yohane 2

eabobonʉ no tovcongʉ ne kaana

1mohcu miteuhi, panto mo tovcongʉ to hosa to kaana ne ngalilaya. mo yonto ic'o 'o ino to iesu; 2ihe yaeza eho'a 'o iesu ho i'o tesisi ho poa no'upu hote eabobonʉ. 3cu soyʉpnga 'o emi, isi mi'usni to inosi 'o iesu ho yainca: <uk'anaci emihe.>

4yainca to iesu: <ino, teav'a 'ahʉhʉya poa peismi no cuma a'o. o'a mocu mo esmi na hie'u.>

5isi eutotaveiya to inosi 'o soskuskunu: <hoci panontesi poa hioaneni muu, maino e'esi ho hioa.>

6to ic'o mo yaa nomʉ ci kazu, lahe titha to couyutaya hola meecofkoya, 'omo macocono kazu la asonʉ se'conza no kinkina ci chumu 'o lasi yayo. 7isi mi'usni to iesu 'o soskuskunu ho yainca: <acʉha posngʉcngʉci no chumu si kazu.> ihecu hoyuhi to chumu 'o kazu, ho poa ngangcʉngcʉ. 8isi ivaha yainca to iesu: <'atec'u peelʉi sicngia, ho faeni to le'aʉt'ʉcʉ ta mo eabobonʉ.> ihecu a'ʉmta faeni. 9isi soetothomi tomo le'aʉt'ʉcʉ 'e isi poa tmuemi ci chumu, o'a isi cohivi na isi i'mizi ta emi (iheeno'so cohivi tamo sicngi ci soskuskunu), isicu eyoho'a 'omo faeva mevcongʉ ci hahocngʉ, 10mi'usni ho yainca: <'o mocmo mala conino auevahe tuyafa 'omo ʉmnʉ ci emi, totea ho lac'u soemamso 'o isi eho'a, tahecu tuyafa 'omo 'ohahe mafe. mainci osko ac'ʉha homo maica ho songacvahe 'emo ʉmnʉ ci emi!>

11na eni ohsi ahoza hioa to iesu ci po'e, ohsi hioa to hosa ta kaana ne ngalilaya. na eni isi pa'teni na psoevohngʉsi; 'o tesisi mo acʉhʉ tmaa'uzo to iesu.

12ataveisi ta hi'hioa tan'e, mo fiho to inosi, ohaesa ho ito tesi 'o iesu ho uhne kapenong, mo mipzohi to ic'o.

poa cofkoya to iesu 'o seiten

(matai 21:12-13; maluko 11:15-17; luka 19:45-46)

13tec'u mon'i esmi 'o meem'esa'o to couyutaya, mo uhne 'elusalemu 'o iesu. 14to coca to yafana to seiten, isi aiti panto mo mhino to 'uachumu, moatʉ'nʉ, hofoyu, panto mon'a yonto ic'o ho yupa meʉmeʉe to peisu. 15'o iesu micu mayo to teesi ho teyai eobaknana, peteoyafa to seiten 'o 'uachumu ho moatʉ'nʉ, popuya 'o pangka tomo meʉe to peisu, mo smoemo'ʉ to ceoa 'o peisu. 16isi ivaha mi'usni 'omo mhino to hofoyu ho yainca: <teopoya si macucuma, teav'a teyai 'oyona 'amamhimhino 'e seiten to amo'u!> 17ihe talʉa to tesisi 'o isi tposi to seiso ci e'e: <hamo, la'u ta'tipvonga 'e seitensu, mais'a isi hmoi co 'tohʉngʉ'u!>

18ihe tuocosi to masoso'ehti to couyutaya 'o iesu: <cuma na teko peelʉi poa aitneni a'mi ci po'e, tee soomei ho pano tonʉsu ho osko hioa 'e hi'hioa eni?>

19yainca to iesu: <hocimu eon'ozi 'e seiten, 'atec'o miteuhi, te'ocu peelʉi p'eyoveiya.>

20ihe yainca: <'e seiten eni. mo tomsʉptʉha unmʉ ho isicu petohʉya aepʉnga, teko peelʉi p'eyoveiya no miteuhi?>

21na a'ʉmtʉsi, 'e isi engha to iesu 'aisieno envonva 'e iachisi feango. 22ataveisi ne mohcu i'mi to mcoi ho smoevovei 'o iesu, ohe talʉa to tesisi 'e e'e eni, ihecu taa'uzva 'o seiso ho i'o e'e to iesu.

isi so'eusoya to iesu 'e 'tohʉngʉ ta cou

23nemo yone 'elusalemu 'o iesu ho no'upu tomo meem'esa'o, botngonʉ ci cou 'omo baito to isi hi'hioa ci po'e, cu taa'uzva 'o iesu. 24at'inghi 'o iesu o'aisi taa'uzva 'emo botngonʉ ci cou, maica ho isi amsʉ'eona cohivi 'e afu'u cou. 25o'a tesi nama totea no eʉsvʉti ta cou namo natʉ'ca na yu'ausna ta cou, maica isi so'eusoya 'e 'tohʉngʉ ta cou.

Atualmente Selecionado:

yohane 2: bsnfe

Destaque

Copiar