MAK 4

N-ndumwa Tumanganjɛ iwɛ Bɛbɛrɛ

(Mat 13:1-9; Luk 8:4-8)

1Aka na ta atwa ofwugwo ụ'wụtụ ụlwatagwụ pi Jisus nụ ụpalanụ itekwu, iwɛbɛ po ge Jisus teni nụ ụhaŋtụ uko baa jɛjɛ, atwa ata kpaaŋ tuba tileni na cɛnjɛ to gwumwonu itekwu ɛtɛ. Bee kwuneneni aŋ iyi timbisogono.#Luk 5:1-3 2Bee mbisegeni aŋ iyi ifwugwo nu n-ndumwa tumanganjɛ, bɛɛ hiɛŋ aŋ.

3Hwulaga ma! Bɛbɛrɛ beni maa 'waŋtanga izɛgwu.

4Aka na tu baa 'waŋtanga izɛgwu ɛtɛ, inee ike 'waŋtagwụ nụ ụzalụ uhwaŋna, ibɛ po shanụnụ shɛ zhajɛ shee zenji iŋ shaa yɛ. 5Inee ike 'waŋtagwụ na cɛnjɛ ta atayɛ, no ofwo na cɛnjɛ ti inshi shi. Gunu ata yɛɛ unshɛ, ama cɛnjɛ kaa ti inshi shi. 6Aka na tu uwaŋna cɛ woo hwoŋzhinji iŋ, iwɛnɛ te tini ti ibɛ ti iri shi, ye hweteni. 7Inyɛ izɛgwu 'waŋtangwụ na ashashɛ esepi, esepi waŋnɛ ni ibɛ aa mɛcɛ iŋ, i meci shi o. 8Inyɛ izɛgwu 'waŋtagwụ na cɛnjɛ ti biye, yaa waŋnɛ, yaa 'yajɛ u'waba. Inee ike meci talacɛ, inee ike meci dupu-ne-eshe-umpwa, inee ike meci dipi-yebi.

9Nazhɛ ge Jisus hiɛŋ aŋ, Bụtụ na 'yajɛ acɛbɛ maa hwuga, ga hwuga.

Ecilo N-ndumwa ma ata Baa Manganjɛ

(Mat 13:10-17; Luk 8:9,10)

10Aka na ti ge Jisus vwɛ bwooko, ibɛ atwa na rungwutwonu bu, keeni eseshi-iyi ubwa umpwa-na-ba-eyebi, heŋteni bu ecilo n-ndumwa ma ata baa manganjɛ.

11Ge Jisus Jishijɛ aŋ, bɛɛ hiɛŋ, E hi peni iyi tusweci Cɛnjɛ-ta-tugwama ta Agwatana maa hi mepi iŋ, ama tuba o mbiso atwa tupohondo iyi elele nu n-ndumwa tumanganjɛ.

12Iwɛ maa okwo aa ngbaracɛ, kede a kwụbɛ,

iwɛ maa okwo aa hwụjɛ kede e eshiciji.

Shibwonu ɛ zhɛ a jɛshɛrɛga a zhagana

Agwatana maa gangana aŋ iwɛwɛ ya aba.#Ayiz 6:9,10

Ge Jisus Eshicigeni Aŋ Ecilo N-ndumwa ma ata ma Bɛbɛrɛ Baa Manganjɛ

(Mat 13:18-23; Luk 8:11-15)

13Ge Jisus heŋteni aŋ, bɛɛ hiɛŋ, Hi te mepi shi ecilo n-ndumwa mu ga Ngaa manganjɛ hŋ? Asha gana naa ɛhi zhɛ hia nda maa hi mepi ecilo n-ndumwa tumanganjɛ me elelee? 14Bɛbɛrɛ shɛ ụsụbwa bụtụ na ba ananga n-ndumwa ma Agwatana. 15Atwa na shɛmɛ sha aba shɛ sụbɛ ụzalụ uhwaŋna, aba shɛ atwa ata ee mbishi iwɛ ɛtɛ, aka na ta a hwụjɛ iŋ, ge Setan ba zhajɛ gunu ata ba vwaga iwɛ ɛtɛ ee ge mbishi aŋ. 16Atwa na shɛmɛ sha aba shɛ sụbɛ cɛnjɛ ta atayɛ, aba shɛ atwa ata ee mbishi iwɛ ɛtɛ, aka na ta a hwụjɛ iŋ, a lashɛga iŋ nu unyasa. 17Ama iwɛ ɛtɛ kaa zasa ikɛnyi na shɛmɛ sha aba tebiye o, ama ti yaa namɛ aka fwalaa, ibɛ ụbaụta keeni tɛshɛka tɛ zhaganɛ aŋ iwɛ n-ndumwa ma ata, gunu ata yaa njɛ aŋ ukwurishi, ee leyegeji. 18Atwa na shɛmɛ sha aba shɛ sụbɛ cɛnjɛ te esepi, aba shɛ atwa ata ee mbishi iwɛ ɛtɛ. Aka na ta a hwụjɛ iŋ, 19tɛtɛtaga ti iyi unyizo ga, ne eshe-iyi uduciya, keeni ukwedeyi maa a 'yaga inyɛ iyi teni na shɛmɛ sha aba, yaa mɛcɛ iwɛ ɛtɛ, i meci shi ya o. 20Atwa na shɛmɛ sha aba shɛ sụbɛ cɛnjɛ ti biye, aba shɛ atwa ata ee mbishi iwɛ ɛtɛ, ee leshiji iŋ. Ee meci, mo tu ko tu namɛ talacɛ, mo tu ko tu namɛ dupu-ne-eshe-umpwa mo tu ko tu namɛ dipi-yebi.

Ụsụtụla na Ee Shiyeni Tuta tu Umudu

(Luk 8:16-18)

21Ge Jisus heŋteni aŋ, bɛɛ hiɛŋ, A 'waŋnɛ suu hwuŋ ụsụtụla maa ee shiyeni uŋ tuta tu umudu, kwo kaa tuta to ogodo? Shɛ maa e peteni uŋ suu nu uteburu-ụsụtụla.#Mat 5:15; Luk 11:33 22Iyi elele nɛ ee sweci, ɛ zhɛ vwɛ iŋ jitoo ko caakwụ. Iyi elele nɛ kaa ee urigeni, ɛ zhɛ o ushigo iŋ jitoo ko tilɛɛ.#Mat 10:26; Luk 12:2 23Bụtụ be elele na 'yajɛ acɛbɛ, ga shɛlaga.#Mat 11:15; Mak 4:9

24Ge Jisus hiɛŋ aŋ, No shiyono ma iyi nɛ ahia hwuga eshe. Ne bimenji na ahia mangangana atwa iyi, nu bwa du ɛɛ zhɛ ma hi mangangana, ɛ zhɛ du a kaana.#Mat 7:2; Luk 6:38 25Bụtụ na 'yajɛ iyi, ubwa ɛɛ zhɛ a pananana. Ama bụtụ na zasa iyi, okwo inɛɛ nɛ baa ga 'yagawa ɛ zhɛ a lashɛga iŋ ni i'ɛlɛ ibwɛ.#Mat 13:12; 25:29; Luk 19:26

N-ndumwa Tumanganjɛ iwɛ Izɛgwu nɛ unshɛ Inɛɛ nɛ Kaa waŋnɛ

26Ge Jisus mbishi aŋ, bɛɛ hiɛŋ, Cɛnjɛ-ta-tugwama ta Agwatana tɛ shɛ gana bụtụ na ba 'waŋtanga izɛgwu na cɛnjɛ. 27Bu no woto malabụ nụ ụjita, bi nɛ zhinjɛ nu uwaŋna. Izɛgwu ɛtɛ tuba yɛ unshɛ, i na waŋna, ubwa kaa mepi shi gana na yaa nda ba. 28Cɛnjɛ ta unsa iyi ni ikɛnyi tuba. Hiiŋ, yɛ unshɛ, nazhɛ ya ta shifubo, nazhɛ ya mata, nazhɛ izɛgwu ibɛ ya na. 29Ama aka na ta tụ'walụ ti ibɛ tɛ nɛ ya, gunu ata agwuma ehilo ata bɛ vwɛ ya ufwuya,#4:29 ufwuya: Tɛjɛshɛrɛga tu ufwugwo ti hiɛŋ, iluwuzhe. asha tugwubo ti ci ya.

N-ndumwa Tumanganjɛ iwɛ Buzagwụ bu Mustad

(Mat 13:31,32; Luk 13:18,19)

30Ge Jisus heŋteni aŋ, bɛɛ hiɛŋ, Imbe kwuŋ ɛti zhɛ ta manga Cɛnjɛ-ta-tugwama ta Agwatana maa tụ sụbɛɛ? Kwo kaa n-ndumwa mu naa kwuŋ ɛti zhɛ ta manganganɛ tụ maa tụ sụbɛɛ? 31Tụ sụbɛ bụzagwụ bu mustad bu ko na 'nyanɛ uhwuri izɛgwu ye elele nɛ namɛ nu unyizo ga hwɛɛ. 32Ama aka na ta a bɛrɛ bụ, baa waŋnɛ ya bee hwuri iyi elele nɛ namɛ ni itimɛ ɛtɛ, harɛ yaa 'waŋ ya a'walụ a'wụtụ a'wụtụ. Ibɛ du shanụnụ sha ta tuhwurugwo nu uhwuŋnu ubwa.

33Nu n-ndumwa mu ufwugwo tumanganjɛ gana ga, ge Jisus mbishi atwa n-ndumwa ma Agwatana, gana na te e eri a hwuga. 34Ge Jisus mbishi shi aŋ iwɛ uzawa n-ndumwa tumanganjɛ o, ama tuba bɛ bwɛjɛ eseshi-iyi ubwa ecilo iyi elele ne tusweci.#Mat 13:34; Jon 16:25

Uvwugo Keeni Itekwu Hwujɛ-unu Jisus

(Mat 8:23-27; Luk 8:22-25)

35Aka na tụ ụrụmɛ shɛ jita ata, ge Jisus hiɛŋ eseshi-iyi ubwa, Hwure ti keshi ma hileniye. 36Ee genji ga ufwugwo wa atwa ata tileni, ee shepi Jisus nụ ụhaŋtụ, baa zhagajɛ na aba. Inyɛ ihiɛŋtu du zhagajɛ nu una aba. 37Eshigiri uvwugo ụ'wụtụ kwuni tɛnda, ibɛ po adanga o zwogono ụhaŋtụ, meni ma jala ụhaŋtụ tishino. 38Ama ge Jisus ni ikɛnyi ibwɛ tuba namɛ ne ekwunyi ụhaŋtụ boo woto malabụ nu utudu. Ɛɛ zhingicinjɛ bụ, ɛɛ hiɛŋ bụ, E-Bimbisegeni, ibi te shi suu tɛ ɛti zhɛ te ilono?

39Nazhɛ ge Jisus zhinjɛ, bee tezhigeni uvwugo ata, bɛɛ hiɛŋ itekwu, Nama saiiŋ! Gunu ata uvwugo ata hwuwowu, nazhɛ itekwu gwuriseni suu. 40Ge Jisus heŋteni aŋ, bɛɛ hiɛŋ, Iwembe po ahia nda inyɛsɛ i ci gana gaa? Asha hi ta zasa waa rishe-tɛtɛtana hŋ?

41Ibɛ po inyɛsɛ shɛ atwa ata duwa duwa, oo momo hoŋtongonu ɛɛ hiɛŋ, Gaaba na yaa? Tu uvwugo keeni itekwu a hwụjɛ-unu ubwa.

Atualmente Selecionado:

MAK 4: RBT

Destaque

Copiar