ỤKỤRWỌ nya ALẸRỤ 21
21
ỊPọlụ Rụ Kele Ka Epweji nya IJerusalẹm
1Ịnyị, ụka kahị rụ hi alegbeju ịkpẹhị rịrị ịchọọchị nya Efesọsị ịịwa kpá lẹ, ahị ju ụgbọ nya enyi rụ kpụrụrụ kele kaka ju ka ịpyị nya ala iKosi lẹlẹ. Ụka ká ahị pyẹ lẹ, ahị myịmyị ju ụgbọ nya enyi rụ kele ka epweji nya iRoodisi lẹ, ahị myịmyị bwu ụwa rụ ka epweji nya ịPatara lẹlẹ. 2Ụka kahị yẹ ụgbọ nya enyi ọlẹ kọ juwa jẹ kele ka ọpyị nya iFonichiya lẹ, ahị ju ụgbọ ọọwa rụ lẹlẹ. 3Ụka ká ụgbọ nyahị kpahị jẹ gbee kahị juwa kpẹhị yẹ epweji nya ịSayịpịrọsị lẹ, ụgbọ nya enyi ọọwa, a kpahị yẹ ịSayịpịrọsị beji koye ụpụpịla nyahị lẹ, ahị jẹ gbee kahị pwụ ịpyị nya ala iSiriya lẹlẹ. Ịnyị, ụgbọ nya enyi nyahị a wu godayị rịrị e-epweji nya ịTaya lẹlẹ. Chajị, ị tịtọ kị ka gba olo nya ụgbọ nya enyi ọọwa ịhyẹ gu eji ụ-ụwa. 4Ịnyị, ụka kahị tịtọ nya angịnyị nya Ohe Oluhye ilepweji nya ịTaya, gbee kahị yaa lẹ, ahị hụwa ị-ịTaya lala ẹnụtụrụ irwiye lẹlẹ. Angịịwa byi ịPọlụ bwula ọngịrị nya Olegu Ịgọgọ yẹkẹẹ, ahụ nyị kele ka epweji nya iJerusalẹm kpong-kpong kaka. 5Ịnyị, ụka ká ẹnụtụrụ irwiye ịịwa chịpwụrụ kpá lẹ, ahị rụ hyaa bwu ụwa, juwa jẹdịyẹ nyahị kịlahị-ịlahị lẹlẹ. Ịnyị lẹ, angịnyị nya Ohe Oluhye ịịwa wuu bala ịhụ nyaa bala anyị nyaa, a kpahị chị gbee kahị pwụ ugumẹ ẹpwa nya epweji nyaa lẹlẹ. Ụka kaahị wuu ya arụụ nyahị kụ eji ọ-ọnụụka nya ihu ọtụka ọlụwa lẹ, ahị raabwọ ha Ohe Oluhye wuu lẹ, ahị da awụlẹ ọkpahị ụ-ụwa lẹlẹ. 6Ịnyị, ụka kahị rụ kaka ju ụgbọ nya enyi lẹ, angịịwa a tịtị rụ tịrẹkpẹ ka ẹpwa nyaa lẹlẹ.
7Ụka kahị yegiri bwu epweji nya ịTaya lẹ, ahị jẹ ịnyịnyịịnyị gbee kahị pwụ epweji nya iTolimayịsị lẹ, ahị kele kaka da ọnụ chị anyadahị ẹ-ẹpwụ nya ịKịrayịsị ịlụwa lẹ, ahị hyehe taa ụ-ụwa ụtụrụ ookpokpo lẹlẹ. 8Ụka ká ahị ọọnamwụ pyẹ lẹ, ahị yegiri bwu ụwa rụ kele ka epweji nya iSisarịya lẹlẹ. Ịnyị, ahị kele ka ẹpwa nya ọlẹng ọhẹ ọlẹ kị wụrụ iFilipu, kọ ri ọngọ kaa họ ụkụrwọ nya o-juwa ga ya ẹrụ ọnyịịla nya Ohe Oluhye pyẹ tụ ẹga myị́ ẹga da lẹlẹ. IFilipu ọọwa ri ọngọhẹ ẹ-ẹpwụ nya angịnyị angị irwiye ịlẹ ká alẹrụ ọnyịịla chụ e-epweji nya iJerusalẹm nya alegbeju ịkpẹhị rịrị ang, ẹ-ẹpwụ nya ịchọọchị. 9IFilipu ọọwa ma anyị anyang ine ịhyẹ ịlẹ kị rwọ ọrụ ẹnẹnẹhẹ lẹka, kị ri angịlẹ kị kaa yẹ ọmwụ dodehe la ẹnyị nya Ohe Oluhye. 10Ịnyị, lụka ọlẹ kahị hụwa ụtụrụ lụmẹ-lụmẹ lẹ, ọlẹng ọhẹ ọlẹ kị wụrụ Agabọsị, kọ ri ọngọ kpa ẹnyị nya Ohe Oluhye yẹ ọmwụ dodehe, a warị bwu epweji nya iJudiya lẹlẹ. 11Ụka ká Agabọsị ọọwa warị wẹ ẹga nyahị lẹ, ọ kele kaka hu ugba ọchọhị nya ịPọlụ lẹ, ọ ya chị ịlọmwụ a-ata bala abwọ bawụlẹ lẹ, ọ yẹkẹẹ, “Anụ wo mẹ! Olegu Ịgọgọ yẹkẹẹ, ‘Ịịlẹ, ala iJuu ịla iJerusalẹm a ka wu ọngọlẹ kọ la ugba ọchọhị ọlẹ lẹ, ị ka chọọ ori, hu ọngọọwa ju ala iJentayịlị ụ-ụbwọ lẹlẹ.’ ”
12Ịnyị, ụka kahị wo ẹla ọọwa lẹ, ahị bala angịlẹ kị juwa ụ-ụwa, a bịlẹ ịPọlụ yẹkẹẹ, ọ hịnyọ la o-kele ka iJerusalẹm mẹ lẹlẹ. 13Ọọwa lẹ, ịPọlụ a wẹ yẹkẹẹ, “Ịịyẹ a tị́ du kanụ juwa jida bala o-juwa tịtọ nyọka kpụm ọkịlẹtụ enyi ịnyị kpong-kpong? Anụ wo mẹ! Aalẹ, am ịPọlụ ọlẹ, ḿ nwụlanọ ba aakama nya ori ọ-chịm chị kem i-iJerusalẹm ka! Ma, m nwụlanọ pwụ igu ọ-ka gbugbu u-uhye nya ẹnyị nya Ọngọlahị iJisọsị ịnyịnyị kpịlọ.”
14Ịnyị, ụka ká ịPọlụ á myị ju ẹla nyahị ọọwa kpong-kpong kaka lẹ, ahị hu abwọ hi ịPọlụ lẹ, ahị juwa yẹkẹẹ, “Aalẹ, ang ọlẹ kọ ri irya nya Ọngọlahị la lẹ, ang ọọwa a họ u-uhye nyang mẹ.”
15Ụka ká ẹnụtụrụ ịịwa chịpwụrụ, kahị nwụlanọ kpá lẹ, ahị hu ang rụ kele ka epweji nya iJerusalẹm lẹlẹ. 16Angịnyị nya Ohe Oluhye ilepweji nya iSisarịya ịhyẹ baahị rụ ụka ọọwa ịnyịnyị. Ịnyị, ị kpahị kele ka ẹpwa nya ọlẹng ọhẹ ọlẹ kị wụrụ ịManasịn e-epweji nya ịSayịpịrọsị lẹlẹ. ỊManasịn ọwẹ a ri ọngọhẹ lẹpwụ nya angịnyị nya ọgbanyẹ-ọgbanyẹ ịlẹ kị ri angịnyị nya Ohe Oluhye ụ-ụwa lẹ. Ẹ-ẹpwa nyamwụ, ahị ju ụga lẹ.
ỊPọlụ Kele Ka Ẹga nya IJemsi
17Ụka kahị pwụ epweji nya iJerusalẹm lẹ, anyadahị ẹ-ẹpwụ nya ịKịrayịsị ịlụwa yehi hiigu-hiigu lụmẹ. 18Ịnyị, ụka ká ahị ọọnamwụ pyẹ lẹ, ịPọlụ bala ahị, a kele kaka yẹ iJemsi lẹlẹ. Alegbeju ịgbahị nya ịchọọchị angị ịkịla wuu juwa tọọ ụka ọọwa ịnyịnyị. 19Ụka kahị da ọnụ chaa kpá lẹ, ịPọlụ a juwa tịrọnụ nya ẹchẹ nya ang ọnyị myị ọnyị ọlẹ wuu ká Ohe Oluhye họ ẹ-ẹpwarịrị nya ala iJentayịlị bwula ẹrụ ọnyịịla o-ya pyẹ nya ịPọlụ lẹlẹ.
20Ụka ká alụwa wo ọnụ-ẹla ọtịrị-tịrị nya ịPọlụ kpá lẹ, ịwa wuu, a juwa gwogbo ha Ohe Oluhye, juwa byi ịPọlụ yẹkẹẹ, “ỊPọlụ ọnyadahị ee, wo mẹ! Iru nya ala iJuu lụmẹ-lụmẹ jam, ịlẹ kị ri angị myị la Ohe Oluhye. Ma, ị tị ri angị hu ọhịhị nyaa lẹpwụ-lẹpwụ wuu, juwa kpa dịrẹ ehile nya iMosisi pyịyọọ wẹẹ! 21Ịwa wuu tị wo oja chajị nyang ahụ ịPọlụ yẹkẹẹ, ahụ nyị juwa kaa mẹ ang jẹ ala iJuu ịlẹ kị kụ ẹ-ẹpwụ nya ala iJentayịlị wuu yẹkẹẹ, nyị tụụbwọ hi ehile nya iMosisi beji wuu mẹ. Chajị, ahụ nyị kaa byaa yẹkẹẹ, nyị da anyị alẹng nyaa ụwụwụ kpong-kpong kaka lee o-juwa ba abwẹla ọhọhọ nya adịda igogo nyahị ahị ala iJuu ọhẹ-lọhẹ jẹ kpong-kpong kaka ịnyịnyị. 22Lẹ, angịịwa á tị ka dayi la o-wo oja yẹkẹẹ, ahụ nyị pwụ eji warị lẹ, kaka lẹ, anyanyị, ahị tị́ ka họ kpá lẹẹ mẹ, ịPọlụ? 23Chajị nya ọọwa lẹ, aa wo ẹla oyaya nyahị ọlẹ ká kpa họ ụkụrwọ mẹ. Ahị la angị ine ịhyẹ jam, ịlẹ kị nwa iro la ẹnyị nya Ohe Oluhye. 24Lẹ, ịPọlụ, kam ká kele, kaahụ bala angịịwa a họ ehile nya ocheri-cheri ọlala jịra jaabwọ ká ehile nya iMosisi ya mẹ. Ká nwụ uri wọnụ nya angịịwa ju, chajị kị ka jẹ́-ẹ pwọ inyi nyaa wuu hi ẹtẹtẹ, jaabwọ ká ehile ya mẹ. Chajị ká ụka ká họ ịnyị wuu lẹ, ká angịnyị wuu ka jẹ́ yẹkẹẹ, ala ịlẹ wuu kị lẹẹ kpa kaka ya jaa rụ́ng ahụ ịPọlụ lẹ, nyị́ ri nya ịlẹhị kaka mẹ. Ma, kị ka jẹ́ yẹkẹẹ, ahụ ayịdang la ịlọng nyị juwa kpa ehile nya iMosisi họ ụkụrwọ ịnyịnyị kpịlọ mẹ. 25Ma, ẹ-ẹga nya ala iJentayịlị ịlẹ kị myị la Ohe Oluhye tị lẹ, ahị da ileta du ẹrụ kele kaka ya jaa, ang ọlẹ ká obyi omeme nyahị ri u-uhye nya ang ọlẹ kọ chịla kị ka họ pyii lẹ. Ahị yẹkẹẹ, ọ chịla kị ka cheji ba iyo nya ojiga oriri bala ọ-ka cheji ba ịwọ nya iyo oriri bala ọ-ka cheji ba o-ri iyo ọlẹ kị pyị imyi ịnyịnyị bala ọ-ka cheji ba ụya ọhọhọ wuu.”
26Ịnyị, ịPọlụ a kpa angịnyị angị ine ịịwa ba ịlọmwụ kele juwa họ ọhọhọ nya ocheri-cheri ọlala wuu jịra bala ịwa lẹlẹ. ỊPọlụ kele ka ube ịgọgọ ọtụka nya Ohe Oluhye nya ala iJuu kaka ya je alegbeju ịlụwa chajị ká ụka ká ẹnụtụrụ nya ọhọhọ nya ehile nya ocheri-cheri ọlala ọọwa á họ jịra kpá lẹ, kị ka jẹ́-ẹ kpa ọhaha nya iya ọkịlaakịla wọnụ nya ọngọngọọng nyaa ju kele, jaabwọ ká odo ọhọhọ nya ehile nyaa ọọwa kaa la lẹlẹ.
Ị Wu ỊPọlụ U-ube Ịgọgọ Ọtụka nya Ohe Oluhye nya Ala IJuu
27Ịnyị, ụka ọlẹ kọ hi pịnyẹ ká ẹnụtụrụ irwiye nya ahụrụ nya ịPọlụ anyị juwa ka họ jịra lẹ, ala iJuu ịhyẹ ịlẹ kị bwu ọpyị nya Echiya kele ka iJerusalẹm, a yẹ ịPọlụ u-ube ịgọgọ ọtụka ọọwa lẹlẹ. Ịnyị, ala iJuu i-bwu ọpyị nya Echiya ịịwa a kele kaka du iru nya angịnyị ịlụwa ju tụ ịPọlụ pyịpyị, du kị kele kaka wu ịPọlụ ụ-ụwa pyẹẹ lẹlẹ. 28Ịnyị, ị juwa ya ẹla dodehe gboo yẹkẹẹ, “Anụ ala Isirẹlụ wuu, anụ kẹwẹ kaka dahị ụbwọ mẹ! Ọlẹng ọlẹ a ri ọngọlẹ kọ kaa juwa ga tụ ẹga myị́ ẹga da, juwa mẹ ang jẹ angịnyị tụ ehile nya iMosisi pyịpyị lalala ju wẹ ẹgẹlẹ lẹ. Ọgụgụ wuu ri yẹkẹẹ, ọ myịmyị kpa ala iJentayịlị jụ warị wẹ ube ịgọgọ ọtụka ọlẹ kaka bịrị ịgọgọ ọlala nya ẹga ọlịgọgọ ọlẹ lẹ.” 29Angịịwa ya ịnyị, chajị jaabwọ ká angịịwa yẹ ọlẹng ọlẹ kị wụrụ iTirofimọsị, ọlẹ kọ ri ala Efesọsị kọọwa bala ịPọlụ juwa bajẹ e-epweji nya iJerusalẹm lẹ, ị me irya yẹkẹẹ, ịPọlụ nyaa ri ọngọ kpa ọlẹng ọọwa kele ka ẹpwụ nya ube ịgọgọ ọtụka nya Ohe Oluhye nyịwa lẹ.
30Ịnyị, ụka ká oja nya ojigi-jigi ọọwa pwụ ụrụ nya alepweji nya iJerusalẹm wuu lẹ, ịwa wuu a kele kaka jịra ẹ-ẹga ookpokpo lẹlẹ. Ịnyị, ị kele kaka wu ịPọlụ lẹ, ị gbiloo kpehe hi ube ịgọgọ ọtụka nya Ohe Oluhye ọọwa lẹ, ị tụ agbayị ịlụwa wuu ku kpọng-kpọng lẹlẹ. 31Ịnyị, ụka ká angịịwa juwa maga nyọka nwụ ịPọlụ nwụ ụ-ụwa lẹ, angịhyẹ a kpa oja nya ọhọhọ nya angịịwa kele kaka ya je olegbeju ọgbahị ọgụgụ nya angịdẹwụ nya ala iRom yẹkẹẹ, ojigi-jigi ọtụka-ọtụka nyị kpeji i-iJerusalẹm lẹ! 32Ịnyị, olegbeju ọgbahị nya ịsọja ọọwa a chụ alegbeju ịkpẹhị rịrị ịsọja ohu ịrụ ịhyẹ bala ịsọja ịlam-ịlam kị ka rụnyẹ kele ka ẹga nya iru nya angịnyị ịịwa lẹlẹ. Ụka ká iru nya angịnyị ịịwa yẹ ịsọja ịwẹ lẹ, ị hu abwọ la enyiri o-nyi ịPọlụ nyi lẹlẹ. 33Ịnyị, ụka ká olegbeju ọgbahị nya ịsọja ọọwa pwụ ụwa lẹ, ọ wu ịPọlụ lẹ, ọ ya, nyị go agba imimiiye kịị nyị ya da ju ịPọlụ kịrang mẹ lẹlẹ. Ịnyị lẹ, olegbeju ọọwa-à tọ iru nya angịnyị ịịwa ịtọ nya ọngọlẹ ká ịPọlụ ri bala ụma nya ang ọlẹ ká ịPọlụ họ ịnyịnyị lẹlẹ. 34Ụka ọọwa, iru nya angịnyị ịịwa lẹ, angịhyẹ nyaa á juwa ya ẹlẹhẹ, angịkịla nyaa juwa ya ụma nya ẹla ọkịla gbee ká olegbeju nya ịsọja ọọwa á jẹ́ egbeju nya ẹlẹlẹhẹ kpong-kpong kaka ọọ-la ojigi-jigi ọọwa. Ịnyị lẹ, ọ ya, nyị tị tị kpa ịPọlụ kịnyaa kele ka ọbarike nyaa ịwa ịsọja mẹ lẹlẹ. 35Ụka ká ịsọja ịịwa kpa ịPọlụ jẹ pwụ opwokpuru nya ube ịgọgọ ọọwa lẹ, ị hu ịPọlụ kpa u-uhye hi iru nya angịnyị ịịwa chajị nyọlẹ ká agbama nyaa juwa wuru lụmẹ-lụmẹ jahị da ịPọlụ lẹlẹ. 36Chajị, iru nya angịnyị ịịwa juwa ba ịsọja ịịwa jẹ ẹ-ẹkpẹ-ẹkpẹ juwa ya dodehe gboo yẹkẹẹ, “Anụ nwụ ịPọlụ ọwẹ mẹ pyii! Anụ nwụ ịPọlụ ọwẹ mẹ pyii!” ịnyịnyịịnyị.
ỊPọlụ Tịrị Ọnụ Ẹla nya Ịlọmwụ
37Ịnyị, ụka kị juwa ka kpa ịPọlụ kele ka ọbarike nya ịsọja ịịwa lẹ, ịPọlụ a byi olegbeju ọgbahị nya ịsọja ọọwa yẹkẹẹ, “M ya ẹla tang chẹẹ mẹ?” Ịnyị, olegbejwọọwa a byi ịPọlụ yẹkẹẹ, “A wo oja nya ala iGiriki?”
38Olegbejwọọwa myịmyị byi ịPọlụ yẹkẹẹ, “O ri aahụ a mịla ri ọla Ijipiti ọlẹ kọ wuleji, juwa jahị da Adịrahụ nya ọpyị ọlẹ bala ọ-kpa angịnyị angị ụnọ iwo chiriri ba ịlọmwụ rụ kele ka ugbileji ka?”
39ỊPọlụ wẹ byoo yẹkẹẹ, “Eheehe! Ám ịPọlụ ọlẹ koo! Am ri ala iJuu ọlẹ kị ma e-epweji ọhẹ ọlẹ kị wụrụ ịTaasọsị ụ-ụwa ọ-ọpyị nya iSilisiya. Aḿ ri ọnyị oleji nya epweji ochiche kpong-kpong ka. Ọbịlẹ bịlẹ nyam ri yẹkẹẹ, aa chuchuu ká ya ẹga da ham kam ya ẹla ta iru nya angịnyị ịwẹ chẹẹ mẹ!”
40Ịnyị, ụka ká olegbeju ọgbahị nya ịsọja ọọwa ya ẹga ha ịPọlụ lẹ, ịPọlụ a wuleji godayị kọkọ ụ-ụwa ọ-ọnụụkpa nya ẹpwang ọọwa, juwa kpa abwabwọ nyi angịnyị bebebe kị ka ba la ọmọnyọ lẹlẹ. Ịnyị, ụka kịịwa wuu ba chịng lẹ, ịPọlụ a juwa kpa oja nya ala iHiburu ya ẹla taa ịwa wuu yẹkẹẹ.
Atualmente selecionado:
ỤKỤRWỌ nya ALẸRỤ 21: IBNO
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Igede Bible © The Bible Society of Nigeria, 2019.