Zakaria 12
12
Lri kipalribulu ka Yerusalrime
1Kikai bilrilane tapelaelane ki Tamatama ka ngwakai ki swa Iseraylri ka vaga. Ku Tamatama wapaipai subelebelenge, wabekace kawmasane, la baai ku niake ki umawmase. Kwi lasu amia kai, 2“Lri malraku kai ki swa Yerusalrime pangimia ki akuvaeva ki kupu ka bava, ku ngiathalringulu ku lakuni lu ungulu kikai ki kupu lri lridrawdrau mia ki mabusuku ka umawmase. Kwi lalasu lu lringulu si kikaruburu ki swa Yerusalrime, lri mialri lringulu si kikaruburu ki drumane ka lacekele ki swa Yuda. 3Ikai kwini ki vai, lri malraku kai ki swa Yerusalrime pangimia ki maadrau kateelrege ka lrenege. Ku kiasanu alrugu kai ki lrenege ku kuni lri kadula makanaelre. Sanaka kuni kai kawmasane lai maelrelre si kikaruburu ki Yerusalrime. 4Ikai kwini ki vai, kwaku ka Tamatama lri pangitulukaku ki larigi lini, lani amama ku latarangurigirigi ka kwapingi lini. Lri palakebaku ki umawmase ki swa Yuda, lai lri kamukici ku larigi ki badha lini. 5Lukamani kwidra, ku lazuku ki swa Yuda lri ngikakawrivariva iya kai, ‘Tamatama ka abebeelengenga ki sanaka kwapingi ka Twaumase wabaai ku puku ki laumawmase ki yakai Yerusalrime.’
6“Ikai kwini ki vai, kai lazuku ki swa Yuda lri pangimiaku ki apwi ka yakai ki angatungatu, lri mia ki yakaai ki takimugimugiane ka tapudhane, kwi lalasu lri lama utu sanaka ngwadadeethe ka kuni. Ai ku laumawmase ki Yerusalrime lrika sakamiya suteelrai ikai ki cekele.
7“Kwaku ka Tamatama lri paswalaku paakaci ki lakwapingi ki swa Yuda, lu malra ku lrigu ku lamwabaibalrithi ki Davidi si laumawmase ki swa Yerusalrime lani kai lribate ki Yuda. 8Ikai kwini ki vai, kwaku ka Tamatama lri palakebe ki yakai Yerusalrime ka laumawmase, ikai liniane adravane ka turawramurunga, lri dulru mia ki Davidi ku takakecengane. Ku lamwabaibalrithi ki Davidi lukabibilrili lri sangiluku liniane, mia ki sasiakawlu ki Tamatama ikai subelebelenge, mia ki Twaumase, sangililuku liniane. 9Ikai kwini ki vai, ku kiasanu kikaruburuburu ki swa Yerusalrime ku lakuni lri mwalraku amudu.
10“Ki lamwabaibalrithi ki Davidi si drumane ka laumawmase ka yakaikai Yerusalrime, kwi lalasu lri pasueteaku ku kalithane si inulri ka ri. Kwi lalasu lri drele paswabelenge kudra ki culrulu lini si alra papacai kwini ki lasu, lai tubi iniane, mararaamau kudra ki wapacai ku vaeva ka lalake; kwi lalasu lri kwalri tubi turamuru, mia kudra ki maulrase ku takatakanga ka sawvalai ka lalake. 11Ikai kwini ki vai, ku Yerusalrime lri tubi kwalri ku kidremedreme mia ki yakaai dratane Migidu ka swa Hadade Rimungu#12.11 “Hadade Rimungu” alau amani ki twaumase ki wacebecebe ka Baale ka twaumase ki swa Kanange si swa Siria. Lukacaili lu kavulru pacai ku lawacebecebe yai, ku tarasukusukubu ki Baale ku laumawmase mialrini ka wapacainga amia iniane, la ngwalai kikai si tubi silringau. ku takwalriane tubi. 12-14Kai swakai kai ku dadadaanane lri kwalri tubi pasikai ki kadaanane lini; ku ngwakai ki Davidi, ku ngwakai ki Nathange, ku ngwakai ki Lrivi, ku ngwakai ki Simi, si kudra drumane ku dadaanane, lri pasikaai makanaelre ki kadaanane lini kwalri tubi, ku sawvalai ku ababai lri mawvagai makitu karaleale tubi.”
Atualmente Selecionado:
Zakaria 12: NDV
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© The Bible Society in Taiwan, 2017
All rights reserved
© 臺灣聖經公會版權所有，2017