MATHI 3
3
Johan Baptist Gü Senkethyü
(Mk 1:1-8; Lk 3:1-18; Jn 1:19-28)
1Lo tsügwünkho ka Johan Baptist gü tsüle, gungü Judia tehennyu me senthyüo, 2“Hagun nyunkelulo,” a-le zo, “Kechamvule tsangge keda le khonni bin kelasi genyu!” 3Isaya sidyükesha gü le a-rüla zo-o:
“Tehennyu temi nme le nra sen-o,
‘Hagun Npugü tson ndolo;
a-no njwen nrün genyu tsonkhue du kenzhü
lo nye!’ ”
tsonkehü khwe gü tsüle a-le.
4Lo Johan phinya tsüle Ut hü lope thyü, lo thyügi senkephin lope a-sen phinpvü; lo a-chvü le khuzü lo tsekhvü. 5Tsükatsü Jerusalem lo Judia kazü lo Jordan züri kho kipon kebin temi aphu a-ki ryü. 6Tson-o temi tsüdan tsüle a-npvü a-kemu zoshwi küshüo Jordan züri nyu Johan ben ka baptaiz thyü külo.
7Ai a-le Farisinyu lo Sadukinyu kechon le a-baptizm nyu gunkeryü hyulo njüo anyugun ka, “Hagun peri tsipwen ju, Sunggigü nyunkekhü nrhilo nrün segü le hagun ka zoshü la? 8Tsügenyu nyunkelulo kekü rasha no nsha chwiryülo nye. 9Lo agun ko Abraham le agun pvü, tson kethyü zo, lo hagun nyunki rüchün nya nye. Kechamvule ale hagun ka zoshü tile Sunggigü le tso hidan ge Abraham nyenyu no yhun soryülo gwa le. 10Lo ntsokae nri le senbin dan phaka bin; tsügenyu senbin ligühigüe a-sha kegwa nshalo kemvunyu we phen pe mah nyu shüla ti. 11Awe hagun no nyunkelu kelo genyu zünyu hagun baptaiz thyü keshü gwünzin, ai a siki ryü kejü gü we anyeki gonkvu, ale a-phaje kephin tho-e thyülo kümvu, lo A-le Kenshün Kapu lo mah nyu hagun baptaiz thyü ti. 12Lo a-le nryü le a-ben nyu bin nyo, lo a-le shyebün whün shünshvula ti, lo shyetsin dan lope a-süsen nyu kequenlo ti; ai shyebün dan we pe nmhülo keho mah nyu rola ti.”
Jisu Baptaiz Thyükelo
(Mk 1:9-11; Lk 3:21-22)
13Lo tsüsika Jisu le Baptaiz thyülo titseo Galil nyu tsonchü sen-o Jordan züri nyu Johan ki ryü. 14Ai Johan le a-khinla nyüo, “Ale nben nyu baptaiz thyükeloi, ai nle aki ryü jü nle?” tson.
15Ai Jisu le a-ka, “Nthu gwün le thyüshülo, kechamvule nne tha thyülo kezü lihie thyülo mvuloshvu kethyü genyu.” Tsontsin Johan le thyüshü titse la.
16Lo Jisu le baptaiz thyülo-o zünyu chwiryülo ntsin hire, tsang le koshü, lo Sunggigü Kapu le nsu hontse tsüryüo a-ge bin kelo Johan le hyulo. 17Lo hire, tsangge thakhwen nme le, “Higü hile A nyu, A yhüdyügü, Ale A-shwi pe A kenyü sa kehügü le,” tsonshü.
Atualmente Selecionado:
MATHI 3: REGSBSI
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
