މަންދޫބުންގެ މަސައްކަތް 12
12
އީމާންވެ ތިބި މީހުންނަށް އިތުރު އަނިޔާތައް
1މި ދުވަސްވަރު ހެރޮދު އަގުރިޕާ ރަސްގެފާނު އީސާގެފާނު ގަބޫލު ކުރާ މީހުންގެ ޖަމާޢަތުގެ ބައެއް މީހުންނާއި މެދު ވަރަށް އަނިޔާވެރިކޮށް ކަންކޮށް އެމީހުން ހައްޔަރުކޮށް ހެދިއެވެ. 2އީސާގެފާނުގެ މަންދޫބުންގެ ތެރެއިން ޔޫޙަންނާގެ ބޭބެ ޔާމިޒު ގަތުލު ކުރުމަށް ވެސް ހެރޮދު ރަސްގެފާނު އޭނާގެ ސިފައިންނަށް އަމުރުކުރިއެވެ. 3ޔާމިޒު ގަތުލު ކުރުމުން އެކަންތަކާ ބަނީއިސްރާއީލުގެ ބޮޑުން އުފާވެ ހިތްހަމަ ޖެހުނުކަން ހެރޮދުއަށް އެނގުމުން އޭނާ ޕަތަރަސް ވެސް ހައްޔަރު ކުރުމަށް އަމުރުކުރިއެވެ. އޭނާ ޕަތަރަސް ހައްޔަރު ކުރީ ފަހަނަޅައި ދިއުމުގެ ޢީދުގެ ދުވަސްވަރުއެވެ.#12:3 މިތާނގައި ގުރީކު ބަހުން ލިޔެވުނު އަސްލުގައި ލިޔެވިގެން ވަނީ މިއީ މިންޖުވުން ފާހަގަކުރާ ޢީދުގެ ދުވަސްވަރުގެ ތެރެއިން ކަމީރުނާޅާ ފިހޭ ރޮށި ނުވަތަ ބޯރޮށިކާ ހަތްދުވަހެވެ. 4ޕަތަރަސް ޖަލުގައި ހައްޔަރު ކުރުމަށް ފަހު އޭނާ ގާޑު ކުރަން ހަތަރު ސިފައިންގެ ހަތަރު ގުރޫޕެއް ބޭތިއްބިއެވެ. ހެރޮދު ރަސްގެފާނު ގަސްތުކުރީ އެޢީދު ފާހަގަކޮށް ނިމުމުން އާއްމުންގެ ކުރިމައްޗަށް ގެނެސް އޭނާޔާ މެދު ޝަރީއަތް ކުރުމަށެވެ. 5ޕަތަރަސް ޖަލުގައި ހައްޔަރު ކުރެވުމާއި އެކު އީސާގެފާނަށް އީމާންވެގެންވީ ޖަމާޢަތުގެ މީހުން އޭނާއަށްޓަކައި މާތްރަސްކަލާނގެ ކިބަފުޅަށް ހިތުގެ އަޑިން ކެނޑިނޭޅި ދުޢާ ކުރަމުން ގެންދިޔައެވެ.
ޕަތަރަސް ޖަލުން ސަލާމަތްކުރުން
6ޕަތަރަސް އާއްމުންގެ ކުރިމައްޗަށް ޝަރީޢަތަށް ނެރެވުނު ދުވަހުގެ ކުރީ ރޭ އޭނާއަށް އޮތީ ނިދިފައެވެ. އޭނާގެ ދެ ފަރާތުގައި ދެ ސިފައިން ފޯރިއަށް ތިއްބެވެ. އޭނާގެ ދެ އަތުގައި ވަނީ ހިލިހިލާ ވެސް ޖެހިފައެވެ. އަދި އޭނާ އިން ގޮޅީގެ ދޮރުމަތީގައި ވެސް ސިފައިން ފޯރިމަރަމުން ދިޔައެވެ. 7ދެން ކުއްލިއަކަށް ވިދުވަރެއް ފަދަ އައްޔެއް އެ ގޮޅި ތެރެއަށް އެޅިގެންދިޔައެވެ. އަދި މާތްރަސްކަލާނގެ ފޮނުއްވި މަލާއިކަތަކު އެތާނގައިވިއެވެ. އެމަލާއިކަތާ ޕަތަރަސް ހޭލެއްވުމަށް އޭނާ ގައިގައި ކޮއްޓާލާފައި ވިދާޅުވިއެވެ. ”އަވަސް ކުރޭ ތެދުވޭ.“ އެވަގުތު ޕަތަރަސްގެ އަތުގައިވާ ހިލިހިލާ ނެއްޓުނެވެ. 8ދެން މަލާއިކަތާ ވިދާޅުވިއެވެ. ”ކަލޭގެ ހެދުންލާ. ފައިވާނަށް އަރާ.“ ޕަތަރަސް މަލާއިކަތާ ވިދާޅުވި ފަދައިން ކަން ކުރިއެވެ. ދެން މަލާއިކަތާ ވިދާޅުވިއެވެ. ”ކަލޭގެ ސާލު ވެސް ގައިގައި އޮޅާލާ. އަދި އަހަރެންނާއި އެކު އާދޭ.“ 9ޕަތަރަސް މަލާއިކަތާ އާއި އެކު ދިޔައެވެ. ނަމަވެސް އޭނާއަށް އެމަލާއިކަތާ އެކުރެއްވި ކަންތައް އެއީ ޙަޤީޤަތެއް ކަމެއް ނޭނގެއެވެ. އޭނާ ހީކުރީ މިހުރިހާ ކަމަކީ ހުވަފެނެއް ފަދަ ކަމެއްކަމުގައެވެ. 10އެމީހުން އެތާނގައި ފޯރިއަށް ތިބި ސިފައިންގެ ދެބައި ވެސް ކަޑަތުކޮށް ދިޔައެވެ. އަދި އެމީހުން އެތާގެ ބޭރުގައިވާ ބޮޑު ދަގަނޑު ދޮރާށި ކައިރިއަށް އައުމާއި އެކު އެ ދޮރާށި އަމިއްލެއަށް ހުޅުވުނެވެ. ދެން އެމީހުން އެ ތަނުން ނުކުމެގެން ވަކިހިސާބަކަށް ހިނގާފައި ދިޔަތަނާ ކުއްލިއަކަށް އެމަލާއިކަތާ ޣައިބުވިއެވެ. 11ދެން އެވަގުތު ޕަތަރަސްއަށް މި ވާނުވާ އެނގިއްޖެއެވެ. އޭނާ އަމިއްލަ ނަފްސަށް ބުންޏެވެ. ”މިއީ ހަމަ ތެދެއް. މާތްރަސްކަލާނގެ އެކަލާނގެ މަލާއިކަތާ ފޮނުއްވާ އަހަރެން ހެރޮދުގެ ކިބައިންނާ އަދި ބަނީއިސްރާއީލު މީހުން އަހަރެންނަށް ދިނުމަށް ބޭނުންވި އަނިޔާއިން އެ ސަލާމަތް ކުރެއްވީ.“
12ޕަތަރަސްއަށް މި ވީނުވީ ގޮތް އެނގުމުން އޭނާ ދިޔަގޮތަށް ދިޔައީ ޔޫޙަންނާގެ މަންމަ މަރިޔަމުގެ ގެއަށެވެ. މި ޔޫޙަންނާގެ އަނެއް ނަމަކީ މަރުކުސްއެވެ. އީސާގެފާނަށް އީމާންވެގެންވީ މީހުންގެ ތެރެއިން އެތައް ބަޔަކު އެގެއަށް އައިސް ދުޢާ ކުރުމަށް ތިއްބެވެ. 13ޕަތަރަސް އެގޭ ބޭރުދޮރުގައި ޓަކިދިނުމުން ދޮރު ހުޅުވުމަށް އައީ އެގޭގައި ގެންގުޅޭ ރޮދާ އޭ ކިޔުނު އަންހެންކުއްޖެކެވެ. 14އޭނާއަށް ޕަތަރަސްގެ އަޑު އިވުމުން ވީ އުފަލުން ދޮރު ހުޅުވަން ވެސް ހަނދާން ނެތި ދުވެފަ ގޮސް ގޭތެރޭގައި ތިބި މީހުން ކާރީގައި ޕަތަރަސް އެ ގޭ ދޮރުމަތީ ހުރި ވާހަކަ ބުންޏެވެ. 15އެންމެން ބުންޏެވެ. ”ކަލޭ މޮޔަވީތަ؟“ ނަމަވެސް މި ކުއްޖާ ކުރުނުކޮށް އެހެން ބުނަމުން ދިއުމުން އެމީހުން ބުންޏެވެ. ”ތިޔަ ވާނީ އޭނާގެ މަލާއިކަތާ ކަމަށް.“ 16ޕަތަރަސް ހުއްޓާނުލާ ދޮރުގައި ޓަކިދެމުން ދިޔައެވެ. ދެން އެންމެފަހުން އެމީހުން އައިސް ދޮރު ހުޅުވިއެވެ. އަދި ޕަތަރަސް އެތާހުއްޓާ ފެނުމުން ހައިރާންވެ އަންތަރީސް ވިއެވެ. 17ޕަތަރަސް އެމީހުންނަށް އަޑުގަދަ ނުކުރުމަށް އިޝާރާތް ކުރިއެވެ. ދެން މާތްރަސްކަލާނގެ އޭނާ ޖަލުން ނެރުއްވި ގޮތުގެ ވާހަކަ އެމީހުންނަށް ކިޔާދިނެވެ. ޕަތަރަސް ބުންޏެވެ. ”ޔާމިޒު#12:17 މި އާޔަތުގައި ބައިމޭލުގެ ބަދަލުގައި މިފޮތް ލިޔެވިފައިވާ އަސްލު ބަސް ކަމުގައިވާ ގުރީކު ބަހުން ލިޔެވިފައި ވަނީ: ”ސަބަތުގެ ދުވަހު ހިނގަން ހުއްދަ އޮންނަ ދުރުމިނުގެ އަދަދެވެ.“ އާއި އެހެން އެންމެންނަށް ވެސް މި ވާހަކަތައް ކަލޭމެން ކިޔާދޭތި.“ ދެން އޭނާ އެތަނުން އެހެންތާކަށް ދިޔައެވެ.
18އަނެއްދުވަހު ފަތިހު ޖަލުގައި ފޯރިއަށް ތިބި ސިފައިންގެ މީހުންނަށް ޕަތަރަސްއަށް ވީނުވީއެއް ނޭނގި ކަންބޮޑުވެ ވަރަށްބޮޑަށް ހާސްވިއެވެ. 19ދެން ހެރޮދު ރަސްގެފާނު ސިފައިންނަށް ޕަތަރަސް ހޯދުމަށް އަމުރުކުރިއެވެ. ނަމަވެސް އެމީހުންނަކަށް ޕަތަރަސް ވީތަނެއް ނުހޯދުނެވެ. ދެން އޭނާ ޖަލު ބަލަހައްޓަން ތިބި ސިފައިންނާއި ސުވާލުކޮށް ތަޙުޤީޤު ކުރުމަށް ފަހު އެމީހުންނަށް މަރުގެ އަދަބު ދިނުމަށް ޙުކުމް ކުރިއެވެ. ދެން މިއަށް ފަހު ހެރޮދު ދުވަސްކޮޅަކަށް ޖުދެއާކަރަ ދޫކޮށް ގޮސް ކައިސަރިޔާގައި ހުއްޓެވެ.
ހެރޮދުގެ މަރު
20ޞޫރު އާއި ޞައިދޫންގެ ރައްޔިތުންނާއި ހެރޮދު އާއި ދެމެދުގައި ވަނީ ހަމަނުޖެހުން އުފެދިފައެވެ. ނަމަވެސް ޞޫރު އާއި ޞައިދޫންގެ ރައްޔިތުން ހެރޮދު ރަސްގެފާނާއި ސުލްޙަވުމަށް އެދި އައެވެ. އެއީ އެދެރަށުގެ މީހުން ކެއުމަށް ބޭނުން ކުރާ ހުރިހާ ގޮވާމެއް ގަންނަނީ ހެރޮދުގެ ވެރިކަމުގެ ދަށުގައި ވާ ސަރަހައްދުގެ ބިންތަކުންނެވެ. އެމީހުން މި ގޮތަށް ކަން ކުރުމަށްޓާކާ އެ ރަސްގެފާނުގެ ޚާއްސަ ވަޒީރަކު ކަމުގައިވާ ބުލާސްތުސް އާއި ވާހަކަދައްކާ އޭނާ އެމީހުންގެ ކޮޅަށް ޖެއްސިއެވެ. 21ދެން މި ބައްދަލުވުމަށް ވަކި ދުވަހެއް ކަނޑައަޅުނެވެ. އަދި އެ ކަނޑަ އެޅުނު ދުވަހު ހެރޮދު ރަސްގެފާނު އެ ރަސްގެފާނުގެ ޝާހީ ހެދުންކޮޅު ތުރުކުރައްވާ ވަޑައިގެން އެ ރަސްގެފާނުގެ ތަޚުތު ކޮޅުގައި އިށީނދެވަޑައިގެން އެމީހުންނާއި މުޚާޠަބު ކުރައްވާ ވާހަކަދެއްކެވިއެވެ. 22އެމީހުން ގޮވަން ފެށިއެވެ. ”ތިޔަބޭފުޅާ ތިޔަ ވާހަކަފުޅު ދައްކަވަނީ އިންސާނަކު ފަދައިންނެއް ނޫން. ތިޔަބޭފުޅާ ތިޔަ ވާހަކަފުޅު ދައްކަވަނީ ކަލާނގެއަކު ފަދައިން.“ 23ހަމައެވަގުތު މާތްރަސްކަލާނގެ ފޮނުއްވި މަލާއިކަތަކު ހެރޮދުއަށް ހަމަލާދިނުމުން އޭނާއަށް ބައްޔެއްޖެހުނެވެ. ދެން އޭނާގެ ހަށިގަނޑުގައި ފަނިތަކެއް އުފެދި ހަށިގަނޑު ހަލާކުވެ އެ ގޮތުގައި އޭނާ މަރުވެ ދިޔައެވެ. ހެރޮދުއާއި ދޭތެރޭ މި ފަދައިން ކަންތައް ވީ އެއީ އޭނާ މާތްރަސްކަލާނގެ ކިބަފުޅަށް ޙައްޤުވެގެންވާ ސަނާ އެކަލާނގެ ކިބަފުޅަށް ނުދީ އެ ސަނާ އަމިއްލެއަށް ލިބިގަތުމުންނެވެ.
24މާތްރަސްކަލާނގެ ބަސްފުޅުތަކާއި އެކަލާނގެ ދެއްވި ދިންނެވުމުގެ ޚަބަރުފުޅު ފެތުރެމުން ދިޔައެވެ. އަދި އެ ޚަބަރުފުޅު އަހާ އެކަލާނގެއަށް އީމާންވަމުން ދިޔަ މީސްތަކުންގެ އަދަދު އިތުރުވަމުން ދިޔައެވެ. 25ބަރުނައްބާސް އާއި ޝާއުލް ޖެރޫސަލަމުގައި އެމީހުން ކުރަން ނިންމި ހުރިހާ ކަންތައްތައް ކުރުމަށް ފަހު ޔޫޙަންނާ މަރުކުސް ގޮވައިގެން އަންތީޔޮކުއަށް އެނބުރި ދިޔައެވެ.#12:25 ބަރުނައްބާސް އާއި ޝާއުލް ޖެރޫސަލަމަށް ދިޔައީ އަންތިޔޮކުގެ އީސާގެފާނަށް އީމާންވާ މީހުންގެ ޖަމާޢަތުގެ މީހުން ޖެރޫސަލަމުގެ އީސާގެފާނަށް އީމާންވާ ޖަމާޢަތުގެ މީހުންނަށް ދިން ފައިސާގެ އެހީ އެ ޖަމާޢަތުގެ ވެރިންނާއި ހަވާލު ކުރުމަށެވެ.
Atualmente Selecionado:
މަންދޫބުންގެ މަސައްކަތް 12: ކމ
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© (Active), Wycliffe Bible Translators, Inc. All rights reserved.
