MATIU 12

Iwɛ Ụjita-ụhinjanụ

(Mak 2:23-28; Luk 6:1-5)

1Na aka ata ge Jisus zhɛ tɛkashɛka ni itimɛ nɛ iyimɛyɛ te shikeni nụ Ụjita-ụhinjanụ we Eju. Imunɛ kaa gwụmɛ eseshi-iyi ubwa, ibɛ po aa cushanga ongbongbozu iyimɛyɛ ɛtɛ, aa shɛcɛma ni i'ɛlɛ, aa ya.#Undwa 23:25 2Aka na ta Afarisi kwụbɛ aŋ, ɛɛ hiɛŋ Jisus, Hioko, te eseshi-iyi bu a nda iyi nɛ Undwa leni shi maa bụtụ njɛ nụ Ụjita-ụhinjanụ.

3Ama ge Jisus hiɛŋ aŋ, Hi ta rɛcɛ shɛ suu iyi nɛ ge Devid njɛ la, medenji atwa na namɛ nu bwa, ti imunɛ gwụmɛ aŋ? #Liv 24:9; 1 Sam 21:1-6 4Gana na ti bee teni nu umwono wa Agwatana, baa yɛ ibrɛd tijilo nɛ undwa ge leni shi maa tu bwa, ta atwa na namɛ nu bwa a yɛ, semi onongbo kiri. 5Okwo hi ta rɛcɛ shɛ suu nu Undwa, maa onongbo na a nama nu Umwono wa Agwatana nụ Ụjita-ụhinjanụ we elele, a hashɛgana Ụjita-ụhinjanụ, ama e peni shi aŋ kaa n-ndumwa-tụwụma o.#Tɛrɛ 8:9,10 6Ama Mo hi mbiso maa, iyi nɛ kaa uhwuri Umwono wa Agwatana namba epe.#Mat 12:41,42; Luk 11:31,32 7Yaa shɛ ehi ge mepi ecilo iwɛ ɛtɛ, nɛ hiɛŋ, Inyɛmɛnyɛmɛ Ama jala, shɛ ụrụpɛ o, hi ga zha shɛ hia pana atwa na njɛ shɛ iyi iwɛ n-ndumwa-tụwụma o.#Hos 6:6; Mat 9:13 8Iwɛnɛ po Yɛu bụtụ, ubwa shɛ Agwangwama Ụjita ata ụhinjanụ.#Jon 5:1-18; 7:19-24; 9:1-41

Ge Jisus Nɛnjɛ Bụtụ na U'ala Ubwa Hwe

(Mak 3:1-6; Luk 6:6-11)

9Ti ge Jisus beni apata, bee teni nu umwono wa aba u tụ'ụlwatagwụ uko. 10Hioko, bụtụ bu ko namba apata na u'ala ubwa hwe. Ee unseni Jisus, ɛɛ hiɛŋ, Undwa leni suu maa a nɛnjɛ bụtụ nụ Ụjita-ụhinjanụ? Iwɛnɛ ta a jala iyi nɛ i shɛ maa a suyanɛ bụ ụshɛrɛya.

11Ge Jisus jishijɛ aŋ, bɛ hiɛŋ, Gaaba namɛ na ashashɛ hiŋ, na 'yajɛ ụgwụdụ uko gba, na shɛ maa ụgwụdụ ata ubwa leyi nu u'ibwa, i shɛ bi zha shɛ bɛ vwɛ ụŋ okwo nụ Ụjita-ụhinjanụụ? #Luk 14:5 12Shɛ bụtụ suu uhwuri ụgwụdụ? Undwa leni kaa maa bụtụ na nda iyi ibiye nụ Ụjita-ụhinjanụ.#Mat 10:31 13Nazhɛ bɛɛ hiɛŋ bụtụ ata, Ndarɛshɛnga u'ala bụ. Bụtụ ata nderishinji ga u'ala ubwa, waa zhɛmananɛ, waa shaananɛ gana una uyebi. 14Ama Afarisi beni, aa njɛ ushaura iwɛ uhiuhiu Jisus, gana na i shɛ maa a kwụnɛ bụ.#Mak 14:1; Jon 7:30; 8:59; 10:39; 11:53

Yɛu-ugondu nɛ Agwatana Meme Teleji

15Ti ge Jisus mepi iwɛ ɛtɛ, bee beni apata. Atwa ofwugwo ụ'wụtụ kaa 'wa bụ, baa nɛnjɛ aŋ hwɛɛ. 16Baa tɛtaganɛ aŋ unu maa kede e mbishi atwa iwɛ ubwa o, 17iwɛ maa iwɛ nɛ ga Ayizaya bigesere ata dumwa la sɛ, aka na bɛɛ hiɛŋ, 18Hioko ma, Yɛu mi ugondu, nɛ Ngee teri,

bụtụ mi na Omo lubo duwa, amɛ mi kaa lemi nu bwa tebiye.

N zhɛ mo urugono bu Mpiala mi mi

ubwa zhɛ ba shapɛrɛganɛ edenji ụshɛrɛya u tishiriri; #Ayiz 42:1-4

19bi zha shɛ ba nda ashamanjɛ o, bi zha shɛ kaa du ba ugana o;

za bụtụ zhɛ ba hwuga rụhwụŋ ru bwa okwo ni ihwɛŋnɛ o.

20Bi zha shɛ kaa ba hwaŋzhɛnga bininjidegbe na aa pɛpɛtanɛ o,

bi zha shɛ kaa bo 'woricingo buzuzu bụ ụsụtụla na ta bana nshikwo,

ama ubwa kaa zhɛ bɛ bɛcinjɛ ụshɛrɛya na zhɛ wa lasụ atwa.

21Izeci ibwɛ kaa edenji zhɛ a shɛlana.#Ayiz 42:1-4

Ɛ Hiɛŋ maa Ge Jisus ba Bacɛnga Atumwa-ibiri nu Ukpahiŋ Uhiu-ibiri

(Mak 3:20-30; Luk 11:14-23)

22Aa shapɛrɛganɛ Jisus bụtụ bu ko na butumwa-bi-ibiri namɛ na amɛ ubwa, na du lubeni, na kaa shaananɛ igwureni. Baa nɛnjɛ bụ, igwureni ɛtɛ dumanɛ iwɛ, baa kwụbɛ du uhwaŋna.#Mat 9:32,33 23Ibɛ po iwɛ ubwa dama atwa ata kpaaŋ, ɛɛ hiɛŋ, Shɛ Yɛu Devid na maa?

24Aka na ta Afarisi hwụjɛ iŋ, ɛɛ hiɛŋ, Shɛ bụtụ ga ba bacɛnga atumwa ga ibiri#12:24 atumwa-ibiri: Ibiri gembi shi ufwugwo, bwooko gba namɛ, ama bi 'yajɛ ya tuba atumwa a na baa tumwana, aba o tono na amɛ bụtụ maa a njɛ bụtụ ata ufwu tedure nụ ụngwụ na ee eri a patana bụ, gana ụmpɛ. Rɛjɛmɛ ra ata ɛtɛ hiɛŋ mbili kwo kaa mbiri ri teni shi cɛŋ o. o, semi tedure nu ukpahiŋ uhiu-ibiri, ibɛ baa nda iŋ.#Mat 9:34; 10:25; Jon 7:20; 8:52; 10:20

25Ti ge Jisus mepi shihaŋsa sha aba, bɛɛ hiɛŋ aŋ, Cɛnjɛ-ta-tugwama te elele tu mama sukakanụ kwo kaa tu momo bogotogwu, ti zhɛ ta sha gana ụshɛka. Kwo kaa ụshɛpwụ kwo kaa ihwɛ ye elele nɛ mama sukakanụ, yoo bogotogwu, ihwɛ ɛtɛ zha shɛ yo shikono. 26Yaa shɛ ge Setan ba bacɛnga Setan, boo bogotogwu, iwɛ maa bu na mama sukakana; asha gana naa cɛnjɛ-ta-tugwama tu bwa ti zhɛ to shikonoo? 27Yaa shɛ tedure nu ukpahiŋ uhiu-ibiri Ama bacɛnga atumwa-ibiri, asha tedure nu ukpahiŋ aba tuba miaụŋ mi hiŋ mi zhɛ ma bacɛnga aaŋ? Asha aba zhɛ a sha ya ajɛmɛ-ụshɛrɛya hiŋ. 28Ama yaa shɛ Ama bacɛnga atumwa-ibiri nu ukpahiŋ Mpiala ma Agwatana, asha Cɛnjɛ-ta-tugwama ta Agwatana ti zhajɛ ga pi hiŋ gom.

29Gana naa bụtụ be elele eri bo tono nu umwono bụtụ na 'yajɛ ikɛnyi, maa sugo i'wɛŋnɛ ibwɛ, ti yaa shɛ shɛ aka na bee umpi tugwo bụtụ ata bi ikɛnyii? Nazhɛ bee eri bo sugo ya i'wɛŋnɛ ibwɛ nɛ zweni nu umwono ubwa.

30Bụtụ be elele na zasa ne mi, asha ubwa ma n sukakana, bụtụ be elele na kaa m mbiyeni shi tusutongono, asha ubwa ba garataga.#Mak 9:40 31Mo hi mbiso iwɛ-tɛkana, maa ɛ zhɛ a gangana atwa iwɛwɛ ye elele, keeni n-ndumwa mụ wɛ me elele, ama bụtụ na ba dumangana Mpiala mi Tijilo n-ndumwa mụ wɛ, a zha shɛ a gangana bụ kwukwuŋ. 32Bụtụ be elele na ba dumangana Yɛu Bụtụ n-ndumwa mụ wɛ, ɛ zhɛ a gangana bụ, ama bụtụ be elele na ba dumangana Mpiala mi Tijilo n-ndumwa mụ wɛ, a zha shɛ a gangana bụ kwukwuŋ, okwo na aka ga, kwo kaa na aka ye te ci hwuŋ.#Luk 12:10

Ụ'wụ'wụ na Tụ'walụ tu Bwa

(Luk 6:43-45)

33Yaa shɛ ụ'wụ'wụ zhɛmɛ, u zhɛ du wa 'wala tụ'walụ tu na tɛ zhɛmɛ, ama yaa shɛ ụ'wụ'wụ zhɛshɛ, u zhɛ du wa 'wala tụ'walụ tu na tɛ zhɛshɛ. A mapa kaa ụ'wụ'wụ we elele na tụ'walụ tu bwa.#Mat 7:20; Luk 6:44 34Ahiɛba ụsụbwa miaụŋ me egbezhi, ahiɛba atwa awɛ, gana naa ehi eri hia duma iyi ibiyee? Iwɛnɛ tu unu bụtụ wa duma iyi nɛ ya gwuzhaga na amɛ ubwa.#Mat 3:7; 23:33; 15:18; Luk 3:7; 6:45 35Bụtụ bi biye bɛ bɛcinjɛ iyi ibiye, nɛ shini na amɛ ubwa ebiye, bụtụ bụ wɛ kaa du bɛ bɛcinjɛ iyi iwɛ, nɛ shini na amɛ ubwa awɛ.

36Iwɛ-tɛkana Omo hi mbiso maa, ụjita ụshɛrɛya ci hwuŋ, atwa zhɛ e sweji sasana n-ndumwa mu tɛgadaga me elele mu na aa dumwangwa la. 37Tedure nu n-ndumwa mu na aba duma, ɛɛ zhɛ ma bụ pana n-ndumwa-zhɛ, nu n-ndumwa mu na kaa aba duma, ɛɛ zhɛ du ma bụ pana n-ndumwa-tụwụma.

Afarisi A Jala Useyida

(Mak 8:11-12; Luk 11:29-32)

38Nazhɛ umeseyi uko na ashashɛ embisegeni Undwa keeni Afarisi oko, hiɛŋ Jisus, E-bimbisegeni, ta jala maa utu ndanɛ useyida uko maa ta kwụba.#Mat 16:1; Mak 8:11; Luk 11:16

39Ama ge Jisus jishijɛ aŋ, bɛɛ hiɛŋ, Uwaŋnɛ ga ụwɛ, keeni uwaŋnɛ ga wa nda tuwɛle, wa jala useyida, a zha shɛ kaa a ndana uŋ useyida we elele o, semi useyida iyi nɛ teneni la bigesere ata go Jona kiri.#Mat 16:4; Mak 8:12 40Gana na tu go Jona namɛ la na amɛ bijana ata bụ 'wụtụ, iwɛŋnɛ itɛtu keeni ijitɛ itɛtu, gobwonu du Yɛu Bụtụ zhɛ ya nama na amɛ ohwulu cɛnjɛ tu unyizo ga, iwɛŋnɛ itɛtu keeni ijitɛ itɛtu.#Jona 1:17 41Atwa Ninivɛ zhɛ a sukakana hwuŋ atwa uwaŋnɛ ga nụ ụshɛrɛya, ɛɛ zhɛ a pana uŋ n-ndumwa-tụwụma nụ ụjita ụshɛrɛya. Iwɛnɛ po aka na ta atwa Ninivɛ hwụjɛ la i'enenji Jona, aa jɛshɛrɛjɛ-shihaŋsa sha aba. Hioko ma, iyi nɛ kaa uhwuri Jona na namɛ epe.#Jona 3:5 42Agwuma-o-o na namɛ Tuta, zhɛ a sukakana hwuŋ atwa uwaŋnɛ ga nụ ụshɛrɛya, bɛɛ zha ba pana uŋ n-ndumwa-tụwụma nụ ụjita ụshɛrɛya. Iwɛnɛ tu baa banɛ taa dụlụ, baa zhajɛ maa hwuga iwɛ ti'inta ta agwuma Sụlụmụn. Hioko ma, iyi nɛ kaa uhwuri Sụlụmụn nɛ namɛ epe.#1 Shɛgwu 10:1-10; 2 Shɛrụ 9:1-12

Mpiala mụ Wɛ mu Gwuri ni Ihwɛ muba

(Luk 11:24-26)

43Aka na tu mpiala mụ wɛ mi beni na amɛ bụtụ, ma bana urungo no ofwo elele na zasa meni, maa mu to ụhinjanụ, ama aka na maa kwụbɛ shɛ. 44Nazhɛ mɛ hiɛŋ, N zhɛ ugwulwo ni ihwɛ mi ingwụshɛ nɛ Ngaa banɛ la. Aka na tu mee gwure, maa kwụbɛ maa ihwɛ ɛtɛ ibwɛ ta namɛ bohondo, yee te suji kaa shɛshɛshɛ, aa ta njɛ iŋ kaa du tisemberi. 45Nazhɛ mee zhe mee suje mpiala mụ wɛ mi nya mi cenje, mu na mu wumanjɛ mu hwuri mu, mee zhe mee teni apata maa jɛjɛ. Nazhɛ bụtụ ata wumanjɛ ya nu ukwunanga ubwa uhwuri umozhigo ubwa. Gabata du yɛɛ zhɛ ya shana hwuŋ atwa uwaŋnɛ ga ụwɛ.

Ge Jisus no Bino Bwa, Keeni Ohongwu Ubwa

(Mak 3:31-35; Luk 8:19-21)

46Aka na ti ge Jisus ta njɛ n-ndumwa na atwa ata ofwugwo, ibɛ bino bwa, no ohongwu ubwa shikekeni no tupohondo, aa jalakaka maa a dumanjɛ n-ndumwa nu bwa.#19:25-27 47Nazhɛ bụtụ bu ko na ashashɛ atwa ata hiɛŋ bụ, Hioko tu go nobu, no ohongwu bu#12:47 go nobu…No ohongwu bu: Abayiburu oko zasa buwala ga bu 47. shikekeni no tupohondo, aa jalakaka ohwolu maa a dumanjɛ n-ndumwa na bụ.

48Ge Jisus jishijɛ bụtụ ata mbishi bu iwɛ ɛtɛ, bɛɛ hiɛŋ bụ, Gaaba shɛ bino mi, no ohongwu mii? 49Bee sekeni eseshi-iyi ubwa u'ala ubwa, bɛɛ hiɛŋ, Bino mi, no ohongwu mi na namɛ epe! 50Bụtụ be elele na ba nda ụkwụlana Bishi mi na namɛ na azuba, asha ubwa shɛ buhongwu mi, na bụngwụfwụ mi keeni bino mi.

Atualmente Selecionado:

MATIU 12: RBT

Destaque

Copiar