ỤKỤRWỌ nya ALẸRỤ 20
20
ỊPọlụ Ị-ịpyị nya ỊMẹsịdoniya Bala Ịpyị nya IGirisi
1Ụka ká ojigi-jigi ọtụka ọọwa kpụ ba kpá lẹ, ịPọlụ a du ẹrụ kaka wụrụ angịnyị nya Ohe Oluhye ilepweji nya Efesọsị kele ka ẹga nyamwụ lẹlẹ. Ụka ká ịPọlụ jwaa ọhụ la ẹla nya Ohe Oluhye oyaya kpá, kọ daa ọkpahị mẹ wuu lẹ, ọ yegiri bwu ụwa rụ ka ịpyị nya ala ịMẹsịdoniya lẹlẹ. 2Ịnyị, ụka ká ịPọlụ jẹ bwu oye nya ọpyị ịịwa wuu, juwa ju angịnyị nya Ohe Oluhye ịlụwa ọhụ ịnyịnyịịnyị lẹ, ọ jẹ gbee kọ pwụ ọpyị nya ala iGirisi ịnyịnyị lẹlẹ. 3ỊPọlụ hụ ọ-ọpyị nya ala iGirisi ọọwa lala ịya ịta gbẹgbịlẹgbẹ. Ma, ụka kọ juwa nwụlanọ kọ ka ju ụgbọ nya enyi kele ka ọpyị nya ala iSiriya lẹ, ala iJuu ịlụwa a juwa me obyi onyobyi ju ịPọlụ lẹ, ịPọlụ a chị eje yẹkẹẹ, ọwa nyị ka rụ tịrẹkpẹ bwu ịpyị nya ala ịMẹsịdoniya ene kọọwa nyị ka pwụ iSiriya lẹlẹ. 4Angịlẹ kị ri alogu ẹdịyẹ nya ịPọlụ lụka ọọwa ri, iSopata ọlẹ kọ ri ọnyị nya iPirihọsị ọlọpyị nya iBeriya. Angị ịkịla ri Arisitakọsị bala ịSẹkọndọsị angịlẹ kị bwu epweji nya ịTẹsalonayịka. ỊGayọsị ọlẹ kọ bwu ọpyị nya ịDẹẹbi juwa ịnyịnyị. ITimoti juwa bala ala Echiya ịlẹ kị wụrụ iTikikọsị bala iTirofimọsị ịnyịnyị. 5Ịnyị lẹ, ịwa angịwẹ wuu a rụ ji ịlahị nyahị kele kaka godayị gbehi e-epweji nya ịTịrowasị lẹlẹ. 6Ma, ahị lẹ, ahị ju ụgbọ nya enyi rụ bwu epweji nya iFilipayị ụka ọlẹ ká ẹnụtụrụ ịlụka nya Ang Oriri nya Ịkaa Ọmịrịị mịrị-ka nya ala iJuu chịpwụrụ kpá wuu lẹ. Ẹdịyẹ nyahị ọọwa bịrịịhị ẹnụtụrụ ịrụ ene kahị pwụ epweji nya ịTịrowasị kaka tọ alogu ẹdịyẹ nyahị ịkịla. Ahị hụ e-epweji nya ịTịrowasị ọọwa lala ụtụrụ irwiye gbẹgbịlẹgbẹ.
Ẹdịyẹ Ohyẹẹkpẹ-ẹkpẹ nya ỊPọlụ Kele Ka Epweji nya ỊTịrowasị
7Ịnyị, ụka ká ẹnụtụrụ ọhọhẹ nya epwihi ọlẹ kọ ri ịchọọchị pwụ eji lẹ, ahị wuu a la ọjịra-jịra nya ịkaa oriri nya ọ-họ lawụlẹ nya angịnyị nya Ohe Oluhye ịlụwa wuu lẹlẹ. Jaabwọ ká ịPọlụ juwa me irya nyọka rụrụ bwu ụwa la ahị ọpyẹpyẹ nyamwụ lẹ, ọ juwa ya ẹla nya Ohe Oluhye ju angịịwa lẹlẹ. ỊPọlụ ya ẹla nyamwụ la udiyo lụmẹ gbee ju ka alepwodu jijiji ẹnụ ọọwa. 8Ụka ọọwa, iru nya ila nya itinika lụmẹ-lụmẹ juwa ẹ-ẹpwụ nya ube-oluhye ọlẹ kahị ji, juwa la ọjịra-jịra ọọwa. 9Ụka ọọwa, onjwo okolobya ọhẹ ọlẹ kị wụrụ iYutikọsị hụhụ u-uhye nya iwindo nya ẹpwa ọhata nya ube-oluhye ọlẹ ká alọjịra-jịra ọọwa hụ. Ịnyị, une a chụ iYutikọsị lẹ, ọ juwa nune nya ịlẹhị-ịlẹhị lụka ọlẹ ká ịPọlụ juwa kpa ẹla nya Ohe Oluhye onyudiyo nyamwụ ọọwa ya wẹẹ lẹlẹ. Ịnyị, jaabwọ ká une ọọwa họ iYutikọsị diidii lụmẹ kaka kpoye lẹ, ọ chabwọ bwu uhye nya iwindo ọọwa kaka mileji lẹlẹ. Ụka kị wuloo eji lẹ, ị yẹ jaabwọ kọ gbu dẹyị-dẹyị lẹlẹ. 10Ma, ụka ká ịPọlụ hireji kele ka ẹga nya iYutikọsị lẹ, ịPọlụ a kpụ ba iYutikọsị ụ-ụwa, juwa bọ́ọ ajẹ lẹ, ọ byi angịnyị yẹkẹẹ, “Anụ chị uko kaka. Chajị, iYutikọsị jam la ọhịhị nyamwụ wẹẹ!” 11Ịnyị, ụka ká ịPọlụ rụ tịrẹkpẹ kele ka ube-oluhye ọọwa, kọ gu ịkaa ene, kị ri kpá wuu lẹ, ọ juwa ya ẹla myịmyị ta angịnyị ụ-ụwa, dọmwụ gbee pwụ ụka ọlẹ ká ẹnụ juwa kpehe la ụtụrụ lẹlẹ. Ịnyị, ịPọlụ a rụ bwu epweji nya ịTịrowasị la ụtụrụ ọọwa lẹlẹ. 12Ịnyị, ụka kị juwa tụ iYutikọsị ọọwa da rụ bwu ụwa lahị-lahị lẹ, alụwa a la ẹjẹ ọkpụ́kpụ ọtụka-ọtụka bwula ọọwa lẹlẹ.
ỊPọlụ Rụ Bwu ỊTịrowasị Kele Ka Epweji nya IMilẹtọsị
13Ụka ọọwa, ahị lẹ, ahị rụ ji ịlahị nya ịPọlụ kaka ju ụgbọ nya enyi, hu ang juwa rụ kele ka epweji nya Asọsị, ẹ-ẹga ọlẹ ká ịPọlụ tịtị ka ju ụgbọ nya enyi tahị. Chajị, ịPọlụ ayịdang nwụlanọ nyọka jẹdịyẹ la ẹta bwu epweji nya ịTịrowasị kele ka epweji nya Asọsị ọọwa ene kahị ka tọ awụlẹ ụ-ụwa. 14Ịnyị, ụka ká ịPọlụ tọhị ụ-ụwa Asọsị lẹ, ịPọlụ a baahị warị wẹ ẹpwụ nya ụgbọ nya enyi lẹ, ahị rụ kele ka epweji nya iMitilin lẹlẹ. 15Ịnyị, ụka kahị ju ụgbọ nya enyi nyahị rụ bwu iMitilin ọwẹ lẹ, ahị jẹ pwụ ọpyị nya iKiyọsị lẹlẹ. Ụka ká ahị ọọnamwụ pyẹ lẹ, ahị pwụ epweji nya iSamosi lẹ, [ahị hyehe e-epweji nya ịTịrogiliyọm lẹ,] ahị jẹ pwụ epweji nya iMilẹtọsị la ahị ọpyẹpyẹ ọkịla lẹlẹ. 16Ụka ọọwa lẹ, eje ọchịchị nya ịPọlụ ri yẹkẹẹ, ọ́ tịtọ kọ ka hireji Efesọsị kpong-kpong ka. Chajị, kọ tụtụm ka bịrị ụka ọ-ọpyị nya Echiya kpong-kpong kaka. Chajị, ọ juwa chagaga kọ ka pwụ iJerusalẹm pwoku ẹnụtụrụ nya ang oriri nya iPentikọsị pyii ó ri kọ ka chịkpẹẹ họọ myị́.
Ẹla Ọ-da Ọkpahị nya ỊPọlụ Ha Alegbeju Ịkpẹhị Rịrị Ịchọọchị nya Ala Efesọsị
17Ịnyị, ịPọlụ a du ẹrụ bwu epweji nya iMilẹtọsị kele ka epweji nya Efesọsị kaka wụrụ alegbeju ịkpẹhị rịrị ịchọọchị ịlụwa wuu kị ka wẹ ẹga nyamwụ lẹlẹ. 18Ụka ká angịịwa pwụ ẹga nya ịPọlụ lẹ, ọ byaa yẹkẹẹ, “Anụ la ịlọnụ tị́ jẹ́ ụma nya ọhịhị ọlẹ kam la ẹ-ẹpwarịrị nyanụ bwu ẹnụtụrụ nya ọgbanyẹ-ọgbanyẹ ọlẹ kam ya ẹta nyam chị ọpyị nya Echiya nyanụ. 19Anụ tị́ jẹ́ jaabwọ kaam ayịdang juwa kaa myị ẹrụ ha Ọngọlahị la ẹ-ẹpwụ nya ịlọm ọ-kpa weji wuu bala ọ-myị ẹrụ ẹ-ẹpwụ nya egbejida wuu bala ẹpwụ nya ịmayẹ la datị-datị ịlẹ kị wẹ chịm ọgụ bwula obyi onyobyi omeme jum nya ala iJuu wuu. 20Anụ tị́ jẹ́ ịnyịnyị, jaabwọ kaam ayịdang á kaa tụ ẹkpẹ-ẹkpẹ kẹkpẹ kpong-kpong ka, ẹ-ẹpwụ nya o-juwa ya ẹla ọlẹ kọ ka ju apyobwuna hanụ jenu lụka ọọwa bala am o-juwa kaa mẹ ẹla nya Ohe Oluhye jẹẹnụ ẹ-ẹpwụ nya uche bala o-juwa mẹjẹẹnụ, tụ ẹpwa-ẹpwa da ịnyịnyịịnyị. 21Ụka ọọwa lẹ, ibeenu oriri nyam dodehe ju ala iJuu wuu bala ala iJentayịlị kaa ri, chajị nya irya ọyẹda ha Ohe Oluhye bala ọmyịmyị ọlala ẹ-ẹga nya Ọngọlahị iJisọsị ịKịrayịsị. 22Ma, lẹẹlẹẹ, anụ yẹ mẹ! M jam hu ang kele ka epweji nya iJerusalẹm bwula ehile nya Olegu Ịgọgọ lẹ! Ma, ḿ tị jẹ́ ụma nya ang ọlẹ kọ ka wẹ chịm ọgụ ụ-ụwa kpong-kpong ka. 23Ang ọlẹ kam jẹ́ ụbwọọmwụ ri yẹkẹẹ, Olegu Ịgọgọ juwa kaa ri ibeenu dodehe ya jem e-epweji myị́ epweji ọlẹ kam ka, yẹkẹẹ, agba ojuju bala akama nya ang ọjụjụ ọ-ka yẹyẹ, nyị juwa godayị gbem ụ-ụwa. 24Ma, am ayịdang tị lẹ, ḿ wa ọhịhị nya ịlọm ju nya ịngịngịhyẹ kpong-kpong ka lee o-hwoo lala ang o-ju apyobwuna ha ịlọm ka ịnyịnyị. Ang ọlẹ kam tịtọ wuu ri, ọ-ka jụ ụkụrwọ nyam họ chị eju myị́ ẹ-ẹpwụ nya ẹrụ ọmyịmyị ha Ohe Oluhye ọlẹ kam ye ọngịrị nyamwụ bwu Ọngọlahị iJisọsị, chajị nyọka juwa kpa ibeenu oriri nya ẹrụ ọnyịịla nya ọgahị ọnahị nya Ohe Oluhye ọlẹ ya pyẹ je angịnyị ehe.”
25“Ma, lẹẹlẹẹ lẹ, m jẹ́ yẹkẹẹ, anụ angịlẹ wuu kaam ya ẹla nya Ohe Oluhye chajị nya ịpyị adịrahụ nyamwụ je wuu lẹ, ánụ ka myịmyị-ị̀ yẹm am ịPọlụ ẹ-ẹhị gụ ọlẹ kaka. 26Chajị nya ọọwa lẹ, m jam ya dodehe jenu nya ịlẹhị-ịlẹhị yẹkẹẹ, ó-riri ká ọngọngọhẹ lẹpwụ nyanụ aa mileji mịla hi ẹla nya Ohe Oluhye wẹwẹ tụbwọ aalẹ, ịwọ nya ọngọọwa á juwa ẹ-ẹpwụtụbwọ nyam am ịPọlụ ọlẹ kpong-kpong kaka. 27Chajị, am ayịdang á tụ ẹkpẹ-ẹkpẹ kẹkpẹ kpong-kpong ka, ẹ-ẹpwụ nya o-juwa ya obyi omeme nya Ohe Oluhye wuu jaabwọ kọ la kaka ba jenu hweng-hweng jịra. 28Chajị nya ọọwa lẹ, anụ́-ụ juwa kpahị ju ịlọnụ yẹẹyẹẹ, kanụ juwa kpahị ju anyị ịkpịlọ nya Ohe Oluhye ịlẹ ká Olegu Ịgọgọ huunu alegbeju ịkpẹhị rịrị nyaa yẹẹyẹẹ ịnyịnyị mẹ. Kanụ juwa kpahị ju ịchọọchị nya Ohe Oluhye ọlẹ ká Ohe Oluhye kpa ịwọ nya Ọnyẹwẹ nyamwụ ra ihi nyamwụ ịnyịnyị yẹẹyẹẹ mẹ. 29M jẹ́ yẹkẹẹ, ụka ọlẹ kaam ịPọlụ á rụ kpá bwu ẹga nyanụ lẹ aalẹ, angị inyibyi ịbịrị ang, ịhyẹ, a ka warị wẹ ẹpwarịrị nyanụ ka juwa nyiinu epepe, jaabwọ ká ijwo kaa nyi ịkpịlọ epepe lẹlẹ. 30Angịhyẹ dọmwụ ka juwa ẹ-ẹpwarịrị nyanụ anụ ayịdang, ịlẹ kị ka mwọọgịlẹ juwa wuleji, juwa ya ala ị-pyị anyoko dodehe, chajị kị ka juwa gbile angịhyẹ ba ịlaa rụ hi ẹla nya ịlẹhị nya Ohe Oluhye ọlẹ. 31Chajị nya ọọwa lẹ, ánụ-ụ cheri kanụ juwa gbeji giri-giri mẹ. Kanụ juwa kpịtịya ịnyịnyị, jaabwọ kaam ayịdang á kaa mwụ ịnyọ kpong-kpong ka, lodu bala alẹnụ ẹ-ẹpwụ nya o-juwa kpa ẹla nya Ohe Oluhye oyaya gbile ọng myị́ ọng lẹpwarịrị nyanụ ụbwọ ụ-ụrụ nya ịlẹhị-ịlẹhị la ugbejida ẹ-ẹhị ẹ-ẹpwụ nya ẹka ịta gbẹgbịlẹgbẹ ịnyịnyị mẹ.”
32“Ma ọlẹẹlẹẹ lẹ, m jam huunu wuu ju Ohe Oluhye ayịdang ụ-ụbwọ bala ọngịrị nya ẹrụ ọnyịịla nya ọnahị nyamwụ ịnyịnyị lẹ. Chajị, ẹrụ ọnyịịla ọọwa la ọngịrị nyọka kpanụ wule ẹ-ẹpwụ nya ọngịnyị nya Ohe Oluhye oriri nyanụ ọwẹ myị́. Bala ọ-ka kpanụ kaka la ugu nya ahị ọwawa nya Ohe Oluhye ta angịkịla ịlẹ wuu kị ri angịlẹ ká Ohe Oluhye hwáa cheri-cheri ha ịlọmwụ lẹ.”
33“Anụ wo mẹ! Am ịPọlụ ọlẹ lẹ, ḿ chẹhị nyanya nya okpoko onyoowuru lee okpoko ịgọm ka lee ang ịkụrụ-kụrụ nya ọngọngọhẹ nyanụ kpong-kpong lụka kam juwa tanụ ka. 34Chajị, anụ la ịlọnụ ri ibeenu nyam jẹ́ yẹkẹẹ, abwọ nyam am ịPọlụ ọlẹ, am nyaa kpa họ ụkụrwọ la ịlọm, du kam nyị kaa ye ang ọ-kpa họ ọbaba nyam am ayịdang bala ọbaba nya alogu ẹdịyẹ nyam wuu ị-ịnyanụ lụka ọọwa, lẹ. 35Chajị, am ayịdang mẹjẹẹnụ ẹ-ẹpwụ nya ang myị́ ang wuu yẹkẹẹ, o-bwula ụkụrwọ ọhọhọ nya ịlẹhị-ịlẹhị ọlịnyị pyii, ahị ka jẹ́-ẹ ye ang ọlẹ kahị ka juwa kpa da angịlẹ kị la dẹwụ dẹwụ-ụbwọ myị́ lẹlẹ. Chajị, anụ tị́ kpịtịya nya ẹla ọlẹ ká Ọngọlahị iJisọsị ya lẹẹ yẹkẹẹ, ‘Ahị ọwawa ka juwa ha angịlẹ kị juwa hu ha, gụ angịlẹ kị juwa yeye kem.’ ”
36Ịnyị, ụka ká ịPọlụ ya ẹla nyamwụ ọọwa kpá chị eju lẹ, ọ ya ụrụụ nyamwụ kụ eji lẹ, ọ raabwọ ụ-ụwa bala ịwa wuu lẹlẹ. 37Ọọwa lẹ, ịwa wuu a juwa jida ju ịPọlụ bala o-juwa woo bajẹ, juwa jwoo ọnụ ịnyịnyị lẹlẹ. 38Ịnyị, ịwa wuu a juwa bwọ ayiiji lẹlẹ. Ọgụgụ wuu ri, chajị nyọlẹ ká ịPọlụ byaa yẹkẹẹ, anụ nyị́ ka ya ẹhị nyanụ gu ọwa myịmyị gụ ọọwa kaka. Ọọwa lẹ, ịwa wuu a kpa ịPọlụ chị pwụ ẹga ọlẹ kọ ka ju ụgbọ nya enyi nyamwụ lẹlẹ.
Atualmente selecionado:
ỤKỤRWỌ nya ALẸRỤ 20: IBNO
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Igede Bible © The Bible Society of Nigeria, 2019.