Yoni 13

Yesuʼa geʼamo neʼafiya vayaʼmo apaiyamo sese huno apateʼniya gemae

1 # Yo 7:30; 12:23; 15:13; 1 Yo 3:16; Fl 2:8 Alopa neʼyaʼmo neʼnaya Pasova afinaʼmo ago afole aigefeʼmo hogo huʼnigenoʼaeʼmo Yesuʼa agaiʼamo ago afiʼniyana ma mopamo ataleʼna Afoʼnimotegamo uʼna haisuva afinaʼnimo ago hogo huʼniye, huno afiʼniye. Agaemo ma mopafi maiʼnaya vayaʼamogifeʼmo hau ayamopafiʼmo haume haume eno atupa afinaʼeʼmo hauʼniye. 2-3#Lu 22:3; Yo 3:35; 13:27; 16:28Sataniʼa Yutasiʼmo Isakaliyoti kotega vekamo Saimoni mafaʼnemoʼa Yesuʼmo avaleno hosu vayaʼai apayapiʼmo atesiya agesamo amiʼniye. Neʼyaʼmo neteʼapaeʼmo Yesuʼa ago ageʼniyana muki yaʼmo Afoʼamoʼmo muki vayaʼaiteʼe muki yateʼeʼmo yagaisuvafeʼmo lekana paino nateʼniye. Gotitegatiʼmo emiʼneʼnovanageʼna halate Gotitegamo uʼna haiguve, huno ago ageʼniye. 4-5Agetenoʼaeʼmo hiʼyalamutetiʼmo he tino kukenaʼamo asagino maleteno taoli kenamo alino hapiliʼneno yuvapafiʼmo aniʼmo laki maleʼneno geʼamo neʼafiya vayaʼai apaiyamo aepa faino sese huno apateteno hapiliʼniya taoliletiʼmo alino hau huno apateʼniye. 6Agaemo Saimoni Pita haopaleʼmo neʼegenoʼaeʼmo, Ala kava nene, huno, naiyamo sese huka natesanafeʼmo hapiye, huno afi geʼnigenoʼaeʼmo, 7hemenimo nagaemo nehuva kavaʼnimo aepaʼamo oʼageʼnananageka henagaʼageʼmo agegane, huno ha paiʼnigeno 8Pitaʼa hunoʼaeʼmo, hemeniʼe muki afinaʼeʼmo naiyamo sese huka oʼnategane, huno ha paiʼnigenoʼaeʼmo, kaiyamo sese huʼna okatesuvana hemenimo nafaluʼnimogamo oʼmaiʼnananageka hetamakamo oʼaligane, huno ha paiʼnigeno 9Saimoni Pitaʼa hunoʼaeʼmo, Ala kava nene, huno, naiyaʼageʼmo sese huka oʼnateka nayaʼe nagenopaʼeʼmo sese huka nato, huno ha paiʼnigeno 10#Yo 15:3; 6:64,70-71Yesuʼa hunoʼaeʼmo, ago aniʼmo faleʼna apateʼnisuva vayaʼmo muki apakufaʼalegamo oʼaniʼya ofaino afaʼa alagepa huno haneʼniyaʼmofeʼmo halate aniʼmo faleʼna olapategauvaʼmonanafa lapaiyaʼageʼmo sese hugae. Mukiʼamogitapamo oʼaniʼyatapimo ofaiʼniyaʼmonanafa lapakaepatiʼmo magoke vekamo oʼaniʼyaʼamo faiʼniya vekamo maiʼniye. 11Yesuʼa agaiʼamo avaleno hosu vayaʼaina apamisiya vekamo ago ageʼniyaʼmofeʼmo lapakaepatiʼmo oʼaniʼyaʼamo faiʼniya vekamo maiʼniye, huno hapa paiʼniye.

12Yesuʼa apaiyamo sese huno apatetenoʼaeʼmo kukenaʼamo halate alino vaiteno hiʼyalamuteʼmo uno haino siyateʼmo fai maiʼnenoʼaeʼmo, nagaemo lapaiyamo sese huʼna lapateʼnova kavaʼmo aepaʼamo ageʼnafiye. 13#Mt 23:8,10Lapakaemo nagaefeʼmo nagi aetapaeʼmo, Tisao, hutapa nagi aege, Ala kava nene, hutapa nagi aege nehaya gemo he, ani agufa vekamo maiʼnovaʼmofeʼmo alagi lama gemo nehae. 14#Mt 20:28; Lu 22:27Nagaemo Ala kava vekatapimo maige tisa vekatapimo maige huʼneʼnaeʼmo lapaiyamo sese huʼna lapateʼnovaʼmofeʼmo konagatapimogi apaiyamo sese hutapa apateyo. 15#Fl 2:5; Kl 3:13; 1 Pi 2:21Mani hemenimo hugetapa agaya agufa kavaʼmo hisayafeʼmo huʼna lapave liʼnovanagi mani agufa kavaʼmo hiyo. 16#Mt 10:24Lama gemo lapa nepauve, huno, Mago aliʼyaʼmo neʼaliya vekamoʼa aliʼyaʼmo afoʼamoʼmo aeno noʼagase. Ani kava huno apa vekamoʼa alino ateʼnigeno uʼniya vekamo aeno noʼagase. 17#Mt 7:24; Ye 1:25Lapakaemo ani gemo afita alagepa huʼnetapa ani kavaʼmo nehisayana Goti aulagaleʼmo alagepa hutapa maiʼnayanagetapa afaʼa lapamogaga aigae. 18#Sam 41:9Nagaemo mani gemo mukiʼamogitapaeʼmo nosuve. Lekana paiʼna lapateʼnova vayaʼmo ago lapakeʼnovaʼmonanafa Goti mukufiʼmo hu maleʼniya gemo afole aisiyafeʼmo lekana paiʼna ateʼnove. Ani gemoʼa hunoʼaeʼmo, nagaeʼeʼmo magokepi lokaeno maiʼneno neʼyaʼmo neʼniya vekamoʼmo kame huno nateʼniye, huno huʼniye. 19#Yo 14:29; 16:4Ani agufa kavaʼmo nagaetegamo afole oʼaiʼnigeʼnaeʼmo ago hogoteʼna mani gemo lapa nepauve. Afole aisigetapaeʼmo nagaefeʼmo, muki afinaʼmo neʼmaiya vekamo maiʼniye, hutapa lapakesamo afita fatago hisayafeʼmo hemenimo mani gemo lapa nepauve. 20#Mt 10:40Lama gemo lapa nepauve, huno, Ina lagimo aliʼna apateʼnogeʼa neʼvaya vayaʼaina aliʼa falu fala huʼa neʼapatesafigeʼa ani kava huʼa nagaeʼeʼmo aliʼa falu fala huʼa neʼnatae. Ina lagimo nagaemo aliʼa falu fala huʼa neʼnatesafigeʼa ani kava huʼa alino nateʼnigeʼna emiʼneʼnova vekaʼeʼmo aliʼa falu fala huʼa neʼatae, huno hapa paiʼniye.

Yesuʼa, mago vekamoʼa nagaemo navaleno hosu vayaʼaina apamigiye, huno hapa paiʼniya gemae

(Mt 26:20-25; Mk 14:17-21; Lu 22:21-23)

21 # Yo 12:27 Yesuʼa ani gemo nehigenoʼaeʼmo agaiʼa aipamoʼmo atete huʼnigeno ina ge huno aeno hakalo huno hapa paitenoʼaeʼmo, alagi lama gemo lapa nepauve, huno, Lapakaepatiʼmo mago vekamoʼa navaleno hosu vayaʼaina apamigiye, huno hapa paiʼniye. 22Geʼamo neʼafiya vayaʼmogimo ani gemo afiteʼapaeʼmo, lagaepatiʼmo ina lafeʼmo huʼnifi, huʼa apakesamo afiteʼa alino aulu haegeno aulu haegeno huʼnae. 23#Yo 19:26; 20:2; 21:7,20Mago vekamo geʼamo neʼafiya vekaeʼmo Yesuʼa hau ayamopafiʼmo hauʼniya vekamo Yesu haopaleʼmo maiʼniye. 24Saimoni Pitaʼa aulama huteno, ina lafeʼmo nehane, huka ge huka afi go, huno huʼnigeno 25Yesu haifiʼyaleʼmo havaeno ape huno maiʼnenoʼaeʼmo, Ala kava nene, huno, ina lafeʼmo nehane, huno afi geʼnigenoʼaeʼmo 26Yesuʼa hunoʼaeʼmo, peleti maya atupamo aliʼna anipiʼmo aeteʼna amisuva vekamae, huno ha paiteno peleti maya atupamo alino anipiʼmo aeteno Yutasiʼa Isakaliyoti kotega vekamo Saimoni mafaʼnemo amiʼniye. 27#Yo 13:2Yutasiʼa peleti maya atupamo aliʼnigenoʼaeʼmo Sataniʼa agae aipafiʼmo faleno haiʼniye. Yesuʼa Yutasifeʼmo hunoʼaeʼmo, huguve, huka nehana kavaʼmo malage huka huvo, huno ha paiʼniye. 28Hiʼyalamuteʼmo siyateʼmo fai maiʼnaya vayaʼmogimo Yesuʼa na agufa kavafeʼmo ani gemo huʼnifi huʼa oʼafiʼnae. 29#Yo 12:6Yutasiʼa moni kuteʼmo neʼyagaiya vekamo maiʼniyaʼmofeʼmo mago geʼamo neʼafiya vayaʼmogi, uka hopa afinaʼmo nesuna neʼyaʼmo miya faiyo, huno huʼnifi, kagemi yaʼapimo ohaneʼnisiya vayaʼaina alika fako huka apamiyo, huno huʼnifi, huʼa apakesa afiʼnae. 30Yutasiʼa peleti mayamo afa aliteno malage huno kumategamo uno lamiʼniye. Haniʼilaga folaguʼmo uno lamiʼniye.

Saufa keʼaepa gemo hapa paiʼniya gemae

31 # Yo 12:23 Yutasiʼa apataleno kumategamo uno lamitegenoʼaeʼmo Yesuʼa hunoʼaeʼmo, hemenimo Vemo Mafaʼnemoʼa ala agiʼamo aligiye. Agaemo Goti ha le konali yaʼamo alino apave lisigeno Gotiʼa agaetetiʼmo ala agiʼamo aligiye. 32#Yo 17:5Agaemo Goti ha le konali yaʼamo alino apave lisigenoʼaeʼmo Gotiʼa agaiʼamo Vemo Mafaʼnemoʼmo ha le konali yaʼamo alino apave ligiye. He, hemenimo malage huno alino apave ligiye. 33#Yo 7:33-34Mafaʼneʼnimogitapae, huno, aise afinaʼmo lapakaeʼeʼmo magokepi lokaeʼna maiguve. Kahauya hutapa nagesayafeʼmo hugayaʼmonanafa oʼnagegae. Yu vayaʼaifeʼmo huʼnaeʼmo, visuva koteʼmo afaʼa oʼugae, huʼna hapa paiʼnovanageʼna hemeniʼeʼmo lapakaeʼeʼmo ani agufa gemo huʼna lapa nepauve. 34#Yo 15:12,17; 1 Yo 3:23; 2 Yo 5Hemenimo mago saufa keʼaepa gemo lapa nepauve. Konagatapimogifeʼmo lapau lapayamopafiʼmo lapaino. Lapakaefeʼmo nahau nayamopafiʼmo nahauʼniya kava huno konagatapimogifeʼmo lapau lapayamopafiʼmo lapaino. 35Konagatapimogifeʼmo lapau lapayamopafiʼmo lapausigeʼapaeʼmo muki vayaʼmogimo lapaketeʼapaeʼmo, Yesu geʼamo neʼafiya vayaʼmo maiʼnae, huʼa hugae, huno hapa paiʼniye.

Yesuʼa Pitafeʼmo hunoʼaeʼmo, nagaefeʼmo oʼageʼnova vekae, huka huteka kakameʼyamo namigane, huno huʼniya gemae

(Mt 26:31-35; Mk 14:27-31; Lu 22:31-34)

36 # Yo 7:34; 21:18-19 Saimoni Pitaʼa agaefeʼmo hunoʼaeʼmo, Ala kava nene, huno, haiyategamo ugane, huno afi geʼnigenoʼaeʼmo, visuva koteʼmo hemenimo afaʼa nakame huka oʼuganaʼmonanafa henagaʼageʼmo nakame huka ugane, huno ha paiʼnigenoʼaeʼmo, 37Ala kava nene, huno, na kava hinageʼna afaʼa kakame huʼna oʼuguve. Kagaetefeʼmo falisuvafeʼmo alo huʼnove, huno ha paiʼnigenoʼaeʼmo, 38nagaetefeʼmo falisanafeʼmo alo huʼnapiye. Alagi lama gemo kaha nepauve, kokolemoʼmo age oʼaiʼnisigekaeʼmo nagaefeʼmo oʼageʼnova vekae, huka huteka kakameʼyamo namigane, huno ha paiʼniye.

Atualmente Selecionado:

Yoni 13: kyg2013

Destaque

Copiar