MAK 3

Bụtụ na U'ala Ubwa Hweteni

(Mat 12:9-14; Luk 6:6-11)

1Nazhɛ ge Jisus teneneni nu umwono Tụ'ụlwatagwụ nyajita; bụtụ bu ko namba nu umwono ata u'ala ubwa hweteni. 2Ee zweni Jisus igbɛtɛtɛ okwo bi zhɛ ba nɛnga bụ nụ Ụjita-ụhinjanụ, iwɛ maa a suyanɛ bụ ụshɛrɛya.

3Ge Jisus hiɛŋ bụtụ ata u'ala ubwa hweteni, Ishijɛ shikono na ashashɛ. 4Ge Jisus heŋteni atwa ata, bɛɛ hiɛŋ aŋ, Undwa leni suu maa bụtụ na nda iyi ibiye nụ Ụjita-ụhinjanụ okwo iyi iwɛ? Maa e bicinji suu bụtụ okwo maa a kwụnɛ?

Ee sumengenji bu. 5Aka na ti ge Jisus mbiyanganɛ aŋ ni isɛbwɛ ta amɛ ubwa hashɛganụ, iwɛnɛ ta shɛmɛ sha aba shɛ shɛshɛpanɛ. Bɛɛ hiɛŋ bụtụ ata, Ndarɛshɛnga u'ala bụ. Bee nderishinji uŋ ga, waa zhɛmananɛ.

6Afarisi keeni atwa Hɛrod#3:6 atwa Hɛrod: Aba shɛ atwa ata leni maa a 'wa Hɛrod ata ụ'wụtụ nu ugondu ushibu cɛnjɛ ta ata, maa ga shɛ ubwa i shɛ agwuma aba. beni gunu ata, aa njɛ ushaura iwɛ uhiuhiu Jisus gana na i shɛ maa a kwụnɛ bụ. (Mak 12:13.)

Ge Jisus Nɛnjɛ Atwa ofwugwo nụ Ụpalanụ Itekwu

7Ge Jisus gwuleneni nụ ụpalanụ itekwu abana ne eseshi-iyi ubwa. Atwa ofwugwo ụ'wụtụ bananjɛ nu Galili, tu Judia, aa 'wa bụ. 8Atwamwa bananjɛ du nu Jɛrusalɛm, ti Idumia, ti hileniye Jodan, ta shɛnguwa shɛ na shu rungwutwonu Taya keeni Saidụn, ɛɛ zhɛ pi Jisus, iwɛnɛ ta a hwụjɛ iyi nɛ baa ndangana kpaaŋ. 9Nazhɛ ge Jisus mbishi eseshi-iyi ubwa maa ga a shapɛrɛganɛ bụ ụhaŋtụ uko ugwumwa, iwɛ maa kede atwa ofwugwo ata na hwungwulangana bu o.#Mak 4:1; Luk 5:1-3 10Atwa elele na igwumɛgwumɛ ya pana ụbaụta, a fwụrụganɛ bụ, iwɛ maa e timengeni bu, iwɛnɛ tu baa nungwa atwa ofwugwo.#Mak 5:28,29,34; 6:56 11Aka na ta bụtụ bu ko na mpiala mụ wɛ mu namɛ na amɛ ubwa kwụbɛ Jisus, bee leyi nɛ ɛvwɛvwɛjɛ ubwa, baa uganɛ, bɛɛ hiɛŋ, Gabụ bɛ shɛ Yɛu ya Agwatana.

12Ge Jisus tɛtaganɛ mpiala ma ata mụ wɛ unu maa kede mɛ njɛ iyi nɛ maa atwa mepi bu o.

Ge Jisus Teri Atumwa Umpwa-na-ba-eyebi

(Mat 10:1-4; Luk 6:12-16)

13Ti Ge Jisus munji ni ishɛmɛ, baa mama suyananɛ atwa na baa jala nu uda ubwa, ɛɛ zhɛ pu bwa.#Mat 5:1 14Bee teri eseshi-iyi umpwa-na-ba-eyebi maa a nama nu bwa, [aba du boo po izeci maa atumwa],#3:14 boo po izeci maa atumwa: N-ndumwa ma ata mu zasaba na abayiburu oko. iwɛ maa bu na tumwangana aŋ utumwa, maa a na ananga du iwɛ ya Agwatana. 15Bee peneneni aŋ du ụhwada maa a na bacɛnga atumwa-ibiri.

16Nzeci me eseshi-iyi ata umpwa-na-ba-eyebi bee teri na: Ga Saimon (na bee keeni izeci ti ga Pita); 17ne Jemis yɛu Zɛbɛdi, ni yɛu-bino bwa ga Jon, (anaa na bee keeni izeci ta Bonejɛs, inɛɛ nɛ ecilo ibɛ shɛ Miaụŋ mu Uto,) 18na Andru, ne Filip, na Batolomu, na Matiu, no Tomas, ne Jemis yɛu Alifios, na Tadios, na Saimon bụtụ bi Kenan, 19keeni Judas Iskariot na senji bu ne tidere.

Ɛ Hiɛŋ maa Uhiu wa atumwa-ibiri Namɛ na Amɛ Jisus

(Mat 12:22-32; Luk 11:14-23; 12:10)

20Ti ge Jisus teni ni ihwɛ, ofwugwo ụ'wụtụ ụlwananụ, ibɛ po ee eri shi a ya okwo iyimɛyɛ.

21Aka na ta atwa ubwa hwụjɛ, aa zhajɛ maa e shepi bu, iwɛnɛ ta atwamwa hiɛŋ maa ba sụma-ụmpɛ.#Jon 10:20

22Aka na te embisegeni Undwa a na banɛ nu Jɛrusalɛm zhajɛ, ɛɛ hiɛŋ, Uhiu wa atumwa-ibiri namɛ na amɛ Jisus, asha tedure nu ukpahiŋ uhiu wa atumwa-ibiri baa bacɛnga atumwa-ibiri.#Mat 9:34

23Ge Jisus suyanɛ aŋ, baa manganganɛ aŋ n-ndumwa, bɛɛ hiɛŋ, Gana naa ge Setan eri ba bacɛnga Setan? 24Yaa shɛ cɛnjɛ-ta-tugwama tu ko tu mama sukakanụ, asha cɛnjɛ-ta-tugwa ta ata ti eri shi to shikono. 25Yaa shɛ kaa ihwɛ ike mama sukakanụ, asha ihwɛ ɛtɛ du eri shi yo shikono. 26Yaa shɛ ge Setan hwayɛgwa maa mama sukakana, boo momo bogwu, asha bi eri shi du bo shikono, asha ukwunanga ubwa ta ya. 27I zasa bụtụ na eri bo tono nu umwono bụtụ na yajɛ ukpahiŋ maa sugo i'wɛŋnɛ ibwɛ o, ti yaa shɛ shɛ aka na bee umpi tugwo bụtụ ata bu ukpahiŋ, nazhɛ bɛɛ zhɛ ba ala maa sugo i'wɛŋnɛ ibwɛ.#Ayiz 49:24,25

28Iwɛ-tɛkana Omo hi mbiso maa, ɛ zhɛ a gangana atwa iwɛwɛ ye elele nɛ aa nda keeni n-ndumwa mụ wɛ me elele mu na aa dumanga#3:28 aa dumanga: Kwo kaa aa dumangana Agwatana. 29Ama bụtụ be elele na ba dumangana Mpiala mi Tijilo n-ndumwa mụ wɛ, a zha shɛ a gangana bu kwukwuŋ. Ama n-ndumwa mụ wụmɛ bụ iwɛ iwɛwɛ ibwɛ unyizo-nom.#Luk 12:10 30Iwɛnɛ ta atwa oko hiɛŋ maa mpiala mụ wɛ mu namɛ na amɛ Jisus.

Bino Jisus, na Miaụŋ-mo-bino Bwa

(Mat 12:46-50; Luk 8:19-21)

31Nazhɛ bino Jisus, na miaụŋ-mo-bino bwa zhajɛ ee shikekeni no tupohondo, aa tumwanɛ butumwa maa a suyanɛ Jisus. 32Atwa ofwugwo ta kaa gɛgajɛ rungwutwonu Jisus, ee mbishi bu, ɛɛ hiɛŋ, Bino bu, na miaụŋ-mo-bino bu keeni angwụfwụ bụ#3:32 angwụfwụ bụ: Tɛjɛshɛrɛga ta atwa oko tu zasa angwụfwụ o. ye shikekeni no tupohondo a ma bu jalakaka.

33Ge Jisus jishijɛ aŋ ni iheŋtene, bɛɛ hiɛŋ, Gaaba shɛ bino mi, na miaụŋ-mo-bino mi keeni angwụfwụ mii? 34Ge Jisus mbiyanganɛ atwa ata gɛgajɛ u rungwutwonu bu, bɛɛ hiɛŋ, Bino mi, na miaụŋ-mo-bino mi keeni angwụfwụ mi na! 35Bụtụ be elele na ba nda ukwulana wa Agwatana, ubwa shɛ yɛu-bino mi, na bụngwụfwụ mi keeni bino mi.

Atualmente Selecionado:

MAK 3: RBT

Destaque

Copiar