JOHAN 9
9
Jisu Le A-yhükeponyu Nme Thyüngwa Keshü
1Tson-o a-le gun zhü ntsin n nyulo nyemhun nyu a-yhüpo kelanyu temi nme hyulo. 2Tsontsin Jisu le senthyükelonyu dan le a-ka, “Rabi, temi higü hile a-yhüpo-o nnyu kelo a-le le a-pepvünyu le mula ola?”
3Ai Jisu le anyugun ka, “Temi higü hi-e lo a-pepvünyu kemu genyue kemvu, ai a-ge Sunggigü tho thyü pe me teshashü titse kethyü genyu hihontse kethyü. 4Tsangben kebin ka ngun le a nikeshü gü tho thyü mvulo shvu; temi nme-e thame thyülo keho tsang kezün jon le ryüzhü nyo. 5Ale kazü nyu kebin ka ale kazü keben gü.”
6A-le tson zoshü njüo nsü pe kazü nyu nnyon kembe thyülo-o nnyon kembe tsü pe a-yhütyü yünshü, tson-o a-ka 7“Gungü Siloam zi nyu süla chi.” (Siloam a-kon le nikeshü.) A-le tsünyu gü süla ntsin tha hyulo njüo ryü la.
8Tsügenyu a-tsagü sikezen nyu lo a-le nduka shvutyü kehü kehyu nyu dan le, “Temi higü hile shvutyü kehü gü tsü mvu ole?”
9Peha le, “Hile tsügü tsüle,” kechanyu le, “Nmvu, ai tsügü au kenfü sa le.”
Ai tsügü we, “Ale tsügü le.”
10Tsügenyu anyugun le a-ka, “Tsonlo nyu tsethyüo nyhütyü le tha ohyu chwiryülo la?”
11Lo a-le, “Jisu tsekethyü temi nme le nsü pe nnyon kembe thyülo njüo pe ayhütyü hishüo aka, ‘Nle gü Siloam zi nyu süla chi’ tsonshü; lo ale gü süla ntsin ayhütyü le tha hyu chwiryülo le.”
12Tsontsin anyugun le a-ka, “Tsügü le dikipon bin nla?”
Ai a-le, “Ale shamvu.”
Farisinyu dan Le A-yhütyü Kepogü Nthonkethyü
13Anyugun le nduka a-yhütyü kepogü zen-o Farisinyu dan ki ryü. 14Lo Jisu le nnyon pe kembe thyü pe a-yhütyü thyü ngwa keshü nyü tsüle Sabbath jon. 15Tsügenyu Farisinyu dan ko a-le nyu tsethyüo tha hyulo yo tsekethyü a-ketso. Lo a-le anyugun ka, “A-le nnyon kembe pe ayhütyü hvu yün shüo ale gü süla ntsin ale tha hyulo le.”
16Tsügenyu Farisinyu peha le, “Temi tsügü tsü le Sunggigü kanyu ryü mvu, kechamvule a-le Sabbath zen hü kemvu genyu.” Ai kechanyu dan me le, “Temi kemunyu le nyu tsethyü tha ndun kethyü tho hihontse thyülo tila?” tson-o anyugun dan nyu kejo rhünlo mvula.
17Tsügenyu anyugun le a-yhütyü kepogü ka, “A-le nyhütyü thyü ngwa keshü genyu nwe a-rüla nyu tse thyü rüchün hü nla?”
Tsügü le anyugun ka, “A-le sidyükeshanyu nme,” tsonla.
18Ai a-yhütyü po hüo tha hyunikelo rüla Judanyu le a-pvü lo a-jvü au ko zen ryü kemvuthen a-tenyen mvu. 19Tson-o anyugun le a-pvü lo a-jvü au ketso-o, “Higü hile hai le a-yhütyü kepo nnyu kelo gü tsüle, lo ntsoka we a-le nyu tsethyüo tha hyulo la sela?”
20A-pvü lo a-jvü au le, “Higü le ayi nyu, a-yhütyü po-o nnyu kelo gü tsekethyü ayi le sha bin nyo. 21Ai a-le nyu tsethyüo tha hyulo yo agun le shamvu, nmvue segü le a-yhütyü hvu thyü ngwashü yo ayi le sha mvu. Hagun npvü a-ketsolo ta; a-le peshü laso, a-le a-npvü a-rüla zoshü ti.” 22A-pvü lo a-jvü au le Judanyu kenshvu genyu jo higü zola; kechamvule Judanyu le temi lihigüe temi tsügü le Khrista tsekethyü zolo kehunka nyu hüla titse kethyü kenthon kebin genyu. 23Tsügenyu a-pvü lo a-jvü au le, “A-le peshü laso, hagun npvü a-ketsolo ta,” tsonla.
24Tsontsin anyugun le a-yhütyü kepogü ko zen ryüo a-ka, “Nle Sunggigü shwenlo nye, temi tsügü tsüle kemunyu nme tsekethyü agun le sha bin nyo.”
25Ai a-le, “A-le kemunyu le nyu tsethyü yo ale shamvu; ai awe le tha nme shabin nyo, tsüle ale a yhütyü po hü, ai ntsoka we tha hyulo laso.”
26Tsügenyu anyugun le a-ka, “A-le nge nyu thyüshü la? A-le nyu tsethyüo nno tha hyu chwiryülo la?”
27A-le anyugun ka, “Ale ngüka hagun ka zoshü so, ai hagun le nyülo mvu; hagun le nyu genyu sha nilo nyü hü nla? Hagun ko a-sikethen nyu thyü nyü hü ole?”
28Tsüselo anyugun le a-kesüo, “Nwe a-sikethen nyu, ai agun we Mosa sikethen nyu. 29Sunggigü le nduka Mosa ka tha zokeshü agun le shabin nyo; ai tsügü we dikipon ryü yo agun le shamvu.”
30Ai a-le anyugun ka, “Ayhütyü hvu thyü ngwa shüe hagun le a-le dikipon gunryü yo tsekethyü sha kemvu tsü le tha ndun kethyü nme. 31Sunggigü le kemunyu khwen nyü hü mvu, ai temi lihigüe Sunggigü rüshvu lo a-kenyü thyü kehünyu khwen nyü hünyo, tsekethyü ngun-e shabin nyo. 32Kazü thyülo keri kanyu ryüo ntsoka keti temi nme-e a-yhüthyü po-o nnyu kelonyu yhütyü thyü ngwa keshü mi sha hümvu. 33Temi tsügü le Sunggigü kanyu ryü mvu yatselo a-le thame tsü thyülo ho.”
34Anyugun le a-ka, “Nle kemunyu ge n nnyu kelo le, nle agun senthyü ti ole?” tson-o anyugun le kehun kanyu a-hüla.
Kapu Kipon Yhükepo
35Jisu le anyugun le a-hüla tsekethyü shalo, tson-o Jisu le a-hyulo njüo, “Nle Sunggigü Nyugü tenyenlo semon?”
36A-le zoshü, “Npugü, a-le segü la? Ano a-tenyenlo nrün genyu aka zoshü ta.”
37Jisu le a-ka, “Nle a-hyu loso, lo nzen kenthon kebin gü tsüle,” tsonshü.
38Tsontsin a-le, “Npugü, ako tenyenlo so.” Tson-o a-le Jisu rüshvu sola.
39Jisu le zo, “Hyuhü kemvunyu no hyulo nrün genyu lo hyu kehünyu no a-yhütyü pola nrün genyu, me kegwa keshvu sha titseo ale kazü hinyu ryü.”
40Lo tsüka a-zen kehü Farisinyu dan le jo tsü shalo njüo a-ka, “Agun ko agun yhütyü po ole?”
41Jisu le anyugun ka, “Hagun yhütyü po yatselo hagun kemu ndi lati. Ai ntsoka we hagun le, ‘Ale hyu hünyo,’ tson hü; tsügenyu hagun kemu le bin zun.”
Atualmente Selecionado:
JOHAN 9: REGSBSI
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
