Génesis 28
28
1Sayno niptinmi surin Jacobta qayaykur Isaac bendicionta qoshpan nirqan: <<Hïju, cananea warmiwanqa ama majasakankisu. 2Padan-aram markaman ayway awiluyki Betuelpa wayinman. Saycho mamaykipa turin Labánpa surinkunawan mayqanwanpis majasakanki. 3Dios El-Shaddai#28.3 El-Shaddai ninanqa lapanpaq munayyuq Dios ninanmi. bendicionninta qoykuläshunki surikikuna askaman mirayänanpaq y paykunapita miraqkuna aska nacionkuna rikakuyänanpaqpis. 4Papänï Abrahamta Tayta Dios bendicionninta qoshqannöla#Gén. 17.4-8. qamtapis qoykuläshunki y qampita miraqkunatapis qoykuläsun. Saynöpami kanan qorpanöla taykashqansi jalqakunapis raqrakunapis qampita miraqkunapaq kanqa. Sayno kananpaqmi papänï Abrahamta Tayta Dios promitirqan>>.
5Saynöpami Isaac surin Jacobta Padan-aram markaman despacharqan. Saymi Jacob charqan tiyun Labánpa wayinman. Labán karqan Rebecapa turin y Betuelpa surinmi. Betuelmi arameo runa karqan. Rebecanami Esaúpawan Jacobpa maman karqan.
Esaú yapay majasakashqan
6Esaúmi musyarqan wawqin Jacobta papänin bendicionninta qoshqanta y warmi ashiq Padan-aramman despachashqanta. Saynöpis musyarqan cananea warmiwan mana tänanpaq nishqanta. 7Saynöpis musyarqan papänin maman nishqanta wiyakur Padan-aramman Jacob aywakushqanta. 8Saynöpami Esaú tantiyarqan cananea jipashkuna lumsuyninpaq papäninta mana gustashqanta. 9Sayta tantiyarmi Esaú aywarqan tiyun Ismael kaqman. Ismael karqan Abrahampa surinmi. Saychönami warminpaq ashirqan Ismaelpa warmi surin Mahalat jipashta. Say jipash karqan Nebaiotpa paninmi. Saynöpami ishkay cananea warmikunawan taykarpis jananman juk warmita ashirqan.#Gén. 26.34-35.
Bet-elcho Jacobta Tayta Dios yuripashqan
10Beersebapita aywakurmi Haránman aywaq nänipa Jacob aywarqan. 11Sayno aywarmi juk partiman charqan. Saycho sakäpakurmi rumita jawnakurkur punurqan. 12Sueñuyninchömi rikarqan pampapita jana pasayaq escalëra ichiraykaqta. Saynöpis rikarqan say escalërapa Tayta Diospa angilninkuna wisaykäyaqta y uraykäyämuqta.#Juan 1.51.
13Saynöpis Tayta Diosta rikarqan escalëra puntancho ichiraykaqta. Paymi nirqan: <<Noqami kaykä awiluyki Abrahampis papäniki Isaacpis yärakushqan Tayta Dios. Kay punuykashqayki pampata qamta y qampita miraqkunatami qoykushayki.#Gén. 13.14-15. 14Qampita miraqkunami polvunöraq yupaytapis mana atipaypaq kayanqa. Surikikuna mirayashpanmi maysaypapis ramakäyanqa. Qam kaynikipa y qampita miraqkuna kayninpami lapan nación runakunapis bendicionnïta chaskiyanqa.#Gén. 12.1-3; 13.14-15; 15.18-21; 22.16-18; 26.3-5. 15Noqa imaypis qamwanmi kaykäshaq. Maypa aywaptikipis noqami rikashayki. Maypitapis kay partimanmi kutisimushayki. Mana qonqaypami qamta promitishqäkunata lapanta cumplishaq>>.
16Punuykashqanpita rikcharkamurmi Jacob nirqan: <<Tayta Dios rasunpaypami kaycho kaykan. Kaycho kaykashqanta manami musyashkäsu>>.
17Saymi mansakash nirqan: <<¡Kay partiqa sagrädumi kaykan! ¡Kayqa Tayta Diospa wayin kar jana pasa punkumi kaykan!>>
18Saka sakala sharkurnami jawnarashqan rumita señal kananpaq jawirqan. Nirkurnami Tayta Diosta adorashpan say rumi jananman aceitita jichaparqan. 19Nawpataqa say cercancho kaq markapa jutin karqan Luz. Jacobnami say markata jutisirqan Bet-el#28.19 Bet-el ninanqa Diospa wayin ninanmi. jutin kananpaq.
20Saychömi Tayta Diosta manakur Jacob nirqan: <<Taytay, kanan aywaykashqäpa ali puriykamunäpaq walkiykalämay. Mikunäpaqpis y mödanata jatikunäpaqpis kamaripaykalämay. 21Papänïpa wayinman kawaykar kutimuptïqa qamlami Tayta Diosnï kanki. 22Kay ichisishqä rumimi señal kanqa kaycho pïmaypis adorayäshunaykipaq. Lapan kamaripämashqaykipitami diezmuta qampaq imaypis churamushaq>>.
Atualmente selecionado:
Génesis 28: qvhB
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2003, Wycliffe Bible Translators, Inc. All rights reserved.