ỤKỤRWỌ nya ALẸRỤ 19
19
ỊPọlụ E-epweji nya Efesọsị
1Ụka ká Apolosi juwa e-epweji nya ịKọrịntị wẹẹ, ịPọlụ jẹdịyẹ nyamwụ chịpwụrụ bwu oye oluhye nya ọpyị nya ala ịKọrịntị ịnyịnyịịnyị gbee kọ pwụ epweji nya Efesọsị. Ịnyị, ịPọlụ a yẹ angịjụgbẹyị nya iJisọsị ịhyẹ Efesọsị lẹlẹ. 2Ọọwa lẹ, ịPọlụ a tọ angịịwa ịtọ yẹkẹẹ, “Anụ ye Olegu Ịgọgọ nya Ohe Oluhye lụka ọlẹ kanụ myị la iJisọsị lẹ?” Ị wẹ byoo yẹkẹẹ, “Eheehe! Ahị́ dọmwụ wo ẹnyị nya Olegu Ịgọgọ nya Ohe Oluhye ọwẹ ká wẹẹ ya ẹla rụ́ ẹnẹnẹhẹ lẹka!”
3ỊPọlụ myịmyị taa wo yẹkẹẹ, “Ụma nya enyi Ohe ọlanyị, anụ tị́ tị tị hụ?” Ị wẹ byoo yẹkẹẹ, “Enyi Ohe nya ịJọn ọngọ hụ angịnyị enyi Ohe, ịnyị!”
4ỊPọlụ wẹ byaa yẹkẹẹ, “Enyi Ohe ọhụhụ nya ịJọn ọwẹ lẹ, enyi Ohe ọhụhụ chajị nya irya ọyẹda kem ịnyị! Chajị, ịJọn ọọwa juwa kaa ya ẹla nya Ohe Oluhye je angịnyị yẹkẹẹ, anụ nyị juwa nwụlanọ kaanụ nyị ka myị la ọngọ ọkịla ọlẹ kịị nyị wẹẹ ka warị ẹ-ẹkpẹ nya ọọwa mẹ. Ọlẹng ọlẹ kị wụrụ iJisọsị a tị ri ọngọọwa kpangga lẹlẹ.”
5Ụka ká angịịwa wo ẹla oyaya nya ịPọlụ, kị myị lẹ, ị hwaa enyi Ohe la ẹnyị nya Ọngọlahị iJisọsị lẹlẹ. 6Ịnyị, ụka ká ịPọlụ yụbwọ nyamwụ nịraa ẹ-ẹpwụ nya abwọ ọrịrị ha Ohe Oluhye lẹ, Olegu Ịgọgọ nya Ohe Oluhye a chị kụrụ angịịwa lẹ, ị juwa ya ẹla la ija ịkịla bala o-juwa yẹ ọmwụ dodehe la ẹnyị nya Ohe Oluhye lẹlẹ. 7Iru ojuju nya angịịwa la angịnyị angị iwo kụrụ imiiye.
8ỊPọlụ hụ e-epweji nya Efesọsị ọwẹ lala ịya ịta gbẹgbịlẹgbẹ. Ọ juwa kaa kele ka ube ọ-mẹ ẹla nya Ohe Oluhye jẹ nya ala iJuu ọlụwa ịnyịnyịịnyị, juwa kaa kpa Ụpwụ Ịgọgọ da ẹla oyaya nyamwụ wụlẹ la ọngịrị-ọngịrị chajị nya ịpyị Adịrahụ nya Ohe Oluhye je angịlẹ kị juwa da ịwẹẹ tọọ ụ-ụwa. 9Ụka ọọwa, angịhyẹ lẹpwarịrị nyaa juwa la egbeju-ọngịrị bala o-juwa la ọmyịmyị ka, du kị juwa ya ala inyibyi ị-ịlahị nya aluche wuu rụ́ ang chajị nya ụgbẹyị nya ọngịnyị nya Ohe Oluhye oriri ọlẹ ká ịPọlụ juwa ya ẹla jaa chajị nyamwụ. Ịnyị, ịPọlụ a chị ịlọmwụ ebwo hi ẹpwụ nya alogu ọọwa lẹ, ọ gba angịlẹ kị ri angịjụgbẹyị nya Ọngọlahị iJisọsị nya ịlẹhị-ịlẹhị kpehe ba ịlọmwụ kele ka ube ọtụka nya ọlẹng ọhẹ ọlẹ kị wụrụ iTiranọsị lẹlẹ. Ọọwa lẹ, ịPọlụ a juwa kpa Ụpwụ Ịgọgọ da ẹla oyaya nyamwụ wụlẹ je angịlẹ kị juwa da ịwẹẹ tọọ ụ-ụwa ẹnẹnẹẹnụ lẹlẹ. 10ỊPọlụ hụ Efesọsị, juwa họ ụkụrwọ nya ẹla nya Ohe Oluhye oyaya ju angịnyị ịlụwa ịnyịnyịịnyị ẹ-ẹpwụ nya ẹka imiiye gbẹgbịlẹgbẹ. Ọọwa lẹ, angịlẹ wuu kị kụ ọpyị nya Echiya, a wo ẹla nya Ohe Oluhye chajị nya Ọngọlahị iJisọsị tụ ala iJuu bala ala iJentayịlị wuu lẹlẹ.
Anyị nya ISikeva
11Ịnyị, Ohe Oluhye a juwa họ iru nya ụkụrwọ ịlẹbyẹbyị nya ịlẹhị-ịlẹhị la datị-datị bwu ẹpwụtụbwọ nya ịPọlụ lẹlẹ. 12Ịnyị lẹ, angịnyị a juwa kele kaka ye anyị-ịpwụ nya ịPọlụ bala ịwụrụ ịchakịlawa nyamwụ, juwa kpa kaka họ alẹdụrụ uda lẹ, ẹdụrụ myị́ ẹdụrụ nyaa wuu a juwa myị hyaa ịnyịlẹhị bala alegu inyibyi o-juwa gba kpehe hi angịịwa jaabwọ ká ọngịrị nya ụkụrwọ ẹbyẹbyị ọhọhọ ọọwa lụmẹ ẹ-ẹga nya ịPọlụ lẹlẹ.
13Ọọwa lẹ, ala iJuu ịhyẹ ịlẹ kị juwa kaa ga tụ ẹga myị́ ẹga da, juwa ku alegu inyibyi dodehe ịnyịnyịịnyị, a chị eje ẹ-ẹpwụ nya irya nyaa yẹkẹẹ, ịwa nyị ka kpa ẹnyị nya Ọngọlahị iJisọsị ku alegu inyibyi dodehe lẹlẹ. Ọọwa lẹ, ị yẹkẹẹ, “Ahụ olegu onyobyi ọwẹ, ahị dang ehile, ká ka gba kpehe bwula ẹnyị nya iJisọsị ọlẹ ká ịPọlụ kaa ya ẹla nya Ohe Oluhye rụ́.” 14Angịlẹ kị họ ẹla ọọwa ri anyị alẹng irwiye nya ala iJuu ọhẹ kị wụrụ ẹnyị nyamwụ iSikeva, kọ ri olegbeju ọgbahị nya angịkiliya nya Ohe Oluhye.
15Ma, olegu onyobyi ọọwa ya ẹla ta anyị nya iSikeva ịịwa yẹkẹẹ, “Am jẹ́ ọngọlẹ ká iJisọsị ọọwa ayịdang ri. M tị jẹ́ ọngọlẹ ká ịPọlụ ri ịnyịnyị. Ma, anụ lẹ, o-owo, anyị, anụ tị́ ri kpong-kpong ene?”
16Ịnyị lẹ, ọlẹng ọọwa ọlẹ ká olegu onyobyi wu, a kele kaka gba mịla anyị alẹng irwiye nya iSikeva ịịwa lẹ, ọ juwa nyaa nya ịlẹhị-ịlẹhị lẹlẹ. Ọọwa lẹ, ọngịrị nyamwụ a lụmẹ gụ ịnyaa lẹ, ọ kụrwaa ịwa wuu chẹẹchẹẹ, juwa baa igo lẹ, ị juwa rụnyẹ rụ bwu ube ọọwa lọhị lọhị hyoo lẹlẹ. 17Ịnyị lẹ, ẹla ọọwa a ru ohi ju ka ụrụ nya angịlẹ wuu kị kụ epweji nya Efesọsị, tụ ala iJuu wuu bala ala iJentayịlị ịlụwa lẹ, uhi ọtụka-ọtụka a juwa jwaa ịwa wuu lẹlẹ. Ịnyị lẹ, ị juwa gwogbo ha ẹnyị nya Ọngọlahị iJisọsị nya ịlẹhị-ịlẹhị lẹlẹ. 18Iru nya angịnyị ịlẹ kị myị la Ohe Oluhye ụ-ụwa kele, juwa ya ịhọbịrị nyaa wuu bala ang myị́ ang inyibyi ịlẹ kị họ ene-ene wuu dodehe ị-ịlahị nya uche nya angịnyị wuu. 19Angịhyẹ ịlẹ kị ri angị kaa mwụ ịnwa bwu ẹpwarịrị nyaa ene-ene, kele kaka go apwụ ịwawa chajị nya ịnwa ọmwụmwụ nyaa ịịwa kpa kaka tụguru lẹ, ị jwaa ila hụrụ ị-ịlahị nya aluche lẹlẹ. Ụka kị wa okpoko ọlẹ ká apwụ ịịwa ka kpụ myị́ wuu lẹ, okpoko ọọwa la ọnụ nya akpa ụnọ ohu ịrwọnyẹ da ụnọ ịrụ da akpa ohu ịrụ nya okpoko onyoowuru myị́. 20Ịnyị lẹ, ẹla nya Ọngọlahị la a bwula ọọwa juwa nwa kele kịlahị-ịlahị la ọngịrị-ọngịrị ịnyịnyịịnyị lẹlẹ.
Ọjụgba-jụgba Ọlẹ Kọ Kpeji E-epweji nya Efesọsị
21Ụka ká ala ịwẹ chịpwụrụ kpá lẹ, ịPọlụ a chị eje ẹ-ẹpwụ nya olegu nyamwụ yẹkẹẹ, ọwa nyị ka chịpwụrụ bwu ọpyị nya ala ịMẹsịdoniya bala ala Akaya, kọọwa nyị ka jẹ kele ka iJerusalẹm pyii lẹlẹ. Chajị, ọ yẹkẹẹ, “Ụka kam jẹ pwụ ẹga ọlaanyị kpá wuu lẹ aalẹ, ḿ ka dayi la ọ-pwụ ọpyị nya ala iRom pwụ pyii kaka.” 22Ịnyị, ụka ká ịPọlụ du angị dọọ ụbwọ imiiye ịhyẹ ịlẹ kị ri iTimoti bala Ẹrasịtọsị ẹrụ kele ka ọpyị nya ịMẹsịdoniya kpá lẹ, ọwa ayịdang a hi hụwa ọ-ọpyị nya Echiya lụka o-kpii lẹlẹ.
23Ụka ọọwa kpangga, a ri ụka ọlẹ ká ojigi-jigi ọtụka-ọtụka kpeji Efesọsị o-oluhye nya ẹrụ ọnyịịla chajị nya ụgbẹyị nya ọhịhị onyeewe nya Ọngọlahị iJisọsị lẹlẹ. 24Chajị, ọlẹng ọhẹ ọlẹ kị wụrụ iDemitiriyọsị kọ ri ọngọ kaa hya ụwa nya okpoko onyoowuru juwa ụ-ụwa. Ọ kaa kpa okpoko onyoowuru me ekpeku nya ojiga ọtụka nya alụwa ọlẹ kị wụrụ ịDayana lee Aatemisi. Ụkụrwọ nya ekpeku nya okpoko onyoowuru ọhyahya nya iDemitiriyọsị ọọwa kaa kpa apyobwuna ọtụka-ọtụka kịla angịlẹ wuu kị ri alụna nya epweji nya Efesọsị lụmẹ kaka kpoye. 25Ịnyị, ụka ká iDemitiriyọsị ọọwa be ẹkọ wụrụ alụkụrwọ nya ụwa ọhyahya ịlẹ kị kaa me ekpeku ịlịnyịnyị kaka jịra wuu lẹ, ọ byaa yẹkẹẹ, “Anụ wo mẹ, anụ tị́ jẹ́ ká ụkụrwọ nya ekpeku omeme nyahị ọlẹ jam tụ ụdụ hahị lụmẹ lẹ. 26Anụ ayịdang tị wẹẹ kpẹhị nya ịlọnụ yẹ bala o-juwa kpa ụrụ nya ịlọnụ wo, jaabwọ ká ọlẹng ọlẹ kị wụrụ ịPọlụ wẹẹ gbile iru nya angịnyị lụmẹ-lụmẹ ba ịlọmwụ lẹ. Ọ́ ba e-epweji nya Efesọsị ọlẹ kem kaka. Ma, ọ hi pyịnyẹng ká ẹla ọọwa ka pwụ ẹga myị́ ẹga nya ọpyị nya Echiya ọlẹ wuu lẹ. Chajị, ịPọlụ ọọwa juwa ya ẹla nyamwụ dodehe byi angịnyị yẹkẹẹ, ihye ijiga ịlẹ ká angịnyị ehe nyị kpa ụbwọ nya ịlaa họhọ wuu lẹ, nyị́ ri ihye nya ịlẹhị kpong-kpong kaka. 27Chajị nya ọọwa lẹ, anụ wo mẹ! Ila ọhọhọ onyobyi nya ịPọlụ ọwẹ, á ba o-ri yẹkẹẹ, ụkụrwọ nyahị ahị ọlẹ ka ta ayịreji myị́ gbanggbang kem kaka! Ma, ẹla ọọwa dọmwụ ka họ ká ube nya ojiga ọtụka ịDayana nyahị ka mwọọgịlẹ ri ang ọ-la ẹpẹpẹ ị-ịlahị nya angịnyị ehe lẹ! Ọọwa dọmwụ ka họ ká ụmụmẹ ọlala nya ịDayana ojiga nyahị ọlẹ ká ala Echiya wuu kaa gbịgba ha bala alodehe ịkịla, ka mwọọgịlẹ ri ang o-byi enyi gbanggbang ịnyịnyị myị́ wẹẹ!”
28Ịnyị, ụka ká iru nya angịịwa wuu wo ẹla oyaya nya iDemitiriyọsị ọọwa kpá lẹ, ị juwa wụ ẹjẹ ọtụka-ọtụka jahị da ịPọlụ lẹ, ị yẹkẹẹ, “ịDayana ọla Efesọsị nyahị lẹ, ojiga ọtụka-ọtụka nya ịlẹhị, ọ ri lẹ.” 29Ịnyị, ụka ká ẹla ọọwa pyẹ yịrị epweji ọọwa yịrị wuu lẹ, ọ kpa ojigi-jigi ọtụka-ọtụka weji ụ-ụwa lẹlẹ. Ịnyị, iru nya angịnyị a juwa rụnyẹ kele ka ube nya ọjịra-jịra nya alepweji ọọwa kaka gbile alẹng ịhyẹ ịlẹ kị wụrụ ịGayọsị bala Arisitakọsị bala ala ịMẹsịdoniya ịhyẹ ịlẹ kị ri alogu ẹdịyẹ nya ịPọlụ kpa rụ lẹlẹ. 30Ụka ọọwa, ịPọlụ juwa tịtọ ịnọ, kọ ka kele ka ube nya ọjịra-jịra ọtụka ọọwa ka ẹga nya iru nya angịnyị ịịwa. Ma, angịjụgbẹyị nya Ọngọlahị la ịlụwa, á tị myị ha ịPọlụ kpong-kpong ka. 31Ụka ọọwa, angịhyẹ ịlẹ kị ri alegbeju ịkpẹhị rịrị ọpyị nya ala Echiya ịlụwa, ịlẹ kị ri aligu nya ịPọlụ tịtị du ẹrụ kele kaka byi ịPọlụ ịnyịnyị yẹkẹẹ, ahụ nyị chị ụchụ kwẹnggẹ, kele ka ube nya ọjịra-jịra ọtụka ọọwa ka ẹga nya iru nya angịnyị ịịwa kpong-kpong koo! 32Ụka ọọwa lẹ, alẹpwụ nya ọjịra-jịra ọtụka ọọwa, á la o-wo lawụlẹ kpong-kpong ka. Ụhwahị ọtụka-ọtụka juwa ẹ-ẹpwarịrị nyaa lụmẹ. Angịhyẹ nyaa á juwa ya ẹlẹhẹ, angịkịla nyaa juwa ya ẹla ọkịla. Chajị, iru nya angịnyị lụmẹ-lụmẹ lẹpwụ nyaa á dọmwụ jẹ́ ang odudu kị kele ka ẹpwụ nya ọjịra-jịra ọọwa kpong-kpong ka. 33Ọọwa lẹ, angịhyẹ lẹpwụ nya iru nya angịnyị ịịwa a kpa ọlẹng ọhẹ ọlẹ kị wụrụ Alẹkịsanda kaka godayị rịrị ị-ịlahị nya aluche lẹlẹ. Chajị, Alẹkịsanda ọọwa a ri ọngọlẹ ká ala iJuu ịkịla tụ da ị-ịlahị ẹ-ẹpwụ nya ẹla ọọwa lẹ. Ọọwa lẹ, Alẹkịsanda ọọwa a juwa kpa ụbwọ nyi angịnyị bebebe chajị kọ ka jẹ́-ẹ tịrị ọnụ-ẹla ọọwa ya je aluche lẹlẹ. 34Ma, ụka ká iru nya angịnyị ịịwa jẹ́ yẹkẹẹ, Alẹkịsanda ọọwa nyị ri ala iJuu lẹ, ịwa wuu a juwa kpa omyi ookpokpo ya ẹla dodehe gboo nya ịlẹhị-ịlẹhị yẹkẹẹ, “ỊDayana nyahị ahị ala Efesọsị lẹ, ojiga ọtụka nya ịlẹhị-ịlẹhị, ọ ri lẹ.” I juwa kpa ya ịịwẹ ịnyịnyịịnyị lala awa imiiye lẹpwụ-lẹpwụ.
35Ịnyị, ụka ká ọlẹng ọhẹ ọlẹ kọ ri akịraa ọ-da ụpwụ ọgbahị nya alepweji ọọwa wuu kpụ iru nya angịnyị ịịwa wuu ba kpá lẹ, ọ byaa yẹkẹẹ, “Anụ alepweji nya Efesọsị ee, o-owo a tị́ ri ọngọlẹ kọ jam ẹ-ẹgẹlẹ kọ jẹ́ yẹkẹẹ, ahị alepweji nya Efesọsị ọlẹ kpangga nyaa ri angị la ohe ojiga ọtụka ọlẹ kị wụrụ ịDayana lee Aatemisi lẹ ka? Lee, o-owo a tị́ jẹ́ ang chajị nya ẹjwọ o-ri ịgọgọ ọlẹ kọ chabwọ bwu uhye-ọgba weji e-epweji nya Efesọsị ọlẹ ka ịnyịnyị? 36Chajị nyọlẹ kaanụ ayịdang wuu jéjé ene-ene yẹkẹẹ, ala ịịwa wuu nyị́ ju ịwẹẹ ọdada kpong-kpong kaka lẹlẹ, ọ́ chịla kanụ tụtụm ka juwa họ ọmọnyọ lee ọ-họ ịngịngịhyẹ ẹ-ẹpwụ nya okeke ọchịchị kpong-kpong kaka. 37M ya ịnyị chajị, alẹng ịlẹ kanụ wu kpa warị wẹ ẹpwarịrị nyahị lẹẹ lẹ, í ri angị kpụhị nya ojiga nyahị ka lee o-ya ẹlẹlẹhẹ onyobyi rụ́ ojiga nyahị ọwẹ kpong-kpong ka. 38Chajị nya ọọwa lẹ, ó ri ká iDemitiriyọsị bala angị họ ụkụrwọ nya ụna ịkịla nyamwụ, á la ẹlẹlẹhẹ tụ ọngọngọhẹ pyịpyị lẹpwụ nya angịlẹ lẹ aalẹ, ịkọtụ oleje nyahị jam. Alegbeju ịkpẹhị rịrị ọpyị ịlẹ kị tị kaa la eje jam ịnyịnyị. Chajị nya ọọwa lẹ, iDemitiriyọsị anyị a kele kaka wụrụ alẹla nyaa ịịwa eje kele ka ata nya ala ịkọtụ ọọwa mẹ! 39Ma, ọ́ tị ri, kọ ri ụma nya ẹla ọkịla ọ-gụ ọọwa gụ wẹwẹ ịnyịnyị aalẹ, ẹ-ẹpwarịrị nya alegbeju ileje ịlịkọtụ nyahị pyii, a tị chịla kị ka ya ẹla ọọwa pyii ịnyịnyị lẹlẹ. 40Ó ri ịnyị ka, tụbwọ alẹ, alegbeju ịtụka nya ọpyị nyahị ka la ọngịrị chịhị ẹla u-uhye nya ojigi-jigi ọtụka ọlẹ kọ kpụ eji lẹẹ e-epweji ọlẹ alẹ. Ọ́ tị ri kọ lịnyị tụbwọ alẹ, ahị́ ka ye ẹlẹlẹhẹ ya dodehe myị́ ọlẹ ká eje nya ang ọ-kpụ ọmwụ nya ojigi-jigi ọlẹ ka rụhị myị́ kpong-kpong kaka.” 41Ụka ká olegbeju ọgbahị ọ-da ụpwụ nya ala Efesọsị ọọwa ya ẹlẹwẹ kpá lẹ, ọ tụ ọjịra-jịra nyaa ọọwa ku lẹ, ị rụ bwu ụwa lẹlẹ.
Atualmente selecionado:
ỤKỤRWỌ nya ALẸRỤ 19: IBNO
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Igede Bible © The Bible Society of Nigeria, 2019.