MATHI 4

Satan Le Jisu Semen Kethyü

(Mk 1:12-13; Lk 4:1-13)

1Tsüselo Jisu le Satan no a-semen titseo Kapu no a-zen-o tehen ki temi kendi bin ki gunla. 2Lo a-le tsangkeben jon henzi lo tsangkezün jon henzi tse tyütsü mvukela ka nnyo la. 3Tsontsin Satan le ryüo a-ka, “Nle Sunggigü Nyugü yatselo, tso hidan ka zoshüo no tensü ngwalo ta.”

4Ai Jisu le a-ka, “Temi le tensü genyu nti rhünlo hümvu, ‘ai Sunggigü mün nyu chwikeryü jo genyu rhünlo ti,’ tsonkethyü thu njü nyo.”

5Tsüselo Satan le a-zen-o rünyi kenshün gü nyu gun-o a-no Kershvuka pesun ge binlo-o 6a-ka, “Nle Sunggigü Nyugü yatselo, hige chetsü shwi, kechamvule,

‘Sunggigü le n-genyu a-lokethyünyu

nishüo,

nno tsügü tso ge jon mvulo nrün genyu,

anyugun no anyugun ben pe npen loti,’ tsonkethyü thu kenjü genyu,” tsonshü.

7Ai Jisu le a-ka, “Nle n Npugü Sunggigü semen loshvu,” tson kethyü thu njü nyo; tsonla.

8Ai Satan le a-zen-o kazüthun ketetso nme ge nikü gü kazü rünyi keda aphu lo tsünyu kenya aphu gwüngwa thyü tsinpe a-hishü. 9Tson-o a-ka, “Nle nkhüntsü gü arüshvu lo ale tha hi aphu pe ntsü lati,” tsonshü

10Tsontsin Jisu le a-ka, “Tinla chi, Satan! Kechamvule nle ‘Npugü Sunggigü nti rüshvulo, lo a-lothyü binlo,’ tson kethyü thu pe bin kenjü genyu!”

11Tsontsin Satan le a-khela, lo hire, tsangge lokethyünyu le tsüryüo a-ntsenlo la.

Galil Nyu Jisu Tho Keridan

(Mk 1:14-15; Lk 4:14-15)

12Tsüselo mele Johan tenlo kela shalo njüo Jisu le ketu sen-o Galil nyu gunla. 13Lo Jisu le Nazaret nyu bin mvuo Galil züda khoki Zebulon lo Naftali au ja nyu kebin Kapernaum nyu gungü bin tinla. 14Lo tsüle kechamvule Isaya sidyükeshagü le zo kenjü tsüno penlo nrün genyu,

15“Jordan zürikho züda kipon kebin,

Zebulon lo Naftali kazü,

Juda kemvunyu Galil!

16Kezün nyu kebin temi dan le,

keben keda nme hyulo so.

Lo kesi kazü lo a-kengüshye nyu kebin

dan ge,

ben chwiryülo so,” tson.

17Tsüselo tsükitsü Jisu le me senthyüo, “Hagun nyu kelulo nye; tsangge keda khonni bin kelasi genyu,” tson.

Jisu Le Tsehü Ketennyu Mizi Kokelo

(Mk 1:16-20; Lk 5:1-11)

18Tsüselo a-le Galil züda khoki gun kezhü ka, tsasikezen nyu mihvu, Simon Pitor tse kehügü lo a-sikezen gü Andria au le joh sen-o zü nyu tsehü ten bin, au le tsehüketennyu kethyü genyu. 19Lo Jisu le au ka, “Hai A sithenlo je, lo Ale hai no temi ketennyu thyülo ti,” tsonshü. 20Tsüselo au joh tsü khe whütsela njüo a-sithen tinla.

21Lo a-le tsüka ni npha zhü ntsin tsasikezen kecha mihvu Zebedi nyu Jakob lo a-sikezen gü Johan, au le au pvü Zebedi zen-o run nyu joh nkhvü bin-o hyulo; tsüselo a-le tsühvu ko koshü. 22Tsontsin au le au run lo au pvü khela njüo a-sithen tinla.

Jisu Le Temi Danda Senthyü Keshü

(Lk 6:17-19)

23Tsüsika Jisu le ntsü sen-o Galil kazü aphu nyugun-o anyugun Sinagog ka nyu yügü me senthyü, lo jolokegwa rüla zope me zen-o temi dan kehokenyü aphu thyü ngwa shü. 24Lo tsükatsü Siria kazü aphu nyu a-rüla zope sü gunla, lo kethyükenyü kechacha pvü kehü nyu aphu, lo tero gwakemvu no nchün ndyü zen kehünyu, lo terothonyu-e zen-o a-ki ryü, lo a-le tsüdan aphu thyü ngwashü. 25Tsontsin Galil lo Dekapoli (Rünyi Tseryü) Jerusalem lo Judia kazü ki-e lo Jordan züri kho likipon kebin temi danda nme le a-sithen tinla.

Atualmente Selecionado:

MATHI 4: REGSBSI

Destaque

Copiar