Yoni 17

Yesuʼa nunumuʼmo huno apateʼniya gemae

1 # Yo 11:41; 12:23 Yesuʼa ani gemo ago hapa paitenoʼaeʼmo alino maku huno kokuʼnategamo ageʼnenoʼaeʼmo nunumuʼmo huʼniye. Afo, huno, ani afinaʼmo ago afole aiyanagi kagikaleʼmo alino asaga huno katesiyafeʼmo Mafaʼnekamo agiʼaleʼmo alika asaga huka ato. 2#Mt 11:27Kagaemo muki ma mopafi vayaʼaiteʼmo yagaino apatesiyafeʼmo lekana paika ateʼnane. Apavaleka amiʼnana vayaʼmo afaʼa maige maige huʼa maisaya yaʼmo alino apamisiyafeʼmo himamuʼamo ago amiʼnane. 3#1 Yo 5:20Kagaemo lama geʼageʼmo nehana Gotigaʼe Yesu Kalaisiʼmo alika ateʼnanageno emineʼniya vekaʼeʼmo anakeʼa alagepa huʼnaya vayaʼmogimo maige maige huʼa maisaya yaʼmo ago aliʼnae. 4#Yo 4:34Nagaemo ma mopafi maiʼneʼnaeʼmo kagikaleʼmo aliʼna asaga huʼna kateʼnove. Kagaemo aliʼyaʼmo aliyo, huka naha paiʼnana aliʼyakamo ago alagi aliʼna hano huʼnove. 5#Yo 1:1; 17:24O Afo, huno, kagaeʼeʼmo magokepi lokaeʼna maiʼneʼnaeʼmo kaulagaleʼmo ha le konali yaʼnimo ma mopamo alo osuʼnana afinatetiʼmo aliʼnova ha le konali yaʼnimo alika namiyo.

6Nagaemo ma mopafi vayapatiʼmo apavaleka namiʼnana vayaʼmo kagikamo aepaʼamo aliʼna apave liʼnove. Ani vayaʼmo vayakamo maiʼnageka ago apavaleka namiʼnane. Apakaemo kagae gemo aliteʼa gekaleʼmo yagaiʼa ateʼneʼa akame huʼnae. 7Hemenimo apakaemo ago ageʼnayana muki namiʼnana yaʼmo kagaetegatikeʼmo eʼniye, huʼa ageʼnae. 8#Yo 16:30Ani kavaʼmo huʼna namiʼnana gemo apamiʼnogeʼa aliteʼapaeʼmo, Gotitegatiʼmo emineʼniye, huʼa nageteʼapaeʼmo Gotiʼa alino ateʼnigeno emineʼniye, huʼa apakesa afiʼa fatago nehae. 9#Yo 6:37,44Nagaemo nunumuʼmo huʼna neʼapatove. Nagaemo ma mopafi vayaʼaifeʼmo nunumuʼmo huʼna noʼapatofa apavaleka namiʼnana vayaʼmo vayakamo maiʼnayaʼmofeʼmo nunumuʼmo huʼna neʼapatove. 10#Yo 16:15Muki vayaʼnimo vayakamo maiʼnae. Ani kavaʼmo huʼa vayakamo vayaʼnimo maiʼnae. Apakaemo ha le konali yaʼnimo aliʼa apave liteʼa nagiʼnileʼmo aliʼa asaga huʼa neʼnatae. 11#Yo 10:30; 17:21Hemenimo ma mopafiʼmo magoʼe huʼna oʼmaiʼna ataleʼna kagaetegamo uʼna haiguvaʼmonanafa apakaemo ma mopafiʼmo maiʼnae. Afo, huʼna, kaote vekamo maiʼneka alagepa kavaʼageʼmo nehana vekae, huʼna, ani kavaʼmo hutaʼa magokeʼageʼmo maiʼnoʼa kava huʼa apavaleka namiʼnana vayaʼmo magokeʼageʼmo maiʼnayanageʼa ani kava huʼa maisayafeʼmo himamukaletiʼmo yagaika apato. 12#Yo 6:39; 13:18; 18:9Nagaemo ma mopafiʼmo apakaeʼeʼmo magokepi lokaeʼna maiʼneʼnaeʼmo kagikaletiʼe himamukaletiʼeʼmo yagaiʼna apateʼnogeʼa afaʼa maiʼnayaʼmonanafa magoke vekaeʼmo kagae mukufi gemoʼmo hunoʼaeʼmo, afela hegaiye, huno huʼniya gemo afole aisiyafeʼmo alagi afela heʼniye. 13#Yo 15:11Hemenimo nagaemo kagaetegamo uʼna haisuvafeʼmo nehuʼnaeʼmo ma mopafi maiʼneʼnaeʼmo namogaga neʼauva kava huʼa apamogaga aisaya kavaʼmo apaipafiʼmo havai tesiyafeʼmo mani gemo huʼna nunumuʼmo huʼna neʼapatove. 14#Yo 15:19Nagaemo kagae gemo aliʼna apamiʼnogeʼa aliʼnageʼapaeʼmo ma mopafi vayaʼmogimo apakaefeʼmo apaini huʼnae. Ma mopafi vayaʼmo oʼmaiʼnayaʼmofeʼmo apakaefeʼmo apaini huʼnae. 15#Mt 6:13; 2 Te 3:3; 1 Yo 5:18Nagaemo huʼnaeʼmo, ma mopafatiʼmo apavalelika uka haiyo, huʼna ge nosufa hosu vekamoʼmo apakaetegamo hosu kavaʼmo osisiyafeʼmo yagaika apato, huʼna nunumuʼmo huʼna neʼapatove. 16Nagaemo ma mopafi vekamo oʼmaiʼnova kava huʼa ma mopafi vayaʼmo oʼmaiʼnae. 17Lama gekaletiʼmo apavaleka apaote apato. Gekamo alagi lama geʼageʼmo haneʼniye. 18#Yo 20:21Kagaemo ma mopafi vayaʼaitegamo alika nateʼnanageʼna emiʼneʼnova kava huʼna ma mopafi vayaʼaitegamo aliʼna apateʼnogeʼa uʼnae. 19#Hi 10:10Kagaemo lama gekaletiʼmo apavaleka apaote apatesanafeʼmo nagaemo aliʼyakamo alisuvafeʼmo aliʼna naote nateʼnove.

20Nagaemo mani vayaʼaifekeʼmo nunumuʼmo huʼna noʼapatofa geʼapiletiʼmo nagaefeʼmo apakesamo afiʼa fatago hisaya vayaʼefeʼmo nunumu huʼna neʼapatove. 21#Yo 4:11; Ga 3:28Apakaemo mukiʼamogi magokeʼageʼmo maiʼneʼa Afoʼnimogamo nagaepiʼmo maiʼnanageʼna kagaepiʼmo maiʼnova kava huʼa laʼagaepiʼmo magokeʼageʼmo maisayafeʼmo nunumuʼmo huʼna neʼapatove. Magokeʼageʼmo maiʼnisageʼapaeʼmo ma mopafi vayaʼmogi apaketeʼapaeʼmo nagaefeʼmo, Gotiʼa alino ateʼnigeno emineʼniye, huʼa apakesamo afiʼa fatago hisayafeʼmo nunumuʼmo huʼna neʼapatove. 22#Ap 4:32Magokeʼageʼmo maiʼnoʼa kava huʼa magokeʼageʼmo maisayafeʼmo namiʼnana ha le konali yaʼnimo apamiʼnove. 23Nagaemo apakaepiʼmo maiʼnogeka nagaepiʼmo maiʼnanaʼmofeʼmo magokeʼageʼmo maisayafeʼmo nunumuʼmo huʼna neʼapatove. Magokeʼageʼmo maiʼnisageʼa ma mopafi vayaʼmogimo apaketeʼapaeʼmo, Gotiʼa alino ateʼnigeno emineʼniye. Gotiʼa Mafaʼneʼaeʼmo hau ayamopafiʼmo hauʼniya kava huno apakaefeʼmo hau ayamopafiʼmo hauʼniye, huʼa hisayafeʼmo nunumuʼmo huʼna neʼapatove. 24#Yo 12:26; 17:5Afo, huʼna, nahauʼniyanagi apavaleka namiʼnana vayaʼnimo nagaetegamo eʼa maiʼneʼa namiʼnana ha le konali yaʼnimo agesayafeʼmo nahauʼniye. Ma mopamo alo osuʼnana afinaʼmo nagaefeʼmo kahau kayamopafiʼmo kahauʼniyaʼmofeʼmo ha le konali yaʼnimo namiʼnane. 25#Yo 8:55O Afo, huʼna, fatago kavaʼageʼmo nehana vekamogae, huʼna, ma mopafi vayaʼmogimo okageʼnayaʼmonanafa nagaemo kageʼnogeʼapaeʼmo mani vayaʼmogi kageteʼapaeʼmo, Gotiʼa Afoʼamoʼmo alino ateʼnigeno emineʼniye, huʼa afiʼnae. 26Nagaefeʼmo kahau kayamopafiʼmo kahauʼniya kavakamo apakaepiʼmo hanesigeʼna apakaepiʼmo maisuvafeʼmo kagikamo aepaʼamo aliʼna apave liʼnovanageʼna magoʼe huʼna aliʼna apave liguve, huno nunumuʼmo huʼniye.

Atualmente Selecionado:

Yoni 17: kyg2013

Destaque

Copiar