MATHI 2

Nishuwa na Hhainan Keghothu

1Herod na kadimi sa keben tsü wi Judea wi Bethlehem nyuti wi Jisu pvüghaya. Tsü tsüwi anyi pahan ghotsi cüki kesithu na nishuwa na Jerusalem wi gho, 2nu keü, “Judah nyithu kadimi sa keten pvügha keben atsawa tsüna khiewa ben nu? Ikhang na nishuwa ma ghotsi tsü muya nu hewi ma kinyile ghoben le!”

3Kadimi Herod nu Jerusalem wi anyi tsüdila ha cüki zakeya wi amansa. 4Herod na keqhaikedithu nu Ayenkesansithu tsüdila cighu chi nu mathu wi, “Messiya tsü khiewa pvügha ben nu?” tsüti keü. 5Mathu na ma wi, “Judea wi Bethlehem nyutiwa wi tsüle” kiza. “Kepaghenanye atusenjüh-kechüwa na hati zhütheng:

6 # Mik 5.2. “Judah yyi wi Bethlehem,

no mang jjügi wi la Judah nyutithu jawi kizza ntsawa nyedha;

kepaghenanye no wina accüli sa,

nu inyi Israel lenketsütsonwa na shhugho den.”

7Tsalina Herod na nishuwa hhainan keghothu tsü cichi pi kuthila keccünengli nu mathu wi ghotsiwa tsüna kusi shhugho khe mehaitsü chüya. 8Tsaseng wi ma kecükegwe ha pi mathu kiza nu kesun pi Bethlehem wi wa thsüa: “Nthu wala mehaitsü ghanyiwa tsü bha nanlo, nu nthu na ma muya lethu pi hi la chü thsülo, isanu hi la wa ma kinyi na.”

9-10Isanu mathu na wa nan alenca wi kishi nishuwa kemu ghotsi tsü mu nengya. Mathu na tsü mukeya wi mathu nonghe ntsa saya. Tsüna wala ghanyiwa kejentan wi npi kengan chu mathu tu sala wa. 11Mathu na wa ajjen wi du, ma jja Maria na ma tsa pie keben kemu wi mathu na akhhutsüdu ma kinyi. Mathu na aju suna, frankinsen nu mirr sengho ma cü.

12Tsaseng wi mathu na alen kepawa na mathu diyyi wi wha neng, kepaghenanye Anyiza na mathu Herod wi nwha neng lalo kesa aman wina mathu kitsanchidha.

Ejipt wi Bvü wa

13Mathu kebvü seng wi Apvüwa na nyilo kesü kesun pi aman wina Josef wi gho nu ma kiza thsü, “Herod na atsawa pathiale kesalina ma bha ghoben. Tsalina shagha atsawa nu ma jja manyi ssiya nu Ejipt wi bvülo, nu hi no npi kekiza chu ciwi benlalo.”

14Josef na shagha atsawa nu ma jja manyi ssiya nu aghaja na Ejipt wi bvüa, 15#Hos 11.1 nu Herod npi keshü chu ma ciwi ben wa. Hawa ha Apvüwa na atusenjüh-kechüwa wi, “Hi Ejipt wina itsawa cishi yaben” khi ketheng tsü atsentsa sacenya thsüle kesalina sa.

Ghanyithu Kepathi

16Herod na nishuwa ghotsi kesithu na ma mechudha kesa chükeya wi ma lebenminu ntsa sa. Bethlehem nu tsü kevü wi ghanyithu amapi keni nu tsü cakhu wi tsüdila pathilo kesa ma ahza khuchia — hawa ha ma ghotsi kesithu wi chükeya kusi ghotsiwa tsü muya khe tsü kenie wina sa.

17Hatinu ntsakhiwa atusenjüh- kechüwa Jeremiya na kekhi tsü sacenya thsüa:

18 # Jer 31.15. “Rama wi ahhai kesü zaya,

tsüna qai ntsa kesa hhai.

Rachel na ma tsangathu ghena qaiben;

nyu ma leben saketecca tsü meya mvu,

kepaghenanye mathu na shüdha.”

Ejipt wina Keghoneng

19Herod keshü seng wi Apvüwa nyilo kesü Ejipt wi aman wina Josef wi gho 20nu khi, “Shagha atsawa nu ma jja manyi ssiya nu Israel yyi wi wha nenglo, kepaghenanye atsawa pathiale kesathu na shüdha.” 21Tsalina Josef na shagha atsawa nu ma jja manyi ssiya nu Israel yyi wi wha neng. 22Isala Josef na Arkhelau na ma ba shiwa sa Judah wi kadimi sabenle kesa zakeya wi ma ciwi wha messiya. Kheneng aman wina ma kecükegwe chi kesalina ma Galilee yyi wi wa, 23#Mrk 1.24; Luk 2.39; Jhn 1.45 nu anyuti kesü Nazareth witsü hang wa. Tsalina atusenjüh-kechüthu na khi ketheng “Ma pi Nazareth nyile ciden” kesa tsü ntsakhiwa sacenya.

Atualmente Selecionado:

MATHI 2: RENGNBSI

Destaque

Copiar