Marcos 6
6
Jesus jamã tá ke ag tỹ ti to é he
(Mt 13.53-58; Lc 4.16-30)
1Kỹ Jesus tóg ti mré mũ tĩ ag mré ẽmã tỹ Nazaré tá jun mũ sir, ti jamã tá. 2Vẽnhkán ke kurã ki tóg ag vẽnh kanhrãn jafã krẽm ag kanhrãn mũ. Ag tỹ ti vĩ mẽ kỹ tóg ag mỹ e tĩ. “Hẽ tán hỹn ki kanhrãn. Ũ nỹ hỹn ti kanhrãn?“ he ag tóg. “Ẽg tỹ nén han vãnh hynhan tóg tĩgtĩ. 3Ðn han tĩ ẽn vẽ mỹr. Maria fi kósin vẽ, Tiago, José, Judas, Simão ag kãke vẽ mỹr, kỹ ti ve fag vỹ ẽg mré nỹtĩ gé. Ti tỹ ne jé ẽg kãfór nĩ sór nẽ?“ he ag tóg. Kỹ tóg ag mỹ ũ nỹ.
4Kỹ tóg ag mỹ: “ẽmã ũ tá ke ag tóg Topẽ vĩ tó tĩ to é he tũ nĩgtĩ,” he mũ. “Ti jamã tá ke ag tóg ti to é he tĩ jãvo, ti mré ke ag, ti kanhkã ag,” he tóg. 5Kỹ tóg tá nén ũ han tũ nĩ sir. Ũn kagyga pipir ag hã tỹ há' he tóg, ti nĩgé tỹ ag mẽ kỹ. 6Kỹ tóg ti mỹ e tĩ, ag tỹ ti ki ge tũ nỹtĩn kỹ. Hã kỹ tóg ẽmã kãsir mĩ tĩg kỹ ag kanhrãn tĩ nĩ sir.
Jesus tỹ ũ tỹ 12 (ke) ag jẽgnẽ
(Mt 10.5-15; Lc 9.1-6)
7Kỹ tóg ũ tỹ 12 (ke) ag jé prẽr mũ. Kỹ tóg ag jẽgnẽg mũ, ũn régre tĩn', ũn régre tĩn' he tóg. Ag mỹ tóg vẽjykre nĩm mũ, ag tỹ vẽjagrẽ kórég pan jé. 8Kỹ tóg ag mỹ: “ãjag mũn kỹ ẽmĩ ma mũ tũg nĩ, sako ke gé, jãnkamy ke gé,” he mũ. 9“Vãtó hã va mũm nĩ, pẽ né ke gé, pẽn to ró ti,” he tóg. 10“Ãjag tỹ ẽmã ũ tá junjun kỹ, ãjag tỹ ĩn kãra ge mũ hã ki nũgnũr' hem nĩ, hã ki ãjag tỹ kurã ki panh ke mũ ẽn tá krỹg nĩ,” he tóg. 11“Ẽmã ũ tá ke ag tóg kejẽn ãjag mỹ: “kãgem nĩ,” henh ke tũ nĩ, ag tỹ ãjag kãmén mẽ sór tũ nỹtĩn kỹ. Kỹ ãjag pẽn hã kykũnh nĩ, ãjag tỹ tá pa kỹ. Kỹ ag tóg Topẽ tỹ ag to kórég nĩ ki kanhrãn mũ, ha mẽ. Ki hã sóg tó mũ. Kurã tỹ ẽgno kã, isỹ vẽnh kar jykre tugnỹm ke kurã ẽn kã ag tóg jagtar nỹtĩnh mũ, ag tỹ ãjag vĩ jẽmẽ jãvãnh nỹtĩn kỹ,” he tóg.
12Kỹ ag tóg mũ mũ sir. “Ãjag jykre tovãnh nĩ,” he ag tóg mũ, vẽnh kar mỹ. 13Vẽjagrẽ kórég pan ag tóg mũ, ha mẽ. Ũn kagyga ag to ag tóg azeite tĩn mũ, kỹ ag tóg ag tỹ há' he kãn mũ sir.
João Batista ter
(Mt 14.1-12; Lc 9.7-9)
14Kỹ pã'i mág tỹ Herodes tóg Jesus kãme mẽg mũ. Vẽnh kar vỹ ti kãmén tĩ, hã kỹ tóg mẽg mũ. Kỹ tóg: “João Batista hỹn, “ he mũ. “Ti ter ja tán hỹn vỹn ké. Hã kỹ tóg ẽg tỹ nén han vãnh hynhan tĩ,” he tóg, Jesus to.
15Hã ra ũ ag tóg Jesus to: “Elias vẽ,” he mũ. Kỹ ũ ag tóg: “Topẽ vĩ tó tĩ vẽ, vãsỹ Topẽ vĩ tó tĩ ag ri ke vẽ,” he mũ gé.
16Kỹ Herodes tóg ti tỹ ti kãme mẽ kỹ: “João hỹn ti ter ja tá vỹn ké, sỹ ũn krĩ kym ja ẽn ti,” he mũ.
17 Herodes vỹ João se ja nĩ, vẽse ja kã ki tóg ti fón ja nĩ, Herodias fi tugrĩn. Tỹ fi Filipe prũ fi nĩ, ti jãvy, hã ra tóg fi tỹ prũg mũ. 18Kỹ João tóg ti mỹ: “ã hã ne tóg ã jãvy prũ fi tỹ prũg mũ'. Kỹ ã tóg Topẽ vĩ mranh mũ,” he ja nĩ. 19Tag tugrĩn Herodias fi tóg ti to kórég ja nĩ, hã kỹ fi tóg ti tén sór ja nĩ, hã ra fi tóg ti tỹ hẽ ri ke ja tũ nĩ. 20Herodes vỹ ti kamẽg ja nĩ, ti tỹ jykre kuryj nĩn kỹ. Topẽ jykre hã han tóg tĩ ja nĩgtĩ. Kỹ Herodes tóg ti jy nĩgãn ja nĩ, ti jykre há tugrĩn. Ti vĩ tóg ti mỹ mẽ há ja nĩ, ge ra tóg to jykrén ja tũ nĩ.
21Kejẽn tóg fi tỹ ti tén ke ki króm ke mũ. Herodes tóg ti mur ja kurã ẽn ki fénhta mág han mũ, tenente ag mỹ, soldado ag pã'i ag mỹ ke gé, ũn riko ag mỹ ke gé.
22Fénhta ẽn ki fi kósin tytãg fi tóg ag mỹ vẽnh grén mũ, kỹ fi tóg Herodes ag mỹ sĩnvĩ tãvĩ jẽ. Kỹ tóg fi mỹ: “ã tỹ nén to vĩ mũ tỹ sóg ã mỹ nĩm mũ,” he mũ. 23Fi mỹ tóg: “sỹ ke há vẽ,” he mũ. “Ã tỹ nén to vĩ mũ kar nĩm jé sóg ke mũ, isỹ nén kar kuju mré hã,” he tóg.
24Kỹ fi tóg fi mỹnh fi to tĩg kỹ fi mỹ: “Inh hỹn ne to vĩnh mũ?“ he mũ. Kỹ fi tóg: “João krĩ to vĩm nĩ,” he mũ. 25Kỹ fi tóg vẽsỹmér ti to vẽnhvãg tĩ kỹ ti mỹ: “inh mỹ ũri João Batista krĩ tỹ pénky kã kã nĩm,” he mũ.
26Kỹ Herodes tóg fe kaj mág han mũ sir. Hã ra tóg fi mỹ: “sỹ ke há vẽ,” he ja nĩ, hã kỹ tóg fi mỹ han sór mũ, ti mré nỹtĩ ag tỹ mẽ kãn ja nĩn kỹ. 27Hã kỹ tóg porisa ũ jẽnẽg mũ, vẽse ja ra, ti tỹ João krĩ kym kỹ ma kãtĩg jé. 28Kỹ tóg ti krĩ ma kãtĩ mũ sir. Pénky kã kã nĩm kỹ tóg tytãg fi mỹ nĩm mũ. Kỹ fi tóg fi mỹnh fi mỹ ma tĩ mũ.
29Kỹ João mré mũ tĩ ag tóg ti venh mũ mũ, ti ter mẽ kỹ. Kỹ ag tóg ti há va mũ mũ, vẽnh kej tá ti péju jé sir.
Hã to jykrén kỹ Herodes tóg Jesus to: “João hỹn ti ter ja tá rĩr mãn, hã kỹ tóg nén ve vãnh ẽn hynhan mũ,” he mũ.
Jesus tỹ ũ tỹ 5 mil (ke) ag jẽn
(Mt 14.13-21; Lc 9.10-17; Jo 6.1-14)
30 Jesus tóg ti tỹ ũn vin mũ ag jẽgnẽ ja nĩgtĩ, ag tỹ vẽnh kar mỹ ti kãmén jé, ũn kagyga ag tỹ há' he jé ke gé. Hã ra ag tóg kejẽn ti to vỹnvỹn ke mũ sir, ti mỹ ag tỹ nén han ja ẽn kãmén jé. 31Hã ra ag tóg tá e nĩ. Kãmũ ag tóg nỹ nĩ, hã kỹ tóg ag jẽn ke mũ ra vẽnh mỹ tĩ. Kỹ tóg ag mỹ: “mũ nỹ, ẽg pir mỹ ẽmã tũ ja ra mũ jé, ẽg vẽnhkán sĩ han jé,” he mũ. 32Kỹ ag tóg ag pir mỹ canoa kã mĩ goj nig mág ẽn kã mĩ mũ mũ sir, ẽmã tũ ja ra.
33Hã ra ũn e ẽn ag tóg ag mũ ve kỹ ag ki kanhrãn mũ. Kỹ ag tóg goj fyr jagma pétẽ mũ, ag jy. Ag jo ag tóg tá junjun mũ sir. Ẽmã kar tá ag tóg kãmũ ja nĩ, hã kỹ ag tóg e nỹtĩ.
34 Jesus tỹ tá jun kỹ tóg sir ũn e ag vég mũ, kỹ ag tóg ti mỹ jagtar nỹtĩ. Ti mỹ ag tóg tỹ ẽg mẽg tỹ mé ri ke nỹtĩ. Ũ tỹ ẽg mẽg ki rĩr tũ nĩn kỹ tóg jagtar nỹtĩgtĩ.
35Hã ra tóg rãké nỹ sir, kỹ ti mré mũ tĩ ag tóg ti mỹ: “rãké ti nỹ ha, ki ti ẽmã tũ nĩ,” he mũ. 36“Ã tỹ ag mỹ ha mũjẽg', hen kỹ tóg há tĩ vẽ. Kỹ ag tóg ẽmã kar mĩ mũnh mũ, vẽjẽn jãvãnh jé,” he ag tóg 37Hã ra tóg ag mỹ: “ha inhhã ag jẽn ge,” he mũ. Kỹ ag tóg: “kỹ ẽg mỹ jãnkamy tỹ hẽn ri ke tỹ ẽmĩ kajãm mũ'?“ he mũ.
38Kỹ tóg ag mỹ: “ẽmĩ tỹ hẽ ri ke nỹ ki nỹtĩ? Ha venh mũ jẽg,” he mũ. Ag tỹ ve kỹ ag tóg: “ũ tỹ 5 (ke) vẽ, pirã régre ke gé,” he mũ.
39Kỹ tóg ag mỹ: “nĩgnĩ ra, vẽnhmãn kỹ, re kri, mrugmru há kri,” he mũ. 40Kỹ ag tóg vẽnhmãn kỹ nĩ', vẽnhmãn kỹ nĩ' he mũ. Ũ vỹ tóg 100 (ke) nĩ' he mũ, jo ũ tóg 50 (ke) nĩ' he mũ, ag vẽnhmãn ũ. 41Kỹ tóg ẽmĩ mré pirã génh kỹ kanhkã ki ẽvãnh mũ. Kỹ tóg Topẽ mré vĩ mũ sir. Kỹ tóg ẽmĩ kupãg mũ sir. Ti mré mũ tĩ ag mỹ tóg vin mũ, ag tỹ ũn e ẽn mỹ kãnhkrén jé. Pirã régre tỹ tóg vẽnh kãpópãm mũ gé sir. 42Kỹ vẽnh kar vỹ ko kãn kỹ funfór mũ sir. 43Kẽj tỹ 12 (ke) fãn ag tóg mũ sir, ẽmĩ ke tỹ, pirã ke tỹ. 44Ẽmĩ ẽn ko mũ ag tóg tỹ ũn tỹ 5 mil (ke) ag nỹtĩ, ũn tỹtá fag tó tũ.
Jesus tỹ goj kri tĩg
(Mt 14.22-33; Jo 6.15-21)
45Vẽsỹmér Jesus tóg ti mré mũ tĩ ag mỹ: “ijo kafã ũ ra mũjẽg, ẽmã tỹ Betsaida ra,” he mũ. “Isỹ ũn e tag ag mỹ: ha mũjẽg, henh ke vẽ ver,” he tóg. 46Ag mũ kar kỹ tóg pãnónh to tãpry mũ, Topẽ mré vĩ jé.
47Kuty ẽn kã canoa tóg ver tĩ nĩ, goj kãmĩ. Jo Jesus tóg tar tá jẽ nĩ, ti pir mỹ. 48Hã ra ag tóg canoa vóg kỹ ronron mũ sir. Mũ kónãn ag tóg mũ sir, kãka tỹ ag kato tẽn kỹ. Hã ra Jesus tóg kurã ke ra ag to kãtĩ mũ, goj kri tĩg kỹ, ti pẽn kã mỹr. Kỹ tóg ag tá jun kỹ ag pãtén sór ve nĩ. 49Kỹ ag tóg jũrũn ke kỹ: “vẽnh kuprĩg vẽ,” he mũ. Kỹ ag tóg kamẽgmẽg kỹ vẽkrẽnkrẽr mũ. 50Ag kar tỹ ti ve kỹ ag tóg jũrũn ke mũ. Hã ra tóg vẽsỹmér ag mỹ: “kamẽg tũg nĩ, inh hã vẽ,” he mũ.
51Kỹ tóg canoa kã ki rã mũ sir ag mré. Kỹ kãka tóg tũ' he mũ sir. Kỹ tóg ag mỹ e tãvĩ tĩ. 52Ag tỹ to jykrén tũ tóg tĩ. Ver ag tóg krĩ tũ nỹtĩ, hã kỹ ag tóg Jesus jykre ki kagtĩg nỹtĩ ver, ti tỹ ẽmĩ pir tỹ ũn e jẽn ja ra.
Jesus tỹ Genesaré mĩ tĩg
(Mt 14.34-36)
53Kỹ ag tóg canoa kã mĩ pa kỹ ga tỹ Genesaré tá junjun mũ. Tá ag tóg canoa nỹgnỹn mũ sir. 54Ag kãpa kỹ tá ke ag tóg vẽsỹmér ti ki kanhrãn mũ. 55Kỹ ag tóg ĩn kar mĩ pétẽ mũ sir, ag tỹ ũn kagyga ag gé kãmũ jé. Kur kã ki ag vin kỹ ag tóg ag gé kãmũ mũ. Ti jẽg jan ra ag tóg ti nón mũ mũ.
56Ti tỹ ẽmã ũ tá jun kỹ ag tóg vẽnh kaga gé kãmũ tĩ. Kỹ ag tóg ĩn prur ki ag vin tĩ. Ẽmã mág tá ag tóg ge tĩ, ẽmã kãsir mĩ, vãnh kã mĩ ke gé. “Mỹ ã mỹ há, ẽg tỹ ã kur tóv mẽ jé?“ he ag tóg tĩ. Kỹ ag tóg há' há' he kãn tĩ sir, ag tỹ ti kur tóv mẽn kỹ.
Atualmente selecionado:
Marcos 6: kgp
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2005, Wycliffe Bible Translators, Inc. in partnership with Sociedade Bíblica do Brasil and Missão de Cristianismo Decidido