Ifyakutaŋga 6
6
1Popele lomba, ili ŵataticile aŵantu ukufula pacalo capansi, neŵana aŵanakasi nekufyalwa kuli ŵo, 2eli ŵabwene aŵana ŵaŵaLesa aŵalalume ati aŵana ŵaŵantunsi aŵanakasi ŵaweme; popele ŵaliŵopile ŵonse aŵo ŵasalulwile. 3Popele apo ŵaYawe ŵalilaŵile ati: Umupasi wanji tesi ukalwililile neŵantunsi, pakuti naŵo ŵamunefu: naŋgawe' fyo insiku syaŵo sikakumana imyaka umwanda umo nemakumi aŵili. 4ŴaNefili ŵali pacalo capansi insiku isyo, napantanjile napo, ili ŵainjile aŵana ŵaŵaLesa aŵalalume muŵana ŵaŵantunsi aŵanakasi, naŵo nekuŵafyalila aŵana: aŵo ŵopele ŵali ŵantu ŵamakosa aŵakale, aŵantu aŵampupo isikulu.
5Popele ŵaYawe ŵalibwene ati ukuŵifya kwaŵantu kukulu pacalo, nakaŵili ati ifyakwalakanya fyonse ifyakulaŋguluka ukwamumitima yaŵo fyeŋke'fiŵipile insiku syonse. 6Popele ŵaYawe ŵaliumfwile insoni, pakuti ŵalileŋgele aŵantu pacalo capansi, nafyo fyaliwaleŋgele insoni mumutima waŵo. 7Popele ŵaYawe ati: Ŋkonala aŵantu, aŵo naleŋgele, ukuŵafumya pamenso acalo; neŵantu, nenama, nefikalaŵa pansi, nefyuni ifyamwiulu, pakuti ndi nensoni, pakuti nalifileŋgele. 8Sombi Noa walipokele uluse pamenso aŵa Yawe.
9Ifitentekwa fyakwe Noa nififi: Noa wali muntu uluŋgeme, uwaminine pacitentekwa cakwe. Noa ewaendele pamo naŵaLesa. 10Kaŵili Noa walifyele aŵana aŵalalume ŵatatu, Syemi naYamu naYafeti.
11Popele icalo capansi caliŵipile pamenso aŵaLesa, naco icalo calikumene uwuŋgwa, 12Popele ŵaLesa ŵalibwene icalo, lomba caliŵipile; pakuti aŵaminefu ŵonse ŵaliŵifisye insila syaŵo pacalo capansi.
13Popele ŵaLesa ŵalilaŵile kuli Noa ati: Ukupela-ko kwaŵaminefu ŵonse kwamficila pamenso; pakuti icalo cilikumene uwuŋgwa pakuti pali ŵo; popele ŵona, ŋkawonawila kumo necalo, 14Ukaliiŵacile ubwato bwamugofeli; ifipinda ukafiiŵake mubwato; kaŵili ukasiŋge ifinanana mukati napesonde. 15Nakaŵili ukabwiŵake koti nififi: muŵutali bwabwato mukakumane amakubita imyanda itatu, namubwipi namo mukakumane amakubita amakumi asanu, napeulu napo pakakumane amakubita amakumi ata tu. 16Ukacite nekambeluka kubwato, nekukatwala peulu ikubita limo ukukasilisya; kaŵili ukafike nemulyaŋgo uwapabwato mukaŵeya kaŵuŵo; pamo nefitupa necapansi necapakati necapeulu. 17Popele neŵo, ŵona, ndukuleto'ŵuloŵe bwamenda pacalo, mukonala fyonse ifyaminefu, ifili nekupema kwamweo, pansi yeulu; ifintu fyonse ifili pacalo capa nsi fikafwa. 18Sombi ŋkekaliko'kulayana kwanji naweŵo; popele ukeniile mubwato weŵo, neŵana ŵoŵe aŵalalume, nemukasi woŵe, neŵakasi ŵaŵana ŵoŵe pamo naweŵo. 19Popele pafintu fyonse ifilaŵi ifyaminefu yonse, fiŵili ifyamikoka yonse ukenjisye mubwato, mukufilame' filaŵi pamo naweŵo; fikalukuli nefyalalume nefyanakasi. 20Pafyuni koti mikoka yafifyo, napanama koti mikoka yasisyo, napa fintu fyonse ifikalaŵa pansi koti mikoka yafifyo, fiŵili pamikoka yonse fikesa kuli weŵo, mukufilame'filaŵi. 21Popele ukaliŵulile ifyakulya fyonse ifiliwa, nekuliloŋganisisya; popele fikalukuli filyo fyoŵe nefyafifyo.
22Fyopele'fyo efi acitile Noa; koti nifyefyo fyonse ifi ŵamufundile ŵaLesa, koti nifyopele'fyo efi acitile.
Obecnie wybrane:
Ifyakutaŋga 6: AAL59
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Lamba Bible Version © United Bible Societies, 1959.