ZEKARIA 14
14
Jerusalem Lo Senyedan
1Npugü le me jünkera nrün jon gü kho nni laso. Tsüka Jerusalem hon selo, lo nyhühyu ka tsü kenjün lo lati. 2Npugü le senye aphu zenryü kerhün lo-o Jerusalem zen teri thyüti. Nyida gü lolo, kanyu kanyü selo, lo tenunyu dan nrhu lati. Temi peha zen mekazü ki tin lati, ai a-sen dan khepe nyida gü nyu shü lati. 3Tsüsiki Npugü le gükela gwünkho ki hontse senye tsüdan zen kenren ti. 4Tsü gwünkho ka a-le oliv kazüthun ge sobin ti, Jerusalem npho kipon. Tsüka Oliv kazüthun le kope kenyhun thyü lati npho lo nkhün zin, tson-o ketejon keda nme thyü lati. Kazüthun gü ponha le ketu-o tesozin lo ponha le tesin kipon tse lati. 5Kazüthun kenjün kho pe kenyhun thyü kela ketejon günyu hagun le tinchwi loti. Juda raja Uzziah gwünkho ka kazü nnu kethyü ka, hagun pvübonnyu dan hontse hagun le tinchwi loti. Npugü a Sunggigü le tsanggelonyu aphu zen ryüti.
6Tsü gwünkho le ryülo, kun, tseren che, 7nmvue zün sin loho. Khejenyu-e a-zintse nhennyu thyü bin ti. Dinyü hihontse la tiyo Npugü nti kesha.
8Jon tsügü le ryülo, Jerusalem nyu kerhün zü le tsunchwi ryüo ponha le kesi zida lo ponha le Mediterranean nyu tsun yüti. Tsüle ntsükerin lo kenda ka-e tsun binti. 9Tson-o Npugü le kazü aphu so raja thyüti; temi aphu a-le Sunggigü le tse zan tsügü sen a-rüshvu ti.
10Teso kipon Geba ka gü tesinzin Rimmon keti lojvü aphu thyü ketejon lati. Jerusalem le a-tekehun kazü aphu so tetso ti, nyida gü le Benjamin khinrun ka gü a-qün ka khinrun, keriki khinrun le kebin gü keti, lo Hananel tsokhwe kagü raja gü vainzü kethün bin keti. 11Temi le nyu bwen-o tsünyu yhun ti, kenke le anyugun kedün sin loho.
12Npugü le keho kerü senryü Jerusalem zen teri kethyü senye dan aphu ge shüti. Anyugun le rhün kebinka anyugun thyü no ten lati; anyugun yhütyü lo anyugun yi no ten lati.
13Tsü gwünkho ka Npugü le anyugun no kevükeben lo nshvu shüo, nmeme tse a-khoka kebin gü sülo-o whe soti. 14Juda temi le Jerusalem nopen-o kenrenti. Anyugun le senye aphu kenya-- suna, rakagi lo phinya kechon khilo lati.
15Keho kentsun le shwikerüchün nyu kensenbin nyu keru, Mule, Ut, gada lo senru aphu ge ryüti. 16Tsüsiki Jerusalem whe kethyüka simvu kelonyu aphu chen kechwi tsünyu gü Kekvutsin Npugü le raja letse a-rüshvuo Thennyu kebin Nga rühvu hüti. 17Senye ligü higü-e gü Kekvutsin Npugü rüshvumvu yatselo, anyugun kazü nyu tsangri shü loho. 18Ijipt nyu le Thennyu kebin Nga rühvu mvu yatselo, Npugü le nipe gü mvu kela senye ligü higü ge shüti tse kebin keho tsüpe anyugun ge shüti. 19Ijipt nyu lo senye kecha aphu Then nyu kebin Nga rühvu mvula ya tselo tsünyu ge ryü nrün shaja le hile.
20Tsü gwünkho ka Keru ge keshü tegi dan ge-e “Thyükenshün pe Npugü tsü laso” tse kethyü jo dan pe thu ti. Kershvuka nyu sen kehü lalü le Kershvubin ge khunshe hontse nshün lati. 21Jerusalem nyu lo Juda aphu nyu lalü aphu Kekvutsin Npugü kerüshvu ka sen nrün genyu khikho kecha thyü lati. Rora thyü kehü temi danle rora kethyü thyü pe tsünyu niti. Tsü gwünkho le ryülo, Kekvutsin Npugü Kershvuka nyu ha kethyü nyu nme-e bin sin loho.
Atualmente Selecionado:
ZEKARIA 14: REGSBSI
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.