Luke 10
10
Chapter 10.
1WAIGIEN adshi dlā Shalana ga kulat tlāale jikwau kenstaian, waigien lana wautliwon isgien, tliga wautliwon ai ishio il kāwong-ung-kasas ā stung-ā kōnastgang il kilistiidāngan.
2Waigien hin tla il shudaian, Tukwūlāeuon-gung, ga lthong-gwilasgai tlou gū-ḵutsū-gung; althji alth lth tukwūlā un nung Itlagadas alth kianung-ū, tukwūlas ā ung-a tla il kilistiidai una.
3Istiidūltha; ōch shū-wī lumado tl istiidaguns ging-an ū dalung lth isdaug.
4Dala gwau-ale isgien, āltliga ishin, stushgaga ishin lth gum isdang-wong; waigien dalung istalsdlu lth gum nung haada ā kil-lāung-wong.
5Waigien tliku nuh et ai-hun dalung isdsasdlu, Akwon lth gudung-ai dlaia adshi nai ā isdi, hin lth shu-tlagang-wong.
6Waigien nung gudung-ai dlaia git gu isisdlu, dalung gudung-ai dlai-e la ing-gu isisang; gum gu il isansdlu tlou, dalung gwī silthgang stīlthishang.
7Waigien gai nai ā swonan lth iswong, waigien dalung ga gin tl isdas ging-an lth tawong; nung lthong-gwilasdlu, giashougai unga il isdie las altha. Gum lth gut giāgūst nuh ai istalung-wong.
8Waigien tliku lana et ai-hun dalung isdsas gien, dalung tl isdsadasdlu, dalung hetgu gin tl isdas ging-an lth tā-wong;
9Tl sti gu isisdlu lth, tl-ligulthwong, Shanung-itlagadas, gia kingdomgai dalung un āanēl-gung, waigien lth hin tl shudawong.
10Waigien tliku lana et ai-hun dalung isdsas gien, dalung ga tl gwou-osdlu lth, keue ā isāwong,
11Waigien lth hin shū-wong, Dalung-gia ilnagai kōiē hun itil stai ga dsilthguts dalung hanltha etgai un wausta talung gīshūgung; waigien Shanung-itlagadas gia kingdomgai āanēlths un tl lth ung ūnshitwong, hin lth shū-wong.
12Gai shantlanai ai Sodom ilnagai un shing-idsas telg, gai ilnagai un shing-idsāashang dalung ga lth shugung.
13Chorazin, dung un gin ga lthwaugīgā-ashang! Bethsaida, dung un gin ga lthwaugīgāashang! dalung shu lthong-gwila euonda ijun ging-an Tyre isgien Sidon gu ishin ijasdlu, tlidleu-un tl gudung-ai stīlths gien, whausda tl giandilths gien, aiid ā tl kouons-gaia-hung-gung.
14Waigien tla tl ging-kilisalunsdlu, Tyre isgien Sidon un ishin shing-idsas telg dalung un shing-idsāashang.
15Waigien dā ishin, Capernaum, shatligai ā gu dung edaltl āash? hēt ga Hades ā dung tl isdāashang.
16Dalung kil nung gudunsdlu, di kil ū il gudung-gung; waigien dalung ga nung gwou-osdlu, di ga ū il gwou-gung; waigien di ga nung gwou-osdlu, di nung kilkaidun ga ū il gwou-gung, waigien hin tla il shudaian.
17Waigien ga tlāale jikwausgai gudan lā alth silthgang stēlan, Shalana, hants dāung-as hun dung kyē agunan itil kilth ging-an ēdung, waigien hin il shu-āwon.
18Waigien hin la il shudāwon, Sē-ā-ūlthda ging-an sha-tligai sta Satan dlū-īs lth keng-gun
19Sik isgien, scorpion ishin ing-gu tudul dungai un isgien, dalung telg nung kens gia dugwīgai wautliwon telg īshin dalung lth tl-dugwīāgun; waigien gum gin hun dalung un dāung-ung-ashang.
20Hants dalung kilth ging-an ets alth lth gum gudung-ung lādang-ū; sha-tligai gu dalung kyē kālung-as alth tl lth gudung-ung lādū, waigien hin la il shudāwon.
21Gai ashkoshgadai gut Hants Las alth il gudung-ai lāgan, waigien hin il shouon, Aung-a, sha-tligai isgien hēt-tligai ishin un nung Itlagadas, ga kutung-asgai isgien, gin un ga ūnshitsgai ishin sta adshi dung salgun gien, tl āḵutila dung kendagun sing dung ā lth kil-lāgung; āng, Aung-a; ā ū tliku etgai dung gwūlagun altha.
22Gin wautliwon di Aung di ga isdagun; waigien gum nung-hun nung Git-as un ūnshi-dang-gung, tlan il Aung swon-an-a; waigien gum nung-hun nung Aung-as un ūnshidang-gung, tlan il Git swonan la un ūnshidung, waigien nung-hun nung Git-as il kendas ū la un ūnshidung, hin il shouon.
23Waigien gyang disciplesgai gwī il kēaian gien, hin il shū-kwolthdaian, Gin dalung kens ga kensgai ū lāgung;
24Ga prophetga kwon isgien, ga king-ga kwon ishin, gin dalung kens kang-gai da gu-dang-an, waigien gum tl keng-ang-an; waigien gin dalung guduns gudung-ai da tl gu-dang-an, waigien gum tl gudung-ang-an, hin il shouon.
25Waigien nung king-gogung-lēga giāagan gien, il edē il kilkang-an, Nung Itlagadas, di hēnung-a-swonung-ai un gūshū lth isdāa-shang? waigien hin il shouon.
26Gushinu king-go-gung-ai ēdung? Gushinu dung lidida-tljū-ūjung? waigien hin la il shudaian.
27Waigien hin hanglthang il shouon, Gudung-ung shashkwau-hun alth isgien, althan-dang dlishkwau-hun alth ishin, dugwīgang wautliwon alth ishin, kwulthilang wautliwon alth ishin, Shalana Shanung-itlagadas dung kwō-yādie lāgung; waigien lthū-ung dung kwōyādas ging-an dung kwulth-īt tl nāans dung kwōyādie lagung, hin hanglthang il shouon.
28Dung kil-lthyetdang; ging-an lth et, waigien dung hēnung-āashang, waigien hin la il shudaian.
29Il las tlou il kendie da il gudang-andlu, Gīshdū di kwulth nung nas ijung? hin Jesus il shudaian.
30Waigien Jesus hin hanglthang shouon, Nung īlthing-a Jerusalem sta Jericho ā kāā-lan; waigien kwolthdālē-alung un il katlagan, waigien gin il giandas la sta tl isdas gien, la tl shkidang-an, waigien il kotulthdalsdlu la sta tl istīidan.
31Waudlu nung liplētga gai keu-e gut kāalan; waigien tlistleuon la il kang-andlu, la hanlthīt il kā-swonang-an.
32Waigien nung Levite-ga ishin ging-an ijan, tlistleuon un il katlagan gien, la il kang-andlu, la hanlthīt il kā-swonang-an.
33Waigien nung Samaria hāada hawun kāgundān, giāgu il is un il katlagan; waigien tlistleuon la il kang-andlu, la kalthshint il gwaulan.
34Waigien la un il katlagan, waigien il kosilas gwī tō isgien wineishin il giadāwon gien, lang-a il kiāwon; waigien gyang gin tīigagai gwau la il koudaian, waigien lthdanou-nai ai la il isdaian gien, duman la il kang-an.
35Waigien waudālēkw penny kēstung il isdaian gien, nung nuh-lēgas ga il isdaian gien, hin il shouon, Duman lth il keng-ung; ashgai telg lē gin dung hīlūdasdlu, tlistleuon silth-gang lth katlasdlu, dung ga lth shou-ashang, hin il shouon.
36Kwolthdālē-alung un nung katlagan un ga lthonulth istlagan-gai gīnasū la un kung-gudung-aiang dung gudung-gung? waigien hin Jesus il shudaian.
37La kalthshint nung gudang-an-a, waigien hin il shouon. Kaidltha, waigien lth ging-an wau, waigien hin Jesus il shudaian.
38Waigien hawun il istalūgundān, lana a il isdsāwon; waigien nung jada Martha hin kyāgan-kwulthgang il isdaian.
39Waigien dōn il dāgan, Mary hin il kyāgan; althunis Shalana hetgu kou-aian gien il kil lang-a il gudang-an.
40Martha tlou lthong-gwil-euon-an gien, il gudung-ai lthkwīdaian; waigien la un il katlagan gien, Shalana, di dōn di swonan lthong-gwildas gu gum alth dung ai-ū-ang-ūsh? di da lth il tlāadalth, hin il shouon.
41Waigien Shalana hin hanglthang il shudaian, Martha, Martha, gin kwon alth dung gudung-ai lthkwīdang.
42Gin swonshung swonan gu stalthīgā-gung; Mary gin las isdagun altha, waigien gum la sta isdiang-ashang, hin la il shudaian.
Atualmente Selecionado:
Luke 10: HAIDA
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
First published by the British and Foreign Bible Society 1891-1899.
