Penemu-Dalam Solomon 8
8
1Kuasa Penemu-dalam nyerangkap seluruh dunya, lalu iya ngasuh semua utai bejalai nitihka atur.
Pengangkun ati Solomon ke Penemu-dalam
2Kenyau aku agi biak aku endang rinduka Penemu-dalam, lalu ngira iya baka bini aku. Aku tekait ati ulih pemajik iya. 3Iya meri mulia ke pun asal iya ti begulai enggau Allah Taala, Tuhan semua utai, ti rinduka iya. 4Iya nemu amat pasal misteria Allah Taala, lalu iya nulung ngatur pengawa ti dikereja Allah Taala.
5Kati manah bisi pengeraja ba pengidup di dunya tu? Nadai utai ulih ngasuh nuan lebih kaya ari Penemu-dalam ti ulih ngasuh utai nyadi. 6Kati penemu nya utai ti beguna dikembuan? Nadai utai manah ari Penemu-dalam ti ngaga gamal semua utai ti nyadi. 7Kati nuan rindu ke pengelurus? Semua utai ti manah bepun ari Penemu-dalam: baka pengelurus enggau pemerani, runding ti ulih nagang diri enggau pemereti ati. Pengidup nadai ulih meri kitai pemanah lebih berega ari semua utai nya. 8Kati nuan deka ngembuan mayuh peneleba? Penemu-dalam nemu mayuh macham peneleba ari utai ti udah nyadi dulu suba, lalu iya nemu semua utai ti deka nyadi. Iya nemu tuku jaku orang sereta nemu ngiga jalai mutarka penusah. Iya nemu pengawa nyelai ti deka digaga Allah Taala, lalu nemu baka ni kuing utai ti deka nyadi.
9Ketegal nya aku mutus ati deka mai Penemu-dalam ke bilik aku ngambika diau enggau aku, laban aku nemu iya deka ngajar aku penemu ti manah lalu iya meransang aku lebuh maya tusah enggau sinu. 10Aku berunding, “Ketegal iya aku deka dibasa orang mayuh lebuh maya begempuru. Orang ti tuai mega bebasaka aku taja aku agi biak. 11Sida deka ningaka penemu aku ti dalam, lalu sida ke bekuasa deka muji aku. 12Lebuh aku diau diri enda bejaku, sida sigi ngadang aku bejaku, lalu lebuh aku bejaku sida deka beratika jaku aku. Taja jaku aku panjai amat agi meh sida bebendar ningaka iya. 13Ketegal Penemu-dalam, aku semampai dikeingatka orang; aku deka idup belama iya dalam pengingat rebak dudi ari aku. 14Aku deka megai kuasa atas mayuh bengkah bansa. 15Bala orang ke jai deka takut ninga nama aku disebut. Aku deka tebilang baka raja manah enggau soldadu ke berani. 16Lebuh aku pulai ke rumah ngagai Penemu-dalam, aku deka puas ati laban dia nadai penyarut tauka pemedis, tang semina pengelantang enggau pengaga aja lebuh aku diau enggau Penemu-dalam.
17Nya alai aku semampai bepikir, pendiau ti jadi enggau Penemu-dalam endang baka ti idup selama iya. 18Rinduka iya nya pengelantang ti penuh, ngereja pengawa iya, nya pengeraja ti nadai sekat, begulai sejalai enggau iya, nya runding ti betul amat, berandau enggau iya, ngasuh bulih basa. Nya meh kebuah aku mutus ati deka ngambi Penemu-dalam ke bini aku. 19Kenyau ari aku agi mit, pendiau aku endang manah. Aku orang ke beberekat amat laban bisi semengat ti manah. 20Iya ti bendar aku diberi tubuh ti manah endur diau laban aku endang manah. 21Taja pia, aku sigi nemu aku enda ulih nerima Penemu-dalam semadi meh Allah Taala meri iya ke aku. Runding ti ngumbai semina Allah Taala aja ti ulih meri iya ngagai aku, nya aja chukup meh nyadika tanda pemereti. Nya alai aku bebendar besembiang minta ari Tuhan enggau pengabis ati aku.
Atualmente Selecionado:
Penemu-Dalam Solomon 8: BK
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Hakcipta © 2011, The Bible Society of Malaysia
Copyright © 2011, The Bible Society of Malaysia