Matthieu 22

Toli ti matanga ti mungo tere ti koli na wali

(Luc 14.15-24)

1Jésus akiri atene tënë na ala na lege ti toli, lo tene: 2“Tënë ti *Kodro-gbia ti yayu ayeke tongana tënë ti mbeni gbia so aleke matanga ndali ti mungo wali so molenge ti lo aye ti mu. 3Lo tokua azo ti kua ti lo ti iri azo so lo tisa ala na matanga ni, me azo ni aye ti ga pepe. 4Lo kiri lo tokua ambeni zo ti kua ti tene na azo ni, atene: ‘Mbi leke aye ti matanga ni awe, mbi fâ abagara ti mafuta, mbi leke ye kue awe. Ala ga na matanga ni fadeso!’ 5Me azo ni abaa tënë ti lo ni tongana senge tënë si ala gue na ando ti ala nde nde: mbeni ague na yaka ti lo, mbeni ague ti de buze ti lo. 6Ambeni agbu azo ti kua ti gbia ni, apika ala si afâ ala. 7Ngonzo agbu gbia ni si lo tokua aturugu ti lo, ala gue, afâ azo ti fango zo so si ala gbi gbata ti ala kue. 8Na pekoni, lo tene na azo ti kua ti lo: ‘Ndembe ti matanga ti mungo tere ni alingbi awe, me akozo zo ni alingbi fade na matanga ni pepe. 9Fadeso, ala gue na ndö ti akota lege, ala tisa azo so kue ala yeke wara ala ti ga na matanga ni.’ 10Azo ti kua ni ague si ala tisa azo so kue ala wara ala, ataa asioni zo, wala anzoni zo, ala bongbi ala kue. Nilaa ya ti da ti matanga ni asi singo na azo. 11Gbia ni ali ti baa azo so a tisa ala si ala ga so; lo baa mbeni koli so ayu bongo ti matanga ni pepe. 12Lo hunda koli ni, lo tene: ‘Ita, mo sara tongana nyen laa mo li na ndo so? Bongo ti matanga ti mo ayeke na ndo wa?’ Me koli ni akiri tënë oko pepe. 13 Tongaso gbia ni atene na azo ti kua ni: ‘Ala kanga gere ti lo na maboko ti lo, ala bi lo na gigi na ya ti vukongo ndo; kâ, gi toto na tengo pembe.’ ” 14Ti hunzi na ni, Jésus atene: “A iri azo mingi biani, me a soro gi ambeni kete.”

Lapo so azo ayeke futa na kota gbia ti Rome

(Marc 12.13-17; Luc 20.20-26)

15Tongaso *Afarizien ague, abongbi tere ti ala ti gi lege titene gi na lege ti tënë ti yanga ti lo wani, Jésus ati na ya ti gbanda ti ala. 16Ala tokua ambeni disiple ti ala na ambeni zo ti kama poroso ti Herode ti tene na Jésus: “Wafango-ye, e hinga so mo yeke tene gi taa-tënë, mo yeke fa taa-tënë na ndö ti lege ti sarango ye so Nzapa aye; mo yeke sara kamene ti le ti zo pepe, ataa zo ni ayeke na kota ndo. 17Tene na e, ti be ti mo: *Ndia amu lege na e ti futa lapo na kota gbia ti Rome, wala e futa ni pepe?” 18Jésus ahinga sioni be ti ala si lo tene na ala: “Ala azo so tënë ti yanga ti ala ayeke nde na sarango ye ti ala so, ngbanga ti nyen ala ye ti sara si mbi ti na ya ti gbanda ti ala? 19Ala fa na mbi le ti nginza so ala yeke futa na lapo so!” Azo ni aga na mbeni le ti nginza na lo. 20Jésus ahunda ala, atene: “So li ti zo wa laa? So iri ti zo wa laa na le ti nginza so?” 21Ala kiri tënë na lo: “Ti kota gbia ti Rome.” Tongaso Jésus atene na ala: “Ala futa na kota gbia ti Rome ye so ayeke ti lo, ala futa na Nzapa ye so ayeke ti Nzapa.” 22So ala ma kiringo tënë so, li ti ala kue akpe; ala zia lo si ala hon.

Tënë ti zingongo ti akuâ

(Marc 12.18-27; Luc 20.27-40)

23 Gi na lango ni so, *asadusien aga nduru na tere ti Jésus. – Asadusien ayeke azo so atene, akuâ ayeke zingo pepe. – Ala hunda Jésus, 24 atene: “Wafango-ye, Moïse atene ando, atene: ‘Tongana mbeni zo akui si lo yeke na amolenge pepe, alingbi ita ti lo amu wali ti wakuâ ni si lo du amolenge na ita ti lo so akui so.’ 25Ando na ndo ti e, ambeni ita mbarambara ayeke daa. Kozo ita ni amu wali, lo du molenge pepe si lo kui; lo zia wali ti lo na ita ti lo ti use ni. 26Gi ye so asi na lo so asi na use ita ti lo ni, na lo ti ota ni, ngbii asi na lo ti mbarambara ni. 27Na peko ti ala kue, wali ni nga akui. 28Na lango ti zingongo ti akuâ, fade wali ni ayeke duti wali ti zo wa na popo ti ala mbarambara so? So ala kue amu lo ti ga wali ti ala so!” 29Jésus akiri tënë na ala: “Ala girisa lege awe, ngbanga ti so ala hinga nda ti Mbeti ti Nzapa wala ngangu ti Nzapa pepe. 30Biani, na lango ti zingongo ti akuâ, fade akoli na awali ayeke mu tere pepe, me azo ayeke duti tongana *a-ange na yayu. 31Âdu tënë ti zingongo ti akuâ, ala diko tënë so Nzapa atene na ndö ni pepe? Lo tene: 32 ‘Mbi laa mbi yeke Nzapa ti Abraham, Nzapa ti Isaac na Nzapa ti Jacob.’ ” Jésus akiri atene: “Nzapa ayeke Nzapa ti akuâ pepe, me lo yeke Nzapa ti azo so ayeke na fini.” 33So gba ti azo ni ama tënë so, li ti ala kue akpe ndali ti fango ye ti lo.

Ndia so ayeke kota ahon atanga ni kue

(Marc 12.28-34; Luc 10.25-28)

34So *Afarizien ama a tene, Jésus akanga yanga ti *asadusien awe, afarizien abongbi tere ti ala. 35 Na popo ti ala, mbeni wafango-ndia oko aye ti sara si Jésus ati na ya ti gbanda ti lo; lo hunda Jésus, lo tene: 36“Wafango-ye, ndia so ayeke kota ahon atanga ni kue ayeke so wa?”

37 Jésus akiri tënë na lo: “Alingbi mo ye *Kota Gbia Nzapa ti mo na be ti mo kue, na yingo ti mo kue, na tënë ti be ti mo kue. 38Ndia so ayeke kota si ahon atanga ni kue laa. 39 Use ndia so ayeke nga kota ayeke so: ‘Mo ye mba ti mo zo tongana ti so mo ye tere ti mo wani.’ 40*Ndia ti Moïse na ambeti ti awayanga-Nzapa kue aluti na ndö ti andia use so.”

Mesii na David

(Marc 1.35-37; Luc 20.41-44)

41So *afarizien abongbi tere ti ala, Jésus ahunda ala na mbeni tënë, atene: 42“Ti be ti ala, ala tene nyen na ndö ti *Mesii? Lo yeke molenge ti zo wa?” Ala kiri tënë na lo: “Lo yeke Molenge ti David.” 43Jésus atene na ala: “Tongana nyen si David, so Yingo amu na lo tënë ti tenengo ni alingbi ti iri lo, atene: ‘*Kota Gbia’ so? Biani, David atene:

44 ‘Kota Gbia atene na Kota Gbia ti mbi, atene:

Mo duti na mbage ti maboko ti mbi ti koli

ngbii mbi sara titene awato ti mo

aduti na gbe ti gere ti mo si.’

45“So David airi lo ‘Kota Gbia’ so, lo kiri ti duti Molenge ti David ni tongana nyen?” 46Zo oko na popo ti ala awara tënë ti tenengo ni na Jésus pepe. Ti londo na lango ni so, zo oko na popo ti ala azi yanga ti hunda lo na mbeni tënë pepe.

Atualmente Selecionado:

Matthieu 22: MNF2010

Destaque

Copiar