Yoni 12

Maliyaʼa Yesu aiyaleʼmo uvelimo lakino faleno ateʼniya gemae

(Mt 26:6-13; Mk 14:3-9)

1 # Yo 11:1,43 Sigisiʼa afinaʼmo utesigeno Pasova hopa afinaʼmo afole aisiyafeʼmo huʼniya afinaʼmo Yesuʼa Metani taonifiʼmo Layosiʼa faliʼniyatetiʼmo alino he tino ateʼniya kotegamo eʼniye. 2#Lu 10:40Eʼnigeʼa une neʼyaʼmo alo huteʼa Mataʼa neʼyaʼmo fako huno apamiʼnigeʼa Layosigiʼeʼmo magokepi lokaeʼa maiʼneʼa neʼnae. 3#Lu 7:37-38Maiʼneʼapaeʼmo Maliyaʼa alopa moniletiʼmo miya nefaiya uvelimo alagepa atumo neʼaiya uvelimo lole kapufiʼmo haneʼniya agufa uvelimo alinineno Yesu aiyalateʼmo lakino faleno ateteno ayokatetiʼmo alino hau huno ateʼnigenoʼaeʼmo alagepa atuʼamoʼmo ani maiʼnaya nopiʼmo havai teʼniye. 4#Yo 18:3Yutasiʼa Isakaliyoti kotega vekamo Saimoni mafaʼnemo geʼamo neʼafiya vayapati vekamo kutulu yaʼmo alisiya vekamoʼa hunoʼaeʼmo, 5#Mt 19:21na kava higenoʼaeʼmo alagepa atumo neʼaiya uvelimo alino maketi hisigeʼa tali hataleti kinaletiʼmo miya faitesageno kagemi yaʼapimo ohaneʼnisiya vayaʼaina apamisiya yafeʼmo huʼniye, huno huʼniye. 6Kagemi yaʼapimo ohaneʼnisiya vayaʼaifeʼmo agesa oʼafiʼniyaʼmonanafa moni kuteʼmo neʼyagaiya vekamo maiʼneno kupatiʼmo kumayaʼmo neʼaliya vekamo maiʼniyaʼmofeʼmo ani gemo huʼniye. 7#Yo 19:40Yesuʼa hunoʼaeʼmo, afaʼa ateyo. Falisugeʼa kiʼa natesaya afinafeʼmo agesamo afiteno noʼafiʼmo maleʼniye. 8#Loa 15:11Kagemi yaʼapimo ohaneʼnisiya vayaʼmo muki afinaʼmo lapakaeʼeʼmo magokepi lokaetapa maigayaʼmonanafa nagaemo muki afinaʼmo lapakaeʼeʼmo magokepi lokaeta oʼmaigune, huno hapa paiʼniye.

9 # Yo 11:43-44 Yesuʼa eno maiʼniye, huʼa huʼnaya gemo afiteʼapaeʼmo muki Yu vayaʼmo Yesukeʼmo agesayafeʼmo oʼmeʼnafa Layosiʼa faliʼniyatetiʼmo alino he tino ateʼniya vekaeʼmo anakesayafeʼmo eʼnae. 10-11#Yo 11:45Layosiʼmo afaʼa maiʼnigeʼa ageteʼa muki Yu vayaʼmogi Yesufeʼmo apakesa afiʼa fatago huʼnageʼapaeʼmo mono huʼa neʼapataya vayaʼaiteʼmo yagaiʼa neʼapataya vayaʼmogimo huʼapaeʼmo, Layosiʼeʼmo anamagigune, huteʼa vegemo huʼnae.

Yesuʼa yagaino neʼapateya kini vekagana huno Yulusalemu taonifiʼmo uno avaʼyi huʼniya gemae

(Mt 21:1-11; Mk 11:1-11; Lu 19:28-40)

12Egaʼamo asole vayaʼmo Pasova afinaʼmo eʼnaya vayaʼmogimo afiʼnayana, Yesuʼa Yulusalemu taonifiʼmo neʼe, huʼa huʼnaya gemo afiteʼapaeʼmo 13#Sam 118:25-26; Mt 27:42; Yo 1:49uʼa vayavekana yosamo akopaʼamo yageʼa aliteʼa uʼa fotu hisayafeʼmo neʼuʼapaeʼmo, laha mao.

Ala kava neʼmo agiʼaletiʼmo neʼeya vekamo Gotiʼa alino auleno ateʼniya vekae. Agaemo Isaleli vayaʼaiteʼmo yagaino neʼapateya kini vekamae, huʼa huʼnae.

14 # Sak 9:9 Yesuʼa mago aikeli noki afumo agotofuleʼmo uno haino fai maiteno eʼniye. Goti Mukufiʼmo avoʼmo kae maleʼniya gemoʼa ani kavatefeʼmo hunoʼaeʼmo,

15Saiyoni taonifiʼmo maiʼnaya vayaʼmogitapamo koli osiyo. Ageyo, ala vekatapimo yagaino nelapateya kini vekatapimo aikeli noki afuleʼmo fai maiteno neʼe,

huno huʼniye. 16#Yo 2:22Ani afinaʼmo geʼamo neʼafiya vayaʼmogi ani kavaʼmo aepaʼamo ageʼa aeto osuʼnayaʼmonanafa Yesuʼa faliʼniyatetiʼmo alino he tino ateʼnigeno kokuʼnapiʼmo uno haino maiʼnigeʼapaekeʼmo Yesufeʼmo ava gemo huno avoʼmo kae maleʼniya ava geeʼmo apakesamo aino halo aiʼnigeʼapaeʼmo, he, ani kavaʼmo Yesutegamo ago afole aiʼniye, huʼa apakesa afiʼa ho huʼnae. 17#Yo 11:43-44Muki vayaʼmogi Yesuʼa Layosiʼmo alino he tino ateʼniya afinaʼmo agaeʼeʼmo lokaeʼa maiʼneʼa ageteʼapaeʼmo faigoko gemo huliʼa uʼeʼa huʼnae. 18Ani noʼagaya agufa aune kavaʼmo huʼniya kavafeʼmo ava gemo huʼnageʼa afiʼnayaʼmofeʼmo asole vayaʼmo agaeʼeʼmo uʼa fotu huʼnae. 19#Yo 11:48Falasi vayaʼmogi apakaiʼapimo huʼapaeʼmo, Lapakaemo ani vekamo aetapa oʼagaseʼnae. Ageyo, huʼa, muki ma mopafi vayaʼmogi akame nehae, huʼa huʼnae.

Galiki nofi vayaʼmogimo Yesuʼmo agesayafeʼmo eʼnaya gemae

20Hopa afinaʼmo Gotifeʼmo mono hisayafeʼmo Yulusalemu taonifiʼmo uʼa haiʼnaya vayapatiʼmo mago vayaʼamo Galiki nofi vayaʼmo maiʼnae. 21#Yo 1:44; Lu 19:3; 23:8Apakaemo Filipiʼa Galeliya kotega Metasaita taonifi vekalegamo eʼa, lao vekae, huʼa, Yesuʼmo agesunafeʼmo nehune, huʼa afi geʼnageno 22Filipiʼa uno Eʼnalufeʼmo ha paitegeʼana Yesutegamo uʼana ha paiʼnaʼae. 23#Yo 13:31-32; 17:1Yesuʼa geʼapileʼmo aeno atagaina huno hapa painoʼaeʼmo, hemenimo Vemo Mafaʼnemoʼa ala agiʼamo alisiya afinaʼmo afole aiʼniye. 24#1 Ko 15:36Lama gemo lapa nepauve, huno, Avina yaʼmo mopafiʼmo ohakaleʼnisayana magoke avina yaʼmo alagi hanegaiyaʼmonanafa hakale maleʼnisageno falitenoʼaeʼmo halate hageteno asole avina yaʼmo aegaiye. 25#Mt 16:25Muki vayaʼmogimo ma mopafi alagepa huʼa maisaya kavafeʼmo hapauʼnisiyaʼmoʼmo afaʼa maisaya yaʼapimo atalegae. Muki vayaʼmogimo ma mopafi alagepa huʼa maisaya kavafeʼmo apaini huʼnisiyaʼmoʼmo afaʼa maisaya yaʼapimo oʼataleʼa alagepa huʼa alagi maige maige huʼa maigae. 26#Yo 14:3; 17:24Aliʼyaʼnimo alisayafeʼmo hisaya vayaʼmogi nagae nakamekeʼmo hiyo. Ani kavaʼmo huʼa aliʼyaʼnimo neʼalisaya vayaʼmogi nagae nakamekeʼmo huteʼa uʼna maisuva koteʼmo uʼa maigae. Inagi Afoʼnimoʼmo aliʼyaʼnimo neʼalisaya vayaʼai apakiʼapileʼmo alino asaga huno apategaiye, huno hapa paiʼniye.

Yesuʼa falisiya kavafeʼmo hapa paiʼniya gemae

27 # Sam 6:3; 42:5; Mt 26:38 Naipamoʼmo atete nehisigeʼnaeʼmo na agufa gemo huguve. Afo, huʼna, nagaetegamo hosu kavaʼmo afole aisiya kavaʼmo alika atalo, huʼna hugufiye. Haʼao. Ani hosu kavaʼmo alisuvafekeʼmo emiʼneʼnove. 28#Mt 3:17Afo, huno, kagikaleʼmo alika asaga huvo, huno huʼnigeno kokuʼnapatiʼmo ge hunoʼaeʼmo, nagiʼnileʼmo aliʼna asaga huʼnovanageʼna halate magoʼe huʼna nagiʼnileʼmo aliʼna asaga huguve, huno huʼniye. 29#Ap 23:9Huʼnigeʼapaeʼmo asole vayaʼmo anileʼmo he tiʼa maiʼneʼa afiteʼapaeʼmo, hakalu huʼniye, huʼa huʼnageʼapaeʼmo mago vayaʼamogi, enisole vekamoʼa ha paiʼniye, huʼa huʼnayaʼmonanafa 30#Yo 11:42Yesuʼa hunoʼaeʼmo, ani gemo nagaefekeʼmo osuʼnifa lapakaeʼefeʼmo huʼniye. 31#Yo 9:39; 14:30Hemenimo ma mopafi vayaʼai hosu kavaʼapimo afole aisigeno Gotiʼa alino fako huno apategaiye. Hemenimo ma mopafi vayaʼaiteʼmo yagaino neʼapateya vekamo alino hafaino atalegaiye. 32#Yo 3:14Apakaemo ma mopafiʼmo aliʼa he tiʼa natetesageʼnaeʼmo muki vayaʼamo nagaiʼnilegamo aiʼna apavayu huliʼna egauve, huno hapa paiʼniye. 33#Yo 18:32Agaemo haiya agufa kava huʼna faligufi, huno hapa paiʼniye. 34#Sam 89:4,36; 110:4; Aiy 9:7; Nen 7:14Asole vayaʼmogi huʼapaeʼmo, lagae keʼaepa gemoʼa hunoʼaeʼmo, Kalaisi vekamo alagi maige maige huno maigiye, huno huʼniyaʼmonanafa na kava higekaeʼmo Vemo Mafaʼnemo aliʼa he tiʼa ategae, huka nehane. Ani Vemo Mafaʼnemo ina laʼmae, huʼa afi geʼnae. 35#Yo 7:33; 8:12; 1 Yo 2:10-11Yesuʼa hunoʼaeʼmo, aise afinaʼmo ha le yaʼmo neʼapamiya vekamo lapakaeʼeʼmo magokepi lokaeno maiʼnenoʼaeʼmo aeno ha leno lapategaiye. Aeno ha leʼnisiya yategamo umenitata hiyo fiku yanageno hani lapaugiyanagi. Hanipiʼmo umenitata nehiya vekamoʼa haiya kateʼmo neʼufi huno oʼagegaiye. 36#Ef 5:8Ha le yaʼmo neʼapamiya vekamo lapakaeʼeʼmo magokepi lokaeno maiʼniyanagi agaefeʼmo lapakesamo afitapa fatago higenoʼao ha le vayaʼmo ha malegayanagi, huno hapa paiteno apataleno uno fala kino maiʼniye.

Apakesamo afiʼa fatago osuʼnaya kavafeʼmo huʼniya gemae

37Yesuʼa asole noʼagaya agufa aune kavaʼmo apaulagaleʼmo huʼniyaʼmonanafa agaefeʼmo alagi apakesamo afiʼa fatago osuʼnae. 38#Aiy 53:1; Lo 10:16Aiyeyaʼa Gotitegati gemo alinineno aeno hakalo huno hapa nepaiya vekamoʼa huʼniya gemo afole aisiyafeʼmo apakesa afiʼa fatago osuʼnae. Aiyeyaʼa ani kavafeʼmo hunoʼaeʼmo,

Ala kava nene, huno, ina laʼmo hapa paiʼnona gemo afiʼniye. Ala kava neʼmoʼa ina laʼmo himamuʼamoʼa agufamo alino katino atesiya himamuʼamo alino ave liʼniye,

huno avoʼmo kae maleʼniye. 39-40#Aiy 6:10; Mt 13:15Aiyeyaʼa ani kavafeʼmo magoʼe gemo hunoʼaeʼmo,

Gotiʼa apaulagaletiʼmo oʼagege apaipafatiʼmo alagepa huʼa afiʼa aeto osuge hisayafeʼmo apaulagamo alino fali kaeno apateteno apaipamo alino yafakana huno lokiya vaino apateʼniye. Gotiʼa hunoʼaeʼmo, nagaetegamo aiʼa atagineʼa esageʼnaeʼmo aliʼna alagepa huʼna oʼapatesuvafeʼmae, huno huʼniye,

huno avoʼmo kae maleʼniye. Aiyeyaʼa ani gemo huno avoʼmo kae maleʼniyaʼmofeʼmo Yesuʼeʼmo magokepi lokaeʼa maiʼnaya vayaʼmogi apakesamo afiʼa fatago osuʼnae. 41#Aiy 6:1Aiyeyaʼa Yesu ha le konali yaʼamo ageʼniyaʼmofeʼmo ani agufa gemo huno ava gemo huʼniye. 42#Yo 7:48; 9:22Ani gemo huʼniyaʼmonanafa asole vayaʼmo yagaiʼa neʼapataya vayaʼmogimo Yesufeʼmo apakesamo afiʼa fatago huʼnayaʼmonanafa Falasi vayaʼmogimo mono nopatiʼmo aliʼa laha faiʼa latalegae, huʼa apakesa afiʼnayaʼmofeʼmo agiʼamo aeʼa hakalo huʼa hapa opaiʼnae. 43#Yo 5:44Apakaemo ma mopafi vayaʼmogi ala apakiʼapimo apamisayafekeʼmo lusi kava huno hapauʼniyaʼmonanafa Gotiʼa ala apakiʼapimo apamisiyafeʼmo aiseʼamo hapauʼniye.

Yesu geʼamoʼmo vayaʼmo agoti huno apatesiya gemae

44 # Mt 10:40 Yesuʼa alopa gefatiʼmo hunoʼaeʼmo, nagaefeʼmo apakesa afiʼa fatago nehaya vayaʼmogimo nagaefekeʼmo apakesamo afiʼa fatago nosayaʼmonanafa ani kavaʼmo huʼa alino nateʼnigeʼna emiʼneʼnova vekaʼefeʼmo apakesamo afiʼa fatago nehae. 45#Yo 14:9Ina lagimo nageʼnafi ani kava huʼa alino nateʼnigeʼna emiʼneʼnova vekaʼeʼmo ageʼnae. 46#Yo 8:12; 12:35Apakaemo nagaefeʼmo apakesamo afiʼa fatago nehaya vayaʼmo hanipiʼmo oʼmaisayafeʼmo ha le yakana huʼna ma mopafiʼmo emiʼneʼnove. 47#Yo 3:17; 8:15Nagaemo geʼnimo afiteʼa akame nosisaya vayaʼmo agoti huʼna oʼapategauve. Nagaemo ma mopafi vayaʼmo agoti huʼna apatesuvafeʼmo emiʼnoʼmeʼnofa apakufamo aliʼna katiʼna apatesuvafeʼmo emiʼneʼnove. 48#Hi 4:12Mago vayaʼmogimo geʼnimo oʼafiʼa apakameʼyamo neʼnamisayana agoti huno apategaiye. Ma mopamo alino hano huno atalesiya afinaʼmo geʼnimokeʼmo agoti huno apategaiye. 49Nagaemo mani gemo nagaiʼni nagesafatiʼmo nagesamo afiʼna nosufa muki yaʼmo Afoʼamoʼmo alino nateʼnigeʼna emiʼneʼnova vekamoʼa ani gemo huvo, huno naha paiʼniya gemo nehuve. 50#Yo 8:26,28Afoʼnimoʼmo mani gemo huvo, huno naha paiʼniya gemo ago afiʼnovana alagepa huʼa maige maige huʼa maisaya yaʼmo neʼapamiya gemo haneʼnigeʼna afiteʼnaeʼmo hapa nepauve.

Atualmente Selecionado:

Yoni 12: kyg2013

Destaque

Copiar