Penemu-Dalam Solomon 9
9
Solomon besembiang minta Penemu-dalam
1“Allah Taala aki ini aku, Tuhan ti kasih, enggau jaku Nuan, Nuan ngaga genap utai. 2Ngena Penemu-dalam Nuan, Nuan ngaga mensia ngambika bekuasa atas semua utai, 3ngambika merintah dunya ngena pengudus enggau pengelurus, ngambika bejalaika adat enggau betul. 4Beri ke aku Penemu-dalam ti duduk ngimbai kerusi raja Nuan; beri ke aku penuduk begulai enggau nembiak Nuan. 5Aku tu pemela Nuan, baka indai aku ke dulu ari aku. Aku semina mensia biasa. Aku enda kering, lalu umur aku pandak. Aku kurang penemu pasal Adat tauka baka ni ngena iya. 6Taja pan orang nya dikira chukup manah, tang iya dikumbai nadai reti enti nadai Penemu-dalam datai ari Nuan. 7Nuan udah milih aku ngambika nyadi raja ke bala nembiak Nuan empu, ngambika ngakim bala anak lelaki enggau anak indu Nuan. 8Nuan udah ngasuh aku ngaga Rumah Sembiang ba bukit kudus Nuan, alta di Jerusalem, nengeri ti dipilih Nuan ke rumah Nuan. Iya nunda rumah sembiang di serega ti udah disediaka ulih Nuan ari pun. 9Penemu-dalam endang enggau Nuan, lalu nemu pengawa Nuan; iya endang bisi lebuh Nuan ngaga dunya. Iya nemu ngerinduka Nuan, nemu utai ti betul nitihka padah Nuan. 10Kirumka iya ari serega ti kudus, nurun ari kerusi raja Nuan ti bemulia, ngambika iya bekereja ngimbai enggau aku, lalu aku ulih belajar nama utai ti ngerinduka Nuan. 11Iya nemu sereta meretika semua utai, lalu iya ngiring aku enggau pemintar dalam pengawa aku. Mulia iya deka nyaga aku. 12Nya baru aku ulih ngakim bala nembiak Nuan enggau pengelurus, lalu ngasuh aku amat patut duduk ba kerusi raja apai aku. Lalu semua kereja aku deka diterima.
13“Sapa ke ulih belajar pasal peneka Allah Taala? 14Runding mensia sigi enda ulih ngereja pengawa nya, lalu pikir kami mensia sigi ngelimpangka kitai, 15laban tubuh mensia ke nemu parai nekanka pemerat ba semengat kami. Tubuh kami mensia sigi endur ti sementara aja ti digaga ari tanah, lalu iya nekanka runding kami mensia. 16Nya kebuah kami semina nyangka aja pasal utai di dunya tu; lalu kami bebendar deka belajar pasal utai ti begulai enggau kami. Sapa ke ulih meretika utai serega? 17Nadai siku orang udah kala belajar pasal peneka Nuan, semadi meh Nuan dulu meri iya Penemu-dalam, sereta ngirumka Roh Kudus Nuan ngagai iya. 18Ngena jalai nya mensia di dunya tu ulih nengah jalai ti betul, lalu ulih belajarka utai ti ngerinduka Nuan, lalu sida diibun enggau likun ulih Penemu-dalam.
Atualmente Selecionado:
Penemu-Dalam Solomon 9: BK
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Hakcipta © 2011, The Bible Society of Malaysia
Copyright © 2011, The Bible Society of Malaysia