MATIU 13

N-ndumwa Tumanganjɛ iwɛ Bufwashɛ na ba 'Waŋtanga Izɛgwu

(Mak 4:1-9; Luk 8:4-8)

1Gunu ụjita ata gbaa, ge Jisus beni ni ihwɛ, bee zhe baa jɛjɛ nụ ụpalanụ itekwu. 2Nazhɛ ufwugwo ụ'wụtụ ụlwatagwụ pu bwa, ibɛ po bee teni nụ ụhaŋtụ uko, baa jɛjɛ. Atwa ata kpaaŋ tuba shikekeni nụ ụpalanụ itekwu ɛtɛ.#Luk 5:1-3 3Bee mbishi aŋ iyi ifwugwo nu n-ndumwa tumanganjɛ, bɛɛ hiɛŋ, Bufwashɛ beni maa 'waŋtanga izɛgwu. 4Tu baa 'waŋtanga iŋ, ibɛ po izɛgwu ike 'waŋtangwụ nụ ụzalụ uhwaŋna, shanụnụ shɛ zhajɛ, shee zenji iŋ, shaa yɛ. 5Izɛgwu inyɛ 'waŋtangwụ na cɛnjɛ ta atayɛ, no ofwo na cɛnjɛ tu twa sụ, gunu ata yɛɛ unshɛ, iwɛnɛ ta cɛnjɛ ti inshi shi apata. 6Aka na tu uwaŋna cɛ, woo hwoŋzhinji iŋ; iwɛnɛ ti yaa zasa tini tu na ti iri tebiye. 7Izɛgwu inyɛ 'waŋtangwụ na ashashɛ esepi; esepi unshɛ du ni bɛ, aa mɛcɛ iŋ. 8Izɛgwu inyɛ 'waŋtangwụ na cɛnjɛ ti biye, inɛ ike meci dipi-yebi, inɛ ike meci dupu-ne-eshe-umpwa, inɛ ike meci talacɛ. 9Bɛɛ hiɛŋ, Bụtụ na 'yajɛ acɛbɛ ga hwuga.

Ecilo no Po ge Jisus ba Manganganɛ Aŋ N-ndumwa

(Mak 4:10-12; Luk 8:9,10)

10Ibɛ po eseshi-iyi Jisus zhe pu bwa, ɛɛ hiɛŋ bụ, Iwɛmbe po aba duma iwɛ na aba nu n-ndumwa tumanganjɛɛ?

11Ge Jisus jishijɛ aŋ, bɛɛ hiɛŋ, E hi peni maa hi mepi iyi tusweci nɛ namɛ na Cɛnjɛ-ta-tugwama ta azuba, ama e peni shi aŋ maa e mepi o. 12Bụtụ be elele na 'yajɛ iyi, ubwa ɛɛ zhɛ a pananana, nazhɛ bɛɛ zhɛ ba kaana ti'yaga te hwuleji. Ama bụtụ na zasaa iyi, okwo inɛɛ nɛ baa ga 'yagawa, ɛ zhɛ a lashɛga iŋ ni i'ɛlɛ ibwɛ.#Mat 25:29; Mak 4:25; Luk 8:18; 19:26 13Ecilo no po Ama duma n-ndumwa na aba nu n-ndumwa tumanganjɛ na: iwɛ maa a na ngbaraka, a zha shɛ kaa a kwụba, ɛ zhɛ na shɛlaga, a zha shɛ kaa a hwuga, a zha shɛ du e eshicigo.

14No ohiuhiu aba tigesere ta ata ga Ayizaya bigesere dumwa la ti sɛ, tu na ti hiɛŋ,

Tuhwuga ɛhi zhɛ hi na hwuga, hi zha shɛ kaa hie eshicigo;

tungbaraka ɛhi zhɛ hi na ngbaraka, hi zha shɛ kaa hia kwụba o; #Ayiz 6:9,10

15iwɛnɛ ta shihaŋsa sha atwa ga shi eshiciji shi iyi kakayɛ,

ibɛ po yaa 'yaganɛ aŋ ikɛnyi tuhwuga,

e utegeji shishe sha aba,

shibwonu shishe sha aba shi gɛ zhɛ sha kwụba,

ɛɛ gɛ zhɛ na hwuga du na shɛcɛbɛ sha aba,

ɛɛ gɛ zhɛ du e eshicigo na shihaŋsa sha aba,

nazhɛ ɛɛ gɛ zhɛ a jɛshɛrɛga-shihaŋsa sha aba

maa a zhajɛ pi mi, maa Ma nɛnga aŋ.

16Hi gwoje iwɛnɛ shishe shi hiŋ sha kwụba uhwaŋna, shɛcɛbɛ shi hiŋ du sha hwuga iwɛ.#Luk 10:23,24 17Iwɛ-tɛkana Omo hi mbiso maa, te egesere, ta atwa tiririri ofwugwo, ga jala maa a na kwụba iyi nɛ ahia kwụba, ama a kwụbɛ shɛ iŋ, maa a na hwuga du iyi nɛ ahia hwuga, ama a hwụjɛ shɛ iŋ o.

Ge Jisus Eshicigeni Eseshi-iyi Ubwa Ecilo N-ndumwa ma Bufwashɛ ata 'Waŋtanjɛ Izɛgwu Baa Manganjɛ

(Mak 4:13-20; Luk 8:11-15)

18Asha na hwuga ma ya ecilo n-ndumwa ma bufwashɛ ata 'waŋtanjɛ izɛgwu Ngaa manganjɛ. 19Aka na ta bụtụ be elele ba hwuga iwɛ Cɛnjɛ-ta-tugwama, bee eshicinji shi iŋ, bụtụ bụ wɛ ba zhajɛ ba vwa iwɛ ɛtɛ aa ga 'waŋtanjɛ na amɛ ubwa. Bụtụ gana ata ubwa shɛ ụsụbwa izɛgwu ɛtɛ 'waŋtangwụ nụ ụzalụ uhwaŋna. 20Bụtụ na amɛ ubwa shɛ ụsụbwa cɛnjɛ ta atayɛ, tu na aa 'waŋtanjɛ izɛgwu ɛtɛ, ubwa shɛ bụtụ na hwụjɛ iwɛ ɛtɛ, na kaa leshiji iŋ du gunu ata nu unyasa. 21Ama gana na ti iwɛ ɛtɛ zasa tini tu na ti iri tebiye na amɛ ubwa; yaa namɛ fwalaa, ụbaụta keeni tɛshɛka ti zhaganɛ bụ iwɛ iwɛ ɛtɛ, yaa njɛ bụ ukwurishi, bee leyi. 22Bụtụ na amɛ ubwa shɛ ụsụbwa cɛnjɛ te esepi, tu na aa 'waŋtanjɛ izɛgwu ɛtɛ, ubwa shɛ bụtụ na hwụjɛ iwɛ ɛtɛ, ama ahaŋsa ofwugwo keeni eshe-iyi iwɛ uduciya ti'yaga, teni na amɛ ubwa, ibɛ po baa shɛ ya ụsụnyasụ ni iwɛ ɛtɛ, bu 'weri shi ya tụ'walụ o.#Mat 19:23; 1 Timo 6:9,10,17 23Bụtụ na amɛ ubwa shɛ ụsụbwa cɛnjɛ ti biye, tu na aa 'waŋtanjɛ izɛgwu ɛtɛ, ubwa shɛ bụtụ na hwụjɛ iwɛ ɛtɛ, na kaa eshiciji iŋ. Ubwa shɛ bụtụ na 'weri tụ'walụ, mo tu ko tu namɛ dipi-yebi, mo tu ko tu namɛ dupu-ne-eshe-umpwa, mo tu ko kaa tu namɛ talacɛ.

N-ndumwa Tumanganjɛ iwɛ Okwudungwuru

24Ge Jisus manganganɛ aŋ sasana n-ndumwa mi nya, bɛɛ hiɛŋ, Cɛnjɛ-ta-tugwama ta azuba tɛ shɛ gana bụtụ bu ko na 'waŋtanjɛ izɛgwu ibiye ni itimɛ ibwɛ. 25Ama aka na ta atwa o woto malabụ nụ ụjita, nazhɛ bụtụ bwa bi i'ime zhe, baa 'waŋtanjɛ du izɛgwu yo okwudungwuru na ashashɛ iyimɛyɛ ɛtɛ, bee hwuri. 26Aka na ti iyimɛyɛ ɛtɛ waŋnɛ, yee meci, nazhɛ okwudungwuru ata banɛ ya caakwụ. 27Nazhɛ miaụŋ-mu-ugondu ma agwuma-ihwɛ ɛtɛ mi zhajɛ pu bwa, mɛɛ hiɛŋ bụ, Agwuma-ihwɛ, shɛ izɛgwu ibiye maa abụ 'waŋtanjɛ la ni itimɛ ɛtɛ bu? Ce ya tuba okwudungwuru banɛ ni bɛɛ?

28Bɛɛ jishijɛ aŋ, bɛɛ hiɛŋ,

Bụtụ-bi-i'ime njɛ iŋ.

Miaụŋ-mu-ugondu ubwa mi heŋteni bu, mɛɛ hiɛŋ,

Ba jala suu maa ta zha ta zaba aŋ?

29Bɛɛ jishijɛ aŋ, bɛɛ hiɛŋ, Awo, iwɛ aka na ahia zaba hwayɛ okwudungwuru ata, ɛhi zhɛ hi no togwu ti iyimɛyɛ ɛtɛ hi no mwo. 30Ganga aŋ ma hwɛɛ, uuwa i ci aka iyimɛyɛ tugwubo, na aka ata nazhɛ Ngɛɛ zhɛ mɛ hiɛŋ egwubi, Sutongono ma tugwo okwudungwuru ata hiiŋ, maa hi umpi aŋ eshi eshi maa hi hwoŋzhinji aŋ nu ulwa. Ama zwono ma iyimɛyɛ ibiye nu urubwu mu.

N-ndumwa Tumanganjɛ iwɛ Bụzagwụ bu Mustad

(Mak 4:30-32; Luk 13:18-19)

31Ge Jisus manganganɛ aŋ sasana n-ndumwa mi nya, bɛɛ hiɛŋ, Cɛnjɛ-ta-tugwama ta azuba tɛ shɛ gana bụzagwụ bu mustad bu ko, na bụtụ bu ko shepi, baa bɛrɛ ni itimɛ ibwɛ. 32Bụzagwụ ata kaa 'nyanɛ bee hwuri izɛgwu ye elele, ama aka na bee hwuwi uwaŋna hwɛɛ, bee hwuri ya iyi elele nɛ namɛ ni itimɛ ɛtɛ, baa shɛ ya ụ'wụ'wụ ụ'wụtụ, na shanụnụ sha patangana na a'wa'walụ ubwa.

N-ndumwa Tumanganjɛ iwɛ Ifucingɛ

(Luk 13:20,21)

33Ge Jisus manganganɛ aŋ n-ndumwa mi nya sasana, bɛɛ hiɛŋ, Cɛnjɛ-ta-tugwama ta azuba tɛ shɛ gana Ifucingɛ nɛ biyikwo bu ko shepi bee sweci ni inɛmɛ yo omudu atatụ, uuwa i ci aka na inɛmɛ ɛtɛ shɛŋ ya kpaaŋ ibɛ.#Gala 5:9

N-ndumwa Tumanganjɛ iwɛ Tisɛ ti Iwɛnɛ Bigesere Dumwa La

(Mak 4:33-34)

34Nu n-ndumwa tumanganjɛ, ge Jisus dumanjɛ iwɛ gɛ kpaaŋ na atwa ata. Bɛ jɛmɛ shɛ n-ndumwa me elele na aba uzawa n-ndumwa tumanganjɛ o.#Jon 10:6; 16:25 35Inɛ gɛ teni iwɛ maa iwɛ nɛ Bigesere ga Ayizaya#13:35 ga Ayizaya: Tɛjɛshɛrɛga tu ko tu zasa Ayizaya o. dumwa la sɛ, inɛ hiɛŋ,

Nu n-ndudmwa tumanganjɛ, Ngɛɛ zhɛ mu na dumanga n-ndumwa na aba,

N zhɛ mu na duma ya iwɛ iyi nɛ ee sweci la taa na aka na aa karɛ unyizo caakwụ.#Shɛzu 78:2

Ge Jisus Eshicigeni aŋ N-ndumwa mo Okwudungwuru ata baa Manganjɛ

36Ti ge Jisus genji atwa ata ofwugwo, bee teni nu umwono uko. Nazhɛ eseshi-iyi ubwa zhegeni bu, aa lụpɛ bụ, ɛɛ hiɛŋ, Iti eshicigeni kaa ecilo n-ndumwa ma ata mo okwudungwuru abu manganjɛ.

37Ge Jisus jishijɛ aŋ, bɛɛ hiɛŋ, Bụtụ na ba 'waŋtanga izɛgwu ɛtɛ ibiye, ubwa shɛ Yɛu Bụtụ. 38Itimɛ ɛtɛ i shɛ unyizo ga. Izɛgwu ɛtɛ ibiye i shɛ miaụŋ mɛ Cɛnjɛ-ta-tugwama. Okwudungwuru ata a shɛ miaụŋ ma bụtụ bụ wɛ; #Jon 8:44; 1 Jon 3:10 39bụtụ ata bi i'ime na 'waŋtanjɛ okwudungwuru ata i shɛ Ibiri. Aka iyimɛyɛ tugwubo i shɛ ukwunanga uwaŋnɛ ga. Egwubi ata a shɛ atumwa Agwatana azuba.

40Gana na te e sutengeni okwudungwuru ata hiiŋ, ee hwoŋzhinji aŋ nu ulwa, gabata du ɛɛ zhɛ a nda hwuŋ nu ukwunanga uwaŋnɛ ga.

41Yɛu Bụtụ zhɛ ya tumwanɛ hwuŋ atumwa ubwa azuba, aba zhɛ o sutongono hwuŋ iyi elele nɛ ya nda la atwa ukwurishi maa e becinji iŋ na Cɛnjɛ-ta-tugwama tu bwa, keeni atwa na untanganɛ shɛ undwa ubwa.#Mat 24:31 42Ɛ zhɛ o sugo aŋ, a 'waŋ aŋ nu ukwokwo ulwa; apata u'wo-tutwa keeni ene tiya namɛ. 43Nazhɛ atwa tiririri zhɛ na ta gana uwaŋna na Cɛnjɛ te Bishi ba aba. Bụtụ na 'yajɛ acɛbɛ, ga hwuga.

N-ndumwa Tumanganjɛ iwɛ Uduciya na Ee Sweci

44Cɛnjɛ-ta-tugwama ta azuba tɛ shɛ gana uduciya na ee sweci ni itimɛ, ibɛ bụtụ bu ko to ugbe, bee keeni uŋ tuswaka. Bee zhe bee senji iyi elele nɛ baa ga 'yajɛ nu unyasa, nazhɛ bee zhe boo so ya itimɛ ɛtɛ.

N-ndumwa Tumanganjɛ iwɛ Bukwambɛ bi Biye

45Cɛnjɛ-ta-tugwama ta azuba tɛ shɛ sasana gana bihinya bu ko na ba jalakaka bukwambɛ bi biye. 46Aka na ta bụtụ ata to bukwambɛ ata bi biye bụ 'wụtụ ugbe, bee hwuri bee senji iyi elele nɛ baa 'yajɛ, bee zhe boo so bu.

N-ndumwa Tumanganjɛ iwɛ Igwune

47Cɛnjɛ-ta-tugwama ta azuba tɛ shɛ sasana gana igwune nɛ ekwuzhi 'wɛŋ ni itekwu, nɛ imɛ ijɛnɛ gɛnɛgɛnɛ. 48Aka na ti yee shini, nazhɛ ɛɛ mbɛ iŋ nu uhaŋsa, aa jɛjɛ, ee zenji ijɛnɛ ibiye ee zweni no okwo aba, nazhɛ aa 'wɛŋ ya ijɛnɛ ɛtɛ teshi eshe beye. 49Gabata du yɛɛ zhɛ ya sha hwuŋ nu ukwunanga usara ga. Atumwa Agwatana azuba, zhɛ a zhajɛ o bogwu atwa awɛ na atwa tiririri, 50ɛ zhɛ o sugo aŋ, a 'waŋ nu ukwokwo ulwa. Apata u'wo-tutwa keeni ene tiya zhɛ a nama.

Iyi Ifwo ni Iyi Ingwụshɛ

51Ge Jisus heŋteni aŋ, bɛɛ hiɛŋ, Hi eshiciji yibwa ijɛ kpaaŋ hŋ? Ɛɛ jishijɛ bụ, ɛɛ hiɛŋ, Agwangwama, Iiŋ.

52Bɛɛ hiɛŋ aŋ, Biseshi-bi-iyi be elele na ee mbisegeni iwɛ Cɛnjɛ-ta-tugwama ta azuba, bɛ shɛ gana agwuma-ihwɛ nɛ bɛ vwɛ iyi ifwo keeni iyi ingwụshɛ nu umwono na boo zwono uduciya ubwa.

Atwa Nazarɛt Lacɛ Jisus

(Mak 6:1-6; Luk 4:16-30)

53Aka na ti ge Jisus hwuwi n-ndumwa mu ga tumanganjɛ hwɛɛ, nazhɛ bee beni apata.#Mat 7:28; 19:1; 26:1 54Bee zhe nu ụshɛpwụ na ee meci bu, bee mbisegeni aŋ iyi nu umwono wa aba u tụ'ụlwatagwụ. Yaa dama atwa na bee mbisegeni iŋ, ɛɛ hiɛŋ, Ce baa banɛ na ti'inta tu ga keeni ugondu ga ụrụhwajɛ ukpahiiŋ? 55Shɛ yɛu bishebi ata na maa? Shɛ bino bwa na maa ɛɛ hiɛŋ ge Meri, shɛ ohongwu ubwa na maa ɛɛ hiɛŋ, ge Jemis, no Josɛf, na Saimon, keeni Judas? 56Shɛ angwụfwụ ubwa na suu namɛ no tu epe hwɛɛ? Ce baa banɛ ya ni inɛ gɛ kpaaaŋ? 57Ibɛ po iwɛ nɛ baa jɛmɛ gwumanɛ aŋ.

Ama ge Jisus hiɛŋ aŋ, Bigesere 'yajɛ ụjɛrụma no ofwo elele, ama bụ zasa ụjɛrụma no ofwo na ee meci bu o.#Jon 4:44 58Ibɛ po baa njɛ shɛ ugondu ụrụhwajɛ ufwugwo apata, iwɛnɛ aa tɛtanɛ shɛ bụ rishe.

Atualmente Selecionado:

MATIU 13: RBT

Destaque

Copiar