ZEKARIA 4
4
Tsemin Ki Mahkenben Bin Kehyu
1Azen kenthon kebin tsangge lo gü le niryü ale jü kebin akesun keshü hontse shü. 2“Nle nyu hyu bin nla?” tse a ketsoshü.
“Suna pe kethyü mahkenben bin nme le” tse ale zoshü. “Terzü khun nme le a-ra ge bin. Mahkenben bin ge mahkenben tsenyü le bin, nme me ge mahkenbenni le bin kü. 3Oliv bin kenyhun le mahkenben bin khoka bin, tsü te lizin hizin.” 4Tsontsin ale tsangge lo gü ketsoshü, “Hile a-kon le nyuo la? Kegagü.”
5“Nle shamvu ole?” tse a-le a ketsoshü.
Ale a-jokenio, “Ale shamvu le, kedagü.”
10bTsangge lo gü le aka zoshü, “Mahkenben bin tsenyü tsüle, kazü aphu hyu kehü Npugü yhütyü le.”
11Tsüselo ale a-ketsoshü, “Oliv bin kenyhun le mahkenben bin lizin hizin kebin tsü le a-kon le nyula? 12Lo suna züpun kenyhun nyu oliv terzü le tsun kebin khoka oliv sen ro kenyhun le kebin tsüle a-kon le nyula?”
13“Nle shamvu ole?” tse a-le a ketsoshü.
Ale a-jokenishü, “Ale shamvu le, kedagü.”
14Tsüselo a-le aka zoshü, “Temi hihvu hile kazü apentha nyu Npugü Sunggigü le a-lothyü titse kejü lo-o terzü pe yün lo kela hvule.”
Sunggigü le Zerubbabel Ka Zoshwikeshü
6Tsangge lo gü le ano Npugü kanyu jolo higü pe Zerubbabel tsü shü lotse zoshü: “Nle rihüdan kekvu, nmvue n npfü nkekvu nyu loho, ai a Kapu nyu kvu loti. 7Nmhundyü nyu ketekhi gon pe kazüthun hontse kethyü dan tsüle hyumvu lati. Nle Kershvuka gü thyüni ti, lo nle tso kenkhintsin gü pe a-bin ka shü keshü ka temi dan le nrao, ‘Zegwasa, zegwasa!’ tse ti!”
8Npugü kanyu jolo kecha nme le akaryü. 9A-le zoshü: “Zerubbabel le Kershvuka phasin gü pe shü laso, lo a-le ka gü thyüpen loti. Hihontse kelo ka temi dan le ale nni pe anyugun ki shü tse sha loti. 10aThatho thyü kethün shü kemvu genyu anyugun le anyu shese bin nyo. Ai anyugun le Zerubbabel le Kershvuka gü thyüzin kebin hyuo anyugun kenyü ti.”
Atualmente Selecionado:
ZEKARIA 4: REGSBSI
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.