Matius Uram 12
12
Sun Yahudi yala nang wa in kum uki si Sabat tum kubmou bok, Er Yesus miliramnyi nang aryi gandum du dakoka yibmai uram
12:1-8
1Sun Yahudi yala nang taruk louboka wa in kum uki tum si Sabat tum tentok berekmou ura, Er Yesus ab Er miliramnyi nang ab ara gandum wa iamnyi ai yibanmai. Yibanmai cok, Er miliramnyi nang ara kwaning atanmou deyok aryi, gandum du dakaliboka yibmai. 2Gandum du dakaliboka yibmai asi sun Musa kerek sengna dirniliramnyi nang Farisi nang aryi asing eibmai. Uca, sunci Er Yesus bisi ato ebmai, “Dibderum, Kan miliranking nang ara gandum du dangmang. Ara, Musa biryi, ‘Uki si Sabat tum aryi wa ina mem!’ ebsou bok, Kan miliranking nang aryi dangbisinmang,” ebmai.
3Ato ebmai bok, Er Yesus biryi sunsi ato ebmou, “Nun abwe weik sienyi Daud ab sun ersi miliramnyi nang ab kwaning atanmou ba, ‘Unato dinyi kubmai do?’ tenen bikmarum do? Daud biryi ukubmou dinyi ara Er Imtamnyi Uram umbura aryi kerek sekeibmai asi sunci nukmandau do kum do? 4Er Daud kwaning atanmou ba, yina yin dinyi ton kum kubmou ba, erci keis ol ai si Kemah Suci ai wengbindoka roti kwaning dobmou ura, er ab er miliramnyi nang ab yibmai. Ato roti ara talyi dobde yina mem roti kuramwe asi Er Imtamnyi urasintam aryi deiriramnyi bok, sun Er Imtamnyi kan ninyi kan noutam kuboka antanirdeirin nang akwe doboka ur yiramnyi. A roti ara talyi dobde yina mem roti kubmou bok, Daud bibabyi er milibmai nang ababyi a roti asi doboka yibmai. Daud biryi a mem roti asi yibmou cok, erci Er Imtamnyi Uram kum dakbisibmou. Ati, Ni miliraning nang ara talyi dakde gandum du dakoka yinmang ababyi, Er Imtamnyi Uram kum dangbisinmang asi sunci kerena mem. 5Tonda, sunci Ni miliraning nang ati, ‘Uki si Sabat tum wa inmang se,’ tenebmarum bok, Niryi, ‘Er Imtamnyi Uram kum dangbisinmang,’ ebmasin. Musa biryi, ‘Ato-ato kubdarur,’ en uram umbura aryi ato eboka kerek sekeibmou, ‘Wa in kum uki tum si Sabat tum berekci ababyi, sun Er Imtamnyi kan ninyi kan noutam kuboka antanirdeirin nang wa ibkwanung,’ eboka kerek sekeibmou. Ara, wa ina mem uki tum aryi wa iramingiryok, sun Er Imtamnyi bisi dama deiriraming nang aryi Musa Uram kum dangbisinung. Sunci a kerek sekeibmou to nukmandau do kum do? 6Niryi sunsi uram ton ebkwinsin ati sunci diboka kekebdarur. Bait Allah ai ara Er Imtamnyi biti ninyi dama deirirban ai ara, ‘Erebdob ai,’ tenen ai kurur bok, Nira Imtamnyi biryi bokwetebnounyi bira bisibkaboka Iya Erebdobnyi kunun. 7Er Imtamnyi biryi minob erdeiriramwe uram umbura aryi ato eboka kerek sekamnyi,
‘Nira Imtamnyi biryi nunukeiboka teleb tenenun ara, “Ninyi dama deirin dinyi deibniting,” kum tenenun.
Eda, iya nunukeiboka teleb tenen dinyi ara, “Ninyi aryi yuk nang asi boukwe kibting,” tenenun.’ (Hosea 6:6)
Ati, sunci a uram asi diboka bikdate uca, sunci boukwe weik kimnandatiryok, sun malyi kun kum nang ati, ‘Malyi dinyi kubmang se,’ kum tenebdate. 8Ni Ninyi Dasinyi kununci, mikib bonun cok, uki si Sabat tum ati, ‘Ato-ato dinyi kunubde bana teleb,’ ena deyoknyi kunun. Tonda, Niryi uki si Sabat tum ati, ‘Ato-ato dinyi kununa mem,’ ena deyoknyi kunun. A deyok aryi, Niryi sunti, ‘Yuk nang asi boukwe kimdamunyi ura, sunci Er Imtamnyi arungdeirisin uram sirya kunubmarumci,’ ebmasin,” ebmou.
Sun Yahudi yala nang wa in kum uki si Sabat tum kubmou ba, Er Yesus biryi taruk lamaamunyi bisi kwetebmou uram
12:9-15a
9Ura, Er Yesus gandum wa in dam aryi anabdobmou ura, binmou. Banmou ani, sun Yahudi yala nang aryi Musa ebdeiansou uram kekeramnyi ai wengbinmou. 10Akai umbura ara taruk dinatam lamaamunyi tentok wengyanmou ura, bukmou. Tonda, Musa kerek sengna dirniliramnyi nang Farisi nang ababyi wengyandoka bukmai cok, sunci Er Yesus bisi ato eboka asibdenmai, “Musa biryi, ‘Uki si Sabat tum kubci ura, wa ina mem,’ ebdeibsou ati, uki si Sabat tum kubci ura, u yin nang asi kwetebdeibtibyi ara ur do mem do?” eboka asibdenmai. Ara, sunci, “Yesus biryi, ‘Uki si Sabat tum ababyi ur kwetebdeibtibyi,’ ebci ura, nunci Erti, ‘Musa Uram dakbisibmar se,’ eboka tatab-tatab ebkwayeb,” tenen ato eboka asibdenmai.
11Ato eboka asibdenmai bok, Er Yesus biryi sunsi ato ebmou, “Wa ina mem uki si Sabat tum kubde ba, sun winirandumci domba tentok asi tukwe ungdona bisik wekmote ura, sunci unato dinyi kurandaute do? Sunci, ‘Arub ara wa ina mem uki tum kubmar ati, nunci a domba asi takmanyi ani, ambutum yuk uki tum berekci ura, a domba asi doboka lebkwayeb,’ tenen kunurandum do? Ato tenen kum. Eda, hari Sabat kubmote ababyi, sunci, ‘Nun domba lebkwayeb,’ tenen a domba asi ungdona bisik aryi kuboka dobdatiryok, ola lebkwandate. 12Domba ara bikdob dinyi kurur bok, ninyi ara bisibkaboka iya bikdob dinyi kurur ati ebman. Ati, hari Sabat tum berekci ura, nunci domba asi ur lebdeibtibyi bok, ninyi asi kum lebdeibtibyi do? Ato tenen kum. Eda, ninyi asi teleb kubdeibtibyi ababyi ara Musa Uram deib aryi mem kum dinyi kurur,” ebmou.
13Ato ebmou ura, Er Yesus biryi dinatam taruk lamaamunyi bisi ato ebmou, “Kan taruk ninikokdum!” ebmou. Uca, anyi biryi er taruk ninikokmou uca, er taruk ara dinatam kib taruk kuramwe to kubmou. 14Ura, sun Farisi nang ara yu kanya boboka akai umbura aryi anabdobmaici, sunci, “Er Yesus bisi una kuboka obkwayeb do?” eboka mar moun yibmai. 15aAto eboka mar moun yibmai asi Er Yesus biryi bikmouci, Erda akatei aryi anabkaboka yuk ai bindobmou.
Er Yesus bira Er Imtamnyi biryi wibdeiamwe wa irmilinanyi kuramwe uram
12:15b-21
15bUra, Yesus bira yuk ai bindobmou asi asing eibmai cok, ninyi ilinto aryi Er Yesus bisi milibmai ura, Erci sun kankan aryi kuboka u yin nang nirya asi kwetebdeibmou. 16Ura, Erci sun Ersi milibmai nang ilinto asi ato ebkatabdeibmou, “Nira Er Imtamnyi biryi Bokwetebnounyi kunun bok, sunci Niti yuk nang asi, ‘Erda Er Imtamnyi biryi Bokwetebunyi biryi ninyi kwetebmasir,’ ebdongobde yibana mem!” ebmou. 17A dinyi ara Yesus biryi, “Ninyi aryi Niti, ‘Erda Er Imtamnyi biryi Bokwetebunyi,’ eboka lak kibningyei,” ebmou ara Er Imtamnyi biryi Er uram ebdeibmaca bobaramunyi si Yesaya deici ebdeiamwe ba, kerek sekdeiamwe to kunubmou. Ara, Yesaya biryi minob ura ato ebmou,
18“Er Imtamnyi biryi ato ebmou,
‘Dirandarur, Anyi bira Ni wa irmilinanyi Niryi wibdeiansinyi kurur, Ni Imtamnyi bira Ersi boukwe weik kunun, Ni kanya ara Erti karyi kuranir, Niryi Ersi Ni Kanya Roh Kudus karebnyi uca, Erci, “Er Imtamnyi biryi ninyi deyok diboka lilibdiryok, sun deyok kum nang asi lebdeibkwande,” eboka lak ebkwande.
19Ni wa irmilinanyi bira yuk nang asi yu uram ton kum ebkwande, tonda, Erci, “Ninyi nirya aryi Ni uram kekebniting,” tenen uram weikanun kum dobkwande.
Uram weikanun ton kum dobkwande ati, sun bisik yibaramingnyi nang ara Er Uram kum kekebkwaming.
20Nira Imtamnyi wa irmilininanyi bira namin kanya bobdiryok, Erci yandoka sun tukwetam bun nang asi kum wenebdeibkwande.
Ati, Erci, “Mar ina tingkwanibmar ato boraming kanya asi Niryi kum bulakeibkwan,” tenen sun mambul kanya bon nang asi teleb kubdeibkwande.
Tonda, Erci, “Mitik uk buk angnanci ato boraming kanya ababyi Niryi kum tangabdeibkwan,” tenen Erci sun tukwetam bun nang asi teleb kubdeibkwande.
Ani, Nira Imtamnyi wa irmilininanyi biryi wa ibde baranci uca, Niryi kiknibdeibse lemdeirin dinyi ara malyi kun dinyi nirya asi bisik sekdiryok, muna kibdongobkwande.
21Tonda, sun im dangna tukwe dangna nang nirya ara Ni wa irmilinanyi biti, “Erci nunsi lebdeibkwansir,” tenen dibde bukwaming,’ ebmou.” (Yesaya 42:1-4)
Ara, Er Imtamnyi biryi Yesaya deib aryi ato eboka ebdeiamwe to, Yesus biryi sirya kunubmou.
Sun Farisi nang ara yu kanya bobmai cok, “Er Yesus bira isa sienyi si Beelzebul mikib deib aryok isa yangdonongnande,” ebmai uram
12:22-37
22Ura, ninyi ton nang aryi Yesus dam yandoka isa kanya wekamunyi bisi boyanmai. Anyi bira isa kanya wekamunyi kuramuryok, asing kuamunyi ton uram ton kum danabsiniamunyi kuramwe asi Er Yesus dam boyanmai. Ura, Er Yesus biryi a isa kanya yakdonokmou uca, a uram kumnyi bira tubto uram ebkalibmouci, asing eibkatabmou. 23Uca ninyi ilinto Er dam tikmai nang ara Er Yesus biryi ukubmou dinyi asi eibmai ura, sunci, “Nai kobe,” teneboka ato ebdanmai, “Anyi Yesus bira Daud deibdoba anyi kurur do? Erda Ninyi Lemyankwansou Weik Sienyi kurur do?” eboka asibdanmai.
24Ato eboka asibdanmai asi sun Farisi nang aryi kekebmaici, sunci Er Yesus biti ato ebmai, “Erda Er Imtamnyi mikib deib aryi isa kanya asi kum yakdonokmar. Eda, isa sienyi si Beelzebul mikib deib aryok isa kanya asi yakdonokmar,” ebmai.
25Ura, Er Yesus biryi sun Farisi nang tenebmai kanya asi bikmou ura, Erci sunsi ato ebmou, “Nira isa yangdonongnun ara isa mikib deib kum yangdonongnun. Isa mikib ara isa asi yakdonokte ura, isa mikib ara minola tuba kum date. Weik sienyi bisi miliraming nang ara sun mamun mar bordaramingnyi ura, a nang ara sun mamun orsengdaraming uca, sun uram arungdeirirande weik sienyi er mikib ara minola kum date. Tonda, neik atei nang ara sun mamun mar bordaramingnyi ura, akatei nang ara mikib tuba kum kuranting. Tonda, sun mining ai nang ara ai abala mar bordaramingnyi ura, tonkwa antaniboka kum kuroraming uca, sun mikib minola kum date. 26Ato aryi isa sienyi Iblis arungdeirirande nang ara bokdandoka mar bobdating ura, isa mer ara sun damnyi nirya obsekdating. Isa ara sun mamun mar kum bordaraming ati ebman. Ati, sunci Niti, ‘Isa sienyi si Beelzebul mikib aryok isa kanya asi yakdonokmar,’ ebmanurum ara diba ati kum ebmanurum. Nira isa milin nang tamnyi kum kunun. 27Sunci Nisi, ‘Isa sienyi si Beelzebul mikib aryi isa kanya mer asi yangdonongdur,’ tenebmanurum ara malyito tenebmarum ati, Niryi sunsi asirdena ton asibdenkwinsin. Sunda Farisi nang kankan aryi ton nang ara isa yangdonongnung ara unanyi mikib deib aryi yangdonongnung do? Isa sienyi mikib aryi do? Er Imtamnyi mikib aryi do? Sun mining yala nang ababyi isa kanya yangdonongnamingiryok, sunci, ‘Beelzebul mikib aryi isa kanya yakdonokman kum,’ tenen bingnaming. Ati, sun mining yala nang ara sunti, ‘Sunci Anyi biti, “Isa mikib deib aryi isa yangdonongnande,” enmarum ara talyi ati ebmarum se,’ eboka lak ebkwansing. 28Bok, Niryi Er Imtamnyi Kanya Roh Kudus mikib biriman aryi isa mer asi yangdonongnun. Ati, sunci a kunubde banun to asing eibmamunyi ura, sunci ato tenen bikwandarur, ‘Er Imtamnyi bira mikib kuboka arukdeibkwansou talak ara sirya berekmar.’ Nira Er Imtamnyi mikib deib aryi isa asi yangdonongnun deyok aryi, sunci ato tenen bikwandarur,” ebmou.
29Ebmou cok, Er Yesus biryi, “Isa kanya yangdonongnun deyok ati ton eterebtabakwan,” tenen ato ebmou, “Isa ara mikib weiknyi kurur deyok aryi, nunci isa asi tabwe deboka muna kibdongobtibiryok, isa aryi tabwe debmaci nang asi lobdeibtibyi. Isa asi tabwe deboka muna kum kibdongobtibiryok, nunci isa aryi tabwe debmaci nang asi kum lebdeibtibyi. Ara, ‘Mikibnyi ai wengbindoka er ai umbura kuranci bona bon dinyi asi akabdobtinyi,’ tenebdinyi bira mikibnyi bisi tabwe debdiryok, er bona bon dinyi asi akabdobte to, Niryi isa mikibnyi bisi tabwe deboka yangdonongnun cok, isa aryi tabwe debmaci nang asi lordeirinun,” ebmou.
30“Unanyi-unaner ara Nisi kum miliraningnyi nang ara Nisi bisik sengnina nang kunung. Tonda, unanyi-unaner ara Ni ab tonkwa kum kuramibiryok, ninyi bulubdeiboka Er Imtamnyi amwetam kum boramingnyi ura, a nang ara Er Imtamnyi biryi bulubdeibte nang asi yakdonokoka bongwalwalarsiniraming,” ebmou. 31“Niryi Er Imtamnyi Kanya Roh Kudus mikib deib aryi isa yangdonongnun bok, sun Farisi nang ara Niti, ‘Isa mikib aryi isa yakdonokmar,’ ebmaning. Ato ati talyi ebmaning ara Er Imtamnyi Kanya Roh Kudus asi ina ngilikmang. A deyok aryi, Niryi sunsi dib en uram ton ebkwinsin ati sunci diboka kekebdarur. Ninyi aryi Er Imtamnyi urasintam aryi malyi kun dinyi utotoa kunubde baramingnyi ababyi Er Imtamnyi biryi a dinyi nirya kilibte. Ba, ninyi aryi Er Imtamnyi Kanya Roh Kudus aryi wa ibde ban dinyi ati, ‘Nun li,’ tenen, ‘Isa wa aca ibde barur,’ ebdengnyi ura, Er Imtamnyi biryi a nang ati, ‘Iya malyi dinyi kubmang,’ tenen sun malyi kun dinyi kum kilibkwande. 32Unanyi-unaner ara Ni Ninyi Dasinyi biti, ‘Ni li,’ tenen ina ngilikniting ura, Er Imtamnyi biryi a nang aryi malyi kun dinyi kilibte. Bok, unanyi-unaner ara Er Imtamnyi Kanya Roh Kudus ati, ‘Ni li,’ tenen ina ngilikting ura, Er Imtamnyi biryi a nang aryi malyi kun dinyi kum kilibkwande. Ara, ukuryok kubde banub talak ababyi aminda sirya kobdob kubkwayeb talak ababyi Er Imtamnyi biryi sun Er Kanya Roh Kudus bisi ina ngilingna dinyi asi iya kum kilibkwande,” ebmou.
33“Co ara teleb co kuranci uca, co du teleb dinyi ababyi moubkwande. Ba, co ara malyi co kuranci uca, co du malyi dinyi akwe mourante. Ara, ninyi ara malyi dinyi kunubde baramingnyi deib aryi yuk nang aryi, ‘A nang ara yu kanya bonung,’ tenen bingnung. Tonda, ninyi aryi teleb dinyi kunubde baraming deib aryi yuk nang aryi, ‘A nang ara teleb kanya bonung,’ tenen bingnung. Nira teleb dinyi akwe kunubde banun ati, sunci Niti, ‘Teleb kanya bonanyi,’ tenen biknindate. 34Se, sunda Farisi nang ara yu kanya boramuncok, kwatima tok ato nang kundarur. Sunda malyi kanya bon nang kundarur deyok aryi, sunci Teleb Uram ton ebmana kum kundarur. Ninyi kanya dam aryi teleb dinyi kum malyi dinyi kum teneibde baramingiryok, neik dinyi akwa langdeiboka ebingiryok, teleb dinyi kum malyi dinyi kum lak eraming. A deyok aryi, Niryi sunsi, ‘Teleb Uram ebmana kum kundarur,’ ebmasin. 35Sun teleb kanya bon nang ara teleb dinyi akwe langdeiboka teneibde baramingiryok, teleb dinyi akwe eraming. Bok, sun malyi kanya bon nang ara malyi dinyi akwe langdeiboka teneibde baramingiryok, malyi dinyi akwe eraming. 36Bok, Niryi sunsi dib en uram ton ebkwinsin ati sunci diboka kekebdarur. Sun tukwetam nang ara talyi uram ebingnyi ura, Er Imtamnyi biryi, ‘Wenebkwan,’ tenen a talyi ebmangnyi uram nirya asi lilibkwande. Ara, aminda aryi wenebkwansir uki tum berekci ura, Erci, ‘Unato ati talyi uram ebmarum do?’ eboka lilibkwansir. 37Ninyi aryi ebmangnyi uram deib aryi Er Imtamnyi biryi sunti, ‘Ni urasintam aryi sun deyok kum kubmasir,’ eboka lebdeibkwande. Tonda, ninyi aryi ebmangnyi uram deib aryi Er Imtamnyi biryi sunti, ‘Ni urasintam aryi sun deyok kubmasir,’ eboka wenebkwande. A deyok aryi, Niryi, ‘Er Imtamnyi biryi sun ebkwamunyi uram nirya asi lilibkwansir,’ ebmasin,” ebmou.
Sun Farisi nang aryi Er Yesus bisi, “Nunci kansi dib tenebkitibyi ati, Kanci ilil tenen dinyi kiknibderum,” eboka molobmai uram
12:38-42
38A talak aryi Musa kerek sengna etereramnyi nang ab Musa kerek dirniliramnyi nang Farisi nang ab ninyi mikbaryi aryi Er Yesus bisi ato ebmai, “Ninyi eterenanyi, Kanci ilil tenen dinyi ton kiknibdeminyi ba, nun asing aryi eibibiryi, ‘Kanda diba ati, Er Imtamnyi biryi Bokwetebunyi kurum,’ tenebkwankib,” ebmai.
39Ato eboka molobmai bok, Er Yesus biryi sunsi ato ebmou, “Sunda yu kanya akwe bondarurci, Er Imtamnyi bisi milirandau ani, taklobmarum nang kurandum se. Sunci ato kun nang kurandum cok, sunci Nisi, ‘Ilil tenen dinyi ton kiknibderum,’ eboka molonmanurum se! Niryi sun urasintam aryi ilil tenen dinyi ton kum kiknibdeibkwaman. Eda, nabi Yunus biryi minob kiklibdeibmou dinyi asi eterebkwinsin ati, sunci a dinyi diboka teneibdarur. 40Nabi Yunus bira minob ura weik mekinaia mundu umbura kunmou ara kitingtam ababyi lukunda ababyi kunmouci, uki winiryi mabmou. Ura, Ni Ninyi Dasinyi bibabyi neiktoto kubkwan. Ati, Niryi tukwe umbura mabkwan ara kitingtam ababyi lukunda ababyi uki winiryi mabkwan,” ebmou.#Yun. 1:17 41Enmou cok, Yesus biryi sunsi ton ato ebmou, “Nabi Yunus bira minob ura sun Niniwe atei nang asi bindoka, ‘Er Imtamnyi biryi wenebkwansir,’ eboka eterebmou uca, a nang ara Er Imtamnyi Uram walwal nang kuramiryok, Er Imtamnyi Uram dib tenebmaici, sun malyi kun dinyi taklobmai. Bok, Nira Yunus bisi bisibkaboka Erebdobnyi kunun cok, sunda ukuryok kurandum nang asi Er Imtamnyi Uram eterebde basunun bok, sunci Nisi dib kum teneranumunci, sun malyi kun dinyi kum taklobmarum se. A deyok aryi, Er Imtamnyi biryi ninyi deyok nirya lilibkwansir uki tum berekde ba, sun atei Niniwe kuramnyi nang aryi tikoka sunda ukuryok kurandum nang asi tatabdongobkwansingiryok, ‘Sunci unato ati dib kum tenebmandauci, sun malyi kun dinyi kum taklobmandau do?’ ebkwansing. 42Tonda, minob ura me youkwa mutuk kuramnyi nang kalingnamwe ner weik sien ner ara, ‘Sun Israel yala nang kalingnande weik sienyi si Salomo bira bikdob weik dinyi bikoka etererurunyi kurur,’ en uram kekebmouci, erci, ‘Er uram kekebtinyi,’ tenen er mutuk dam kum mutuk aryi anabdobmouci, Salomo dam yandoka kekeryanmou. Bok, Nira Salomo bisi bisibkaboka iya bikdob dinyi bikoka eterenunyi kunun bok, sunda ukuryok kurandum nang ara Ni uram diboka kum kekerandum. A deyok aryi, Er Imtamnyi biryi ninyi deyok nirya asi lilibkwansir uki tum berekde ba, me youkwa mutuk nang kalingnamwe ner weik sien ner ababyi tikoka sunda ukuryok kurandum nang asi tatabdongobkwansiriryok, ‘Unato ati sunci dib kum tenebmandau do?’ ebkwansir,” ebmou.
Er Yesus biryi, “Isa tentok ara sunda ukuryok talak kurandum nang kanya aryi anabdobmou ani, isa mer ara sun kanya tubto wengbinmou,” eboka eterebmou uram
12:43-45
43Ura, Er Yesus biryi ton ato eterebtabakmou, “Isa ara ninyi kanya dam aryi yakdonokamingnyi ura, anaboka yibindanci ura, a isa ara ninyi kun kum ai bindoka talyi noutam asi yibinkirikoka er kubdobmanto ai ati ingkiringkiringnande uca, er kubdobmanto ai kum eibkwande. 44Ani, er kubmanto ai ton kum eibdobci ura, isa aryi ato erande, ‘Ni tubto tamuboka abniryi ni takloyase ai tubto wengdorbinkwan,’ erande. Ato ebci ura, isa aryi ninyi kanya takloanci asi tubto wengbarande. Ara, ninyi aryi er kanya asi bitabdeibmouci, er tenen dinyi nirya lilibmou bok, dib tenen dinyi er kanya dam kum kurande ati, er kanya ara lo ai, isa aryi ur kubdobmanto ai ato kurande. 45Ninyi kanya ara ato kuboka kuranci asi isa aryi yandoka eibci ura, Erci er kwit yabwe isa tabaryi ara ersi bisibkaboka iya yu but kobdob isa asi nabci ura, boyangarande ba, ninyi kanya umbura yandoka kuraming. Ati, minob ura isa tentok aryi er kanya dam wekamwe kamuk ara malyito kuramwe ani, aminda aryi isa mer aryi wekamnyi deyok aryi, anyi kamuk ara bisibkaboka iya malyito kurande. Ura, sunda ukuryok kundarur nang ara dib kum teneranurum deyok aryi, isa mer aryi wekanci nang ato kurandum ati ebman,” ebmou.
Er Yesus Er weit yabwe ab sun kwin Maria ab aryi, “Er Yesus ab ebdatibyi,” tenen yanmai uram
12:46-50
46Ninyi ilinto buluboka wekmai ai aryi kunmai cok, Er Yesus bira uram tuba enmou bok, Er weit yabwe ab sun kwin Maria ab aryi, “Er Yesus ab ebdandoka uram ton sisiktibyi,” tenen yandoka baitam tikmai. 47Ura, ninyi tentok aryi Er Yesus dam asi ato eboka ebdongobmou, “Nai, Kan kwin ab Kan weit yabwe ab ara, ‘Yesus ab ebdandoka uram ton sisiktibyi,’ tenen yandoka baitam kuboka dibde tikmaking,” ebmou.
48Ebmou bok, Er Yesus biryi Ersi ebdongobmunyi bisi ato ebmou, “Ni kwin yabwe ato nerabwe ara una nerabwe kunung do? Ni weit yabwe ato kunung nang ara una nang kunung do?” eboka asibdenmou. 49Ura, Erci Er miliramnyi nang asi taruk ukdongobmouci, ato ebmou, “A nang Nisi miliraning nang ara Ni kwin yabwe ab Ni weit yabwe ato kunung,” ebmou. 50“Unanyi-unaner ara Ni Nai Imtamnyi teleb tenerur to kunubde baramingnyi nang ara Ni weit yabwe ab, Ni malnerabwe ab, Ni kwin yabwe ab ato kuramingiryi ati, ato ebmasin,” ebmou.
Atualmente Selecionado:
Matius Uram 12: MTG
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
@LAI 2007 (New Testament), @LAI2022 (Old and New Testament)
