Matius Uram 13

Er Yesus biryi yala kwengnanyi biti kemdeirin uram doboka eterebmou uram

13:1-23

1A uki tum tuba kunmou bok, Er Yesus biryi Er kunmou ai aryi anabkaboka Galilea me kwan katum dam bindoka bunmou. 2Ura, ninyi ilinto aryi buluboka Er Yesus dam yanmaici, arubdongobmai. Arubdongobmai deyok aryi, Er Yesus kisibdongoboka co ngun-ngun dub welebindoka bukmou. Bukmou ba, a bulubmai nang nirya ara me kwan katum dam tikmai. 3Ura, Yesus biryi kemdeirina uram yuk-yuk asi doboka sunsi deyok ilinto asi eterebmou. Ato eboka eterebmou, “Uki tentok tum aryi ninyi tentok er wa in dam bindoka yala kwengbinmou. 4Wa in dam bindoka yala kwengmou uca, ton dinyi ara bisik iririkna dam sakmou uca, tukwe kat aryi a yala ara lak mabmou asi maka mer aryi yandoka nirya doyibsekmai. 5Ba, ton yala kwengmou uca, keil kankan aryi sakmou. Keil kankan aryi tukwe ara mitik deyok aryi, a yala ara ola betekalibmou bok, koula danmou. 6Ara, kiting deibmou ura, a yala yating ara me ton bolina kum kubmou aryi a yala ara kiting tin aryi tumakoka koula danmou. 7Ba, ton yala kwengmou uca, dola kankan aryi sakmouci, abkalibmou bok, dola aryi kwiliya obsinibmou uca, lubmou. 8Ba, ton yala kwengmou uca, tukwe teleb ai sakmou ura, diboka betekmou. Diboka betekmou ani, ton dinyi ara du yubwa-yubwa seratus baryi moubmou ba, yuk dinyi ara du yubwa-yubwa enam puluh baryi moubmou ba, yuk dinyi ara du yubwa-yubwa tiga puluh baryi moubmou. 9Unanyi-unaner ara amol boramunyi nang nirya ara a ebmasin uram diboka kekebmunci, bikdobkwandum!” eboka eterebmou.

10Er Yesus biryi ato eboka sirya eterebmou ura, Er miliramnyi nang amolbaryi aryi yandoka Ersi ato eboka asibmai, “Nai, Kanci a bulubmang nang asi etererandim ara unato ati kemdeirina uram deib aryi etererandim do?” eboka asibdenmai.

11Asibdenmai uca, Er Yesus biryi sunsi uram dengna ara ato dekdeibmou, “Er Imtamnyi biryi sunda Nisi miliranurum nang asi karebmasou uca, sunci yuk nang aryi bingna kum dinyi bingnandum. Ara, sunci, ‘Er Imtamnyi bira Weik Sienyi kururcok, Erci ninyi ilinto lebdeiboka Er amwetam kun nang kimdeirisurur ara ato-ato kuboka kimdeirisurur,’ tenen bingnandum bok, yuk nang aryi a dinyi ara lak kum dinyi kum bingnung. Ara, Er Imtamnyi biryi yuk nang asi lak kum kibdeibmou bok, Erci sunda Nisi miliranurum nang asi a dinyi lak kibdeibsou. 12Sun, ‘Dib en uram dobdobtibyi,’ tenen nang asi Er Imtamnyi biryi bingna dinyi tabakoka karebkwande. Ba, sun, ‘Dib en uram dobdobtibyi,’ tenen kum nang asi Er Imtamnyi biryi bingna dinyi tabakoka kum karebkwande. Eda, a nang aryi bingna dinyi mitikanun bingnaming ababyi Er Imtamnyi biryi kum daneibkwande. 13A bulubmang nang ara Ni eterenun uram asi kekeramingiryok, sunci sun kanya dam aryi, ‘Kekena nun li,’ teneraming. A deyok aryi, Niryi a nang asi eterenun cok, laktoto kum eterenun. Eda, kemdeirina uram deib aryok eterenun. Kemdeirina deib aryi eterenun uca, a nang aryi Niryi kiknibde banun ilil tenen dinyi asi asing dinmangiryok, sunci, ‘Nun dib tenebkwayeb ati, ilil tenen dinyi kiknibde barur,’ tenen kum kuraming. Tonda, a nang ara Niryi eterenun uram lilim asi kekeramingiryok, sunci a uram deyok asi diboka kum bingnaming. Ati, Niryi, ‘Ni eterebde banun uram deyok bikingyei,’ tenen kemdeirina uram deib aryi eterebde banun,” ebmou. 14“A bulubmang nang kuraming to ara minob Er Imtamnyi Uram ebdeibmaca bobaramunyi si Yesaya kerek sekdeiamwe to kuraming. Ara, Yesaya biryi minob ura a nang ati ato eboka kerek sekdeiamwe,

‘Sunda, “Nun li,” tenen kanya borandum nang ara dib en uram tuba-tuba kekebde baramunyi ababyi, sunci a uram deyok asi diboka kum bingnandum.

Sunci Er Imtamnyi biryi kiknibde barur ilil tenen dinyi asi asing diramun cok, sunci, “Nun dib tenebkwayeb ati ato kiknibde barur,” tenen kum bingnandum.

15A yala nang kisok ara kat kurur deyok aryi, sunci Er Imtamnyi Uram deyok diboka kum bingnung.

A nang ara amol kekeramingiryok, diboka kum kekeraming.

Tonda, sunci, “Dib en uram bikibyei,” tenen sun asing kum eiriraming.

Ati, a nang ara, “Er Imtamnyi biryi ilil tenen dinyi kiknibde barur ati asing eibibyei,” tenen kuraming.

Tonda, sunci, “Er Imtamnyi Uram kekebibyei,” tenen kuraming.

Tonda, sunci, “Nun kanya dam aryi bikdob dinyi bikibyei,” tenen kuraming.

A nang ara, “Nun malyi kun dinyi taklobtibyi,” tenen kum kuramingiryok, “Er Imtamnyi dam tamurbibyi uca, Erci nunsi lebsute,” tenen ababyi kum kuraming,’ (Yesaya 6:9-10)

Ato eboka nabi Yesaya biryi a bulubmang nang ati eboka minob ebdeiamwe,” ebmou. 16Enmou cok, Er Yesus biryi Er miliramnyi nang asi ato ebmou, “A bulubmang nang ara asing kun nang ato kuraming bok, sunci asing diboka eirirandum. Ara, Er Imtamnyi biryi ilil tenen dinyi kiknibde barur ati, sunci asing diboka eirirandum. A deyok aryi, sunda Er Imtamnyi biryi kisal dangsurur nang kurandum. 17Niryi sunsi dib en uram ebkwinsin ati sunci diboka kekebdarur. Er Imtamnyi Uram ebdeibmaci to lak etereramnyi nang ara minob kuramiryok, ‘Er Imtamnyi biryi iya ilil tenen dinyi kiknibkwande ati asing eiboka kekebtibyi,’ tenen dibde buramiryok, a kunubkwamwe dinyi asi asing kum eiriramiryok, kekena ababyi kum kuramnyi. Tonda, Er Imtamnyi urasintam aryi teleb dinyi kunubde baramnyi nang ilinto ara minob kuramiryok, neik dinyi akwe tenen dibde buramiryok, sunbabyi a kunubkwamwe dinyi asi asing kum eiriramiryok, kekena ababyi kum kuramnyi. Bok, sunda Nisi miliranurum nang ara Er Imtamnyi biryi minob ebdeiamwe tok, kunubde barur asi eirirandum ati ebman.

18Ura, Er Imtamnyi biryi sunda Nisi miliranurum nang ati, ‘Lak kum dinyi bikting,’ tenesurur ati, Niryi sunti yala kwengnanyi biti kemdeirina uram deyok asi lak kiboka eterebkwinsin,” ebmou. 19“Yala kwengnanyi yala kwengmou ati kemdeirin uram ebmonwe ara sun, ‘Er Imtamnyi Weik Sienyi kururci, ninyi ilinto lebdeiboka Er amwetam kun nang kimdeirirur,’ en uram keken nang yuk-yuk kuramingnyi to asi kiklibdeibmonwe. Ninyi kankan aryi ton nang ara Er Imtamnyi Uram asi kekeramingiryok, sunci sun kanya dam aryi, ‘Dobdobtibyi,’ teneramingiryok, a uram deyok asi diboka kum bingnung cok, kum doronung. Ara, isa aryi, ‘A uram ara ninyi aryi bikoka dib tenebingnyei,’ tenen yandoka Er Imtamnyi biryi ebmaci uram asi ukula dorsengnande. Sun ato kuraming nang ara bisik iririkna dam sakmou yala ato kuraming. Maka mer aryi yandoka ato yala lak mabmaci asi doyiraming to, isa aryi yandoka Er Imtamnyi Uram ara ninyi kanya wengbinmou asi ukula dorsengnande. 20Ba, yuk yala ara keil kankan aryi sakmou ati ebmonwe. Sun kilkil asa aryi, ‘Er Imtamnyi Uram anmalakoka dobdobtibyi,’ tenen nang ara a yala ato kuraming. 21Ato tenen kuraming bok, Er Imtamnyi Uram ara diboka sun kanyatam wengbana kum kurande uca, a nang ara tiya ati dib tenebmangnyi ura, minola tangloraming. Ara, mambul dinyi a nang dam yaci ura, sunci Er Imtamnyi Uram kekena ati minola tangloraming. Tonda, ninyi aryi, ‘Er Imtamnyi Uram keken nang asi obtibyi,’ tenen domkiringnansing uca, a nang ara, ‘Ninyi aryi obsingnyei,’ tenen Er Imtamnyi Uram kekena ati minola tangloraming. 22Ba, yuk yala ara dola kankan aryi sakmou ati ebmonwe. Sun Er Imtamnyi Uram kekeramingnyi ani, tukwetam wa yuk-yuk ati mambul kanya boboka wa iraming uca, Er Imtamnyi Uram luba kimnaming nang ati ato ebmonwe. Tonda, ‘Bona bon dinyi ilinto talebtibyi,’ tenen tiya dinyi akwe ingkiringnaming nang ati ato ebmonwe. Sun ato kanya bon nang ara Er Imtamnyi Uram kekeroramingnyi asi sikliboka ouraming uca, du kum mourande ati ebman. 23Ba, ton yala ara tukwe teleb ai sakmou ati ebmonwe. Sun Er Imtamnyi Uram kekeroramingiryi, sun kanyatam aryi diboka bingdoramingiryi, dib tenen nang ati ato ebmonwe. A nang ara Er Imtamnyi Uram diboka dororaming uca, du mourirande. Ara, ton nang du mourirande ara du seratus baryi moubte. Ba, yuk nang du mourirande ara du enam puluh baryi moubte. Ba, yuk nang du mourirande ara du tiga puluh moubte,” ebmou.

Er Yesus biryi gandum ab alingkweia ab ati kemdeirin uram ebmou uram

13:24-30

24Er Yesus biryi me katum dam tuba bukmouci, Erci yuk kemdeirina uram asi doboka sun bulubmai nang asi ato eboka eterebmou, “ ‘Er Imtamnyi bira Weik Sienyi kururci, ninyi ilinto lebdeiboka Er amwetam kun nang asi kimdeirirur kiklibkwan,’ tenen ato eboka kiklibkwinsin. Ninyi tentok ara er wa in dam bindoka gandum yala teleb dinyi kwekmou. 25Gandum yala teleb dinyi kwekmou bok, lukunda kubmou ba, er wa in nang nirya mabsekmai ba, er mar ordananyi biryi, ‘Gandum du moubcei,’ tenen wa in dam yandoka gandum yala kankan asi alingkweia du kwekdonokmou ura, bindobmou. 26Ura, a gandum du ara betekokabdiryi du murungdaci asi dinmai uca, alingkweia du ababyi abci uca, gandum du kankan aryi tingnamwe asi eibmai.

27Ura, sun wa in damnyi wa irmiliramnyi nang aryi sun nai bisi yandoka ato eraming, ‘Nai, kanci gandum du teleb dinyi asi kan wa in dam kwekamoumwe bok, alingkweia du ababyi abwe ara dantam aryi kuboka abwe do?’ eboka asibdenmai. 28Uca, sun nai biryi ato ebmou, ‘Ni mar ordananyi biryi yandoka alingkweia du kwekdongobwe,’ ebmou. Uca, er wa irmiliramnyi nang ara ersi ato eraming, ‘Ato kubwe ura, nunci wa in dam bindoka alingkweia ara kwinibkabokwayeb do?’ eboka molobmai. 29Molobmai bok, sun nai biryi ato ebmou, ‘Ato kuna mem! Sunci alingkweia kwinirkarongmunyi uca, gandum ab laboka kwinibmunyei. 30Ati, sunci gandum ab alingkweia ab nisintum takloamunyi ba, tikandingnyi ani, du moun dinyi yongon uki tum berekci ura, niryi sun ya sekoka yongobkwaming nang asi ato ebkwan, “Alingkweia ara minob bulubdeiboka uk dabdarur. A sirya ura, sunci gandum du asi bulubdeiboka ni gandum du bulurdeirin ai umbura deirirbindarur!” ebkwan,’ Er wa in damnyi biryi er wa in nang asi ato ebmou.” Ato eboka Er Yesus biryi sun Er dam bulubmai nang asi kemdeirin uram ebmou.

Er Yesus biryi kemdeirin uram yuk-yuk doboka co uryi si sesawi du mitik dinyi ati eterebmouci, roti bungbung erdeirirande keica mitikanun ton ati eterebmou uram

13:31-35

31Ura, Er Yesus biryi kemdeirina uram yuk uram asi doboka sun bulubmai nang asi ato eboka eterebmou, “ ‘Er Imtamnyi bira Weik Sienyi kuboka ninyi ilinto asi lebdeiboka Er amwetam kun nang asi kimdeirisurur kiklibkwan,’ tenen ara ato kiklibkwan. Ninyi tentok ara wa in dam bindoka co uryi si sesawi du iya mitik keica asi kwekmou. 32Yuk kouna ababyi mitik keica kurande bok, a co uryi si sesawi du ara iya mitik kurande asi kwekamunyi uca, a co du ara betekokabdiryi welebci ura, cang weik co ato weleboka te yangnande. Yuk kouna ababyi cang weik welebte bok, co uryi si sesawi ara bisibkaboka iya weik weleboka te yangnande. Uca, maka mer aryi yandoka a co te asi ai laboka du deiraming. Er Imtamnyi Weik Sienyi kururci, ninyi ilinto asi lebdeiboka Er amwetam kun nang asi kimdeirirur ababyi neiktoto kurur ati ebman. Deyok koun dinyi ara mitik dinyi ato kurande bok, sirya kobdob dinyi ara bisibkaboka iya weik dinyi kurur,” ebmou.

33Ura, ton yuk kemdeirina ababyi doboka Erci sunsi eterebmou, “ ‘Er Imtamnyi bira Weik Sienyi kururci, ninyi ilinto asi Er amwetam kun nang kimdeirisurur kiklibkwan,’ tenen ato eboka kiklibkwan. Ner tentok ara, ‘Roti ilinto kiknibkwan,’ tenen tepung sici borbosa ato dinyi ilinto kiknibdeibmou. Sirya kiknibdeibmou ura, a ner ara roti bungbung erdeirin dinyi si ragi mitik nun dobmouci, a kiknibdeibmou tepung ilinto asi inibdeiboka dongobmou. Ragi mitikanun asi sirya dongobmou uca, a kikninmou roti nirya ara bungbung eboka welebmou. Ura, Er Imtamnyi bira Weik Sienyi kururci, ninyi ilinto asi lebdeiboka Er amwetam nang kimdeirirur ababyi neiktoto kurur. Ara, deyok koun dinyi ara mitik kurande bok, sirya kobdob dinyi ara bisibkaboka iya weik dinyi kubkwande,” ebmou.

34Er Yesus biryi, “Er Imtamnyi Weik Sienyi kururci, ninyi ilinto lebdeiboka Er amwetam nang asi kimdeirirur,” tenen Erci sun Er dam buluboka wekmai nang ilinto asi etereramwe. A dinyi nirya asi etereramuryok, Erci a nang asi lak kimdeirin uram asi kum etereramwe. Eda, kemdeirina uram akwe doboka etereramwe. 35Kemdeirina uram doboka etereramwe ara Er Imtamnyi biryi Er uram ebdeibmaci to lak etereramnyi nang deici aryi ebdeiamwe ba, kerek sekdeiamnyi to etereramwe. Ara, Er Imtamnyi Uram ebdeibmaca bobaramunyi biryi minob ura ato eboka kerek sekeiamwe.

“Niryi, ‘Ninyi eterebkwan,’ tenen kemdeirin uram doboka eterebkwan. Eterebniryok, Niryi minob lak kum kuamwe dinyi lak kibkwan. Ara, Er Imtamnyi biryi im ton tukwe ton kikniamwe talak aryi lak kum kimnamwe dinyi asi Niryi lak kibkwan,” ebmou. (Mazmur 78:2)

Ura, Er Imtamnyi Uram erbananyi biryi minob ebdeiamwe tok, Er Yesus biryi kunubdeibmouci, kemdeirina uram akwe doboka etereramwe.

Er Yesus biryi gandum ab alingkweia ab ati kemdeirin uram deyok asi lak kiboka eterebmou uram

13:36-43

36Eterenmou ani, Er Yesus biryi sun Er dam bulubmai nang ilinto asi deiblobmou ura, Er kunmou ai asi wengbinmou. Ura, Er miliramnyi nang amolbaryi aryi Er dam yandoka ato eboka molobmai, “Nai, Kanci kemdeirin uram doboka, ‘Alingkweia wa in dam arande,’ ebmasumwe asi nunci, ‘Una deyok ati ato ebmar do?’ tenen kum bikmab ati, Kanci a uram deyok ati lak kiboka eterebsurum,” eboka molobmai. 37Uca, Erci sunsi ato eboka eterebmou, “Gandum yala teleb yala kwengbinmou ebmanounyi bira Ni Ninyi Dasinyi a kunum. 38Ba, wa in dam ebmonwe ara sun im dangna tukwe dangna nang ati ebmonwe. Ba, gandum yala teleb yala ebmonwe ara Er Imtamnyi amwetam kun nang Er Uram dib tenen nang kuraming. Ba, alingkweia ebmonwe ara isa uram milin nang ati kiklibmonwe. 39Ba, mar ordananyi bira alingkweia du kwekmou ebmonwe ara isa sienyi Iblis a kunum. Ba, ya sekoka yongon tum ebmonwe ara sirya kobdob berekwande uki tum ati ebmonwe. Ba, ya sekoka kin nang ebmonwe ara Er Imtamnyi Uram eryuryangan nang kunung.

40Ba, alingkweia ara ya sekbuluboka uk dabkwaming ebmonwe ara aminda sirya kobdob tum ati ato kubkwande dinyi ati ebmonwe. 41Ara, Ni Ninyi Dasinyi biryi Ni uram eryuryangan nang asi bokdonoknyi uca, sunci Nira iya weik sienyi kuboka arungdeirinun mutuk nirya yibindoka sun malyi kun nang ab ninyi boboka malyi kun bisik bobaramingnyi dinyi ab asi yuk wibdeiboka bulubdeibkwaming. 42Ura, Er Imtamnyi Uram eryuryangan nang aryi a malyi kun nang nirya asi bobindoka uk buk weik arur ai dongobkwaming. A uk buk weik arur ai ara engen weik dam kururci, mambul weik aryi si keterdan ai kurur. 43A talak ara sun Er Imtamnyi urasintam aryi teleb dinyi kunubde baraming nang aryi iya ererdein dinyi dobdobkwaming. Ara, Er Imtamnyi biryi Er amwetam kun nang nirya asi iya kalikwande uki tum berekci ura, Erda sun Nai biryi karebci uca, Er amwetam kun nang ara kiting sinarya milil ato arabkarebkwaming. Unanyi-unaner ara amol borandum nang nirya aryi a ebmasin uram asi diboka kekeboka bikdobkwandum.” Ato eboka Yesus biryi Er miliramnyi nang asi eterebmou.

Er Yesus biryi dengna weik dinyi eibmana dinyi ati kemdeirin uram bitinyi ebmou uram

13:44-46

44Er Yesus biryi Er miliramnyi nang asi eterenmouci, kemdeirin uram ton asi ato ebmou, “Er Imtamnyi bira Weik Sienyi kururci, ninyi ilinto lebdeiboka Er amwetam kun nang asi kimdeirirur ati kiklibkwan. A dinyi ara bisibkaboka dengna weik dinyi tukwe umbura aryi inibdeiamnyi dinyi ato kurur. Ura, ninyi tentok aryi tukwe ukoka a dengna weik dinyi asi eibci ura, er kanya kilkil aryi, ‘A dengna weik dinyi dobdobtinyi ati, a tukwe asi dekwan,’ tenebte. Ura, erci er taleranci bona nirya asi dekeibci uca, erci a tukwe asi dekdobte uca, a tukwe ab a dengna weik dinyi ab er dinyi kubte. Ati, Er Imtamnyi biryi ninyi lebdeiboka Er amwetam kimdeirirur dinyi ababyi neiktoto iya nunukeibkwayeb tenen dinyi kurur.

45Ura, Er Imtamnyi bira Weik Sienyi kururci, Erci ninyi lebdeiboka Er amwetam kun nang kimdeirirur deyok ati kebdeiboka yuk uram ebkwinsin. Dengna dinyi yuk-yuk dengnanyi tentok aryi, ‘Dengna weik keil si mutiara ati ingkirikoka dekdobkwan,’ tenen ingkirikde yibarante. 46Ingkirikde yibarante ani, dengna weik keil si mutiara asing eibte uca, erci, ‘A dengna weik keil asi dobdobtinyi,’ tenebte. Ato tenebte uca, erci bindoka er taleranci bona nirya doboka yuk nang asi dekeibte. Ura, co bok dobdobte ura, erci a dengna weik keil si mutiara dekdobte. Ato kuboka Er Imtamnyi bira Weik Sienyi kurur amwetam kun dinyi ara, ‘Nunukeiboka dobdobtibyi,’ tenen dinyi kurur.” Ato eboka Yesus biryi eterebmou.

Er Yesus biryi, “Er Imtamnyi Weik Sienyi kururci, ninyi ilinto lebdeiboka Er amwetam kun nang kimdeirirur ati kebdeiboka eterebkwan,” tenen mekinaia don aling ati ebmou uram

13:47-52

47Er Yesus biryi ton ato kebdeiboka eterebmou, “Er Imtamnyi bira Weik Sienyi kururci, ninyi ilinto lebdeiboka Er amwetam kun nang kimdeirirur ati kiklibkwan ara mekinaia don aling ati kiklibkwan. Mekinaia don nang ara mekinaia don aling weik aling asi taleboka weik me kwan umbura donokmangnyi ani, lirtaleramingnyi uca, mekinaia ilinto ara yala amuma-amuma mekinaia don aling umbura wengbarande. 48Ura, mekinaia ilinto wengbanmaci ani, aling langkarikci ura, sun mekinaia don nang ara aling liboka abingiryi me kwan katum dam deirirbaraming. Sirya deirirbingmangnyi ura, sunci bukoka winmangiryi, mekinaia teleb ara dobde aling kironmangnyi ura, malyi mekinaia ara bai donongnaming. 49Aminda sirya kobdob berekwande tum ara ato kubkwansir. Er Imtamnyi Uram eryuryangan nang ara yandoka wibdeibingiryok, sun Er Imtamnyi urasintam aryi teleb dinyi kunubde ban nang ab sun malyi kun dinyi kunubde ban nang ab yuk-yuk bulubdeibkwaming. 50Ura, sunci sun malyi kun dinyi kunubde ban nang asi uk buk weik angdur ai umbura yakdongobkwaming. A uk buk weik angdur ai ara engen weik ai kurur. Tonda, mambul aryi si keterdan ai kurur,” ebmou.

51Er Yesus tuba enmou cok, Erci Er miliramnyi nang asi ato eboka asibdenmou, “A eterenmasina nirya ati sunci, ‘Ato-ato deyok ati enmar,’ tenen diboka bingdonmarum do kum do?” eboka asibdenmou.

Uca, sunci Ersi ato ebmai, “Diba, ‘Ato-ato deyok ati enmar,’ tenen bingdonmab,” ebmai.

52Uca, Er Yesus biryi sunsi ato ebmou, “Sunci Ni eterenmasina deyok asi bikdobmarum deyok aryi, Niryi sunsi ato ebkwinsin. Unanyi-unaner ara Musa kerek sengna dibliliboka etereramingnyi nang ara, ‘Er Imtamnyi bira Weik Sienyi kururci, ninyi ilinto lebdeiboka Er amwetam kun nang kimdeirirur,’ eboka eteren uram ababyi diboka bikdobting. Sun Er Imtamnyi biryi minob lak kibdeibmou dinyi ab ukuryok lak kibdeibmou dinyi ab antanibdeibdandoka eteren nang ara telebto etereraming. A nang ara ai damnyi tentok bona bon dinyi talerandanyi bito nang kunung. Ai damnyi bira ukuryok talebci bona bon dinyi ababyi minob taleanci bona bon dinyi ababyi er ai dam aryi miningnande asi dobkweteboka talerande.” Ato eboka Yesus biryi eterebmou.

Sun Nazaret atei nang ara Er Yesus bisi Er mining atei nang kuramiryok, sunci, “Yesus nun li,” eboka dokdonokmai uram

13:53-58

53Ura, Er Yesus biryi a kemdeirin uram yuk-yuk asi eterenmou ani, sirya eterebmou ura, Erci Galilea me kwan dam aryi anaboka bindobmou. 54Banmou ani, Er atei Nazaret binmou ura, Erci Musa Uram eteren ai wengbindoka akatei nang eterenmou. Eterenmou ba, akatei nang aryi, “Nai kobe,” tenebmaici, ato ebdanmai, “Anyi bira dantam aryi kuboka ato bingna dinyi eterebyi bikdobwe do?” Tonda, sunci, “Anyi bira ilil tenen dinyi kiknibde barur mikib ara dantam aryi kuboka dobdobwe do?” Ato eboka asibdanmai. 55Enmai cok, sunci Er Yesus biti ato ebmai, “Anyi bira co aryi kuboka yuk dinyi-yuk dinyi kikninanyi Yusuf mi kurur ara nun bingnub. Tonda, Er kwin si ara Maria kurur. Tonda, Er weit yabwe ara Yakobus ab Yusuf ab Simon ab Yudas ab asi nun sirya bingnub 56Tonda, Er malnerabwe nirya ara nun ab tonkwa kunub ara nun bingnub. Ati, Erci a uram nirya eterenmarci, ilil tenen dinyi kikninmar ara dantam aryi bikdoburyi ukunmar do? Anyi bira weiknyi kuma!” ebdanmai 57Ura, sunci sun kanya dam aryi Er Yesus biti, “Nun li,” tenen dokdonokmai. Uca, Er Yesus biryi sunsi ato ebmou, “Yuk atei nang ara Er Imtamnyi Uram ebdeibmaci to lak etereramnyi nang ati, ‘Nun nai yabwe,’ tenen Er Uram kekeraming. Bok, sun mining atei nang ab sun mining ai ninyi ab ara, ‘Nun nai,’ tenen kum kuraming.” Ato eboka Yesus biryi sunsi ebkarebmou. 58Ura, sun Nazaret atei nang ara Er Yesus biryi eterebmou uram asi diba kum tenebmai deyok aryi, Erci sun Nazaret atei nang kankan aryi kuramuryok, ilil tenen dinyi tentok-tentok akwe kiknibmou.

Atualmente Selecionado:

Matius Uram 13: MTG

Destaque

Copiar