JOHAN 8
8
Tenunyu Keyülanyu Nme Tenkelo
1Ai Jisu le Oliv kazüthun ge gunla. 2Tson-o a-le lonyü nshwen Kershvuka nyu ni ryülo, lo temi kechon le a-ki ryü; tsüselo a-le solo njüo anyugun senthyü so. 3Lo tsükatsü lesükeshanyu ju lo Farisinyu dan le tenunyu nme le keyüla hüo ten zen ryü, tson-o anyugun le tsügi khipe anyugun dan nyu shülo njüo Jisu ka, 4“Senkethyü gü, tenunyu higi hile keyüla kebin agun le tenlo le. 5Lo tejvü nyu tso lope hihontse kethyünyu jon shvula lo tsekethyü Mosa le agun ka zo njü. Lo n we le nyu tsethyü zo tila?” 6Anyugun le Jisu nmu kelo rüchün-o a-semen-o jo higü zo. Ai Jisu le nkhüntsügü a-zenkero lope kazü nyu tha thu bin.
7Ai anyugun le a-ketso bin gwünzin kela genyu a-le nyiso gü anyugun ka, “Hagun dan nyu mu mvu shü kethyü gü no tso shwe teri pe tenunyu higi jon shü re. 8Tsonshü njüo nkhünni tsügü a-zenkero pe kazünyu tha thu ni tinla. 9Tson-o temi tsüdan le a-jo shashü ntsin peshü tsin gü le rio a-kekhin keti tsü mi meme tse chwila. 10Lo Jisu le nyiso gü tenugi ka, “Tenugi, anyugun le dikipon güla sela? Temi nme-e n nmu mvu ole?”
11Tsontsin a-le, “Npugü, temi nme-e a nmu mvu,” tsonshü.
Lo Jisu le, “A-ko n nmu loho; nle gunla chi. Hisiki we mu ninya gwün.”
Jisu Le Kazü Keben Gü
12Lo Jisu le anyugun ka, “Ale kazü keben gü, temi lihigüe a sithen kehü gü le kezün nyu hü mvule kerhün keben gü hyulo ti.”
13Tsügenyu Farisinyu le a-ka, “Nle n npvü njün zohü nyo, njo tsüle a-ketsin mvu.”
14Jisu le anyugun ka, “Ale a npvü ajün zo hüe ajo tsü le a-ketsin, kechamvule ale dikipon ryü yo lo ale dikipon güla tiyo tsekethyü sha kehü genyu; ai hagun we ale dikipon ryü yo lo ale dikipon gun tiyo tsü sha hü mvu. 15Hagun we thyü ge kegwa keshvu ketso hünyo; awe temi nme-e ketso hü mvu. 16Lo ale me ketso hüe ale me ketso kethyü tsüle a-ketsin; kechamvule ale a npvü mvule a nikeshü gü Pvügü le azen kehü genyu. 17Tsüntimvule mihvu jo kezo le a-ketsin tsekethyü hagun jvü ka thu njü nyo. 18A npvü ajün kezo gü tsüle ale, lo a nikeshü Pvügü tse le ajün zo hünyo.”
19Tsügenyu anyugun le a-ka, “Npvü le dikipon bin nla?”
Jisu le, “Hagun le a-e lo Apvüe sha hümvu. Hagun le a sha kethyü we a pvüe sha ti ata le.”
20Jisu le Kershvuka nyu senthyü kebinka pisa pe shü kehü khin kho ka jo hi zoshü, ai a-gwünkho timvu zun kethyü genyu temi nme-e a-tenlo mvula.
Hagun Le Akegü Binka Gü Loho
21Tson-o a-le anyugun ka, “Ale tinla ti sele, lo hagun le a fü ti, ai hagun kemu nyu sila ti. Ale kegun bin nyu hagun le ryü loho.”
22Tsügenyu Judanyu le, “Ale kegü bin ki hagun le gü loho, a-le tson kehü hile, a-le a-npvü a-dushvula ti ole?”
23Tsontsin a-le anyugun ka, “Hagun le tesin gü, lo a we teso gü, lo hagun le kazü hinyu temi, ai awe tsangge ryü kethyü genyu. 24Tsügenyu ale hagun ka zo, ‘Hagun le hagun kemu nyu sila ti,’ kechamvule hagun le ale tsügü tsekethyü tenyen kemvu we, hagun le hagun kemu nyu sila ti.”
25Tsügenyu anyugun le a-ka, “Nle segü la?”
Jisu le anyugun ka, “Ale a-kerika hagun ka zo keshü gü tsü. 26Ale hagun rüla zo nrün lo ketso nrün kechon le bin nyo. Ai a nikeshü gü tsü le ketsin gü,lo ale a-ka nyu nyü kelo, ale tsü lope kazünyu ka zo hünyo.”
27Anyugun le a-le anyugun ka Pvügü rüla pe zo keshü rüchünlo mvula. 28Tsügenyu Jisu le, “Hagun le Temi Nyugü penso keshü ka hagun le tsügü tsü tsekethyü lo ale a npvü thame thyü hü mvu, ai Pvügü le a senthyü keshü hontse ale tsü zo kehü shalo ti. 29Lo a nikeshü gü le azen hü; tsügü le akhipe ano a npvü hü mvu, kechamvule ale a-kenyü aphu thyü kehü genyu.”
30A-le jo hi zo kebin ka temi kechon le a-tenyen lo.
Ketsin Gü Le Hagun Hoshü Lati
31Lo Jisu le Judanyu tenyenlo kelanyu dan ka, “Hagun le ajo nyu bin hü lo hagun le ale senthyü kelonyu ketsin. 32Lo hagun le ketsin gü shalo ti, lo ketsin tsügü le hagun hoshü lati.”
33Anyugun le a-ka, “Agun le Abraham nyenyu, lo agun le thame kae medo thyühü mvu. Nle nyuthyüo, ‘Hagun hoshü lati,’ tsekethyü zohü nla?”
34Jisu le anyugun ka, “Ale hagun ka zo tsentsü shüti le, temi lihigüe mu kehünyu le kemu do so. 35Lo do tsüle me ka nyu bin zin hü mvu; ai nyutsin nyu we bin zin hünyo. 36Tsü genyu Nyugü le hagun hoshü selo, hagun ho tsin thyüshü lati. 37Ale hagun le Abraham nyenyu tse kethyü sha bin nyo, ai ajo le hagun ge a-bin kendi genyu hagun le adushvu lati tseo a fü hünyo. 38Ale Apvü zen hüo ale anpvü hyukelo pe zo hünyu; hagun ko hagun pvügü ka nyu nyülo yo tsü thyü hünyo.”
Hagun Pvü Le Satan
39Anyugun le a-ka, “Abraham le agun pvü le.”
Jisu le anyugun ka, “Hagun le Abraham nyenyu yatselo hagun le Abraham tho thyü hü ti. 40Ai hagun le ale Sunggigü kanyu shakelo ketsin gü pe hagun ka zo keshü gü a hi-e dushvula titseo afü hünyo. Abraham le hihontse hü mvu. 41Hagun we hagun pepvünyu dan tho hontse thyü hünyo.”
Lo anyugun le a-ka, “Agun le keyüla nyu ge agun nnyu kelonyu mvu; agun le agun pvü nme le bin nyo, lo tsüle Sunggigü.”
42Jisu le anyugun ka, “Sunggigü le hagun pvügü yatselo, hagun le aso loti, kechamvule ale Sunggigü kanyu chwiryü lo ryü kethyü genyu. Ale a npvü akanyu ryü mvule, a-le a nikeshü genyu. 43Hagun le nyuthyüo ajo shalo hü mvu la? Hagun le ajo nyü hü lokeho le? 44Hagun le hagun pvü tero gwakemvu gü kanyu, lo hagun le hagun pvü kenyü gü thyü nyü hünyo. A-le sokerika nyu me dukeshvu nyu nme, lo a-ge ketsin kendi genyu a-le ketsin nyu bin hümvu. A-le kenku jo zo solo a-npvü a-ka nyu zo chwiryü hünyo; kechamvule a-le kenkunyu lo a-le kenkunyu pvü genyu. 45Ai ale ketsin gü kezo genyu hagun le a tenyen hümvu. 46Hagun segü le kemu zope a njü logwa la? Ale jo ketsin zo hü yatselo hagun le nyu thyüo a tenyen hü mvula? 47Sunggigü ka chwikeryü nyu le Sunggigü jo nyü hünyo. Hagun we Sunggigü kipon kemvu genyu tsügenyu hagun le tsünyü hümvu.”
Abraham Mhundyü Jisu Le Hü Laso
48Judanyu dan le a-ka, “Nle Samarianyu nme lo nle tero gwakemvu gü zen hü kethyü agun le zo tsentsü la mvu ole?”
49Jisu le, “Ale tero gwakemvu zen hü mvu, ai ale Apvü shwen hünyo; lo hagun we A-shwen hümvu. 50Lo tson-e awe a npvü a zan fü hümvu; fü kehü lo ketso kehü nme le bin nyo. 51Ale hagun ka zo tsentsü shüti, temi lihigüe ajo zen hülo tsügü le thame kae kesi hyu loho.”
52Judanyu le a-ka, “Nle tero gwakemvu nme zen kehü agun le shalo laso. Abraham-e lo sidyükeshanyue sila so; lo nle zokeshü, ‘Temi lihigüe ajo zen hü yatselo tsünyu le thame kae kesi hyulo ho.’ 53Nle agun pvü Abraham nyeki gon ole? Abraham lo sidyükeshanyue sila so; nle segü letse hü nla?”
54Jisu le anyugun ka, “Ale a npvü a zan zope gon yatselo, a zan kezo tsü le a-kenrun. A zan zo pe gon kehü tsüle Apvü. Hagun le tsügü lope hagun Sunggigü letse kehü gü tsü. 55Lo hagun we Sunggigü sha mvu, ai awe a-sha bin nyo. Lo ale a-shamvu, tson zo yatselo ako hagun hontse kenkunyu thyü lati. Ai ale a-sha bin nyo, lo a-jo zen hünyo. 56Hagun pvü Abraham le nduka a jon gü hyukelo rüchün pe a-sherhün-o tsü hyulo laso.”
57Tsügenyu Judanyu le a-ka, “Lo nle Abraham hyu la?”
58Jisu le anyugun ka, “Ale hagun ka zo tsentsü shüti, Abraham nnyu kelo mhundyü ki ale hü laso.”
59Tsügenyu anyugun le tso lope a-jon titse sola. Ai Jisu le a npvü kebuo Kershvuka nyu chwila.
Atualmente Selecionado:
JOHAN 8: REGSBSI
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
