yohane 1

ceonʉ ta nsou

1auyusi no teyai 'e mouhpʉhpʉngʉ, mohcu la yayo 'e e'e. mo no'upu to hamo 'e e'e; 'e e'e 'aeno hamo. 2no soahoisi, 'e e'e mohcu no'upu to hamo. 3'o hamo isi ieni ta e'e ho teyai 'e aʉcʉcʉhʉ; aucunu ta ohsila hia mouyoyai, uk'a cimo coni ci isi o'te ieni ta e'e ho teyai. 4'e e'e 'aisieno i'mizi ta nsou, 'e nsou eni isi pafi no tiskova 'e yatatiskova. 5'e tiskova isi psoetiskovi 'e voecʉvcʉ, 'e voecʉvcʉ o'a la ahtu atpʉtʉ ta tiskova.

6panto cihi ci cou, zou yohane 'o ongkosi, isi popeoskuna to hamo ci soskuskunu. 7mo cmʉ'ho ho 'akasineni 'e tiskova, akoeva no poa tmac'ʉhʉ 'e cou ho ko'ko tmaa'uzo. 8'e iachisi o'a i'o tiskova, mate 'akasi to tiskova. 9'o tiskova ic'o zou a'ʉmtʉ tiskova, cmʉ'ho ta hpʉhpʉngʉ ho psoetiskovi 'e yatatiskova.

10yonta hpʉhpʉngʉ 'e e'e, 'o hamo isi ieni ta e'e ho teyai 'e hpʉhpʉngʉ, 'e yatatiskova nama ihe o'te honga. 11mo uhta iachisi hpʉhpʉngʉ, ihe o'te tiova ta iachiasi 'oahngʉ. 12at'inghi, namo afu'u tiou, 'ai'omoeno tmaa'uzo ci cou, isi afnasa fii no tonʉ ho teyai 'o'oko to hamo. 13'emo maica ci cou o'a mo i'mi ta natʉ'ca no ceoceona no hmuyu, o'amo i'mi no poc'ou ta cou, maezo o'amo h'unano i'mi no 'tohʉngʉ ta hahocngʉ ho yayo, mamo i'mi to hamo ho yayo.

14mo tmucou 'e e'e, no'ayumonʉ ta taicoto, nongcʉngci to mengumi ho so'emio. itocu aiti 'o psoevohngʉsi, 'e psoevohngʉ eni isi anana'va tanua to pecnia ci oko to amo.

15isi 'akasineni to yohane, moozoyʉ ho yainca: <e'usna to ic'o o'ula yainca: <<te ataveihe cmʉ'ho a'o, at'inghi mo taicinihe a'o; maica ho o'a mocu mo'u yayo, mohcula noyocʉ.>> >

16i'mi to atngasosi, mito tiou no mengumi, a'vinano la asngʉcva topuhngi no mengumi na mengumi. 17'o hamo isi ieni to moose ho epeaska 'o hoolicu. at'inghi 'o mengumi ho i'o so'emio, isi ieni to iesu kilisto ho cmʉ'ho. 18uk'amocu ci mosola baito to hamo, i'oc'o pecnia oko#<i'oc'o pecnia oko> panto h'unasi ci tposʉ noana'o isi yainca <i'omoc'o totiski to hamo ci pecnia>., 'ai'o moeno atva'esi natvopca to amo ci ic'o, isi paavi ho eyafa.

'akasi to letoonono yohane

(matai 3:1-12; maluko 1:1-8; luka 3:1-18)

19'e oi'isi zou 'akasi to yohane. ne mio, 'o couyutaya ta 'elusalemu ihe skuna 'o saisi ho i'o coulevi ho uhto yohane, tuocosi: <zou siyas'a suu?>

20o'amo bʉʉpsʉpsʉ no yut'inga to yohane, a'vinano esansana ho yainca: <ma'ic'oso kilisto a'o.>

21ihe tuocosi: <maeno siya suu? zoun'asi 'iliya?>

yut'inga to yohane: <o'as'a a'o.>

ihe ivaha tuocosi: <zou ic'o ci eyongensa?>

isi ivaha yut'inga: <o'asa'a.>

22ihe acnguha yainca: <eʉsvʉta a'mi, zou asansano siya suu, temia ko'ko evaha tomo smuhnu a'mi. teko iachia engha, zou siya suu?>

23isi titha to yohane 'o e'e to eyongensa 'izaya ho yut'inga, yainca:

'aeno a'o 'omo yonta maepuepuhu ho fihfihngau moozoyʉ:

ptusngʉcveni no tesi mia ci ceonʉ 'o nooe'oca!

24'o piyo ci ihe skuna to coufalisai 25tuocosi 'o yohane: <ho o'aeno kilisto na suu, o'a 'iliya, o'aeno h'unasi ic'o ci eyongensa, mainci mikoeno toonono?>

26isi yut'inga to yohane: <mi'o boemi ta chumu ho toonono; at'inghi panto mo bitaico muu, o'a imus'a honga. 27mo ataveihe cmʉ'ho a'o, o'ate mako 'aseolʉ ho ci'u yunga si sapieisi.>

28'e hi'hioa eni moso yuyafo to apihana to c'oeha to yolutan ci potaniya, 'aito isieno seolʉa no yoni toonono to yohane.

oko moatʉ'nʉ to hamo

29cu mivahi, isi teolʉi to yohane 'o iesu te emo'usnu, cu yainca: <aiti, oko no moatʉ'nʉ to hamo, tesi toonva 'e kuisi ta yatatiskova! 30'emo cihi eni. 'ai'o o'ulaeno yainca <<mo ataveihe cmʉ'ho a'o, at'inghi mo taicinihe a'o; maica ho o'amocu mo'u yayo, mohcula noyocʉ>> ci ic'o. 31o'aos'o honga taini; ho mi'o cmʉ'ho maitan'e, boemi ta chumu ho toonono, akoevano poa honganeni ta 'isolaelu na taini.>

32isi i'vaha 'akasi to yohane ho yainca: <os'o aiti 'o seilei mo mais'a hofoyu ho i'mi ta engʉca ho ohpueho, su'ta feango taini. 33o'a os'oc'o h'unasa honga taini. at'inghi 'omo smuhnu a'o ho boemi ta chumu ho toonono ci hamo isi mi'usni a'o ho yainca: <<osko aiti 'o seilei mo ohpueho, mo su'no feango no siya, 'aeno siya nate boemi no seilei ho toonono.>> 34os'ocu aiti, ko'ko te'ocu mi'usnu muu ho soomei na taini 'aeno oko to hamo.>

ahoi epei to tesi

35sucaefi 'o conohie, mo i'vaho yonto ic'o 'o yohane ho i'o mo yoso ci tesisi. 36isi aiti 'o iesu mo tocaefi, cu yainca: <aiti, oko no moatʉ'nʉ to hamo!>

37ihe talʉi tamo yoso ci tesi 'e e'e eni, cu to'ofeihni to iesu. 38mo tmaiezuhu 'o iesu, aiti homo to'ofeihni 'omo yoso, cu tuocosi: <cuma na temu 'ucia hioa?>

ihe yut'inga: <lapi, lako yonenu?> (<'e lapi> zou <sensei> 'o e'ausnasi.)

39yainca to iesu: <'atemueno usa ho aiti!> micu to'ofeihni to iesu, cu aiti 'o isi yoni, to hiesi ne mio micu no'upu to iesu. (ho mio moso asonʉ ma'hi4 no atavei no cohzona.)

40'omo cihi tomo tmalʉ to e'e to yohane ho to'ofeihni to iesu, zou ohaesa to saimong petelo ci 'antole. 41isi aueva i'ima 'o ohaevasi ci saimong. mi'usni ho yainca: <'aimzacu lʉa 'o misaiya.> (na e'ausna ta <misaiya> zou <kilisto>.) 42isicu hafa 'o saimong ho baito to iesu.

isi teochʉmi to iesu, yainca: <zou oko to yohane ci saimong na suu, te yainca kepa na teko ongko.> ('e kepa ho petelo mo totiski 'o e'ausnasi, zou <yakivayʉ> 'o e'ausnasi.)

eoho'a 'o fuili ho natanyo

43micu hucma, isi esvʉta no uhne ngalilayasoo to iesu. isi lʉa 'o fuili, isi mi'usni ho yainca: <to'ofeihni a'o!> ( 44'o fuili zou couposaita, mo cono you 'o 'antole ho i'o petelo.) 45isi elʉa to fuili 'o natanyo, mi'usni ho yainca: <i'o ohsi tposi to tposno hoolicu to moose ho i'o ohe tposi to eyongensa ci ic'o, imzacu lʉa. 'ai'oeno oko to yosefu, yane nazalo ci iesu.>

46isicu tuocosi to natanyo: <cumanamo ʉmnʉ cinte i'mi ne nazalo?>

yainca to fuili: <uhtan'e tekoeno aiti!>

47ne isi aiti to iesu 'o natanyo nemo emo'usnu, cu yainca: <aiti, na sico zou a'ʉmtʉ cou'isolaelu; o'amo ake'i moezʉezʉhʉ si 'tohʉngʉsi!>

48isi tuocosi to natanyo 'o iesu: <mainci osko honga a'o?>

yut'inga to iesu: <ne mikon'a noskufu to moezunge, o'amocu isi eyoho'a to fuili suu, os'ocu teolʉi suu.>

yainca to natanyo: 49<sensei, zou oko to hamo suu; zou honte ta 'isolaelu suu!>

50yainca to iesu: <mikon'asi maica ho os'oso eʉsvʉta suu, os'o teolʉi ne mikon'a noskufu to moezunge hocu tmaa'uzo? 'atenakola baito tote asuhcuhe meoisi ci hi'hioa tan'e!> 51isi ivaha mi'usni ho yainca: <te'o bumemeala eʉsvʉta muu, tenamu aiti te maavo 'e engʉca, 'o tensi to hamo te ohmi ta feango ta okocou ho yuavovei.>

Atualmente Selecionado:

yohane 1: bsnfe

Destaque

Copiar