MATHI 4

Jisu Kemechu

(Mrk 1.12-13; Luk 4.1-13)

1 # Ibr 2.18; 4.15. Atsaghang yala Jisu mechu thsüle kesalina Aghamu na ma ssisen ayyikeshü wi wa. 2Jisu na ghanan jügha nu ghaja jügha kezi seng wi ma ghamaya. 3Tsaseng wi Atsaghang na ghonu ma wi khi, “No Anyiza Tsa lethu alon hathu ha kiza nu amesa ceng thsülo.”

4 # Aye 8.3. Isala Jisu na khineng, “Ntsawajüh na khiben, ‘Anyi na amesa ghena ketan hangya nten, isala Anyiza na kekhi jüh tsüdila nsenthu yishü.’ ” 5Tsaseng wi Atsaghang na Jisu ssinu Kemetha Nyunutiwa Jerusalem wi wa nu ma pi Kekinyijjen mili kemisi ntsa wi ben thsü, 6#Zak 91.11,12. nu ma wi khi, “Keujüla no Anyiza Tsa lethu, no ketanla ha wina penca cülo, kepaghenanye Ntsawajüh na khiben,

‘Anyiza na ma nyilothu kiza

nu no nonccaya thsüaben;

isanu nccü pi alonthu nkihheki thsüle kesalina

mathu kwen pi no pie yaben.’ ”

7 # Aye 6.16. Jisu na khineng, “Isala Ntsawajüh na hati la khiben, ‘Apvüwa n-Nyiza nmechu lalo.’ ”

8Tsaseng wi Atsaghang na Jisu ssinu ayikha kemisi ntsa kesü miwi ki nu ayyi wi kadiyyithu nu mathu kemehai tsüdi pi ma ccüca, 9nu ma wi khi, “Keujüla no nkhutsüdula hi kinyi lethu hi ha tsüdi pi no cüaben le!” 10#Aye 6.13. Tsaseng wi Jisu na khineng, “Satan, bvülo! Ntsawajüh na khiben, ‘Apvüwa n-Nyiza kinyi nu ma kekuli ketan salo.!’ ”

11Tsaseng wi Atsaghang na Jisu teshia; nu tangnyilothu na gho ma nonccaya.

Jisu na Galilee wi Kekuli Kesashhu

(Mrk 1.14-15; Luk 4.14-15)

12 # Mat 14.3; Mrk 6.17; Luk 3.19,20. Jisu na nyu Johan ghan pi atssüzüjjen wi chidha le kesa zakeya seng wi ma Galilee wi wa. 13#Jhn 2.12. Ma Nazareth wi nbenla wa Zebulun nu Naftali yyi wi Galilee Ghajü kete anyuti kesü Kapernaum wi hang wa. 14Hawa ha Isa atusenjüh-kechüwa na khi ketheng tsü ntsakhiwa sacenya thsüle kesalina sa:

15 # Isa 9.1,2. “Zebulun nu Naftali yyi,

atssükedone wi kewalen miwi,

Jordan na khhakawa,

Galilee, Judah nyi nkenyethu yyi!

16Anyi kejang wi kahangthu na kewegü keti kesü muyaden.

Kewegü tsüna anyi kejang keshü yyi wi kahangthu wegü cüden.”

17 # Mat 3.2. Tsü nten na Jisu na jühkemehaiwa khi pi nyu sansishu: “Nthu kesami wina leben khapeghe yalo, kepaghenanye tang Kadiyyi na tetsakidha le!”

Jisu na Angakaghanthu Mejü Cikeya

(Mrk 1.16-20; Luk 5.1-11)

18Jisu na Galilee Ghajü ghüsa wi kegoe keten wi ma angakaghan cünyunyi keni Simon (Pitor le ci ketenwa) nu ma cünyuwa Andria manyi na kaghanthsü sen nu aghajü wi anga ghan keten muya. 19Jisu na manyi wi kiza, “Hi nie ghalo, hi nshinyi sansi pi anyi kaghan sa thsüden.” 20Tsümeyi manyi na kaghanthsü tsü teshi theng nu ma nie wa.

21Ma tsümiwi wha nan cünyunyi kepa wi Zebedee tsa James nu Johan manyi muya. Manyi na manyi ba Zebedee gweghe ahun wi ben nu mathu kaghanthsü tsü noncca ben. Jisu na manyi cichi nan, 22manyi na wan manyi ba nu ahun tsü teshi theng nu ma nie wa.

Jisu na Nyu Sansi nu sa pi Mehaikecü

(Luk 6.17-19)

23 # Mat 9.35; Mrk 1.39. Jisu na Galilee tsüdi wi wa sinagogthu wi nyu zhüsansi, Kadiyyi cüki Ajühkemehaiwa pi khisansi, nu anyi khuma-khujü kepapa pvü keten nu kesakinaathu tsüdi sa pi mehai cü. 24Ma cüki tsüna Siriya diyyi tsüdi wi la pong kesalina anyithu na kesakinaathu, khuma-khujü kepapa pvünu ketizen sa kebenthu tsüdi; anyi atsaghang ssi keten, nu kezumathu, nu kecügüshü ssinu ma wi gho, Jisu na tsüdila sa pi mehai cü. 25Anyitenti keti na Galilee nu Anyunuti Tagha, Jerusalem, Judea, nu ayyi Jordan khhakawa wina ma nieden.

Atualmente Selecionado:

MATHI 4: RENGNBSI

Destaque

Copiar