Génesis 27
27
Jacobta Isaac bendicionninta qoshqan
1Pasaypa awkinna karmi Isaac reqikurqannasu. Juk kutichömi qechpa kaq surin Esaúta qayarqan. Qayaptinmi nirqan: <<¿Imapaqtaq qayaykämanki, papä?>>
2Saymi Isaac nirqan: <<Pasaypa awkinnami kaykä. Sayno kaykarqa capaznachir wanukushaqnapis. 3Jirkapa ayway ima uywalatapis flëchawan cäzarkur 4yachashqä mikuyta rurapämänaykipaq. Sayta mikurkurmi manaraq wanukushqäyaq bendicionnïta qoykushayki>>.
5Esaúta papänin sayno nishqantami Rebeca wiyarqan. Saymi jirka uywata cäzakamuq Esaú aywaskiptin 6Jacobta Rebeca nirqan: <<Wawqiki Esaúta papäniki parlapashqantami wiyashkä. 7Paytami manakush jirka uywata sarirkamur yachashqan mikuyta rurapänanpaq. Sayta mikurkurnashi Tayta Diospa jutincho bendicionninta qonqa. 8Kanan yäsishqäta shumaq wiyamay, hïju. 9Jukla aywar cabransikunapita ishkay alinnin malta cabrakunata apamuy. Say aysapitami papäniki yachashqan mikuyta rurapäshaq. 10Sayta ruraskiptïnami mikunanpaq apapanki. Sayta mikurkurnami manaraq wanukur bendicionninta qoshunki>>.
11Sayno niptinmi mamanta Jacob nirqan: <<Noqapa manami wawqï Esaúpanösu cuerpü shapra kaykan.#Gén. 25.25. 12Papänï yatamarqa tantiyamanqachir. Engañaykashqäta tantiyaykur bendicionninta qomänanpa trukan maldicionamanqachir>>.
13Saymi maman nirqan: <<Papäniki maldicionashuptikiqa noqaman chämäsun, hïju. Nishqänöla malta cabrakunata jukla apamuy>>.
14Maman sayno niptinmi Jacob ishkay malta cabrakunata apamurqan. Saytanami Isaac yachashqan mikuyta Rebeca rurarqan. 15Nirkurmi Esaúpa churaräkuq alinnin kaq mödananta Jacobta jatiparqan. 16Saynöpis papänin mana tantiyananpaqmi malta cabrakunapa qarasanta rikranmanpis kunkanmanpis wankuparqan. 17Yanukuskirnami tantantinta mikuyta ayaparqan papäninman apananpaq.
18Papänin kaqman chaykurmi Jacob nirqan: <<¡Papä!>>
Sayno niptin Isaac nirqan: <<¿Mayqan kaq surïtaq kaykanki, hïju?>>
19Saymi Jacob nirqan: <<Noqa kaykä mayor suriki Esaúmi, papä. Nimashqaykita rurashkänami. Kanan sharkamuy sarimushqä uywapa aysanta mikunaykipaq. Nirkur bendicionnikita qoykalämay>>.
20Saymi Isaac tapurqan: <<¿Imanöpataq rätulaqa jirka uywata sariramushkanki, hïju?>>
Sayno niptinmi Jacob nirqan: <<Tayta Diosniki yanapämaptinmi rasla sarimushkä>>.
21Saymi Isaac nirqan: <<Rasunpaypa Esaú kashqaykita musyanäpaq witimuy>>.
22Sayno niptinmi papäninpa nawpanman Jacob witirqan. Yataykurmi papänin nirqan: <<Parlakuyninqa Jacobpanömi. Rikranmi isanqa Esaúpa rikranno>>.
23Esaúpa rikran niraq shaprasapa kaptinmi yataykarpis tantiyarqansu Jacob kashqanta. Bendicionninta qonanpaq kaykarnami 24yapay tapurqan: <<¿Rasunpaku surï Esaú kaykanki?>>
Saymi nirqan: <<Rasunpaypami Esaú kaykä, papä>>.
25Sayno niptinmi papänin nirqan: <<Sarimushqayki uywapa aysanta qaraykalämay, hïju. Mikuskirnami bendicionnïta qoshayki>>.
Sayno niptinmi mikuytawan vïnuta Jacob apapämurqan. Saytami Isaac mikurqan y upurqan. 26Mikuyta ushaskirnami nirqan: <<Witiykamur musamay, hïju>>.
27Sayno niptinmi witiykur musarqan. Musaptinmi Esaúpa mödananpa asyayninta Isaac mayarqan. Saymi Esaú kashqanta yarpar bendicionninta qoshpan nirqan:
<<Kayqa surïpa asyayninmi.
Tayta Dios bendicionninta churashqan chakranömi asyaykanpis.
28Qam tashqaykimanqa Tayta Dios tamyaykasimusun.
Shuntaytapis mana atipashqaykiyaq murupakushqayki wayuykuläsun.
Trïguykipis vïnuykipis saysika kaykuläsun.
29Qamta aska runakunami sirviyäshunki.
Saynöpis lapan nación runakuna puntaykiman qonqurpakuyäsun.
Aylluykikunapis munaynikicho kayäsun.
Paykunapis puntaykiman qonqurpakuyäsun.
Qamta maldicionashuqniki maldicionashqami kanqa.
Bendisishuqnikiqa bendisishqami kanqa>>.#Gén. 12.3; Heb. 11.20.
30Bendicionta chaskirir Jacob yarqurishlanchömi Esaúqa sarimushqan munti uywan aparish charqan. 31Paypis papänin yachashqan mikuyta ruraskirmi apaparqan. Chaykasirmi nirqan: <<Sharkamuy, papä, yanukamushqä mikuyta mikurkunaykipaq. Nirkur bendicionnikita jukla qoykalämay>>.
32Sayno niptinmi Isaac tapurqan: <<¿Mayqan surïtaq kaykanki, hïju?>>
Niptinmi Esaú nirqan: <<Qechpa suriki Esaúmi kaykä, papä>>.
33Sayno niptinmi Isaac pasaypa suksukyashpan nirqan: <<Sayno kaptinqa ¿Pitaq jirka uywata sariykur yanukapämash? Say mikuyta lapantami manaraq chämuptiki mikushkä. Paynami lapan bendicionnïta chaskish>>.
34Papänin sayno niptinmi Esaú fiyupa waqashpan nirqan: <<Papä, noqatapis bendicionnikita qoykalämay>>.
35Sayno niptinmi Isaac nirqan: <<Wawqiki shamur engañamaptinmi qamta qonäpaq kaq bendicionta paytana qoykushkä>>.
36Saymi Esaú nirqan: <<Sayno kaptinchir Jacob#27.36 Jacob ninanqa ankuta aptan ninan y engañakuq ninanmi. jutitapis churaparqayki. Kananwanqa ishkay kutinami engañaman. Nawpata qechpa kay derëchüta qechumash.#Gén. 25.29-34. Kanan noqapaq kaq bendicionta chaskikurkush. ¿Manaku walkalapis bendición noqapaq kanraq?>>
37Sayno niptinmi Isaac nirqan: <<Jacobtanami nishkä munaynincho sararäshunaykipaq y qampita miraqkunapis paypa munaynincho kayänanpaq. Saynöpis nishkä trïgunpis üvanpis aska kananpaqmi. Kanan ¿ima bendicionlataraq qoykümanpis, hïju?>>
38Sayno niptinmi Esaú yapay nirqan: <<Noqataqa ¿manaku juk bendicionlatapis qoykamankiman? Noqatapis bendicionta qoykalämay, papä>>.
Sayno nirmi papäninta seqaypa waqaparqan.#Heb. 12.17.
39Saymi Esaúta Isaac nirqan:
<<Mikuy mana wayushqan chakracho y tamya mana kashqanchömi tankipaq.
40Espädaykiwan defiendikurmi kawanki.
Wawqikipa munayninchömi kanki.
Sayno karpis munayyuq rikakur makinpita yarqunkimi>>.#Heb. 11.20.
Esaúpita Jacob qeshpikushqan
41Papänin bendicionta qoshqan junaqpita pasami Esaú fiyupa Jacobta chikirqan. Saymi kayno yarparqan: <<Papänï wanukunqanami. Pay wanuskiptinqa wawqï kaptinpis Jacobta supayninta aparasishaqmi>>.
42Esaú sayno yarpaykashqanta musyaykurmi Jacobta qayaykasir Rebeca nirqan: <<Wawqiki Esaúmi wanusishunaykipaq juraykan. 43Hïju, yäsishqäta shumaq wiyamay. Haráncho turï Labán kaqman jukla qeshpikuy.#Gén. 24.28-30; 28.1-2. 44Pay kaqcho täkamuy wawqikipa rabyaynin päsashqanyaq. 45Rabyaynin päsaskiptinnami qayasimushayki kutimunaykipaq. ¡Noqa manami munäsu ishkan wawäta juk junaqlacho oqraykuyta!>>
46Saypitanami runan Isaacta Rebeca nirqan: <<Esaúpa warminkunata mana rikanä rayku jina wanukümanpis. Kay Canaáncho heteo warmikunata Jacobpis ashiptinqa ¿imapaqnataq kawashaqpis?>>
Atualmente selecionado:
Génesis 27: qvhB
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2003, Wycliffe Bible Translators, Inc. All rights reserved.