Yoni 15

Yesuʼa nofikana huʼna maiʼnove, huno huʼniya gemae

1Yesuʼa hunoʼaeʼmo, nagaemo lama ge alagamo neʼaeya nofikana huʼna maiʼnove. Afoʼnimoʼmo ani nofi hoyamo afoʼamoʼmo maiʼneno neʼyagaiye. 2#Mt 3:10Agaemo nagaepatiʼmo aeʼniya nofi akopamoʼmo alagamo noʼaeya nofi akopamo hatagauno alino alagepa nehiye. Ani agufa kavakeʼmo huno alagamo neʼaeya nofi akopafatiʼmo magoʼe huno alagamo aesiyafeʼmo hatagauno alino alagepa nehiye. 3#Yo 13:10Nagaemo hatagauʼna aliʼna alagepa hugekana huʼna aliʼna lapaya maleʼnova geletiʼmo hosu kavatapimo sese huʼna lapateʼnogetapa yaveyave vayaʼmo maiʼnae. 4#Yo 6:56Nagaepiʼmo aeta hanitapa maigeʼnao nagaemo lapakaepiʼmo alagi maino. Nofi akopamoʼmo nofiʼafiʼmo aeno ohaniʼnigeno alagamo noʼaeya agufa kavaʼmo hutapa nagaepiʼmo alagi oʼmaiʼnisayaʼmoʼmo alagamo alagi oʼaegae.

5 # Yo 15:16; 2 Ko 3:5 Nagaemo nofiʼagana huʼna maiʼnogetapa nofi akopaʼagana hutapa maiʼnae. Naote maige lapaote maige huʼnisunana lapakaemo mago kavaʼmo afaʼa osugayaʼmofeʼmo nagaepiʼmo alagi maiʼnisageʼna lapakaepiʼmo alagi maiʼnisugetapaeʼmo asole alagamo afaʼa aegae. 6#Mt 7:19; 13:42Mago vekamoʼa nagaepiʼmo aeno hanino oʼmaiʼnisiyaʼmoʼmo akopamo hatagauno ataleʼnisigeno leno vaitesigeʼa aliʼa anupa huteʼa atafiʼmo aliʼa yaga auʼa kaesageno leno sagaligiye. 7#Mt 7:7Lapakaemo nagaepiʼmo aeta hanitapa maiʼnisageno geʼnimo lapaipafiʼmo haneʼninagetapa lapauʼnisiya yafeʼmo Gotifeʼmo ge hutapa afi gesagenoʼaeʼmo afaʼa lapamigiye. 8#Mt 5:16Lapakaemo asole alagamo aeʼnetapaeʼmo Afoʼnimoʼmo ala agiʼamo amisaya kavatetiʼmo geʼnimo neʼafiya vayaʼmo maigae. 9Afoʼnimoʼmo nagaefeʼmo hau ayamopafiʼmo hauʼniya kava huno lapakaefeʼmo nahau nayamopafiʼmo nahauʼniye. Nahau nayamopafiʼmo nahauʼniya kavapiʼmo aeta hanitapa maiyo. 10#Yo 14:15; 1 Yo 2:5Geʼaepa geʼnimo akame hisayana nahau nayamopafiʼmo nahauʼniya kavapiʼmo aita hapaitapa maigae. Ani kava huʼna Afoʼnimo keʼaepa geʼamo akame nehuʼnaeʼmo Afoʼnimoʼmo hau ayamopafiʼmo hauʼniya kavapiʼmo alagi maiʼnove. 11#Yo 17:13Namogaga neʼauva kavaʼmoʼa lapaipafiʼmo havai tesigetapaeʼmo lapamogaga aisayafeʼmo mani gemo lapa nepauve. 12#Yo 13:34Geʼaepa geʼnimo haneʼniyana lapakaefeʼmo nahau nayamopafiʼmo nahauʼniya kava huno konagatapieʼmo lapau lapayamopafiʼmo lapaino. 13#Yo 10:11; 1 Yo 3:16Mago vekamoʼa ao vayaʼaifeʼmo hau ayamopafiʼmo hauʼninageno falino apatesaiyana ani agufa hau ayamopafiʼmo hauʼniya kavaʼamoʼmo muki vayaʼmogimo hapau apayamopafiʼmo hapauʼniya kavaʼapimoʼa ago aeno agaseʼniye. 14#Mt 12:50Lapakaefeʼmo muki gemo mani kava hiyo, ina kava osiyo, huʼna lapa paiʼnova geʼnimo akame nehisayaʼmoʼmo nao vayaʼmo maiʼnae. 15Aliʼyaʼmo afoʼamoʼmo aliʼyaʼamo neʼaliya vayaʼmo muki aliʼyaʼamo alisayafeʼmo aliʼyaʼmo aepaʼamo alino apave noliyaʼmonanafa aliʼyaʼnimo neʼaliya vayaʼageʼmo maiʼnayaʼmofeʼmo hemenimo magoʼe huʼna ge osuguve. Afoʼnimotegatiʼmo muki geʼamo afiʼnova gemo ago lapa paiʼnovaʼmofeʼmo nao vayaʼmo maiʼnae, huʼna nehuve. 16Lapakaemo lekana paitapa oʼnateʼnafa nagaekeʼmo lekana paiʼna lapateʼnovanagetapa alagamo hanege hanege huno hanesiya alagamo aesayafeʼmo lekana paiʼna lapateʼnove. Afoʼnimofeʼmo nagiʼniletiʼmo muki kavafeʼmo ge hutapa afi gesayana afaʼa lapamigiye. 17#Yo 13:34Inagi ani keʼaepa geeʼmo lapa paiʼnaeʼmo, konagatapieʼmo lapau lapayamopafiʼmo lapaino, huʼna ago lapa paiʼnove, huno hapa paiʼniye.

Ma mopafi vayaʼmogimo apaini hugae, huno hapa paiʼniya gemae

18 # Mt 10:22; 1 Yo 3:13 Ma mopafi vayaʼmogimo lapakaefeʼmo apaini huʼnisayana hogoteʼa Ala kava nefeʼmo apaini huʼnaya kava huʼa lagaefeʼmo apaini nehae, hutapa lapakesamo afiyo. 19#1 Yo 4:5; Yo 17:14Lapakaemo ma mopafi vayaʼmo maiʼnaesinana ma mopafi vayaʼmogimo vayaʼapieʼmo hapauʼniya agufa kavaʼmo huʼa lapakaefeʼmo hapau apayamopafiʼmo hapauʼniesine. Hapauʼniyesinaʼmonanafa nagaemo ma mopafi vayapatiʼmo lekana paiʼna lapateʼnogetapa ma mopafi vayapiʼmo oʼmaiʼnayaʼmofeʼmo lapakaefeʼmo apaini nehae. 20#Yo 13:16Nagaemo, mago aliʼyaʼamo neʼaliya vekamoʼmo aliʼyaʼmo afoʼamoʼmo aeno noʼagase, huʼna lapa paiʼnova geeʼmo lapakesamo afiyo. Apakaemo apaini huʼa natesaya agufa kava huʼa lapakaeʼeʼmo apaini huʼa lapategae. Apakaemo geʼnimo afiʼnisayana getapimo afigae. 21#Mt 5:11; Mk 13:13Apakaemo alino nateʼnigeʼna emiʼneʼnova vekamo oʼageʼnayanageʼa vayaʼnimo maiʼnayaʼmofeʼmo lapakaetegamo muki ani agufa kavakeʼmo hugae. 22Emiʼneʼna hapa opaiʼnovesinana apakameʼyamo oʼnamisageno hosu kavaʼapimo afaʼa ohaneʼniyesine. Ago hapa paiʼnovaʼmofeʼmo hosu kavatimo oʼageʼnone, huʼa alagi osugae. 23#Lu 10:16Ina lagimo nagaefeʼmo apaini nehafi ani kava huʼa Afoʼnimoʼefeʼmo apaini nehae. 24#Yo 9:41; 14:11Nagaemo apakaetegamo emineʼna vayaʼmogi nosaya agufa kavaʼmo osuʼnovesinana apakameʼyamo oʼnamisageno hosu kavaʼapimo ohaneʼniyesinaʼmonanafa huʼnova kavaʼmo ago ageteʼapaeʼmo nagaeʼe Afoʼnimoʼefeʼmo apaini huʼnae. 25#Sam 35:19; 69:4Apakae keʼaepa gemoʼmo hunoʼaeʼmo, apakaetegamo mago hosu kavaʼmo osuʼnovaʼmonanafa nagaefeʼmo fikumo apaini huʼnae, huno avoʼmo kae maleʼniya gemo afole aisiyafeʼmo ani kavaʼmo nehae. 26#Yo 14:26Nagaemo lapa maesiya vekamo alagi lama gemo aepa Aunemeʼamo Afoʼnimotegatiʼmo aliʼna atesugeno emineno nagaefeʼmo faigoko geʼnimo hugiye. 27#Lu 1:2; Ap 1:8,21-22Lapakaemo aliʼyaʼnimo aepa faiʼna aliʼnova afinatetiʼmo nagaeʼeʼmo magokepi lokaeta maime maime etapa hemeniʼeʼmo maiʼnayaʼmofeʼmo lapakaeʼeʼmo nagaefeʼmo faigoko geʼnimo aeta hakalo hugae, huno hapa paiʼniye.

Atualmente Selecionado:

Yoni 15: kyg2013

Destaque

Copiar