö, jojodönöbi, a̧ji̧kwakwawedönöbi, nijinö kwebachadönöbi, nijinö töbawadönöbi, mö köba̧lö ju̧kwadönöbi söbebö lobijetö Isabenö Jo̧ma. Noéda Noékwö isowi okwa tebachajadöda ju̧kwibijadötö. 24Ja̧danö, böjȩnöma ciento cincuentanö möle jwai balawa ma öibajökönö li̧jetö.
Atualmente Selecionado:
Génesis 7: WPC
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
©2021, All Rights Reserved
