Marcos 4
4
Jesus tỹ nén fy kãmén
(Mt 13.1-9; Lc 8.4-8)
1Kejẽn Jesus tóg goj nig mág tỹ Galiléia fyr tá ag kanhrãn mãn mũ. Hã ra vẽnh e vỹ ti pénĩn nỹtĩ, vẽnh e tãvĩ, hã kỹ tóg canoa kã ra rã kỹ kã kã nĩ mũ. Hã ra vẽnh e vỹ nig fyr tá vẽnh mãn kỹ nỹtĩ. 2Kỹ tóg ag mỹ: 3“kejẽn ũ tóg nén ũ fy krãn tĩ mũ,” he mũ. 4“Ti tỹ krãn kỹ ti fy ũ tóg ẽmĩn kri kutẽ mũ. Kỹ sẽsĩ tóg ti ko mũ sir. 5Ti fy ũ tóg pãró kri kutẽ mũ, ga e tũ ki, kỹ tóg kãnhmar mur mũ vẽ, ga sĩ ẽn ki. 6Hã ra tóg rã tỹ ẽg nĩno kã sa kỹ ti pũn mũ. Ti jãre han tũ nĩn kỹ tóg tóg mũ. 7Ti fy ũ tóg sónh kã ki kutẽ mũ, kỹ tóg ti mré mur mũ. Ti kri tóg rũm ke mũ sir. Kỹ tóg kanẽn tũ nĩ. 8Ti fy ũ tóg ga há kri kutẽ mũ. Kỹ tóg ti mur kỹ mog há han mũ. Kanẽn há han tóg mũ gé. Ũ tóg kanẽ tỹ 30 (ke) han, jo ũ vỹ kanẽ tỹ 60 (ke) han, jo ũ vỹ kanẽ tỹ 100 (ke) han. 9Ũ nĩgrẽg nỹtĩ tỹ tỹ jẽmẽ jé,” he tóg.
Jesus tỹ nén fy kãmén
(Mt 13.10-23; Lc 8.9-15)
10Ũn e ẽn ag mũ kar kỹ ti mré nỹtĩ ag tóg, ti ki nén fy kãme jẽmẽg mũ. Kỹ ag tóg ti mỹ: “ã tỹ ẽg mỹ ne tó nẽ?“ he mũ.
11Kỹ tóg: “ãjag hã tóg Topẽ tỹ tỹ ẽg pã'i nĩ ki kanhró nỹtĩnh mũ, ijo tó ja tũ ẽn ki,” he mũ. “Hã ra sóg ẽn ag mỹ: tag ri ke ti nĩ, he tãvĩ han mũ. 12Ũ tỹ ón kỹ mẽg mũ ag mỹ sóg tó há han ke tũ nĩ. Kỹ ag tóg ag tỹ vég mũ ra ki kagtĩg nỹtĩnh mũ. Ag tỹ mẽg mũ ra ag tóg to jykrén ke tũ nĩ. Kỹ ag tóg Topẽ ki ge tũ nỹtĩ gé. Kỹ Topẽ tóg ag mỹ vẽnh pãte fón ke tũ nĩ gé,” he tóg.
13Kỹ tóg ag mỹ: “ãjag tỹ to jykrén tũ tóg tĩ', sỹ ãjag mỹ nén fy kãmén kỹ,” he mũ. “Kỹ ãjag mỹ ũ to jykrén há nỹtĩnh mũ', sỹ kar kỹ ãjag mỹ nén ũ kãmén mãn kỹ?“ he tóg.
14Kỹ tóg ag mỹ: “ũ tóg nén fy krãn tĩ, kỹ ti tỹ Topẽ vĩ tó vẽ, hã vỹ: krãn, he mũ. Nén fy krãn ri ke vẽ,” he tóg. 15“Ti fy ũ vỹ ẽmĩn kri kutẽ mũ. Topẽ vĩ mẽg mũ ũ ag vẽ. Ag tỹ mẽg mũ ra Satanás tóg ag mỹ tỹ tũ' he mũ, vẽsỹmér. Kỹ ag tóg ki kagtĩg nỹtĩ ha. Ẽpry kri kutẽ mũ ri ke ag hã vẽ sir. 16Hã ri ken hã vẽ gé, ti tỹ pãró kri krãn mũ ẽn ti. Ag tỹ Topẽ vĩ mẽ kỹ ag tóg vẽsỹmér: hej, he mũ sir. Ag mỹ tóg sér tĩ. 17Hã ra ag tóg nén fy kré jãre tũ ri ke nỹtĩ, kỹ ag tóg mũ sĩ han mũ, Topẽ mré. Nén ũ jagy kutẽ kỹ ag tóg sir tovãnh mũ vẽsỹmér, ũ tỹ Topẽ tugrĩn ag kato tẽ kỹ. 18Ti tỹ sónh kã ki krãn mũ ẽn hã vẽ gé, hã vỹ tỹ, Topẽ vĩ mẽg mũ ag nỹtĩ gé. 19Hã ra ag tóg, ag rãnhrãj hã mĩ ẽkrég mũ, ón kỹ riko nĩ sór kỹ. Nén ũ kar to ag tóg én tĩ, hã kỹ Topẽ vĩ tóg, ag mỹ tũ' he mũ sir. Kỹ ag tóg kanẽn há han tũ nĩ. 20Kỹ ti tỹ ga há ki krãn mũ ẽn vỹ tỹ Topẽ vĩ mẽg mũ ag nỹtĩ gé. Hej, he ag tóg mũ sir, kanẽn há han ag tóg mũ, ũ tóg kanẽ tỹ 30 (ke) han mũ, ũ tóg kanẽ tỹ 60 (ke) han mũ, ũ tóg kanẽ tỹ 100 (ke) han mũ,” he tóg.
Jesus vĩ ki kanhrãn kãme
(Lc 8.16-18)
21Kỹ tóg ag mỹ: “ẽg pijé néj grug kỹ kẽj krẽm fẽg tĩ', ẽg pijé kỹmỹ krẽm fẽg tĩ',” he mũ. “Ti fẽg jafã kri ẽg tóg fẽg tĩ, ti tỹ ẽg mỹ jẽngrẽ han jé. 22Hã kỹ ãjag tỹ, ãjag tỹ nén ki kagtĩg ẽn ki kanhrãn kãn ke vẽ. 23Ũn nĩgrẽg nỹtĩ tỹ tỹ jẽmẽ jé,” he tóg.
24“Hã kỹ jẽmẽ há han, inh vĩ ti. Ãjag mré ke ag jykre tugnỹm ãjag tóg tĩ, kỹ ãjag tóg ag mỹ vĩ tar han tĩ. Hã ra Topẽ vỹ ãjag mỹ vĩ tar han ke mũ gé, ha vem nĩ,” he tóg. 25“Ũ tỹ ti vĩ to jykrén há han mũ ẽn tar han jé tóg ke mũ. Jãvo tóg ũ tỹ nén ũ to jykrén há han tũ nĩn kỹ tóg ti mỹ tũ' he mũ sir, ti tỹ nén ũ to jykrén sĩ han mũ ra,” he tóg.
Jesus kãtĩg mãn ke kãme
26Kỹ Jesus tóg ag mỹ: “Topẽ tỹ tỹ ẽg pã'i nĩ vỹ ge nĩnh mũ, ha mẽ,” he mũ. “Kejẽn ũ vỹ tóg nén ũ fy krãn mũ, ti japỹ ki. 27Krãn kar kỹ tóg jatun mỹ nĩ nĩ. Kejẽn tóg vãhã venh tĩ mũ. Hã ra ti fy ẽn vỹ mur ja nĩ. Mog ja tóg nĩ. Kỹ tóg: “ti hẽ ri ken kỹ mur'?” he mũ. 28Jãvo tóg vẽsóg ki mog, kar tóg mó han, kỹ tóg vãhã kanẽn mũ sir, ti mó kã ki. 29Ti tỹ tóg' he kỹ tóg krég mũ sir, ke tũ nĩ kỹ tóg fãg mũ sir,” he tóg.
Topẽ vĩ tỹ vẽnh kar kri rũm ke
(Mt 13.31-32, 35; Lc 13.18-19)
30Kỹ Jesus tóg: “Topẽ tỹ tỹ ẽg pã'i nĩ vỹ 31ka tỹ krén ri ke nĩ,” he mũ. “Ti krãn ẽg tóg tĩ. 32Ti mog kỹ tóg vãhã vãnh kãfór kar nĩ. Kỹ sẽsĩ vỹ ti féj kã ki ti jagfe han kỹ kã ki krẽg tĩ.
33Kãmén tỹ hẽn ri ke han tóg, ag tỹ to jykrén jé. 34“Tag vỹ ge nĩnh mũ,” he tóg tĩ, ũn e ag mỹ. Hã ra tóg ti mré mũ tĩ ag hã mỹ kãmén há han mũ, ag pin kỹ.
Jesus tỹ kóho tỹ tũ' he
(Mt 8.23-27; Lc 8.22-25)
35Hã tỹ kuty tá tóg ag mỹ: “mũ nỹ, goj nig mág kafã ũ ra,” he mũ.
36Hã kỹ ag tóg vẽnh e ẽn ré kỹ ti mré canoa kã mĩ mũ mũ sir. Hã ra ũ ag tóg ti mré mũ mũ gé, canoa ũ kãmĩ.
37Kejẽn kãka tar tãvĩ vỹ tóg vãhã krog he mũ. Kỹ goj tóg canoa kã ki krém krém ke kỹ fãn sór mũ sir. 38Hã ra Jesus tóg nũr nỹ, fakrĩnh kỹ, canoa nér tá. Kỹ ag tóg ti rĩn kỹ ti mỹ: “Senhor, ẽg kãgter ha mẽ tóg tĩ. Mỹ ã mỹ tỹ nén ũ tũ?“ he mũ.
39Kỹ tóg rĩr mũ sir, kỹ tóg kóho mỹ vĩ tar han mũ, ti mỹ: “krỹg he ra,” hen kỹ. Kỹ tóg tũ' he mũ. Katy' he tóg mũ. 40Kỹ tóg ag mỹ: “ãjag tỹ ne jé kanẽ junjur nẽ? Ãjag mỹ inh ki ge há han tũ?“ he mũ. 41Kỹ ti jykre tóg ag mỹ e pẽ tãvĩ tĩ sir. Jagnẽ mỹ ag tóg: “kóho vỹ ti vĩ han, goj ti ke gé,” he mũ.
Atualmente selecionado:
Marcos 4: kgp
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2005, Wycliffe Bible Translators, Inc. in partnership with Sociedade Bíblica do Brasil and Missão de Cristianismo Decidido