Marcos 5
5
Jesus tỹ vẽjagrẽ kórég tỹ mil ag pan
(Mt 8.28-34; Lc 8.26-39)
1Kỹ ag tóg goj nig mág kafã ũ tá junjun mũ sir, Gerasa tá ke ag tá. 2Jesus tỹ canoa kã tákãkutẽ mũ ra ũ tóg ti kato tẽ mũ. Jagrẽ kórég ti nĩ. Vẽnh kej tá tóg kãtĩ mũ. 3Tá tóg ẽmã nĩ. Ag tỹ ti senh ke mũ ra tóg vẽnh mỹ tĩ. 4Ti se tỹ hẽn ri ke han ja ag tóg nĩgtĩ vẽ, ferro tỹ, ti nĩgé, ti pẽn ke gé. Hã ra tóg ẽn kykym kãn ja nĩgtĩ. Ag tỹ ti kanhrãn sór mũ ra ag tóg ti tỹ hẽ ri ke ja tũ nĩgtĩ. 5Kuty mré kurã ki tóg prẽr tĩgtĩ, vẽnh kej tá. Pãró ẽn ki pó génh kỹ tóg tỹ vẽsãnh tĩgtĩ. 6Ti tỹ kuvar há tá Jesus ve kỹ tóg ti kato vẽnhvãg kãtĩ mũ, kỹ tóg ti krẽm grĩnh ke mũ. 7Prẽr tóg mũ, kỹ tóg: “!..Jesus'..!“ he mũ, “!..kynhmỹ Topẽ kósin'..! Ã isỹ hẽ ri kenh mũ,” he tóg. “!..Topẽ jiji tó kỹ sóg ã mỹ to vĩ mũ, ã tỹ inh vóg kónãn tũ nĩ jé..!” he tóg. 8Hã ra tóg ti mỹ: “ti tovãnh ra, Nén-Kórég',” he ja nĩ.
9Kỹ tóg ti mỹ: “ã jiji hẽ ri ke tĩ,” he mũ. Kỹ tóg: “Mil,” he mũ. “E tãvĩ ẽg nỹtĩ,” he tóg, Nén-Kórég ti.
10Kỹ tóg to vĩ', to vĩ', he mũ, ti tỹ ẽmã ẽn ki ti kutẽm tũ nĩ jé.
11Hã ra ag mẽg tỹ porko ag tóg jẽg nỹtĩ, pãnónh ẽn kri. 12Kỹ Nén-Kórég ag tóg ti mỹ: “ag mẽg to ẽg jẽgnẽ, ẽg tỹ ag ki ge jé,” he mũ.
13Kỹ tóg ag mỹ: “hej,” he mũ. Kỹ ag tóg ẽn ti tovãnh kỹ porko ag ki ge mũ sir. Kỹ ag tóg rán ki re mũ sir, porko ag. Nãgnãr kãn ag tóg mũ sir, goj nig mág ki, porko tỹ mil régre ag hỹn.
14Kỹ porko ki rĩr tĩ ag tóg pétẽ mũ sir, ẽmã ra. Tá ag tóg kãmén kãn mũ, ũ tỹ Nén-Kórég tỹ jagrẽ ja ẽn ti. Kỹ ag tóg Jesus to mũ kãn mũ sir, nén ẽn ve jé. 15Hã ra ũn jagrẽ kórég ja ẽn tóg kur tu kỹ nĩ nĩ. Krĩ há tóg nĩ gé. Kỹ ag fe tóg jũrũn ke mũ. 16Kỹ ũ tỹ vég mũ ag tóg ti kãmén mũ sir. 17Hã kỹ ag tóg Jesus mỹ: “ha ẽmã tag ki kutẽ,” he mũ, ti tỹ ag rã hã nĩ tũ nĩ jé.
18Ti tỹ canoa kã ki rã kỹ ũn jagrẽ kórég ja tóg: “nhỹ ã mré tĩg mũ,” he mũ. 19Hã ra tóg ti mỹ: “nejé. Ha tĩg, ã ĩn ra, ã tỹ ã mré ke ag mré nĩ jé,” he mũ. “Ag mỹ kãmén nĩ, ẽg jóg mág tỹ ã tỹ há' he mũ ti, ti tỹ ã jagãgtãn mũ ti,” he tóg. 20Kỹ tóg tĩ mũ. Ẽmã tỹ Decápolis tá tóg Jesus tỹ ti tỹ há' he ẽn kãmén mũ. Kỹ tóg vẽnh kar mỹ e tĩ sir.
Jairo tỹ ti kósin fi kaga tỹ Jesus mỹ tó
(Mt 9.18-19; Lc 8.40-42)
21Kỹ Jesus tóg goj nig mág kafã ra tĩg mãn mũ, canoa kãmĩ. Kỹ vẽnh e tóg ti jo vẽnh mãn mũ, goj fyr tá. 22Kỹ Judeu ag vẽnh kanhrãn jafã to pã'i tỹ Jairo tóg tá jun kỹ Jesus krẽm mũg ke mũ. 23Ti mỹ tóg: “inh kósin fi vỹ tũg sór mũ. Kunĩg, ã tỹ ã nĩgé tỹ fi mẽ jé, fi tỹ há' he jé, fi kren jé,” he mũ. 24Kỹ tóg ti mré tĩ mũ. Hã ra ũn e ag tóg ti nón mũ kỹ ti kutãn mũ.
Ũn tỹtá kaga fi
(Mt 9.20-22; Lc 8.43-48)
25Ag mũ ra ũn tỹtá ũ fi tóg ag nón tĩ mũ. Kyvénh krỹg ja tũ han kỹ fi tóg nĩ, prỹg tỹ 12 (ke) ki. 26Médico ag mỹ fi tóg vẽnh ven tỹ hẽn ri ke han, to fi tóg fi tỹ nén vãm kãn, hã ra fi tóg há' he tũ nĩ, ke han han fi tóg. 27Hã ra fi tóg Jesus kãme mẽ ja nĩgtĩ. 28Kỹ fi tóg: “sỹ hẽn ri ke mũn ti kur mẽg kỹ sóg há' henh mũ,” he mũ. Kỹ fi tóg vẽnh e kã mĩ tĩg kỹ ti nón ti kur mẽg mũ sir. 29Kỹ vãhã fi kyvénh tóg gám ke mũ sir, kỹ fi tóg ki kanhró nĩ, fi kaga tỹ há' he ẽn ti.
30Hã ra Jesus tóg ti fe tỹ ki kanhró nĩ gé. Kỹ tóg vẽnh e kã ki vĩrĩn ke kỹ: “ũ nỹ inh kur mẽ'?“ he mũ. 31Kỹ ti mré mũ tĩ ag tóg ti mỹ: “vẽnh kar tỹ ã kutãn vẽ,” he mũ. 32Kỹ tóg tã mĩ ẽvãnh kỹ fi vég mũ. 33Kỹ fi tóg jũrũn ke mũ. Ti krẽm mũg ke kỹ fi tóg ti mỹ kãmén kãn mũ sir. 34Hã ra tóg fi mỹ: “inh kósin,” he mũ. “Ã tỹ inh ki rã hã kỹ ã tóg há' hé. Ha tĩg, jatun mỹ. Ã tỹ há' he vẽ ha,” he tóg.
Jairo kósin fi rĩr mãn
(Mt 9.23-26; Lc 8.49-56)
35Ti tỹ ver fi mré vẽmén jẽ ra Jairo mré ke ũ ag tóg ti tá junjun mũ. “Ã kósin fi vỹ hur ter. Ti kutãn mãn tũg nĩ,” he ag tóg mũ. 36Hã ra Jesus tóg: “to krĩ kufy han tũg nĩ, inh vĩ hã kri nĩm nĩ,” he mũ. 37Kỹ tóg ũn e ag mũ kamẽg kỹ ag mỹ: “Pedro hã vỹ tĩg mũ inh mré, Tiago ke gé, Tiago jãvy tỹ João ke gé,” he mũ.
38Ag tỹ Jairo ĩn tá junjun kỹ tóg ũn kygfỹ mũ fag mỹ: 39“ãjag tỹ ne jé kygfỹ nẽ,” he mũ. “Ãjag tỹ ne jé vẽsỹrénh nẽ? Ter tũ fi nĩ. Fi nũr vẽ,” he tóg. Ũn vẽsỹrénh jagy han mũ ẽn fag mỹ tóg ke mũ.
40Hã ra fag tóg ti to é he mũ. Kỹ tóg fag pan kỹ gĩr fi mỹnh fag mré fi venh rã mũ, ti mré kãmũ mũ ag mré. 41Fi nĩgé kãgmĩ kỹ tóg fi mỹ: “talitá cumi,” he mũ. Ẽg vĩ ki ke, hã vỹ: “nĩ ra, jỹ,” he mũ.
42Kỹ vãhã gĩr fi tóg, nĩ kỹ kynẽ tĩ nĩ sir. Kri prỹg tỹ 12 (ke) fi nĩ. Kỹ tóg ag mỹ e tãvĩ tĩ. 43Hã ra tóg ag mỹ: “ker ũ mỹ tó hẽ'!“ he mũ. “Ha fi mỹ vẽjẽn ven,” he tóg.
Atualmente selecionado:
Marcos 5: kgp
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2005, Wycliffe Bible Translators, Inc. in partnership with Sociedade Bíblica do Brasil and Missão de Cristianismo Decidido