Yoni 16

1Asagautapa oʼaisayafeʼmo mani gemo lapa nepauve. 2#Mt 24:9; Lu 6:22; Yo 9:22Apakaemo mono nokoʼapifatiʼmo aliʼa lapa faiʼa lapatalete lapataletekeʼmo hugae. Mago afinaʼmo afole aisigeʼapaeʼmo kamiti lapamagiteʼapaeʼmo, Goti aliʼyaʼamo alagi neʼalune, huʼa apakesamo afigae. 3#Yo 15:21Muki yaʼmo Afoʼamoʼmo ageʼa alagepa osuʼnaya kava huʼa nagaemo nageʼa alagepa osuʼnayaʼmofeʼmo ani agufa kavaʼmo lapakaetegamo hugae. 4#Yo 13:19Ani kavaʼmo afole aisigetapaeʼmo, ani agufa kavafeʼmo laha paiʼniya kavaʼmo hemenimo afole aiʼniye, hutapa lapakesamo afita ho hisayafeʼmo mani gemo lapa nepauve.

Goti Aunemeʼamo aliʼyaʼaeʼmo huʼniya gemae

Hogoteʼna lapakaeʼeʼmo magokepi lokaeʼna maiʼnova afinaʼmo mani gemo lapa opaiʼnovaʼmonanafa 5#Yo 7:33; 13:36hemenimo alino nateʼnigeʼna emiʼneʼnova vekalegamo uʼna haisuvafeʼmo nehuʼnaeʼmo mani gemo lapa nepauve. Lapa nepauvaʼmonanafa lapakaepatiʼmo magoke vekamoʼa haiyategamo ugane, huno alagi loka huno ge huno nafi okeʼniye. 6Mani gemo lapa nepauvaʼmofeʼmo lapaipamoʼmo lusi kava huno kana huʼniya kavaʼmo lapaipafiʼmo havai teʼniyaʼmonanafa 7#Yo 14:16lama gemo lapa nepauve, huno, lapa maesugetapa magoʼe huta alagepa hutapa maisayafeʼmo lapataleʼna uʼna haiguve. Lapataleʼna ohaisuvana lapa maesiya vekamo aliʼna atesugeno lapakaetegamo emi noʼmegaiyaʼmonanafa lapataleʼna uʼna haisuvaʼmoʼmo lapa maesiya vekamo aliʼna atesugeno eminegaiye. 8Emiʼnenoʼaeʼmo ma mopafi vayaʼai hosu kavaʼapigi fatago kavaʼnigi agoti huʼna apatesuva kavaʼnigi huno alino apave lisigeʼa agegae. 9#Yo 3:18Nagaefeʼmo apakesamo afiʼa fatago nosayaʼmofeʼmo hosu kavaʼapimo alino apave lisigeʼa agegae. 10#Ap 5:31; Lo 4:25Nagaemo Afoʼnimotega uʼna haisugetapaeʼmo alagi oʼnagegayaʼmofeʼmo fatago kavaʼnimo alino apave lisigeʼa agegae. 11#Yo 12:31Nagaemo ma mopafi vayaʼaiteʼmo yagaino neʼapateya vekamo ago agoti huʼna ateʼnovaʼmofeʼmo agoti huʼna apatesuva kavaʼmo alino apave lisigeʼa agegae. 12#1 Ko 3:1-2Nagaemo magoʼe gemo lapa paisuva gemo haneʼniyaʼmonanafa kana huʼniya gemo haneʼniyaʼmofeʼmo oʼafigae. 13#Yo 14:26; 1 Yo 2:27Hemenimo oʼafigayaʼmonanafa Aunemeʼamo lama gemo aepa vekamo eminenoʼaekeʼmo muki lama geʼamo alino lapave ligiye. Agaiʼamo agesafatiʼmo agesa afino ani gemo osugifa afiʼniya gemo lapa paiteno afole aisiya kavafeʼmo ava gemo huno lapa paigiye. 14Agaemo ha le konali yaʼnimo alino lapave liteno nagiʼnileʼmo alino asaga huno nategaiye. 15Afoʼnimo muki yaʼamo nagaiʼni yaʼageʼmo haneʼniyaʼmofeʼmo ani gemo huʼnaeʼmo, Goti Aunemeʼamoʼmo ha le konali yaʼnimo alino lapave ligiye, huʼna ago lapa paiʼnove.

Yesuʼa, yulagefa aitetapaeʼmo halate lapamogaga aigae, huno hapa paiʼniya gemae

16 # Yo 14:19 Aise afinaʼmo utesigetapa oʼnagegayaʼmonanafa halate magoʼe huno aise afinaʼmo utesigetapa nagegae, huno hapa paiʼniye. 17Geʼamo neʼafiya vayapatiʼmo magoʼamogimo ani gemo afiteʼapaeʼmo, aise afinaʼmo utesigetapa oʼnagegayaʼmonanafa halate magoʼe huno aise afinaʼmo utesigetapa nagegae, huno laha paige Afoʼnimotega uʼna haiguvaʼmofeʼmae, huno laha paige huʼniya gemo aepaʼamo na agufa gemo huʼniye. 18Aise afinane, huno huʼniya gemo aepaʼamo na agufa gemoʼmo huʼniye. Na agufa kavafeʼmo ani gemo huʼnifi huta oʼafiʼnone, huʼa huʼnae. 19Inagi Yesuʼa loka huʼa ge huʼa nafi gesayafeʼmo nehae, huno apaketenoʼaeʼmo, nagaemo huʼnaeʼmo, aise afinaʼmo utesigetapa oʼnagegayaʼmonanafa halate magoʼe huno aise afinaʼmo utesigetapa nagegae, huʼna lapa paiʼnova geeʼmo gemo huge afige hutapa maiʼnafiye. 20Alagi lama gemo lapa nepauve, huʼna, lapakaemo aviʼyaʼmo hugayaʼmonanafa ma mopafi vayaʼmogimo apamogaga aigae. Yulagefa aitetapaeʼmo halate aitapa afe letapa lapamogaga aigae. 21#Aiy 26:17Aʼnemogimo mafaʼnemo aliʼa apatesayafeʼmo huʼnaya afinaʼmo apakafu kiʼnigeʼapaeʼmo yulagefa neʼaiyaʼmonanafa aliʼa apateteʼapaeʼmo apakafu kiʼniya kavafeʼmo apakesa oʼafiʼa mafaʼneʼapiekeʼmo apamogaga neʼaiye. 22#Aiy 66:14Ani kava hutapa hemenimo yulagefa neʼaiyaʼmonanafa halate eʼna lapakesugetapaeʼmo lapaipafiʼmo lapamogaga aigae. Mago vekamoʼmo ani lapamogaga aisaya kavatapimo afaʼa alino oʼatalegaiye. 23#Mt 7:7Ani afinaʼmo afole aisigetapaeʼmo mago kavafeʼmo loka huta nafi okegae. Alagi lama gemo lapa nepauve, huʼna, lapakaemo Afoʼnimofeʼmo nagiʼniletiʼmo muki yafeʼmo afi gesagenoʼaeʼmo afaʼa lapamigiye. 24#Yo 15:11Hogotetapa nagiʼniletiʼmo ge hutapa afi okeʼnae. Afaʼa ge hutapa afi gegenoʼao lapamisigeno lapaipafiʼmo lapamogaga aisaya kavaʼmo havai tegaiye, huno hapa paiʼniye.

Yesuʼa, ma mopafi kavaʼmo aeʼna agaseʼnove, huno hapa paiʼniya gemae

25 # Yo 10:6 Nagaemo ani kavafeʼmo aeʼna kalafefa gemo huʼna lapa paiʼnovaʼmonanafa afole aisiya afinaʼmo aeʼna kalafefa gemo lapa opaigufa Afoʼnimofeʼmo ava gemo huʼna afole aiʼna lapa paiguve. 26Ani afinaʼmo afole aisigetapaeʼmo nagiʼniletiʼmo nunumuʼmo huta ge huta afi gegae. Lapakaemo nagiʼniletiʼmo ge hutapa afi gegayaʼmofeʼmo Afoʼnimofeʼmo ge huʼna afigeʼna lapa maesuva kavaʼmo ohanegaiye. 27#Yo 14:21,23Lapakaemo nagaefeʼmo lapau lapayamopafiʼmo lapauʼnigetapaeʼmo Gotitegatiʼmo emineʼniye, hutapa lapakesamo afita fatago nehayaʼmofeʼmo Afoʼnimoʼmo agaiʼamo lapakaefeʼmo hau ayamopafiʼmo hauʼniye. 28Nagaemo Afoʼnimotegatiʼmo ma mopafiʼmo emiʼneʼnove. Halate ma mopamo ataleʼna Afoʼnimotegamo uʼna haiguve, huno hapa paiʼnigeʼapaeʼmo 29geʼamo neʼafiya vayaʼmogimo, vae, huʼa, hemenimo aeka kalafefa gemo huka laha nopaipa huka afole aika laha nepaine. 30#Yo 2:25Hemenimo lagaemo ago kageʼnonana mago vekamoʼa kagaefeʼmo mago geeʼmo loka huno kafi gesiyafeʼmo agava oʼmaika hogoteka vayaʼai apaipafiʼmo neʼapakanageta kageʼnone. Muki kavaʼmo neʼaganaʼmofeʼmo kagaefeʼmo Gotitegatiʼmo emikeʼnane, huta lagesa afita fatago nehune, huʼa ha paiʼnagenoʼaeʼmo, 31Hemenimo lapakesa afita fatago nehafiye. 32#Mt 26:31,56; Yo 8:29Afiyo, huʼna, ani afinaʼmo alagi ago hogo huʼniyaʼmonanafa hemenimo ago afole aiʼniyanagetapa nataletapa atagu faetapa notapilegamo utetapa hisageʼna nagaiʼnigeʼmo maiguve. Maiguvaʼmonanafa muki yaʼmo Afoʼamoʼmo nagaeʼeʼmo magokepi lokaeno maiʼniyaʼmofeʼmo nagaiʼnigeʼmo oʼmaiguvaʼmonanafa muki yaʼmo Afoʼamoʼeʼmo magokepi lokaetaʼa maiguʼae. 33#Yo 14:27; Lo 5:1; 2 Ti 3:12; 1 Yo 5:4Lapakaemo nagaepiʼmo maiʼnetapaeʼmo lapaipamoʼmo falu hisiyafeʼmo mani gemo lapa nepauve. Ma mopafiʼmo maiʼnetapaeʼmo hanageke yaʼmo alitapa maigayaʼmonanafa nagaemo kame huʼna ma mopafi kavaʼmo ago aeʼna agaseʼnovaʼmofeʼmo lapakaemo lokiya vaita maiyo, huno hapa paiʼniye.

Atualmente Selecionado:

Yoni 16: kyg2013

Destaque

Copiar