Sirak 2
2
Penaluk ke Allah Taala
1Anak aku, enti nuan deka gawaka Tuhan, nuan anang enda nyediaka diri diuji sebarang maya. 2Tetap sereta teguhka ati nuan; anang irau lebuh penusah datai. 3Nuan anang enda tetap talukka Tuhan, lalu anang limpang ari Iya, nya baru nuan senang lantang jemah ila. 4Terima aja nama utai ti nyadi ba nuan, lalu liat ati, sekalika nuan dikeleseka, 5laban mas diuji dalam api, lalu orang ke dikerinduka Tuhan deka dikeleseka orang kena nguji iya. 6Arap ke Tuhan, nya baru Iya nulung nuan. Ruruska jalai pengidup nuan lalu andal ke Iya.
7Semua kita ke nangika Tuhan, anti aja meh pengasih Iya. Anang sekali-kali limpang ari Iya enggaika kita labuh. 8Semua kita ke nangika Tuhan, arap ke Iya. Kita tetap deka bulih upah. 9Semua kita ke nangika Tuhan, andal ke pengelantang, pengasih, enggau pengaga ti tetap enggi kita belama.
10Ingatka orang rebak ke dulu lalu peratika pekara tu: kati kala Tuhan ngelebu orang ke andal ke Iya? Kati kala Tuhan ninggalka orang ke bebasaka Iya? Kati kala Tuhan enda pedulika orang ke besembiang ngagai Iya? 11Tuhan sigi mentas sereta penuh pengasih. Iya ngampun penyalah kitai lalu nyelamatka kitai ari penusah.
12Tang puntan meh orang ke kakang sereta lemi. Puntan meh orang ke bedosa sereta enda lurus. 13Puntan orang ke lemi ati laban enda andal, sida nadai bulih pengelindung. 14Puntan nuan enti enda tetap ati. Nama utai deka digaga nuan lebuh Tuhan datai nguji nuan?
15Orang ke nangika Tuhan sigi enda ngelaban pengasuh Iya. Orang rinduka Iya deka idup nitihka peneka Iya. 16Orang ke nangika Tuhan sigi nguji deka ngeyenangka Iya. Orang ke rinduka Iya deka talukka Adat Iya. 17Orang ke nangika Tuhan deka nyediaka ati sida, lalu ngemaruhka diri nyembah Iya. Lalu ku sida, 18“Aram kitai nyerahka nasib kitai ke dalam jari Tuhan, ukai ngagai jari mensia, laban pengasih Iya endang amat besai baka pemesai mulia Iya. Lalu nama Iya endang amat besai baka pemesai pengawa Iya.”
Atualmente Selecionado:
Sirak 2: BK
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Hakcipta © 2011, The Bible Society of Malaysia
Copyright © 2011, The Bible Society of Malaysia