Mateo 10

So Jesús lca'au'alo soua doce lamaxa'shi

(Marcos 3.13-19; Lucas 6.12-16)

1Nachi so Jesús iÿaxanalo soua doce lapaxaguenataqa, nachi ÿanema da n'añaxac, da yaqto' ishit da i'oldauec na n'ecpi, qataq da nataden 'enauac nam ÿotta'a't nalolaxaguesat qataq na nhuetaxanaxapi.

2Qaq 'ena na l'enaxatpi soua doce lamaxa'shi: Simón da l'enaxat lÿa Pedro, qataq so lqaÿa Andrés; Santiago qataq so lqaÿa Juan, soomayi llalqa so Zebedeo; 3qataq so Felipe, Bartolomé, Tomás qataq so Mateo som ÿacootapeeguet co'ollaxa ana nshiitenaqte ca nta'a; Santiago som llalec so Alfeo; qataq Alfeo da lÿa l'enaxat Tadeo; 4Simón som chigaqaigui co'ollaxa ana l'enaxat cananista; qataq so Judas Iscariote som ÿaneuo co'ollaxa so Jesús.

So Jesús ÿama'q soua lapaxaguenataqa da da'aqtaxa'n

(Marcos 6.7-13; Lucas 9.1-6)

5So Jesús ÿama'q soua doce lapaxaguenataqa, qaq ÿanema da l'aqtac, 'eeta':

–Sa ishit qome da qanqo'oñiÿalo na 'ale'u mayi netalguete nam sa ishit da judiopi. Qataq sa ishit qome da qanqo'oñiu'a nam pueblopi mayi huaigui yi Samaria. 6Chaqdata qome da qanqo'oñiÿa nam llalaqpi, so Israel mayi 'eeta'am aca qagueta mayi isomtac. 7Nachi qau'axachiim qome da mashi sa qaÿapeque da l'onataxanaxac ñi Dios mayi neta'ague da piguem da ilo'ogue 'enauacna. 8Qataq qanatayiñi qome na sa no'onpi, qataq qanca'alaxachiiuec nam mashi ileupi, qataq qauÿoi nam nchiga na l'oc, qataq qau'oyiÿauec na n'ec leguemaxaicpi. Qaq de'eda n'añaxac, damayi chochi qami' qoÿaatema, qaq ÿoqo'oyi sa ishit qome da qaushiichiñi da qau'onataxañiÿa.

9Qataq sa ishit qome da qauachii aca qodomi mayi chigaqaigui na oro, huo'otaq plata, huo'otaq na cobre, 10qataq ca laÿi' ca qonoqoi na nqa'aic. Qataq 'oonolec ca qauachii qal-lomaxaquii, qataq caua qadapela'chilli' qataq ca qadashilaxala'ai. Cha'ayi ca 'onataxanaxaic ÿataqta 'itchiguiñi da ÿaconguet ca aloq.

11Qaq qami' da huo'otaq huo'o ca qaviyiu'a pueblo, huo'otaq saq 'amaqtaq shiÿaxauapi, nachi qaunataxañiÿaique ca shiÿaxaua mayi ÿataqta npe'et. Qaq nachica qoviÿa'a ca lma', chochi ivitta'a da qaltaq qoquii. 12Qaq da qaviyiu'a que'eca nma', nachi qauquinaxañi, qoñiita': “Huo'o qome da qadlagaxayiqui.” 13Qaq cam lalamaxat que'eca nma', da huo'otaq ÿaconguet, nachi qan'onaxachiÿa'aguet de'eda qadquinaxanaxaqui mayi naigui da nlagaxayic. Qalaxayi da sa ishit da ÿaconguet, nachi qañi'iguelaxachiila't de'eda qadquinaxanaxaqui. 14Qaq da huo'otaq sa ishit da qami' ÿacongueta, huo'otaq da sa ishit da qami' n'axaÿaxanalo, nachi qoquiÿa'ai que'eca nma', huo'otaq que'eca pueblo. Ime, nachi qauchigoqoiuec na namoxoÿaxa mayi talguete naua qadapia'chilli'. 15Qaq ÿataqta 'eesa de'eda shinapec da qom ivita que'eca na'a'q mayi huetoigui da ñi Dios nmit 'enauacna, nachi ca nhuaxanaguec que'eca pueblo ÿataqta napacalec qome da nhuaxanaguec som shiÿaxauapi mayi netaña co'ollaxa yi Sodoma qataq yi Gomorra.

Na ncanaguecpi nam quegue so Jesús

16¡Qaq qan'axaÿaxañiichigui de'eda shinapec! Da aÿim qami' sama'q, qalaq qoñiita'am qome ana qagueta da quichiguingui nam shiguiÿacpi mayi dequi'iÿapec. Qalaq ÿataqta sa qanqalaachi qome, qoñiita'am na n'adaxanaq, qalaxayi sa ishit da qauacoñiÿa'aguet ca qad'oi, qoñiita'am na qoto'pi. 17Qaq maxatchaxa qome, cha'ayi na shiÿaxauapi qome ishit da qami' ÿaneu'alo na nta'alpi mayi i'ot na lataxacpi, da yaqto' qami' qaiuaxaata'pe da huaigui ana laponaxaquipi na judiopi. 18Qataq ivida'a qome da qami' qaÿauegueu'alo nam ilotagueto naua 'ale'u, qataq na lta'alpi namayipi, souaxat da aÿim qoquiitague'. Huaña, nachi ishit da aÿim qau'axachi da qau'aqtaxañiim namayipi qataq nam sa ishit da judiopi. 19Qalaxayi da ivita da qami' qoÿaneu'alo ne'ena nta'alpi, qalaq sa ishit qome da qami' ÿaquicoqchi't cam 'eetec ca qadtaxaÿaxaqui, huo'otaq ca qad'aqtaqui. Cha'ayi da ivita ca laloqo' da qautaqai, qalaq ñi Dios qami' ÿanema cam qad'aqtaqui. 20Cha'ayi sa ishit da nachiqami' da qautaqai. Cha'ayi som n'Espíritu ñi qadta'ai Dios, nachiso som qami' detaxaiguilo.

21Na shiÿaxauapi i'otec qome ca maichi lqaÿa da qaÿalauat, qataq ca shiÿaxaua i'otec qome ca maichi lalamaxat llalec da qaÿalauat. Qataq ca nsoq maichi npa'aguene' ca lta'a, nachi damaxasoxoolec da qaÿalauat. 22Qataq 'enauac qome nam huetalec ana 'alhua ÿataqta qami' nquiÿalo, souaxat da aÿim qoquiitague'. Qalaxayi ca sa ishit da huo'o ca ÿoqocha'a, chochi ivitta'a ca loga't da nachaalataxac, nachica ca qanca'alaxateec. 23Qaq da huo'otaq qami' qaicana'pe da huo'otaq qoviita'a ca pueblo, qalaq qananeltaxañiÿa ca lÿa. Cha'ayi aÿim qami' shinapegalo da ne'ena shiÿaxaua llalec mashi nvi' qom saxanaxa da qaumachi da qauconñiigui 'enauac nam pueblopi mayi lma' na llalaqpi so Israel.

24Qaq sa ishit da huo'o ca chochi napaxaguenatac da huo'otaq napacalec ca napaxaguenaxala', qataq ca chochi nlatac sa ishit da napacalec ca n'aco'. 25Ÿoqo'oyi ca chochi napaxaguenatac ishit qome da machiguiñi da ivi' da 'eeta'am ca napaxaguenaxala', qataq cam chochi nlatac da ivi' da 'eeta'am ca n'aco'. Cha'ayi cam nataxala' cam nma' da huo'otaq qoÿiitega lataxala' na saq cha'api, qaq ¿huá'ago' ca qoÿiitec da qaitaxaÿa cam llalaqpi?

Cam ÿoqta ÿacteec da qañi'iÿa

(Lucas 12.2-9)

26Qaq ÿoqo'oyi sa ishit qome da qayi'iitega nam shiÿaxauapi. Cha'ayi sa ishit da huo'o ca saq cha'a lataxac da huo'otaq sa qaÿaÿaten, qataq sa ishit da huo'o ca qoÿoxottapiguiñi da huo'otaq sa qaÿanata. 27Qaq cam aÿim shinapec da huaigui ca napalaxa, qalaq qau'axachiiuec qom qoviitaigui ca yi'oqchiguiñi; qataq cam ñichitta'ac da qami' sa'axatema, qalaq ÿataqta qan'axanñiic da qanasaqaiuec da hualec na l-laq ca noÿic. 28Qaq sa ishit qome da qayi'iÿai cam ishit da ÿalauat da n'oquiaxac, qalaxayi sa ishit da ÿalauat som lqui'i. Chaqdato' qome da qayi'iÿai añi Dios mayi ishit da nlaxajñi da n'oquiaxac qataq som lqui'i, da ÿasaxaña cam nhuaxanqa' na 'itaxaloxoicpi.

29Cha'ayi ishit da qaishijnaxanalo caua dos qoÿolqa da lashiue qanqoÿin aca 'oonole lcatole. Qalaxayi sa ishit da huo'o ca 'oonolec namayipi da chochi talec ana 'alhua naq'en ñim qadta'ai. 30Qaq ivida'a na laue ñi 'oonolec da qoñiita ÿataqta qanaloqteeta. 31Qaq ÿoqo'oyi sa ishit qome da qayi'iitac, cha'ayi qami' ÿataqta qanapaquiÿalec da lashiichiÿaxac cam qalota qoÿopiolec.

Nam da'aqtaxanem na shiÿaxauapi da quetague' so Cristo

(Lucas 12.8-9)

32Qaq ÿoqo'oyi 'enauac nam da'aqtaxanem nam shiÿaxauapi da aÿim quetague', qaq aÿim nataq'en sa'axatem qome namayipi ñi ita'a mayi neta'ague da piguem. 33Qalaxayi cam sa ishit da i'axatem na shiÿaxauapi da aÿim quetague', qaq aÿim nataq'en sa ishit da sa'axatem qome camayi ñi ita'a mayi neta'ague da piguem.

So Jesús huesogui naq'en na shiÿaxauapi

(Lucas 12.51-53; 14.26-27)

34Sa ishit qome da qaupichiitega da aÿim ñida'a ana 'alhua da nlagaxa. Aÿim sa ishit da ñidoi' da nlagaxayic, chaqdata da loquiaxac. 35Qaq aÿim ñanac da yaqto' ca shiÿaxaua maichi npa'aguene' ca lta'a, qataq aca 'alo maichi npa'aguene' aca maichi late'e, qataq aca nate maichi npa'aguene' aca lachodo. 36Qaq ÿoqo'oyi ñi 'oonolec maichi npa'agueetapegue' ca maichi lalamaxat lauo' l'ec.

37Ca ÿacteec da ÿauotec ca lta'a, huo'otaq aca late'e, da saq 'en'am naq'en aÿim da lauochi, nachi camayi sa ishit da ÿalamaxat. Qataq cam ÿacteec da ÿauotec ca llalec, huo'otaq aca llale, da saq 'en'am naq'en aÿim da lauochi, nachi camayi saq taiguet da ÿalamaxat. 38Qataq cam aÿim quegue da huo'otaq sa ishit da lhuennataxa da nai'ctaxa da aÿim ileetalec, nachi camayi sa ishit da ÿalamaxat. 39Qaq ca nshitaique da maichi nca'alaxateec da maichi nachaalataxac, nachi camayi daqat. Qalaxayi ca 'ico' ÿaqataqchit da nachaalataxac, souaxat da aÿim quetague', nachi camayi qanca'alaxateec.

Ca nshiitenaxat ca shiÿaxaua

(Marcos 9.41)

40Ca qami' ÿacongueta, camayi nachaÿim aÿim ÿaconguet. Qaq ca aÿim ÿaconguet, camayi ÿaconguet ñim aÿim namaq. 41Qaq cam ÿaconguet cam l'aqtaxanaxanec ñi Dios, qaq cha'ayi camayi lamaxashic ñi Dios, nachi camayi ÿaconguet cam nshiitenaguec mayi 'eeta'am qanqoÿin aca nshiitenaqte cam n'aqtaxanaxanec. Qaq cam ÿaconguet ca no'on shiÿaxaua, qaq cha'ayi camayi no'on, qaq camayi da qaishiiten, nachi 'eeta'am qanqoÿin aca lashiue cam no'on shiÿaxaua. 42Qataq camachaqca shiÿaxaua, da huo'otaq ÿami' ca ÿataqta atom 'etaxat ca 'oonolec nam saq 'amaqtaqpiolec, qaq souaxat da aÿim quetague' namayipi, qaq camayi ÿataqta huo'o qome da nshiitenaguec.

Atualmente Selecionado:

Mateo 10: TBSNT

Destaque

Copiar